7 декабря
Канон святому великомученику Меркурию
![Святаго великомученика Меркурия Святаго великомученика Меркурия](img_i/022.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь му́ченика, гла́с 4
Му́ченик Тво́й, Го́споди, Мерку́рий во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.
Кано́н му́ченика, гла́с 8.
Пе́снь 1.
Ирмос: Посе́ченый несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль. Пе́снь же воспева́шеся: Го́сподеви пои́м, сла́вно бо просла́вися.
Припев: Святый великомучениче Меркурие, моли Бога о нас.
С го́рними ли́ки, Мерку́рие, благи́х исто́чнику, ра́дуяся, предстоя́, и Боже́ственныя сла́дости, приснопа́мятне, исполня́яся, любо́вию торжество́ твое́ соверша́ющия сохраня́й, Го́споду пою́щия: сла́вно бо просла́вися.
Припев: Святый великомучениче Меркурие, моли Бога о нас.
Во́льно вше́л еси́ в три́знище муче́ния, му́дре, си́лою укрепля́емь Христо́вою, на́с ра́ди стра́сти спаси́тельныя во́лею претерпе́вшаго пло́тию, и, ра́дуяся, взыва́л еси́: Го́споду пои́м, сла́вно бо просла́вися.
Сла́ва Отцу́ и Сы́ну и Свято́му Ду́ху:
Глаго́л мучи́теля я́ве укори́л еси́, испове́данием Христо́вым, блаже́нне, украша́емь, и вся́кий боле́зней ви́д, веселя́ся, претерпе́л еси́, Мерку́рие, вопия́ тебе́ Укре́пльшему: Го́споду пои́м, сла́вно бо просла́вися.
И ны́не и при́сно и во ве́ки веко́в. Ами́нь.
Богоро́дичен: От Отрокови́цы Де́вы яви́лся еси́, воплоща́емь на́с ра́ди, по на́м Челове́к бы́в, и свиде́теля ве́рна страсте́й Свои́х явля́ет, Мерку́рия, до́бляго Своего́ страда́льца, Тому́ кре́пко пою́ща: Го́споду пои́м, сла́вно бо просла́вися.
Пе́снь 3.
Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.
Припев: Святый великомучениче Меркурие, моли Бога о нас.
Ве́сь разжига́емь Боже́ственною любо́вию, сла́вне, о́гнь и ю́зы, мечи́ и му́ки, я́коже со́н, вмени́л еси́, Мерку́рие.
Припев: Святый великомучениче Меркурие, моли Бога о нас.
Воспева́л еси́ Сотво́ршаго, примеша́яся лю́тым ра́нам, му́чениче му́дре, и исцеле́ния я́зв приима́л еси́, сла́вне.
Сла́ва Отцу́ и Сы́ну и Свято́му Ду́ху:
Жезло́м укрепля́емь боже́ственным, вра́жие свире́пство, я́ко страда́лец, му́чениче доблему́дренне, благомо́щно смири́л еси́.
И ны́не и при́сно и во ве́ки веко́в. Ами́нь.
Богоро́дичен: Яко да прообрази́т Твое́ па́че ума́, Чи́стая, рождество́, купина́ яви́ся, огне́м пали́ма, и ника́коже сгара́ющи.
Седа́лен му́ченика, гла́с 4. Подо́бен: Ско́ро предвари́.
Му́ченик Мерку́рий, подвиза́вся, льсти́ваго посрами́ и вене́чник кре́пок Христо́в бы́сть: те́мже небе́сным ны́не причте́ся лико́м, сла́вы неприе́мныя досто́йно причаща́яся. Сего́ ра́ди свяще́нную его́ па́мять соверша́ем ве́рно.
Пе́снь 4.
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Припев: Святый великомучениче Меркурие, моли Бога о нас.
Присво́ился еси́ Зижди́телю твоему́ боже́ственнаго свиде́тельства, богому́дре, страстьми́ и све́тлыя венцы́ от Него́ прия́л еси́, сла́вне, я́ко непобеди́мый.
Припев: Святый великомучениче Меркурие, моли Бога о нас.
Истка́нную от вы́шния благода́ти в ри́зу, му́чениче, ны́не оде́ялся еси́, тли́ и ме́ртвости ри́з, му́чениче, совле́кся.
Сла́ва Отцу́ и Сы́ну и Свято́му Ду́ху:
Да́же до кро́ве, сла́вне, ко греху́ подвиза́вся, победоно́сец показа́лся еси́ и вы́шния сла́вы сподо́бился еси́, Мерку́рие.
И ны́не и при́сно и во ве́ки веко́в. Ами́нь.
Богоро́дичен: На Тя́ спаси́тельное Сло́во сни́де, Присноде́во, я́коже ту́ча, и изсуши́ многобо́жия наводне́ния.
Пе́снь 5
Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.
Припев: Святый великомучениче Меркурие, моли Бога о нас.
Растяга́емь и острото́ю, Мерку́рие, неосла́бно разсека́емь, терпе́л еси́, Боже́ственными наде́ждами вжиля́емь.
Припев: Святый великомучениче Меркурие, моли Бога о нас.
Ка́менем мы́сленным укрепи́в твое́ се́рдце, ка́менем отягча́емь, не преврати́лся еси́, Мерку́рие сла́вне.
Сла́ва Отцу́ и Сы́ну и Свято́му Ду́ху:
Соприча́стник страсте́й Влады́ки твоего́ бы́в, сла́вы приобщи́лся еси́ Того́ и Боже́ственныя све́тлости.
И ны́не и при́сно и во ве́ки веко́в. Ами́нь.
Богоро́дичен: Умертви́, Де́во, живу́щий мо́й гре́х, Жи́знь ро́ждшая, умертви́вшую сме́рть.
Пе́снь 6.
Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.
Припев: Святый великомучениче Меркурие, моли Бога о нас.
Вжиля́ше тя́ присносу́щное Сло́во, за Него́ вся́к ви́д му́к, му́чениче му́дре, терпя́ща тя́ ви́дя, и чрез Ангела дерза́ти повелева́ше, Мерку́рие, и ника́коже мучи́телей устраши́тися противле́ния.
Припев: Святый великомучениче Меркурие, моли Бога о нас.
Умертви́ся многообра́зный зми́й и нога́ми попра́ся кра́сными страда́льца и до́бляго ору́жника, самово́льными бо стремле́нии вше́д к муче́ния ра́нам, сме́рти, сла́вы испо́лнен.
Сла́ва Отцу́ и Сы́ну и Свято́му Ду́ху:
Всесоверше́нно Влады́це прине́сл еси́ серде́чное произволе́ние, му́чениче, и Того́ ра́ди претерпе́в сломле́ния, я́ко победи́тель от Него́ венча́лся еси́, и Тому́ ны́не на небесе́х со все́ми му́ченики предстои́ши, Мерку́рие.
И ны́не и при́сно и во ве́ки веко́в. Ами́нь.
Богоро́дичен: Зачала́ еси́ гла́сом Ангеловым Вели́каго сове́та Ангела, Отрокови́це, и от Твои́х пречи́стых крове́й воплоще́нна, Всенепоро́чная, родила́ еси́ показа́вшаго все́м жи́зни вхо́ды за неизглаго́ланную ми́лость.
Та́же конда́к Мерку́рия, гла́с 4. Подо́бен: Яви́лся еси́ дне́сь.
Во бране́х непобеди́маго во́ина и в беда́х непосты́дна засту́пника, пе́сньми Мерку́рия ублажи́м, сла́вяще, пра́зднующия бо па́мять его́ ве́село от бе́д избавля́ет и скорбе́й.
Пе́снь 7.
Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.
Припев: Святый великомучениче Меркурие, моли Бога о нас.
Све́том го́рняго просвеще́ния озаря́емь, до́блий во́ине, воспева́ющия тя́ ны́не просвеща́еши, песнопою́щия: благослове́н еси́, Го́споди Бо́же, во ве́ки.
Припев: Святый великомучениче Меркурие, моли Бога о нас.
Воспева́л еси́ все́х Благоде́теля, распаля́емь Того́ ре́вностию, блаже́нне, и огне́м чу́вственным жего́мь, и песнопоя́: благослове́н еси́, Го́споди Бо́же, во ве́ки.
Припев: Святый великомучениче Меркурие, моли Бога о нас.
Ка́мению принося́щии че́сть, и́же чу́вство окамене́но иму́ще, ка́менем, му́чениче, отягчава́ют вы́ю твою́, вопию́ща, Мерку́рие: благослове́н еси́, Го́споди Бо́же, во ве́ки.
Сла́ва Отцу́ и Сы́ну и Свято́му Ду́ху:
Кровьми́ кро́вь смеси́в твою́ честну́ю Влады́ки Человеколю́бца, о́бщник Того́ яви́лся еси́ страсте́й, вопия́, Мерку́рие: благослове́н еси́, Го́споди Бо́же, во ве́ки.
И ны́не и при́сно и во ве́ки веко́в. Ами́нь.
Богоро́дичен: Чи́ни Ангельстии ужаса́ются та́инства Твоего́ глубине́, Богоро́дице: Бо́г бо из Тебе́ воплоще́н яви́ся, Ему́же песнопое́м: благослове́н еси́, Го́споди Бо́же, во ве́ки.
Пе́снь 8.
Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Припев: Святый великомучениче Меркурие, моли Бога о нас.
Страда́льцев прило́г тя́ ли́к прия́ше, укра́шена и све́тла бы́вша честны́ми красота́ми пречестны́х твои́х страда́ний и благочести́ваго твоего́ и честна́го свиде́тельства, и ны́не вопие́ши непреста́нно: свяще́нницы, благослови́те, лю́дие, превозноси́те Христа́ во ве́ки.
Припев: Святый великомучениче Меркурие, моли Бога о нас.
Благочестивому́дренно, сла́вне, по́двиг соверши́л еси́, и доблему́дренно врага́ посрами́л еси́, и, побе́ду небе́сную я́ко победи́тель взе́м, со Ангельскими ны́не ли́ки весели́шися, с ни́миже, вопие́ши непреста́нно: свяще́нницы, благослови́те, лю́дие, превозноси́те Христа́ во ве́ки.
Сла́ва Отцу́ и Сы́ну и Свято́му Ду́ху:
Сконча́вся, всеблаже́нне, мече́м, Мерку́рие, и получи́в жела́емаго ти́ предлежа́щаго конца́, зе́млю у́бо кро́вными излия́нии напои́л еси́, победоно́сное же и блаже́нное те́ло беле́йше сне́га показа́л еси́, поя́: свяще́нницы, благослови́те, лю́дие, превозноси́те Христа́ во ве́ки.
И ны́не и при́сно и во ве́ки веко́в. Ами́нь.
Богоро́дичен: Яко на́шего су́щи воззда́ния, Пречи́стая, вси́ вино́вную, ве́рнии, пое́м Тя́, Бо́га бо всевино́внаго па́че вины́ родила́ еси́, сокруши́вшийся о́браз зло́бою, Свои́м благоутро́бием назда́вшаго, еди́на Преблагослове́нная и Обра́дованная.
Песнь 9
Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.
Припев: Святый великомучениче Меркурие, моли Бога о нас.
Гно́еве му́ченчестии благово́ние ны́не испуща́ют благода́тию и злосмра́дныя на́ша стра́сти неизрече́нным сло́вом отгоня́ют, и источа́ют ко́сти врачева́ний во́ды и напая́ют ду́ши пою́щих те́х чудодея́ния.
Припев: Святый великомучениче Меркурие, моли Бога о нас.
Яко вели́ка столпа́ Христо́вы Це́ркве свяще́нно тя́ почита́ем, я́ко сте́ну непоколеби́мую, я́ко гра́д вои́стинну, му́чениче, непленя́емый, я́ко во́ина кре́пка Бо́га Всецаря́, я́ко потреби́теля враго́в, я́ко свети́льника, у́мнаго и всеми́рнаго.
Припев: Святый великомучениче Меркурие, моли Бога о нас.
Соше́ственника Ангела све́та к страда́нию, богому́дре, получи́л еси́, те́мже терза́емь, и свеща́ми поджига́емь, и разсека́емь лю́те, и мече́м посека́емь, не устраши́лся еси́, страстоте́рпче Христо́в до́блественнейше.
Сла́ва Отцу́ и Сы́ну и Свято́му Ду́ху:
Де́нь, по́лн просвеще́ния, весе́лия и ра́дости, на́м возсия́ — боже́ственная па́мять твоя́, тебе́ чту́щим, му́чениче Мерку́рие, в не́мже помина́й на́с, па́мять твою́ творя́щих, и лю́тых искуше́ний, и бе́д, и страсте́й ны́ изба́ви.
И ны́не и при́сно и во ве́ки веко́в. Ами́нь.
Богоро́дичен: Просвети́, Две́ре Све́та, осле́пшую ду́шу мою́ страстьми́, и лука́выми по́мыслы омрачи́вшуюся, и бе́дствующую, и изба́ви мя́ искуше́ний, бе́д и скорбе́й, да сла́влю Тя́, наде́жду ве́рных и утвержде́ние.
Моли́тва
О великому́чениче святы́й и до́блий во́ине Христо́в Мерку́рие, страда́нием, кро́вию и сме́ртию свое́ю ве́рность Христу́ и Це́ркви Его́ свиде́тельствовавый и сего́ ра́ди вене́ц жи́зни от Него́ прие́мый! Ны́не в хвале́бных пе́снех тебе́ прославля́юще, смире́нно к тебе́ припа́даем и усе́рдно мо́лим: предста́тель бу́ди пред Бо́гом о душа́х на́ших неусы́пный, умоли́ Влады́ку Го́спода, да сохрани́т Святу́ю Це́рковь Свою́ и всех чад ея́ в сою́зе любве́ и единомы́слии, да утверди́тся мир и безмяте́жие в лю́дех, во оте́честве на́шем живу́щих, да позна́ют вси, я́ко Христо́с есть Путь, И́стина и Жи́знь, и да прии́дут к Нему́ вси тружда́ющиися и обремене́ннии, и упоко́ит их. О вели́кий уго́дниче Бо́жий! Кре́пкое стоя́ние в ве́ре на́шей да́руй нам, благода́тную по́мощь нам низпосли́, да ми́рное, ти́хое и богоуго́дное житие́ поживе́м в ве́це сем и досто́йно с тобо́ю в день о́ный восхва́лим Пресвяту́ю Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святаго великомученика Меркурия Святаго великомученика Меркурия](img_b/022.jpg)