6 декабря

Канон святителю Григорию, епископу Акрагантийскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Кано́н свята́го Григо́рия, гла́с 8.

Пе́снь 1.

Ирмос: Сокруши́вшему бра́ни мы́шцею Свое́ю и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу, я́ко просла́вися.

Припев: Святителю отче Григорие, моли Бога о нас.

Заря́ми Ду́ха просвеща́емь при́сно, свяще́нне Григо́рие, и светоза́рна звезда́ бы́в, всего́ мя́ озари́ моли́твами твои́ми, я́ко да воспою́ тя.

Припев: Святителю отче Григорие, моли Бога о нас.

Иже Предве́дец все́х, облагода́тствив у́м тво́й богода́нными сия́ньми, от пеле́н тя́ освяща́ет, боже́ственными доброде́тельми сия́ти хотя́ща, о́тче, и чудесы́.

Сла́ва Отцу́ и Сы́ну и Свято́му Ду́ху:

Дрема́ние от ве́ждей уны́ния отве́рг, свети́льник бо́дрый ты́ яви́лся еси́, богоно́се, показа́в вещми́ зва́ние твое́, Григо́рие, и́стинствующее.

И ны́не и при́сно и во ве́ки веко́в. Ами́нь.

Богоро́дичен: Богоро́дицу Тя́ госпо́дственно и и́стинно испове́дую: родила́ бо еси́ Го́спода несказа́нно, во дву́ существа́х и хоте́ниих, Пречи́стая Де́во, разумева́ема.

Пе́снь 3.

Ирмос: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Припев: Святителю отче Григорие, моли Бога о нас.

Сего́ ра́ди тво́й прие́м, о́тче, тру́д Зижди́тель, ста́рцу приведе́ тя́ в пусты́ню, уча́щу тя́, Григо́рие, вся́каго писа́ния сказа́нию.

Припев: Святителю отче Григорие, моли Бога о нас.

Всю́ провожда́я седми́цу безпи́щен, о́тче, пита́лся еси́ сне́дию небе́сною, твои́х сле́з дожде́м напая́емь и Боже́ственно наслажда́емь.

Сла́ва Отцу́ и Сы́ну и Свято́му Ду́ху:

От Бо́га тебе́, иера́рше, простра́нство се́рдца даде́ся: источи́л бо еси́ бога́тно уче́ний чисте́йшия во́ды, сердца́ ве́рных напая́ющия.

И ны́не и при́сно и во ве́ки веко́в. Ами́нь.

Богоро́дичен: Глаго́лы пропове́дников богоглаго́ливых испо́лнишася: се́ бо роди́ Де́ва мла́до Отроча́, Ада́ма дре́внейшее и сопресто́льное Роди́телю.

Седа́лен, гла́с 8. Подо́бен: Прему́дрости.

От пеле́н Го́споду возложе́н, я́ко дре́вле пресла́вный Самуи́л, та́кожде зову́щаго тя́ Спа́са послу́шал еси́ и, ду́шу очи́стив до́брых подая́ньми, свяще́нства благода́ть досто́йно взя́л еси́. Те́мже на зла́це боже́ственнаго зна́ния па́ствовав па́ству, врачева́ний изблиста́л еси́ де́йства, Григо́рие, моли́ Христа́ Бо́га, грехо́в оставле́ние дарова́ти пра́зднующим любо́вию святу́ю па́мять твою́.

Пе́снь 4.

Ирмос: Услы́шах, Го́споди, слу́х Тво́й и убоя́хся, я́ко неизрече́нным сове́том, Бо́г сы́й Присносу́щный, от Де́вы прише́л еси́, вопло́щся. Сла́ва снизхожде́нию Твоему́, Христе́, сла́ва си́ле Твое́й.

Припев: Святителю отче Григорие, моли Бога о нас.

Земля́ я́ко добра́, процве́л еси́ стори́чествующий, о́тче, кла́с и серпо́м твои́х уче́ний пожа́л еси́ ерети́ческое злочести́вое мне́ние, собо́ра побо́рник яви́вся, преподо́бне Григо́рие.

Припев: Святителю отче Григорие, моли Бога о нас.

Небе́сный тя́ су́д архиере́я, Бо́жий уго́дниче, показу́ет до́бре путево́дствити па́ству, ю́же стяжа́ Кро́вию Христо́с, прове́дый твоея́ души́, о́тче, све́тлость.

Сла́ва Отцу́ и Сы́ну и Свято́му Ду́ху:

Хра́м Бо́жий бы́л еси́, очище́н страсте́й скве́рны, и, в хра́ме свяще́ннем предстоя́, Ду́ха прише́ствие прия́л еси́ я́ве ви́дом чи́стыя голуби́цы, Христу́, тя́ просла́вльшу.

И ны́не и при́сно и во ве́ки веко́в. Ами́нь.

Богоро́дичен: Ро́д челове́ческий спасе́ся па́че ума́ Твои́м Рождество́м и су́щии во тме́ тле́ния, Пречи́стая Влады́чице, ви́деша Све́т, возсия́вший из чре́ва Твоего́, вино́внаго на́шего, Отрокови́це, воззда́ния.

Пе́снь 5

Ирмос: Мра́к души́ моея́ разжени́, Светода́вче Христе́ Бо́же, началоро́дную тму́ изгна́в бе́здны, и да́руй ми́ све́т повеле́ний Твои́х, Сло́ве, да у́тренюя, сла́влю Тя́.

Припев: Святителю отче Григорие, моли Бога о нас.

Глаго́лом твои́м очища́еши смра́дныя не́мощи прокаже́ннаго, иногда́ прише́дшаго к тебе́ ве́рою: от Бо́га бо прия́л еси́ благода́ть чуде́с, му́дре, я́коже Елиссе́й боже́ственный, богому́дре Григо́рие.

Припев: Святителю отче Григорие, моли Бога о нас.

Отве́рзл еси́ моли́твою твое́ю гугни́ваго уста́ и у́ши, Григо́рие, врачева́ний, всеблаже́нне, де́йством обогати́лся еси́ и изры́гнул еси́ богосло́вия глубину́, моря́ безбо́жных изсуша́ющу.

Сла́ва Отцу́ и Сы́ну и Свято́му Ду́ху:

Земна́го пристра́стия очи́щся, о́тче, я́ко Пе́тр первоизбра́нный апо́столов, се́нию твое́ю целе́ния соверша́еши, содержи́мыя лю́тыми неду́гов нападе́ньми боже́ственно врачу́я.

И ны́не и при́сно и во ве́ки веко́в. Ами́нь.

Богоро́дичен: Не́др Оте́ческих не истощи́в, во е́же воплоща́тися, Всенепоро́чная, в Твои́х не́дрех ви́дится, держи́мь я́ко Младе́нец: Его́же ми́лостива сотвори́ благоче́стно Тя́ чту́щим, Де́во Богоневе́сто.

Пе́снь 6.

Ирмос: Якоже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви, я́ко Человеколю́бец, и упра́ви живо́т мо́й, молю́ся.

Припев: Святителю отче Григорие, моли Бога о нас.

Укрепля́ется отрокови́ца, те́лом разсла́бленная в ле́тех мно́жайших, моли́твою твое́ю, преподо́бне, ве́рно прише́дши к тебе́, и вино́внаго все́х велича́ет Христа́.

Припев: Святителю отче Григорие, моли Бога о нас.

Стопа́м после́дуя Влады́чним житие́м непоро́чным, сла́вне, непра́ведне оскорбля́емь и оклевета́емь, не изничто́жен пребы́л еси́.

Сла́ва Отцу́ и Сы́ну и Свято́му Ду́ху:

Зло́бою соживу́щии, тя́, незло́биваго а́гнца, я́ко свире́пии зве́рие, восхи́тивше, в темни́цу осуди́ша, храни́ма, о́тче, Боже́ственною благода́тию.

И ны́не и при́сно и во ве́ки веко́в. Ами́нь.

Богоро́дичен: Ум разуме́ти недоуме́ет вели́кое Твоего́ рождества́ та́инство: Бо́га бо родила́ еси́, челове́ка бы́вша, Присноде́во, необмы́сленнаго.

Конда́к Григо́рия, гла́с 4. Подо́бен: Яви́лся еси́ дне́сь.

Светолу́чными сия́нии Це́рковь Свята́го Ду́ха светово́дит све́тлое соверша́ющих твое́ успе́ние, преподо́бне о́тче всеблаже́нне Григо́рие.

Пе́снь 7.

Ирмос: Ангелом о́троки из огня́ спасы́й и гремя́щую пе́щь преложи́вый на ро́су, благослове́н еси́, Бо́же оте́ц на́ших.

Припев: Святителю отче Григорие, моли Бога о нас.

Чудоде́йствует Зижди́тель, суди́му тебе́, блаже́нне, блудни́ца бо жени́що стремле́нием взята́ де́монским, все́м показа́ тя́ чи́ста, Григо́рие.

Припев: Святителю отче Григорие, моли Бога о нас.

Светопода́тельнии боже́ственнии ученицы́ Спа́совы, тебе́ предста́вше, преподо́бне, привя́зана дре́ву разреша́ют, ра́достно лобза́юще.

Сла́ва Отцу́ и Сы́ну и Свято́му Ду́ху:

Терпе́нию твоему́, о́тче, Влады́ка, вне́мля, чудоде́йствы бо́льшими тя́ свяще́нно украша́ет, неду́гов мра́к отгоня́ща.

И ны́не и при́сно и во ве́ки веко́в. Ами́нь.

Богоро́дичен: Матероле́пно все́х родила́ еси́ Зижди́теля и рука́ми понесла́ еси́, я́ко херуви́мский престо́л, содержа́щаго вся́, Неискусобра́чная.

Пе́снь 8.

Ирмос: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Припев: Святителю отче Григорие, моли Бога о нас.

Отреша́ется ра́ны де́монския стра́шныя, моли́твою твое́ю, блаже́нне, я́же лука́вством пребеззако́нных муже́й оклевета́вшая тебе́, пра́веднаго, отрокови́ца, и посреде́ собо́ра тя́ прославля́ет подвигополо́жник Бо́г во вся́ ве́ки.

Припев: Святителю отче Григорие, моли Бога о нас.

Те́мнаго омраче́ния исполня́ются лука́вством на тя́ поучи́вшиися, о́тче, и сия́ет твое́ светоза́рное житие́ пред отцы́, Григо́рие, в и́хже прише́ствии, у́глие держа́ руко́ю, чудоде́йствовал еси́.

Сла́ва Отцу́ и Сы́ну и Свято́му Ду́ху:

Яко звезда́ светле́йшая, яви́лся еси́ и́стинно на высоте́, о́тче, церко́вней, озаря́еши ны́ доброде́тельми всегда́ и чуде́с луча́ми, пою́щия твою́ светоно́сную па́мять, святи́телю богому́дре Григо́рие.

И ны́не и при́сно и во ве́ки веко́в. Ами́нь.

Богоро́дичен: Пресла́вное рождество́ Твое́ помышле́ния на́ша ужаса́ет, еди́на Благослове́нная: Бо́г бо из Тебе́ пло́ть прия́т, е́же бе́ пребы́в, Богоро́дице, невра́щен естество́м. Его́же превозно́сим во ве́ки.

Песнь 9

Ирмос: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, Отрока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Припев: Святителю отче Григорие, моли Бога о нас.

Се́ све́тлое торжество́, се́ па́мять свяще́нная, се́ благода́ть все́м соше́дшимся ве́рным, оби́льно врачева́ния точа́щи, присту́пим: то́чит бо на́м Григо́риева ра́ка просвеще́ние присноте́чное и безсме́ртие.

Припев: Святителю отче Григорие, моли Бога о нас.

Яко река́, испо́лнился еси́ во́д Христо́вых, я́ко ма́слина, еле́й то́чиши жи́зни, я́ко фи́никс, возвы́сился еси́, Григо́рие, я́ко лоза́, гро́здие на́м доброде́телей твои́х но́сиши, от ни́хже напая́емся вино́м нетле́ния.

Припев: Святителю отче Григорие, моли Бога о нас.

Да сра́дуется дне́сь на́м в па́мяти твое́й свяще́нных собо́р, и преподо́бных мно́жество, и все́х Ангел чи́нове: с ни́миже предстоя́ Творцу́, озаря́емь, о́тче, помяни́ любо́вию тя́ песносло́вящия.

Сла́ва Отцу́ и Сы́ну и Свято́му Ду́ху:

Освяще́н бы́л еси́, о́тче, сосу́д Христо́в, Це́ркве сто́лп, и приста́нище ве́рных, и ме́чь, пре́лести изсека́ющий, исто́чник исцеле́ний, и глубина́ боже́ственных разуме́ний, и свеща́ неугаса́ющая, и па́стырь па́стырей.

И ны́не и при́сно и во ве́ки веко́в. Ами́нь.

Богоро́дичен: Све́т ро́ждшая безле́тный, возсия́вший из Отца́, просвети́ мою́, Отрокови́це, ду́шу и у́м, дале́че от мене́ отгоня́щи тму́, Де́во, страсте́й: да Тя́ ублажа́ю, Присноблаже́нную, ве́рных наде́жду.

Свети́лен свята́го Григо́рия:

По́стнически житие́ твое́ украси́в, му́дре о́тче, и честны́я, Григо́рие, Христо́вы Це́ркве иера́рх яви́лся еси́, блаже́нне, правосла́вных просвеща́я заря́ми уче́ний твои́х и неизглаго́ланными чудесы́. Те́мже твое́ пресвято́е успе́ние соверша́ющим испроси́ моли́твами твои́ми душе́вное спасе́ние.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Григорие, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.