9 декабря

Канон преподобному Алипию Столпнику

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Терпе́ния сто́лп бы́л еси́, ревнова́вый пра́отцем, преподо́бне, Иову во страсте́х, Ио́сифу во искуше́ниих, и безпло́тных жи́тельству сы́й в телеси́, Али́пие о́тче на́ш, моли́ Христа́ Бо́га спасти́ся душа́м на́шим.

Канон преподо́бнаго. Гла́с 5.

Пе́снь 1.

Ирмос: Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Припев: Преподобне отче Алипие, моли Бога о нас.

Благода́тию испо́лнен, ра́дости мою́ испо́лни ду́шу, похвали́ти житие́ твое́, Али́пие, и жи́тельство, и́миже вся́ Ангелы возвесели́л еси́, подвиза́вся.

Припев: Преподобне отче Алипие, моли Бога о нас.

Яко друга́го тя́ Самуи́ла Бо́г освяти́ из ма́терняго чре́ва, Али́пие блаже́нне, и зре́ти пре́дняя я́ко проро́ка Боже́ственна соде́я тя́, достосла́вне.

Сла́ва Отцу́ и Сы́ну и Свято́му Ду́ху:

Яко да Бо́г яви́т твою́ све́тлость, ю́же напосле́док име́л еси́, до́бре подвиза́вся, све́та Боже́ственнаго испо́лни, тебе́ ро́ждшуся, преподо́бне, хра́мину па́че ума́.

И ны́не и при́сно и во ве́ки веко́в. Ами́нь.

Богоро́дичен: Рече́ние проро́ка честна́го коне́ц прия́т: се́ бо Де́ва пло́тию Бо́га роди́, челове́ки воззи́ждуща, сокруше́нныя пре́жде грехми́ и прегреше́нии.

Пе́снь 3.

Ирмос: Водрузи́вый на ничесо́мже зе́млю повеле́нием Твои́м, и пове́сивши неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Припев: Преподобне отче Алипие, моли Бога о нас.

Яко свети́льник на све́щнице, дея́ния лу́чшаго возложе́н, светоза́рными твои́ми, о́тче, доброде́тельми вся́ку ду́шу, ве́рно к тебе́ приходя́щую, благочестному́дренно просвети́л еси́, тмы́ греха́ избавля́я.

Припев: Преподобне отче Алипие, моли Бога о нас.

Ума́ твоего́ свяще́нная движе́ния творя́ к соблюде́нию Боже́ственных зако́нов Ду́ха, Ангел яви́лся еси́ на земли́, Ангельское жи́тельство с пло́тию восприе́м, о́тче богоно́се Али́пие.

Сла́ва Отцу́ и Сы́ну и Свято́му Ду́ху:

Разу́мно пли́щей жите́йских, Али́пие, отше́льник яви́лся еси́ и приступи́л еси́ к три́знам по́стническаго пребыва́ния усе́рдно, твое́ се́рдце жили́ще явля́я Ду́ха, преподо́бне.

И ны́не и при́сно и во ве́ки веко́в. Ами́нь.

Богоро́дичен: Де́во Чи́стая, Сло́ва пала́та, ду́шу мою́ покажи́ до́м Ду́ха и водо́ю исто́чника живонача́льнаго напо́й мя́, зно́ем греха́ пали́маго, я́ко да по до́лгу сла́влю Тя́.

Седа́лен, гла́с 4. Подо́бен: Ско́ро предвари́.

Све́тлостию ве́ры и де́тельным све́том яви́лся еси́ равноа́нгелен на земли́ вои́стинну, Али́пие преподо́бне, показа́л еси́ му́жественно кре́пкое ра́зума твоего́, победи́в ополче́ния стра́стная посто́м. Те́мже и по кончи́не, я́ко жи́в сы́й, моли́ спасти́ся на́м.

Сла́ва, и ны́не, Богоро́дичен:

Де́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ние прегреше́ний и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.

Пе́снь 4.

Ирмос: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Припев: Преподобне отче Алипие, моли Бога о нас.

Любо́вь и́стинную и милосе́рдие, ве́ру и наде́жду тве́рду и жи́тельство нельсти́вое прие́мь, о́тче, уго́дник Христо́в бы́л еси́.

Припев: Преподобне отче Алипие, моли Бога о нас.

Стоя́ на столпе́, непрекло́нен проти́вными прило́ги, де́монов по́лк победи́л еси́ и коле́блемым бы́л еси́, всеблаже́нне, незы́бленное утвержде́ние.

Припев: Преподобне отче Алипие, моли Бога о нас.

Во́д Боже́ственных испо́лнен бы́в, и ороси́л еси́ ду́ши, иста́явшия зно́ем лю́таго греха́, Али́пие богому́дре, всебога́те.

Сла́ва Отцу́ и Сы́ну и Свято́му Ду́ху:

Яви́лся еси́ стра́шен и непристу́пен де́моном все́м вои́стинну, ураня́я сия́ ра́ною свяще́нных твои́х моли́тв и дале́че отгоня́я, Али́пие.

И ны́не и при́сно и во ве́ки веко́в. Ами́нь. Богоро́дичен: Стра́сти души́ моея́ исцели́ и просвети́ у́м и се́рдце мое́, Влады́чице, Светода́теля ро́ждши Христа́, преблага́го Бо́га.

Пе́снь 5

Ирмос: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Припев: Преподобне отче Алипие, моли Бога о нас.

Ве́сь возложи́вся Вседержи́телю, ле́тным стоя́нием без покро́ва, о́тче, дожде́м и зно́ем зе́льно стражда́, усе́рдно претерпе́л еси́.

Припев: Преподобне отче Алипие, моли Бога о нас.

В пе́снех и мольба́х упраждня́яся, преподо́бне, Трисо́лнечныя Зари́ благода́ть ума́ чистото́ю прия́л еси́ и све́т целе́ний возблиста́л еси́.

Сла́ва Отцу́ и Сы́ну и Свято́му Ду́ху:

Те́ло твое́ на столпе́ огради́в, умо́м ше́ствовати невозбра́нно к тебе́ Жела́емому, о́тче, попусти́л еси́, све́та исполня́емь.

И ны́не и при́сно и во ве́ки веко́в. Ами́нь.

Богоро́дичен: Свята́го родила́ еси́ Бо́га, бы́вша Челове́ка за милосе́рдие, Свята́я Отрокови́це, освяща́ющаго и́же Того́ ве́рою и стра́хом освяща́ющия.

Пе́снь 6.

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя, я́ко Благоутро́бен.

Припев: Преподобне отче Алипие, моли Бога о нас.

Ка́мением тя́ ду́си зло́бы бию́ще я́ве, творя́ща стоя́ние на столпе́, я́ко тве́рдаго ка́мене, ника́коже поколеба́ша.

Припев: Преподобне отче Алипие, моли Бога о нас.

Терпя́, преподо́бне, претерпе́л еси́, терпе́ние тебе́ и́стинное Го́споду дарова́вшу и от все́х неудо́бных тя́ изба́вившу.

Сла́ва Отцу́ и Сы́ну и Свято́му Ду́ху:

Пресла́вно, преподо́бне, све́т ви́ден бы́сть вы́ше столпа́, на вся́к де́нь просвеща́ющь твоя́, чудотво́рче, душе́вная чу́вства.

И ны́не и при́сно и во ве́ки веко́в. Ами́нь.

Богоро́дичен: Кре́пко Тя́ утеше́ние су́щии в ско́рби, и прибе́жище, и изве́стное вси́ и́мамы заступле́ние, Богоро́дице: спаси́ от бе́д рабы́ Твоя́.

Конда́к, гла́с 8. Подо́бен: Яко нача́тки.

Яко доброде́телей вину́ и по́стников удобре́ние, Це́рковь сла́вит тя́ дне́сь и воспева́ет, Али́пие: моли́твами твои́ми пода́ждь чту́щим любо́вию до́блести твоя́ и боре́ния лю́тых прегреше́ний избавле́ние, я́ко тезоимени́тый.

Икос:

Али́пиеву житию́ боже́ственному и равноа́нгельному, прииди́те, почуди́мся, свяще́нницы, ца́рие, и кня́зи, и мона́шествующии, и вси́ лю́дие богому́дрии, и подража́им дея́ния его́, да и того́ ча́сти сподо́бимся мольба́ми его́, празднолю́бцы, и́бо то́й небе́сную пе́снь пое́т безпеча́льно Бо́гу, я́ко тезоимени́тый.

Пе́снь 7.

Ирмос: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Припев: Преподобне отче Алипие, моли Бога о нас.

Терпели́вейший и кре́пкий Али́пий, ле́ты мно́гими зимо́ю дручи́мь, Ду́ха теплото́ю гре́яшеся пресла́вно.

Припев: Преподобне отче Алипие, моли Бога о нас.

К высоте́ небе́сней име́я жи́тельство, о телеси́ небре́гл еси́, я́ко растле́тися иму́щем, и тому́, согнива́ему, неради́л еси́ о боле́знех.

Сла́ва Отцу́ и Сы́ну и Свято́му Ду́ху:

Вся́каго сладостра́стия, о́тче, отве́ргся, с зимо́ю и ва́ром боря́ся, пострада́л еси́, безпокро́вен, поя́: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Непостижи́мый пло́ть прия́т, у́мну же и одушевле́нну, из Тебе́, Присноде́во, е́же спасти́ пою́щия: Бо́же, благослове́н еси́.

Пе́снь 8.

Ирмос: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

Припев: Преподобне отче Алипие, моли Бога о нас.

Но́вый Самуи́л, предзря́ бу́дущее ума́ чистото́ю, яви́лся еси́, Али́пие, все́м предглаго́ля, я́ко Бо́жий проро́к, от Го́спода явля́емая тебе́, о́тче.

Припев: Преподобне отче Алипие, моли Бога о нас.

Светови́дный Це́ркве сто́лп, забра́ло незы́бленное, стена́ неруши́мая все́х челове́ков, Бо́гу ве́ровавших, Христо́в уго́дник Али́пий да почти́тся.

Сла́ва Отцу́ и Сы́ну и Свято́му Ду́ху:

Усну́л еси́ до́бре сно́м пра́ведным, о́тче, все́м до́лжным, успи́в пре́жде стра́сти многообра́зныя мольба́ми и бде́нии. Те́мже, неусы́пна тя́ предста́теля иму́ще ны́не, обогати́хомся.

И ны́не и при́сно и во ве́ки веко́в. Ами́нь.

Богоро́дичен: Твое́ Рождество́ роди́вшийся гре́х зло́бою змии́ною обезпло́дстви ны́не, еди́на кля́твы потреби́тельница, Де́во. Те́мже Тя́ чти́м во вся́ ве́ки.

Песнь 9

Ирмос: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.

Припев: Преподобне отче Алипие, моли Бога о нас.

Свяще́нное житие́ твое́ от пеле́н яви́ся Христу́, сия́я доброде́тельным све́том, блаже́нне, честна́ же твоя́ сме́рть пред Бо́гом бы́сть, о́тче Али́пие, мона́шествующих нача́льниче.

Припев: Преподобне отче Алипие, моли Бога о нас.

Яко свети́ло пресве́тлое, просвеща́еши всю́ зе́млю, отгоня́ лука́выя стра́сти, и разреша́я тму́ грехо́вную, и просвеща́я Боже́ственными светлостьми́ исцеле́ний пою́щия тя́.

Припев: Преподобне отче Алипие, моли Бога о нас.

Стоя́ние на столпе́ сотвори́л еси́ ле́та, му́дре, пятьдеся́т к тре́м, я́ко страда́лец стражда́ усе́рднейше, и зимо́ю, и мра́зом, и зно́ем, о́тче, неосла́бно дручи́мь.

Сла́ва Отцу́ и Сы́ну и Свято́му Ду́ху:

Свята́я твоя́ па́мять Ду́хом Святы́м на́с освяща́ет, му́дре, сию́ свяще́нно соверша́ющия и ве́рою тя́ воспева́ющия, о́тче, в не́й я́ко засту́пника и предста́теля ду́ш на́ших.

И ны́не и при́сно и во ве́ки веко́в. Ами́нь.

Богоро́дичен: Просвеще́ние мне́ да́руй, во тме́ су́щу страсте́й, окая́нному и гре́шному, и изба́ви мя́ лука́вых де́л и пла́мене, предлежа́щаго ми́, Пречи́стая Влады́чице, Предста́тельнице пою́щих Тя́.

Свети́лен. Подо́бен: Жены́, услы́шите.

По́двиги па́че челове́ка проше́л еси́, о́тче преподо́бне, Христо́вою си́лою: пятьдеся́т бо к тре́м ле́том на столпе́ стоя́л еси́, му́дре Али́пие, отвсю́ду дручи́мь, и ны́не коне́чное, блаже́нне, благи́х все́х обре́л еси́.

Богоро́дичен:

Ты́ моя́ предста́тельница, Чи́стая, и тве́рдое прибе́жище, Ты́ моя́ засту́пница и покро́в, и, к Тебе́ припа́дая, зову́: боле́зней мои́х изба́ви мя́, я́ко все́х преиму́щи, и огня́ мя́ исхити́ ве́чнующаго, Де́во, на Тя́ упова́ющаго.

Молитва

О свяще́нная главо́, преподо́бне о́тче, преблаже́нне а́вво Али́пие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.