9 декабря

Канон великомученику Георгию Победоносцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Яко пленных свободитель/ и нищих защититель,/ немощствующих врач,/ православных поборниче,/ победоносче, великомучениче Георгие,/ моли Христа Бога// спастися душам нашим.

Кано́н, гла́с 4.

Пе́снь 1.

Ирмос: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Припев: Великомучениче и победоносче Георгие, моли Бога о нас.

Воспе́ти твоя́ страда́ния ра́зум да́ждь сла́вно, венцено́сче страстоте́рпче Гео́ргие, Царя́ все́х престо́лу предстоя́ све́тло, на́с сохраня́й, пою́щих тя́.

Припев: Великомучениче и победоносче Георгие, моли Бога о нас.

О благоче́стии кре́пце подвиза́вся, великострада́льче Гео́ргие, венце́м сла́вы досто́йно почествова́лся еси́ десни́цею Вседержи́телевою.

Сла́ва Отцу́ и Сы́ну и Свято́му Ду́ху:

Кре́пость даде́ тебе́ Христо́с на по́двиги мно́ги, ви́ды му́к до́блественне и терпели́вно подъя́ти, те́м и победи́л еси́ безбо́жных шата́ния.

И ны́не и при́сно и во ве́ки веко́в. Ами́нь.

Богоро́дичен: Ле́ствица яви́лася еси́ небе́сная, Де́во, Еюже сни́де к на́м Сло́во Бо́жие, Тя́ дре́вле прови́де Иа́ков, пра́отец Тво́й.

Пе́снь 3.

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Великомучениче и победоносче Георгие, моли Бога о нас.

Плотски́й сою́з и сочета́ние твои́х удо́в разруша́шеся, но кре́пость соблюде́ся твоея́ души́ неразруши́ма.

Припев: Великомучениче и победоносче Георгие, моли Бога о нас.

Ярости стремле́ние благомо́щно претерпе́л еси́ зело́ от му́чащих тя́, страстоте́рпче Гео́ргие, терпе́ние до́блественно кре́пко показа́в.

Сла́ва Отцу́ и Сы́ну и Свято́му Ду́ху:

Кто́ возмо́жет твое́ кре́пкое и си́льное и по́мысла неукло́нную му́дрость, Гео́ргие, похвала́ми почестви́ти по достоя́нию, блаже́нне?

И ны́не и при́сно и во ве́ки веко́в. Ами́нь.

Богоро́дичен: Уста́вила еси́ тлю́ сме́рти, я́же во Ипоста́си пло́тию Живота́ ро́ждши, Пречи́стая, челове́ком я́вльшася из чре́ва Твоего́, Пресвята́я.

Седа́лен, гла́с 4. Подо́бен: Ско́ро предвари́.

До́блему страда́льцу и во́ину кре́пкому всецарю́ющаго Христа́ похвале́ния прино́сим: ра́дуйся, му́чеников украше́ние и ле́пота; ра́дуйся, пресве́тлая Це́ркве звездо́, засту́пниче и спаси́телю к тебе́ прибега́ющих, великому́чениче сла́вный Гео́ргие, тя́ пою́щия спаса́й от все́х наве́т вра́жиих и моли́твами твои́ми ко Го́споду Ца́рствия Его́ сподо́би на́с.

Сла́ва, и ны́не, Богоро́дичен:

Де́во Всенепоро́чная, пребога́таго Бо́га ро́ждшая, со страстоте́рпцы Того́ моли́ непреста́нно оставле́ние согреше́ний и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.

Пе́снь 4.

Ирмос: Небеса́ доброде́тель Твоя́ покры́ла е́сть, и земля́ испо́лнися сла́вы Твоея́, Христе́. Те́мже ве́рно вопие́м: сла́ва си́ле Твое́й, Го́споди.

Припев: Великомучениче и победоносче Георгие, моли Бога о нас.

Яростию де́монскою мучи́телие одержи́мии, тя́, любо́вию Бо́жиею содержи́маго, неми́лостивно злоде́и ураня́ху, страстоте́рпче Гео́ргие.

Припев: Великомучениче и победоносче Георгие, моли Бога о нас.

Огня́ сильне́йши изволе́ние стяжа́л еси́, мучи́теля несмы́сльство низложи́в, посрами́л еси́, зовы́й, Гео́ргие: сла́ва си́ле Твое́й, Го́споди.

Припев: Великомучениче и победоносче Георгие, моли Бога о нас.

По Христе́ да́же до сме́рти душе́ю терпели́вно вся́ким му́кам сопроти́вился еси́, велегла́сно вопия́: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Зе́льнейшим изволе́нием, блаже́нне, одержи́мь, пре́лесть, Гео́ргие, попра́л еси́, благода́рно вопия́: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богоро́дичен: Вопло́щся из Де́вы, Безпло́тен Сы́й на зе́млю к челове́ком прии́де. Те́м ве́рою зове́м: сла́ва си́ле Твое́й, Го́споди.

Пе́снь 5

Ирмос: Стяжа́вый ны́, избра́нныя лю́ди, кро́вию Твое́ю, Го́споди, Тво́й ми́р да́ждь на́м, во единомы́слии сохраня́я ста́до Твое́.

Припев: Великомучениче и победоносче Георгие, моли Бога о нас.

Непобеди́мою креста́ си́лою укрепля́емь, вели́кий страда́льче Гео́ргие, возмо́гл еси́ мучи́телево лю́тое победи́ти свире́пство.

Припев: Великомучениче и победоносче Георгие, моли Бога о нас.

Поста́вив се́рдце твое́ велеу́мне на тве́рдем ка́мени ве́ры, Гео́ргие, нахожде́ньми искуше́ний му́к непобеди́мь пребы́л еси́.

Сла́ва Отцу́ и Сы́ну и Свято́му Ду́ху:

Яко небе́снаго Царя́ во́ин, со Ангельскими во́и Тому́ предстоя́, страстоте́рпче Гео́ргие, тебе́ ве́рою призыва́ющия от вся́ких искуше́ний изба́ви.

И ны́не и при́сно и во ве́ки веко́в. Ами́нь.

Богоро́дичен: Избавля́ющи на́с яви́ся от бе́д и прегреше́ний, тлетво́рных страсте́й, и скорбе́й, и обстоя́ний, пою́щия Тя́ ве́рою, Богоро́дице Присноде́во.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Великомучениче и победоносче Георгие, моли Бога о нас.

Преди́вен взо́ром, красе́н те́лом, удобре́н же ду́хом, Гео́ргие, отлучи́лся еси́ к боре́нию злоко́зненнаго, и сего́ разрази́в, побе́ды вене́ц прия́л еси́.

Припев: Великомучениче и победоносче Георгие, моли Бога о нас.

Украша́ются до́брых по́двиг одоле́нием, стра́дальческое зря́ще натрижне́ние, перворожде́нных избра́ние и светоно́сное собо́рище.

Сла́ва Отцу́ и Сы́ну и Свято́му Ду́ху:

Небе́сных блаже́нство восприе́мля, от Го́спода угото́ванных, Гео́ргие страда́льче, и́хже ра́ди на земли́ подвиза́лся еси́ да́же до кро́ве, и побе́дныя по́чести прии́м.

И ны́не и при́сно и во ве́ки веко́в. Ами́нь.

Богоро́дичен: Яко бразда́, чре́во твое́, Чи́стая, яви́ся, пшени́цу принося́щи безсме́ртия, все́х ве́рных ду́ши пита́ющи и му́ченик веселя́щи.

Конда́к, гла́с 2. Подо́бен: Тве́рдыя.

Боже́ственнаго и венцено́снаго великому́ченика Христо́ва Гео́ргия, на враги́ побе́ду взе́мшаго одоле́ния, соше́дшеся ве́рою во освяще́нный хра́м, восхва́лим, его́же благоволи́ Бо́г созда́ти во и́мя его́, Еди́н во святы́х почива́яй.

Икос:

Яко свети́льника незаходи́маго звезда́ показа́ся непреле́стна, Со́лнца Христа́ возвеща́я заря́ми твои́ми, страстоте́рпче Гео́ргие, созыва́еши от первопресто́льнаго ма́тере градо́в, Бо́гом спасе́ннаго Ки́ева, во освяще́нный хра́м христолюби́вая мно́жества облагоде́тельствовати обы́чне, хотя́щия восхвали́ти пе́сньми во гла́се ра́дования и испове́дания, соста́вити пра́здник свяще́ннаго хра́ма: его́же благоволи́ Бо́г созда́ти во и́мя твое́, Еди́н во святы́х почива́яй.

Пе́снь 7.

Ирмос: Оте́ц на́ших Бо́же, не посрами́ на́с, но да́руй на́м со дерзнове́нием вопи́ти Тебе́: благослове́н еси́, Бо́же оте́ц на́ших.

Припев: Великомучениче и победоносче Георгие, моли Бога о нас.

Крепча́йшим ра́зумом пла́мень ле́сти погаси́в, во искуше́нии непобеди́мь бы́л еси́, Гео́ргие, вопия́: оте́ц на́ших Бо́же, благослове́н еси́.

Припев: Великомучениче и победоносче Георгие, моли Бога о нас.

Яко му́ченик и вели́к страда́лец в пресве́тлый Боже́ственный черто́г вше́л еси́, Христо́в уго́дниче, вопия́: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Ви́дети сподо́бился еси́, Гео́ргие, та́мо блаже́нства и наслажде́ния ве́чных святы́х све́тлостей, апо́стол, и проро́к, и му́ченик, иера́рхов и все́х пра́ведных.

И ны́не и при́сно и во ве́ки веко́в. Ами́нь.

Богоро́дичен: Яви́лася еси́ все́м челове́ком, чи́стая Ма́ти Бо́жия, держа́ва ве́лия, и покро́в, и заступле́ние, Тя́ пою́щим всегда́ свяще́нными пе́сньми.

Пе́снь 8.

Ирмос: Вся́ дела́ Бо́жия и вся́ тва́рь, благослови́те Го́спода, я́ко челове́ком от земли́ возсия́ Све́т, и вселе́нную всю́ просвети́, и жи́знь ве́чную ми́ру дарова́, по́йте, лю́дие, и превозноси́те Его́ во ве́ки.

Припев: Великомучениче и победоносче Георгие, моли Бога о нас.

Низложи́в вся́ вра́жия ору́жия, великому́чениче Гео́ргие, попра́л еси́ и́дольскую ле́сть, зовы́й: по́йте, лю́дие, и превозноси́те Христа́ Бо́га во ве́ки.

Припев: Великомучениче и победоносче Георгие, моли Бога о нас.

Укра́шен зело́ благоле́пно, Христу́ предстоя́, страда́льче приснопа́мятне Гео́ргие, от крове́й твои́х му́ченических очервле́ну багряни́цу нося́, ве́село пое́ши: лю́дие, превозноси́те Его́ во ве́ки.

Припев: Великомучениче и победоносче Георгие, моли Бога о нас.

По́чести тебе́ Христо́с подаде́, Гео́ргие, во страда́ниях твои́х, испове́дал бо еси́ Того́ велегла́сно, свиде́тельствуя, и зовы́й: по́йте, лю́дие, и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Ны́не предстои́ши живонача́льныя Све́ту Тро́ицы, Боже́ственными сия́нии, Гео́ргие, просвеща́емь, помина́й на́с, ве́рою честву́ющия тя́ и превознося́щия Христа́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Законода́вца родила́ еси́, Христа́, зако́нно страда́вшаго венча́вша страстоте́рпца и му́ченика, Его́же моли́ зако́ном греха́ побежде́на мя́, Отрокови́це, исцели́ти.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Великомучениче и победоносче Георгие, моли Бога о нас.

Зако́нными повеле́нии побежда́ется по́двиг твои́х, Гео́ргие, велича́вый, еди́н бо Влады́ка Христо́с просла́ви тя́. Его́же моли́ о на́с, страстоте́рпче, любо́вию пою́щих тя́.

Припев: Великомучениче и победоносче Георгие, моли Бога о нас.

Красе́н вои́стинну душе́ю и те́лом ве́сь, сла́вне Гео́ргие, ны́не предстои́ши Царю́ царе́й все́х красоте́, при́сно прича́стии удобря́емь всекра́сных, всече́стне, наслажде́ний.

Припев: Великомучениче и победоносче Георгие, моли Бога о нас.

Твою́, Царю́ Христе́, любо́вь Гео́ргий подража́в кро́вию да́же до сме́рти, мечу́, огню́ же и му́кам боже́ственный страда́лец сопроти́влься, и е́же от Тебе́, Человеколю́бче, безсме́ртие прии́м, наслажда́ется.

Припев: Великомучениче и победоносче Георгие, моли Бога о нас.

Всего́ себе́ же́ртву прине́сл еси́ Христу́, и Того́ Ца́рствия насле́дник яви́лся еси́ и прича́стник, и при́сно с ли́ки святы́х ра́дуяся, ны́не ве́чно ца́рствуеши, страстоте́рпче Гео́ргие.

Сла́ва Отцу́ и Сы́ну и Свято́му Ду́ху:

Ве́рою страда́ния твоя́, Гео́ргие, о на́с, честву́ющих, Христа́ моли́, страстоте́рпче, приле́жно, спасти́ся на́м бе́д треволне́ния и все́х страсте́й, и до́бре прейти́ житие́, и Боже́ственное блаже́нство улучи́ти.

И ны́не и при́сно и во ве́ки веко́в. Ами́нь.

Богоро́дичен: Обле́кся из Тебе́ Ца́рь в теле́сную багряни́цу, про́йде ве́сь красе́н из утро́бы Твоея́, и вся́ враги́ победи́, и побе́ду страда́льцем подаде́, еди́на Присноде́во Ма́ти.

Свети́лен. Подо́бен: Све́те неизме́нный.

Яко светоза́рное со́лнце, чуде́с луча́ми осия́еши всю́ тва́рь, пресла́вне Гео́ргие страстоте́рпче, твою́ пра́зднующе па́мять, про́сим от вся́ких бе́д изба́витися.

Молитва великомученику Георгию

Святый, славный и всехвальный великомучениче Георгие! Собраннии в храме твоем и пред иконою твоею святою покланяющиися людие, молим тя, известный желания нашего ходатаю, моли с нами и о нас умоляемаго от Своего благоутробия Бога, да милостивно услышит нас, просящих Его благостыню, и не оставит вся наша ко спасению и житию нуждная прошения, и дарует стране нашей победу на сопротивныя; и паки, припадающе, молим тя, святый победоносче: укрепи данною тебе благодатию во бранех православное воинство, разруши силы востающих врагов, да постыдятся и посрамятся, и дерзость их да сокрушится, и да уведят, яко мы имеем Божественную помощь, и всем, в скорби и обстоянии сущим, многомощное яви свое заступление. Умоли Господа Бога, всея твари Создателя, избавити нас от вечнаго мучения, да прославляем Отца, и Сына, и Святаго Духа и твое исповедуем предстательство ныне, и присно, и во веки веков. Аминь.