8 декабря

Канон священномученика Петра Александрийскаго

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Кано́н свята́го Петра́. Гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Священномучениче Петре, моли Бога о нас.

Во светле́йших селе́ниих житие́ име́я, просвеще́ние ми́ пода́ждь моли́твами твои́ми, Пе́тре всеблаже́нне.

Припев: Священномучениче Петре, моли Бога о нас.

Зна́нию науче́н и свяще́нством украша́емь, всеблаже́нне Пе́тре, Христу́ прине́слся еси́ кро́вию.

Сла́ва Отцу́ и Сы́ну и Свято́му Ду́ху:

Утварь упещре́нная, я́коже многоце́нное возложе́ние, Христо́ве Це́ркви от Бо́га дарова́лся еси́, блаже́нне.

И ны́не и при́сно и во ве́ки веко́в. Ами́нь.

Богоро́дичен: Пречи́стая Богоро́дице, воплоще́нное, Присносу́щное и Пребоже́ственное Сло́во па́че естества́ ро́ждшую, пое́м Тя́.

Пе́снь 3.

Ирмос: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че, Тебе́, Го́споди.

Припев: Священномучениче Петре, моли Бога о нас.

Возше́л еси́, е́здя, я́ко на колесни́це, твое́ю кро́вию, прему́дре, к небе́сным, иде́же Предте́ча на́ш Христо́с вни́де, еди́н безгре́шный.

Припев: Священномучениче Петре, моли Бога о нас.

Жи́знь тле́нную оста́вил еси́ и жи́знь безсме́ртную обре́л еси́, блаже́нне, иде́же венцено́сец лику́еши, моля́ спасти́ся душа́м на́шим.

Сла́ва Отцу́ и Сы́ну и Свято́му Ду́ху:

Якоже фи́никс процве́л еси́ благопло́днейший, я́ко ма́слина плодоро́дна яви́лся еси́, богодохнове́нне, во дво́рех Госпо́дних, я́ко сми́рна и лива́н и я́ко миро благово́ннейшее.

И ны́не и при́сно и во ве́ки веко́в. Ами́нь.

Богоро́дичен: Яко две́ри спаси́тельныя и ра́й кра́сный, Све́та присносу́щнаго о́блак, су́щу Святу́ю Де́ву воспое́м вси́, глаго́люще Ей: ра́дуйся.

Седален  Петра́, гла́с 8. Подо́бен: Прему́дрости.

От вы́шняго суда́ Христо́ва предста́тельствова ста́ду, на па́житех благожи́зненных упа́сл еси́ всему́дрыми твои́ми догма́ты, отгна́в Ария, я́ко во́лка некро́ткаго, вше́дшаго в ни́х безбо́жными уче́нии. Те́мже и ду́шу твою́ положи́л еси́ за ни́х, па́стырь наре́клся еси́, я́ко рече́ Госпо́дь, иера́рше Пе́тре блаже́нне, моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Пе́снь 4.

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Припев: Священномучениче Петре, моли Бога о нас.

Доброде́телей ше́ствовав стезе́ю, о́тче, пости́гл еси́ оби́тели вы́шния, богоно́сне, свяще́нства пома́занием укра́шен и муче́ния сия́я кро́вию.

Припев: Священномучениче Петре, моли Бога о нас.

Ту́чами пото́ков твои́х крове́й, блаже́нне, угаси́л еси́ пе́щь пре́лести и гоня́щих погуби́л еси́ мра́к, священному́чениче достосла́вне.

Сла́ва Отцу́ и Сы́ну и Свято́му Ду́ху:

Но́вый Пе́тр не́кий на́м яви́лся еси́, и́стинно апо́стольскими сия́я дарова́нии, священноде́тель же и свиде́тель страсте́й Влады́ки твоего́, всебога́те.

И ны́не и при́сно и во ве́ки веко́в. Ами́нь.

Богоро́дичен: Все́х до́брых исполне́ние ро́ждши, испо́лни на́ша, Де́во, моле́ния, грехо́в на́м избавле́ния прося́щи, и просвеще́ния, и ве́лия ми́лости.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Священномучениче Петре, моли Бога о нас.

На ка́мень возше́д ве́ры, страстоте́рпче, неукло́нен пребы́л еси́ во искуше́нии сопроти́вных.

Припев: Священномучениче Петре, моли Бога о нас.

Ору́жием пла́менным Ду́ха Свята́го, иера́рше, Ария вредосло́вца Боже́ственным судо́м закла́л еси́.

Сла́ва Отцу́ и Сы́ну и Свято́му Ду́ху:

Кре́постию укрепля́емь, сла́вне, Спа́совою, вра́жию си́лу и кре́пость попра́л еси́.

И ны́не и при́сно и во ве́ки веко́в. Ами́нь.

Богородичен: Деву по рождестве, поем Тя, Богородице, Ты бо Бога Слова плотию миру родила еси.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Священномучениче Петре, моли Бога о нас.

Целому́дренно и пра́ведно Бо́гу ты́ жи́тельствовав, коне́ц блаже́нный от Него́ прия́л еси́, всеблаже́нне Пе́тре.

Припев: Священномучениче Петре, моли Бога о нас.

Всесоверше́нную же́ртву и прия́тну, тебе́ сама́го прине́сл еси́, Пе́тре ди́вный, же́ртва тебе́ ра́ди бы́вшему Бо́гу.

Сла́ва Отцу́ и Сы́ну и Свято́му Ду́ху:

Слове́с духо́вных испо́лнився, Ду́хом дви́жимь орга́н бы́л еси́, песнопоя́, богоглаго́ливе, неизрече́нная.

И ны́не и при́сно и во ве́ки веко́в. Ами́нь.

Богоро́дичен: Еди́на сло́вом пло́тию Сло́во ро́ждшая, изба́ви, мо́лимся, сете́й вра́жиих ду́ши на́ша.

Конда́к, гла́с 4. Подо́бен: Яви́лся еси́ дне́сь.

Це́ркве недви́жимии и боже́ственнии пи́ргове, благоче́стия боже́ственнии столпи́ вои́стинну кре́пцыи, Кли́менте с Петро́м всехва́льнии, ва́шими моли́твами соблюди́те вся́.

Пе́снь 7.

Ирмос: Отроцы богочести́вии в Вавило́не, о́бразу злато́му не поклони́шася, но посреде́ пе́щи о́гненныя, ороша́еми, пе́снь воспева́ху, глаго́люще: превозноси́мый отце́в и на́ш Бо́же, благослове́н еси́.

Припев: Священномучениче Петре, моли Бога о нас.

Житие́м боголе́пным укра́шен и боже́ственным све́том просвеща́емь, небе́сных в нехо́дная вше́л еси́, веселя́ся и вопия́, му́дре, Сотво́ршему: благослове́н Бо́г оте́ц на́ших.

Припев: Священномучениче Петре, моли Бога о нас.

Яко да пресве́тло благоугоди́ши Христу́ Бо́гу, богоблаже́нне, в ру́ки беззако́нных тя́ сама́го пре́дал еси́ во́лею, поя́, пребога́те: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Ве́сь просвеще́н, сподо́бился еси́ ви́дети Христа́, тебе́ показу́юща свою́ ри́зу, лю́те расте́рзану, истка́нную свы́ше, преподо́бне, — благослове́н еси́, — вопия́, — Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Вся́, я́ко чиста́, прия́ла еси́ во утро́бе Твое́й Сло́во воплоща́емо, но Того́ моли́ очи́стити ми́ прегреше́ний ду́шу и те́ло, Пречи́стая, к Тебе́ чи́стою ве́рою прири́щущаго.

Пе́снь 8.

Ирмос: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Припев: Священномучениче Петре, моли Бога о нас.

Жиру́ющую соску́тал еси́ па́губу Ариева зле́йшаго хуле́ния, от ве́рных собо́рища отсе́к и отгна́в церко́вных, богому́дре, огра́д.

Припев: Священномучениче Петре, моли Бога о нас.

Первостоя́тель ли́ка Ангельскаго Пе́тр яви́ся, боже́ственный верхо́вник, сто́лп же му́чеников бы́л еси́, всему́дре Пе́тре богоно́се, и священноде́йствитель Боже́ственных та́инств.

Сла́ва Отцу́ и Сы́ну и Свято́му Ду́ху:

Научи́вся от Боже́ственнаго вдохнове́ния бу́дущих ра́зуму, богоглаго́ливе, и е́же от земли́ проуве́дев твое́ преставле́ние муче́нием, к вы́шних Го́споду сла́вы Христу́ во ве́ки вся́.

И ны́не и при́сно и во ве́ки веко́в. Ами́нь.

Богоро́дичен: Во утро́бу Де́вы все́льшагося и от Нея́ стра́шно и па́че сло́ва дре́вняго Ада́ма обно́вльшаго, Го́спода по́йте и превозноси́те во вся́ ве́ки.

Песнь 9

Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Припев: Священномучениче Петре, моли Бога о нас.

Предопределе́ннаго свяще́нно иера́ршествовати, и свяще́нства коне́ц благосла́вно прии́мша, и Христо́ву подража́вша стра́сть, Петра́ чу́днаго воспои́м.

Припев: Священномучениче Петре, моли Бога о нас.

Жезло́м укре́пльшася си́лы Госпо́дни, и свяще́нствовавша, и свяще́нствованна, и Христу́ прине́сшагося же́ртва, Петра́ богоно́снаго воспои́м.

Припев: Священномучениче Петре, моли Бога о нас.

Всесмеше́ннаго заре́ю Тро́ичною, и светле́йшаго ея́ насла́ждшася сия́ния, и на́м спасе́ния прося́ща, Петра́ богоприя́тнаго воспои́м.

Сла́ва Отцу́ и Сы́ну и Свято́му Ду́ху:

Дае́ши оби́льно души́ мое́й спасе́ние, я́ко первосвяще́нник бо и́маши вла́сть вяза́ти и реши́ти прегреше́ний вины́, твои́ми моле́нии, свяще́ннейший.

И ны́не и при́сно и во ве́ки веко́в. Ами́нь.

Богоро́дичен: Ты́ еси́, Богоро́дице, ору́жие на́ше и стена́, Ты́ еси́ заступле́ние к Тебе́ прибега́ющих, Тебе́ и ны́не на моли́тву подвиза́ем, да изба́вимся от вра́г на́ших.

Молитва

О святы́й уго́дниче Бо́жий, священному́чениче Петре! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.