7 декабря

Канон великомученице Екатерине

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь му́ченице, гла́с 4:

Агница Твоя́, Иису́се, Екатери́на, зове́т ве́лиим гла́сом: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нию Твоему́, и стражду́ Тебе́ ра́ди, я́ко да ца́рствую в Тебе́, и умира́ю за Тя́, да и живу́ с Тобо́ю; но, я́ко же́ртву непоро́чную, приими́ мя, с любо́вию поже́ршуюся Тебе́. Тоя́ моли́твами, я́ко Ми́лостив, спаси́ ду́ши на́ша.

Кано́н му́ченицы, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святая великомученица Екатерина, моли Бога о нас.

Екатери́ны, всему́дрыя му́ченицы, моли́твами, Христе́, мра́чное о́ко души́ моея́ просвети́, зарю́ ми́ дая́, Влады́ко, Твоего́ светоли́тия, душетле́нных паде́ний мои́х ве́сь мра́к потребля́ющую.

Припев: Святая великомученица Екатерина, моли Бога о нас.

Направля́ема Влады́ки, всему́драя, Боже́ственными повеле́нии и Того́ любо́вию пали́ма, потекла́ еси́, к подвиго́м тща́щися, и мучи́телей ра́зумы, Екатери́но, устраши́ла еси́ сло́вом, и му́дростию, и благода́тию.

Припев: Святая великомученица Екатерина, моли Бога о нас.

Управля́ема дла́нию, сла́вная, кре́пкою Христо́вою, и́дольския бу́ри избе́гла еси́, му́ченице, немо́кренно преплы́вши креста́ ве́трилом и Боже́ственными ве́тры Ду́ха, пе́снь Бо́гу воспева́ющи.

Сла́ва Отцу́ и Сы́ну и Свято́му Ду́ху:

Ра́дующися де́вственными добро́тами, Екатери́но му́драя, и Боже́ственное зна́ние с небесе́ иму́щи, лжеиме́ннаго зна́ния благодерзнове́нно и му́жественно предста́тели посрами́ла еси́, ты́я держа́вне победи́вши.

И ны́не и при́сно и во ве́ки веко́в. Ами́нь.

Богоро́дичен: Иже Богоро́дицу Тя́ пропове́дает, Пречи́стая, вся́кия е́реси отринове́ние и́мать: пло́ть бо бы́вша, неизме́нно родила́ еси́ превы́шша вся́кия, Богороди́тельнице, тва́ри Сло́во Бо́жие Присносу́щное.

Пе́снь 3.

Ирмос: Утверже́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, еди́не Человеколю́бче.

Припев: Святая великомученица Екатерина, моли Бога о нас.

Во́льными твои́ми стремле́ньми вошла́ еси́ ко страда́нию, во́лею Христа́ подража́ющи и победи́вши све́тло тмы́ мироде́ржца, венцено́сица яви́лася еси́, Екатери́но богоприя́тная.

Припев: Святая великомученица Екатерина, моли Бога о нас.

Кре́постию ума́ обличи́ла еси́ мучи́тели, безбо́жия в глубине́ валя́ющияся, ри́торствующи я́ве богозна́ния догма́ты, Бо́жиею му́дростию му́ченица уясня́ема всехва́льная.

Сла́ва Отцу́ и Сы́ну и Свято́му Ду́ху:

Равнобо́жие во у́ши Евине пошепта́вый, от отрокови́цы млады́я ны́не попира́ется, ору́жием бо Креста́ огради́вшися, посрами́ Екатери́на му́ченица безме́рно того́ хва́лящася.

И ны́не и при́сно и во ве́ки веко́в. Ами́нь.

Богоро́дичен: Умерщвле́нный мо́й у́м жи́зни де́йством из Тебе́ я́вльшияся ми́ру воздви́гни, я́звы и стру́пы истребля́ющи грехо́вныя, еди́на Богороди́тельнице Всенепоро́чная.

Седа́лен святы́я, гла́с 4. Подо́бен: Вознесы́йся.

Жениха́ твоего́, Христа́, возлюби́вши, свещу́ твою́ све́тло угото́вльши, доброде́тельми просия́вши, сла́вная. Те́мже вошла́ еси́ с Ни́м в черто́г и, вене́ц страда́ния от Него́ прие́мши, от бе́д изба́ви на́с, соверша́ющих, Екатери́но, па́мять твою́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святая великомученица Екатерина, моли Бога о нас.

Страда́льческое, Екатери́но, противле́ние показа́ла еси́, му́ченице приснопа́мятная, вражде́бнику зело́ терпели́вно противля́ющися и того́ попра́вши нога́ми кра́сными Креста́ си́лою, страстоно́сице, му́чеников похвала́.

Припев: Святая великомученица Екатерина, моли Бога о нас.

Неве́ста Христо́ва, Екатери́но всеблаже́нная, яви́лася еси́, Боже́ственныя красоты́ светови́дными луча́ми просвеща́ема и добро́тою сия́ющи. Те́мже и, веселя́щися, песнопое́ши Влады́це: си́ле Твое́й сла́ва, Человеколю́бче.

Припев: Святая великомученица Екатерина, моли Бога о нас.

Мучи́тельскую горды́ню низложи́ла еси́ и Боже́ственным сло́вом му́дрости твоея́ я́ко от глубины́ ле́стнаго демоногове́ния прельща́емыя исхи́тила еси́, уча́щи зва́ти Христу́ песнопою́щия: си́ле Твое́й сла́ва, Человеколю́бче.

Сла́ва Отцу́ и Сы́ну и Свято́му Ду́ху:

Благосла́вное и светоно́сное торжество́ сла́вныя па́мяти твоея́, всехва́льная, кре́пко де́рзость вра́жию попра́вши, я́ко со́лнце, возсия́, в не́мже велегла́сно Влады́це вопие́м: си́ле Твое́й сла́ва, Человеколю́бче.

И ны́не и при́сно и во ве́ки веко́в. Ами́нь.

Богоро́дичен: Ны́не кре́пость низложи́ отмета́ющихся о́браза, Отрокови́це, поклоне́ния Тебе́, Чи́стыя, и па́че ума́ из Тебе́ воплоще́ннаго и ми́р ве́сь просве́щшаго, и все́х святы́х, ве́рою же чту́щия Тя́ просвети́, еди́на Всепе́тая.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святая великомученица Екатерина, моли Бога о нас.

Любо́вию огнепали́ма, му́ченице всесла́вная, Влады́ки твоего́ и и́щущи Того́ недомы́сленную добро́ту ви́дети, самово́льным нра́вом ра́нам себе́ вдала́ еси́, де́вства сия́ющи благода́тьми.

Припев: Святая великомученица Екатерина, моли Бога о нас.

Страстьми́ свяще́ннейшими, отрокови́це доброде́во, украси́вши тебе́ саму́ю благоле́пно, возшла́ еси́ к небе́сному Христо́ву черто́гу и ны́не све́тло твоему́ Жениху́, веселя́щися, сочта́лася еси́, всеблаже́нная.

Сла́ва Отцу́ и Сы́ну и Свято́му Ду́ху:

Отрокови́ца всесве́тлая яви́лася еси́, возлюби́вши Еди́наго Жела́емаго, и, во сле́д Того́ крепча́йшее тече́ние соверши́вши, в воню́ мѵ́ра твоего́ у́мнаго истоще́ннаго, вопия́ла еси́: теку́, Женише́ мо́й.

И ны́не и при́сно и во ве́ки веко́в. Ами́нь.

Богоро́дичен: Истинную Богоро́дицу Тя́ вси́ позна́вше, Пречи́стая Влады́чице, из Тебе́ ро́ждшагося Бо́га Сло́ва ве́дяще, пропове́даем во дву́ существа́х, хоте́ниих самовла́стных познава́ема, Ма́ти Богоневе́стная.

Пе́снь 6.

Ирмос: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю! и спаси́.

Припев: Святая великомученица Екатерина, моли Бога о нас.

Всю́ тя́, добро́тою сия́ющу, де́вства заре́ю, му́ченическими же, отрокови́це, обагре́ну кровьми́, ви́дев, благо́е Сло́во и пречи́стое в черто́зех небе́сных тя́ всели́.

Припев: Святая великомученица Екатерина, моли Бога о нас.

Возмогла́ еси́ Кресто́м мучи́телей разреши́ти держа́ву, и мирски́я му́дрости обличи́вши суету́, богодохнове́ннаго уче́ния точа́щи догма́ты, велему́дренная Екатери́но приснопа́мятная.

Сла́ва Отцу́ и Сы́ну и Свято́му Ду́ху:

Ле́стию пе́рвее Ада́ма ра́йския сла́дости изгна́вшаго, ра́н боле́зни кре́пко терпя́щи, низложи́ла еси́ на зе́млю, му́ченице всесла́вная, и венцы́ Ца́рствия венча́лася еси́.

И ны́не и при́сно и во ве́ки веко́в. Ами́нь.

Богоро́дичен: Ми́лостива мне́ Судию́ и Сы́на Твоего́, Богоро́дице Де́во, Твои́ми мольба́ми бы́ти в де́нь суда́, Изба́вителя же лю́тых, Ма́ти, сотвори́, к Тебе́ бо еди́ной наде́жды возлага́ю.

Конда́к святы́я, гла́с 2. Подо́бен: Вы́шних ища́.

Ли́к честны́й боже́ственне, мучениколю́бцы, воздви́гните ны́не, почита́юще всему́друю Екатери́ну, сия́ бо в три́знищи Христа́ пропове́да и зми́я попра́, ри́торов ра́зумы укроти́вши.

Икос:

От Бо́га му́дрость прии́мши изде́тства, му́ченице, и вне́шнюю до́бре му́дрость всю́ извы́че, позна́вши у́бо от тоя́ стихи́й движе́ние же и творе́ние по сло́ву, и сия́ из нача́ла сло́вом Сотво́ршаго, Тому́ благодаре́ние в нощи́ и во дни́ приноша́ше, и́долы низложи́вши и си́м несмы́сленно служа́щия ри́торов ра́зумы укроти́вши.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.

Припев: Святая великомученица Екатерина, моли Бога о нас.

Му́чеников хвала́, благоче́стия учи́тельница была́ еси́, све́тлому твоему́ Жениху́ му́чеников мно́жество приве́дши, Христу́. С ни́миже зове́ши, всехва́льная, пою́щи: благослове́н Бо́г оте́ц на́ших.

Припев: Святая великомученица Екатерина, моли Бога о нас.

Сло́во твое́ прему́дрое ко спасе́нию мно́ги исхи́ти от идолонеи́стовства и светоно́сны яви́ му́ченики, велегла́сно с тобо́ю взыва́ющия: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Отрокови́ца, в сле́д Тебе́ иду́щи, Тебе́ приведе́ся, мече́м посе́чена, Твою́ подража́ющи стра́сть пречи́стую и Тебе́, Зижди́телю, вопию́щи и глаго́лющи: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Святы́х Святы́й, в Тебе́ свя́то всели́вся, Чи́стая Богоро́дице Де́во, воплоще́н, из Тебе́ ражда́ется, за е́же спасти́ ве́рою зову́щия: благослове́н Бо́г оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святая великомученица Екатерина, моли Бога о нас.

Твои́ми уче́нии цари́ца, ве́рующи, притече́ ко благоче́стию, и кре́пко претерпе́вши боле́зней чу́вство, и Ца́рствия небе́снаго непрее́мнаго я́вственно сподо́бися, вопию́щи Влады́це: свяще́нницы, благослови́те, лю́дие, превозноси́те во вся́ ве́ки.

Припев: Святая великомученица Екатерина, моли Бога о нас.

С му́ченики да бу́дут ве́рных проше́ния, страстоте́рпица бо Христу́ предстои́т, прося́щи лу́чшая и спасе́ния хода́тайственная всесвяту́ю и честну́ю ея́ па́мять усе́рдно соверша́ющим и ве́рно песнопою́щим: лю́дие, превозноси́те Христа́ во ве́ки.

Припев: Святая великомученица Екатерина, моли Бога о нас.

Отве́рз, прие́млет тя́ Жени́х, всему́драя, две́ри ра́йския, и в черто́зе всесве́тлем обита́ти сотвори́, Ца́рствия прича́стницу я́ко соо́бщницу страсте́й явля́ет. Ему́же ны́не предстоя́щи, царе́ва дщи́, све́тло укра́шена, на́с не забу́ди.

Сла́ва Отцу́ и Сы́ну и Свято́му Ду́ху:

Ухищре́нными глаго́лы искуша́ше мучи́тель, и уветливосло́вии, лю́тый, льстя́, разсла́бити твою́ кре́пость наде́явся, сла́вная, но уневе́ститися Христу́ хотя́щи, вопия́ла еси́ Влады́це: свяще́нницы, воспо́йте, лю́дие, превозноси́те Христа́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Свяще́ннейши была́ еси́, Богоро́дице Всенепоро́чная, преми́рнаго Ангелов чи́на: си́х бо родила́ еси́ Соде́теля и Го́спода от де́вственныя и неискусобра́чныя утро́бы, во дву́х существа́х неслия́нно и невра́щно, во еди́ной же Ипоста́си Бо́га воплоще́нна.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святая великомученица Екатерина, моли Бога о нас.

Преста́вилася еси́ к черто́гом светови́дным, неве́стными укра́шена у́тварьми, де́вственную иму́щи свещу́ в твое́й десни́це, в друго́й же держа́щи отсе́ченную твою́ главу́. И ны́не, предстоя́щи Христу́, твоему́ Жениху́, Тя́ пою́щия сохрани́.

Припев: Святая великомученица Екатерина, моли Бога о нас.

Прия́та бы́сть твоя́, богому́драя, моли́тва, ве́рою бо твое́ имену́ющия и́мя, честна́я, спаса́ет Влады́ка от искуше́ний и благоздра́вие подае́т, неду́гов избавля́я всеразли́чных, душе́вных же и теле́сных. Те́м тя́, веселя́щеся, Екатери́но, ублажа́ем.

Припев: Святая великомученица Екатерина, моли Бога о нас.

Приста́ла еси́ ти́хому приста́нищу ны́не, благоопря́тно же и легко́ мо́ре мирско́е, му́ченице, преплы́вши треволне́ний, не искуси́вшися, всему́драя, бога́тство многоразли́чное Христу́ принося́щи, де́во, мно́жество му́ченик, Екатери́но всеблаже́нная.

Сла́ва Отцу́ и Сы́ну и Свято́му Ду́ху:

В черто́зех небе́сных ны́не вну́трь с де́вственных ли́ки ликовству́ющи, му́ченическими озаря́ема луча́ми, Екатери́но всему́драя, разреши́ паде́ний мои́х плени́цы, усе́рдно моля́щи все́х Благоде́теля, за Его́же кро́вь твою́ излия́ла еси́.

И ны́не и при́сно и во ве́ки веко́в. Ами́нь.

Богоро́дичен: Яви́лася еси́, о Де́во Ма́ти Бо́жия! па́че естества́ ро́ждши в телеси́ благо́е Сло́во, Его́же от се́рдца Своего́ Оте́ц отры́гне пре́жде все́х веко́в, я́ко бла́г, Его́же ны́не и теле́с превы́шша разумева́ем, а́ще и в те́ло облече́ся.

Свети́лен святы́я. Подо́бен: Ду́хом во святи́лищи.

Возжиля́ема мудрова́нием же́н, о де́во Екатери́но всечестна́я, страстоте́рпцев сла́во, филосо́фов хи́трость о Бо́зе обличи́ла еси́, я́ко буесло́вие су́щу и ба́снь, всенепоро́чную и́стинно Ма́терь Бо́жию спомо́щницу стяжа́вши.

Мо­ли́т­ва

О свя­та́я Екатери́но, де́­во и му́ченице, и́стинная Хри­сто́­ва не­ве́с­то! Мо́­лим тя чрез особли́вую бла­го­да́ть, е́ю­же предвари́ тя Жени́х твой, Сладча́йший Иису́с: я́ко­же посрами́вши пре́­лес­ти мучи́теля, му́дростию твое́ю пятьдеся́т вити́й победи́ла еси́ и, напои́вши их Не­бе́с­ным уче́нием, к све́­ту и́с­тин­ныя ве́­ры наста́вила еси́, та́­ко ис­про­си́ и нам о́ную Бо́­жию му́дрость, да и мы, расто́ргнувше вся ко́з­ни а́дскаго мучи́теля и пре­зре́в ми́­ра и пло́­ти собла́зны, досто́йны яви́мся Бо­же́ст­вен­ныя сла́­вы и к разшире́нию свя­ты́я на́шея пра­во­сла́вныя ве́­ры сосу́ды досто́йны соде́лаемся, и с то­бо́ю в Небе́сной ски́нии Го́с­по­да и Вла­ды́­ку на́­ше­го Иису́­са Хри­ста́ хва́­лим и про­сла­вля­ем во вся ве́­ки. Ами́нь.