6 декабря

Канон святителю Амфилохию, епископу Иконийскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Кано́н свята́го Амфило́хия. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святителю отче Амфилохие, моли Бога о нас.

Словеса́ злочести́вых ересе́й и киче́ния, правосла́вия заре́ю просвеще́н, удо́бно разори́л еси́; в не́мже тебе́ чту́щия, священноявле́нне, сохрани́.

Припев: Святителю отче Амфилохие, моли Бога о нас.

Иже все́х спасе́ния при́сно хотя́й, Госпо́дь свяще́нныя тя́ па́ствы путевожда́, иера́рше, предлага́ет, сло́вом и житие́м светя́ща изря́дно ви́дев.

Сла́ва Отцу́ и Сы́ну и Свято́му Ду́ху:

Зако́нно пострада́ти избра́в по Христо́ве Це́ркви, всеору́жием, о́тче, креста́ себе́ огради́л еси́ и победи́тель благода́тию и вене́чник яви́лся еси́, сла́вне.

И ны́не и при́сно и во ве́ки веко́в. Ами́нь.

Богоро́дичен: Сло́во, Отцу́ Собезнача́льное и Соприсносу́щное, и Того́ существа́ зра́к ро́ждшему су́ща, из Тебе́ воплоще́нна родила́ еси́ несказа́нно, Неискусобра́чная.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святителю отче Амфилохие, моли Бога о нас.

Боже́ственное и светоза́рное твои́х догма́тов сия́ние погаси́ злочести́вый по́лк ерети́ческий, Амфило́хие сла́вне.

Припев: Святителю отче Амфилохие, моли Бога о нас.

Во́д животво́рных, я́ко река́, сы́й, от Бо́га испо́лнена, первосвяще́нник бы́в, и́миже, благочести́вии, напая́емся.

Сла́ва Отцу́ и Сы́ну и Свято́му Ду́ху:

Бога́тыми луча́ми просвеща́емь, у́м осия́л еси́ та́йным, преподо́бне, твои́х уче́ний благоле́пием.

И ны́не и при́сно и во ве́ки веко́в. Ами́нь.

Богоро́дичен: Све́щник Тя́ светоза́рный, и душепита́тельную благоче́стия трапе́зу, и киво́т, Пречи́стая, вси́ ве́рнии, возвеща́ем.

Седа́лен, гла́с 4. Подо́бен: Ско́ро предвари́.

Просвеща́еши концы́ в твое́й па́мяти, му́дре: те́ло бо твое́ источа́ет исцеле́ний исто́чник, Амфило́хие сла́вне. Те́мже и не́мощи избавля́еши вся́кия ве́рою приходя́щия к честно́му твоему́ хра́му, сего́ ра́ди и ны́не моли́ спасти́ся на́м.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святителю отче Амфилохие, моли Бога о нас.

Амфило́хия боже́ственнаго и богоглаго́ливаго свяще́нное торжество́, богому́дрии, прииди́те, ве́рою воспле́щим, того́ уче́ньми и богосло́вием укрепля́еми.

Припев: Святителю отче Амфилохие, моли Бога о нас.

Невестово́дец, богоно́се, це́ркве су́щия в Христе́ бы́в, добро́тою слове́с сию́ украси́л еси́ и красото́ю правосла́вия уясни́л еси́.

Сла́ва Отцу́ и Сы́ну и Свято́му Ду́ху:

Богосло́вный тво́й язы́к и богоглаго́ливый нача́льныя Тро́ицы единоче́стную держа́ву все́м уясни́ и Еди́но Божество́ чти́ти в Тре́х Ипоста́сех.

И ны́не и при́сно и во ве́ки веко́в. Ами́нь.

Богоро́дичен: Но́вую ски́нию Тя́, Де́во, разумева́ем, и чи́стое святи́лище все́х Влады́ки: Того́ бо родила́ еси́ пло́тию, по Ипоста́си сте́кшася, Всенепоро́чная.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святителю отче Амфилохие, моли Бога о нас.

Просвеща́емь све́том Трисо́лнечнаго Божества́, се́л еси́ на престо́ле архиере́йства, богому́дре Амфило́хие.

Припев: Святителю отче Амфилохие, моли Бога о нас.

Всеце́ла тебе́ сама́го Бо́гу освяти́л еси́ и бы́л еси́ богопропове́дник велегла́сен, о́тче всеблаже́нне Амфило́хие.

Сла́ва Отцу́ и Сы́ну и Свято́му Ду́ху:

Ра́достный на́м пра́здник и всесвяще́нный наста́ боже́ственнаго и му́драго учи́теля, ми́р освяща́ющий.

И ны́не и при́сно и во ве́ки веко́в. Ами́нь.

Богоро́дичен: О, все́х ве́рных благоле́пное удобре́ние, Пречи́стая Богома́ти! души́ моея́ скве́рну омы́й моли́твами Твои́ми.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святителю отче Амфилохие, моли Бога о нас.

Умертви́в в пло́ти долере́вностное мудрова́ние, безстра́стия благода́тию оде́ялся еси́, о́тче священнотаи́нниче, и всечи́стыми уче́нии Тро́ицу пропове́дал еси́. [Два́жды.]

Сла́ва Отцу́ и Сы́ну и Свято́му Ду́ху:

Стра́хом огради́вся Боже́ственным, богоприя́тне, и ду́шу от скве́рн чи́сту соде́яв, богосло́вия яви́лся еси́ свяще́ннейший орга́н, преподо́бне.

И ны́не и при́сно и во ве́ки веко́в. Ами́нь.

Богоро́дичен: Чи́стое Тя́ и свято́е ве́дяще селе́ние Царя́ сла́вы, и хра́м, и престо́л Превысоча́йшаго, мо́лим ду́ши на́ша спасти́, Всепе́тая.

Конда́к свята́го Амфило́хия, гла́с 2. Подо́бен: Вы́шних ища́.

Боже́ственный гро́м, труба́ Ду́ха, ве́ры садоде́лателю и се́чиво ересе́й, иера́рше Амфило́хие, Тро́ицы уго́дниче вели́кий, со Ангелы предстоя́ при́сно, моли́ непреста́нно о все́х на́с.

Икос:

От Ду́ха Свята́го прему́дрый иера́рх Христо́в вдохну́вся, Це́рковь запеча́та, име́я бо си́лы де́йство, сла́вный таи́нник и учи́тель ве́ры прия́тен, услы́шав благочте́ние Боже́ственных Писа́ний, воображе́ние Живоно́снаго и Честна́го Креста́ творе́нием, Евно́мия отгна́ и, ве́ру уясни́в, пропове́дая Христа́, мо́лит непреста́нно о все́х на́с.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святителю отче Амфилохие, моли Бога о нас.

Та́инственнейшим боговеща́нием твои́м вне́млюще любо́вию, Ариева, о́тче, разсече́ния Божества́ избега́ем, Тро́ицу Несозда́нную и Единосу́щную ве́рою сла́вяще.

Припев: Святителю отче Амфилохие, моли Бога о нас.

Облича́ема уче́нием твои́м Македо́ния, о́тче, зря́ще, Ду́ха Блага́го, Отцу́ же и Сы́ну спокланя́ема и Собезнача́льна, ве́рою сла́вим.

Сла́ва Отцу́ и Сы́ну и Свято́му Ду́ху:

Сло́вом уясни́в е́же па́че сло́ва Сло́ва воплоще́ние, чествова́ти в дву́х существа́х Еди́наго Бо́га богому́дренно научи́л еси́ и разделе́ния, и смеше́ния бежа́ти, богоприя́тне.

И ны́не и при́сно и во ве́ки веко́в. Ами́нь.

Богоро́дичен: Вси́ усе́рдно Богоро́дицу восхва́лим, прииди́те, ве́рою спа́сшиися, из Нея́ ро́ждшагося Вседержи́теля, — благослове́на Ты́ в жена́х еси́, — вопию́ще, — Всенепоро́чная.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святителю отче Амфилохие, моли Бога о нас.

Украси́шася пе́сненно уста́ твоя́, богосло́вящая я́сно Тро́ицу несозда́нну, безнача́льну, единосу́щну, несли́тну Треми́ Ипоста́сьми, о́тче богому́дре. Ейже вопие́м: благослови́те, вся́ дела́ Госпо́дня, Го́спода.

Припев: Святителю отче Амфилохие, моли Бога о нас.

Бога́тство тебе́ и сла́ву честну́ю Ипоста́сная Му́дрость даде́, богосло́вившу ти́, прему́дре, благоче́стно, и ересе́й низложи́вшу горды́ню, и любо́вию пою́щу: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Иже все́м подая́й жи́знь я́ко иера́рха ве́рна и богоглаго́лива в Це́рковь тя́, преподо́бне, перворо́дных вво́дит, свяще́нствующа та́инственно и ве́рно пою́ща: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Се́ ны́не оскуде́ я́ве от Иу́дина коле́на нача́льник и во́ждь: Ты́ бо, Всенепоро́чная, родила́ еси́ Самаго́ отлежа́щаго, жда́ние язы́ков Христа́, Ему́же пое́м: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святителю отче Амфилохие, моли Бога о нас.

Еди́но Триипоста́сное Естество́ всеблагоче́стно богосло́вив, Всесвяту́ю Тро́ицу, Богонача́льную, Непости́жную, ны́не от Нея́ почествова́лся еси́, священноявле́нне Амфило́хие.

Припев: Святителю отче Амфилохие, моли Бога о нас.

Име́я к Бо́гу дерзнове́ние, я́ко иера́рх, богоно́се, свяще́нную и светоно́сную соверша́ющих па́мять твою́, всеблаже́нне, всегда́ помина́й, твоему́ Влады́це предстоя́.

Сла́ва Отцу́ и Сы́ну и Свято́му Ду́ху:

Дава́еши ми́ оби́льную благода́ть, похвалы́ тебе́, богому́дре, спле́тшу усе́рдным се́рдцем, грехо́в разреше́ние прося́щу, я́ко святи́тель ве́рнейший, преподо́бне о́тче Амфило́хие.

И ны́не и при́сно и во ве́ки веко́в. Ами́нь.

Богоро́дичен: Ада́мова у́бо вну́ка яви́лася еси́, Бо́жия же Ма́ти позна́лася еси́: Ты́ бо от ве́ка яви́лася еси́ святе́йши вся́кия тва́ри, Благослове́нная Пречи́стая, те́м Тя́ вси́ велича́ем.

Свети́лен свята́го Амфило́хия. Подо́бен: Ученико́м.

Бо́г положе́нием бы́в в безвеще́ственнем причаще́нии Бо́жия естества́, всему́дре, от Ангел пома́зався святи́тель боже́ственному при́чту, хода́тайствуя Созда́телю и созда́нию, богоприя́тне, Амфило́хие о́тче. Те́мже, твою́ соверша́юще па́мять, тя́ воспева́ем, избавля́еми моли́твами твои́ми от тли́ и напа́стей.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Амфило́хие, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со а́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства укра́си, мона́шествующыя к по́двигом до́браго тече́ния укрепи́, ца́рствующий град и вся гра́ды и страны́ до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.