6 декабря

Канон святому благоверному Великому Князю Александру Невскому, во иноцех Алексию

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Яко благочести́ваго ко́рене пречестна́я о́трасль бы́л еси́, блаже́нне Алекса́ндре, яви́ бо тя́ Христо́с, я́ко не́кое Боже́ственное сокро́вище Росси́йстей земли́, но́ваго чудотво́рца, пресла́вна и богоприя́тна. И дне́сь, соше́дшеся в па́мять твою́ ве́рою и любо́вию, во псалме́х и пе́ниих ра́дующеся, сла́вим Го́спода, да́вшаго тебе́ благода́ть исцеле́ний. Его́же моли́ спасти́ гра́д се́й, и держа́ве сро́дник твои́х богоуго́дней бы́ти, и сыново́м росси́йским спасти́ся.

Ин тропа́рь, гла́с то́йже:

Позна́й свою́ бра́тию, росси́йский Ио́сифе, не в Еги́пте, но на небеси́ ца́рствующий, благове́рный кня́же Алекса́ндре, и приими́ моле́ния и́х, умножа́я жи́та лю́дем плодоно́сием земли́ твоея́, гра́ды влады́чествия твоего́ огражда́я моле́нием и насле́дником твои́м на сопроти́вныя спобо́рствуя.

Кано́н свято́му пе́рвый, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святый великий княже Александре, моли Бога о нас.

Досто́йными похвала́ми воспе́ти пресла́внаго чудотво́рца, у́м и смы́сл да́руй ми́, Христе́ Бо́же, я́ко да воспою́, ра́дуяся, па́мять его́.

Припев: Святый великий княже Александре, моли Бога о нас.

Пе́сньми и пе́ньми духо́вными восхва́лим блаже́ннаго, и честну́ю его́ и многоцеле́бную ра́ку, обстоя́ще, любе́зно облобыза́ем, и си́це вопие́м: ра́дуйся, оте́честву твоему́ пресве́тлый свети́льниче.

Сла́ва Отцу́ и Сы́ну и Свято́му Ду́ху:

Богому́дре Алекса́ндре, а́ще тя́ и напосле́док ле́т новопросвеще́нная Росси́йская страна́ возрасти́, но дре́вних че́сти сподо́бился еси́, дарова́ние чуде́с досто́йно прие́м.

И ны́не и при́сно и во ве́ки веко́в. Ами́нь.

Богоро́дичен: Зако́н кроме́ есте́ственных, Де́во, родила́ еси́ Законода́вца Бо́га, Челове́ка бы́вша: Того́, я́ко бла́га, моли́, Всенепоро́чная, на́ша беззако́ния презре́ти.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святый великий княже Александре, моли Бога о нас.

Свети́льник све́та яви́лся еси́, богоблаже́нне Алекса́ндре, неду́гов глубо́кую тму́ разруша́я всегда́, заре́ю све́тлою чуде́с, прему́дре.

Припев: Святый великий княже Александре, моли Бога о нас.

Престо́лу предстои́ши благода́ти, со Ангелы и все́ми святы́ми ра́дуяся дне́сь, и ми́ру исцеле́ния раздава́я бога́тство, спаси́ все́х на́с моли́твами твои́ми, блаже́нне.

Сла́ва Отцу́ и Сы́ну и Свято́му Ду́ху:

Жития́ твоего́ све́тлость, преподо́бне, все́м Бо́г я́ве показа́, возжже́нием свещи́ у гро́ба твоего́, те́мже прибега́ющии к тебе́ с ве́рою вси́ просвеща́ются.

И ны́не и при́сно и во ве́ки веко́в. Ами́нь.

Богоро́дичен: Яко вои́стинну Госпо́дь воцари́ся Ца́рствием неотпа́дающим, и облече́ся псало́мски из Тебе́, Богома́ти, в красне́йшее благоле́пие, пло́ть святу́ю, е́юже сме́рть прия́т и разруши́ ея́ ца́рство.

Седа́лен, гла́с 8:

Яко звезда́ многосве́тлая яви́лся еси́, све́тлаго ра́ди жития́ твоего́, сосу́д Свята́го Ду́ха бы́в. Сего́ ра́ди по мно́гих ле́тех во гро́бе нетле́нны обрето́шася святы́я твоя́ мо́щи, от ни́хже источа́еши ре́ки чуде́с исцеле́ний ве́рно зову́щим ти́: ра́дуйся, благове́рный вели́кий кня́же Алекса́ндре.

Сла́ва, и ны́не, Богоро́дичен:

Яко Всенепоро́чная Неве́ста Творца́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная Нетле́нная, отжени́ о́блак страсте́й и вы́шняго прича́стия сподо́би и Све́та невече́рняго моли́твами Твои́ми.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божcтво́.

Припев: Святый великий княже Александре, моли Бога о нас.

Заре́ю Трисо́лнечныя благода́ти сия́я, све́тло тво́ю па́мять пра́зднующих озари́ и стра́стнаго омраче́ния де́монскаго изба́ви, Алекса́ндре пресла́вне.

Припев: Святый великий княже Александре, моли Бога о нас.

Источи́л еси́ ре́ки чуде́с, блаже́нне, ве́рных напая́ющия сердца́ и му́тныя во́ды многобо́жия изсуша́ющия.

Сла́ва Отцу́ и Сы́ну и Свято́му Ду́ху:

Ца́рие и кня́зи, и свяще́нницы, и вельмо́жи, и ста́рцы со ю́нотами, и ве́сь во́зраст, све́тло торжеству́йте и па́мять блаже́ннаго в пе́снех возвели́чите.

И ны́не и при́сно и во ве́ки веко́в. Ами́нь.

Богоро́дичен: Име́ю Тя́ Помо́щницу и не постыжду́ся, Пречи́стая Ма́ти Бо́жия; име́ю Тя́ Предста́тельницу и вра́г мои́х не убою́ся.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Припев: Святый великий княже Александре, моли Бога о нас.

Стяжа́л еси́ благода́ть моли́тися за ны́, блаже́нне Алекса́ндре, те́мже су́щим в беда́х подава́еши избавле́ние твои́м заступле́нием, супоста́тов де́рзость низлага́еши и ми́р чудесы́ озаря́еши.

Припев: Святый великий княже Александре, моли Бога о нас.

Яко звезда́ све́тла яви́ся непреле́стна, пле́нных свободи́тель, и ни́щих богати́тель, и боля́щих вра́чь, царе́й побо́рник и гра́да свята́го Петра́ утвержде́ние.

Сла́ва Отцу́ и Сы́ну и Свято́му Ду́ху:

Яви́ся в Росси́йстей земли́ чудотво́рец пресла́вен, Алекса́ндр блаже́нный, я́ко всесве́тел свети́льник, сия́я во все́м ми́ре и во мра́це страсте́й су́щих озаря́я.

И ны́не и при́сно и во ве́ки веко́в. Ами́нь.

Богоро́дичен: Ме́ртвости и тли́ изба́вила еси́ челове́чество, естество́м бо Жизнода́вца и Бо́га без се́мене родила́ еси́, Де́во Всенепоро́чная, на благодея́ние восхваля́ющих Тя́ ве́рно.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святый великий княже Александре, моли Бога о нас.

От пречестна́го ко́рене изра́сл еси́ ве́твь, пресла́вне, и благоче́стно на земли́ пожи́л еси́, и прия́телище чи́сто Ду́ха яви́лся еси́, освяща́я ве́рою притека́ющия ко гро́бу твоему́, блаже́нне.

Припев: Святый великий княже Александре, моли Бога о нас.

Доброде́тели христиа́нския подви́жника и благочести́вым князе́м удобре́ние, Це́рковь сла́вит тя́ и воспева́ет, блаже́нне, моли́твами твои́ми пода́ждь чту́щим любо́вию до́блести твоя́ и боре́ния, лю́тых прегреше́ний оставле́ние.

Сла́ва Отцу́ и Сы́ну и Свято́му Ду́ху:

Иже в беда́х и в ско́рбех су́щии, к ра́це твое́й притека́юще, прие́млют многоразли́чныя дарова́ния, от живу́щия в нетле́нных оста́нках твои́х благода́ти, ты́ бо ми́ру при́сно источа́еши исцеле́ние.

И ны́не и при́сно и во ве́ки веко́в. Ами́нь.

Богоро́дичен: Су́щи пресвяты́й хра́м, Богоро́дице, Исто́чник родила́ еси́, Пренепоро́чная, неисчерпа́емый, Влады́чице.

Конда́к, гла́с 8. Подо́бен: Яко нача́тки.

Яко звезду́ тя́ пресве́тлую, почита́ем, от восто́ка возсия́вшую и на за́пад прише́дшую: всю́ бо страну́ сию́ чудесы́ и добро́тою обогаща́еши и просвеща́еши ве́рою чту́щия па́мять твою́, Алекса́ндре блаже́нне. Сего́ ра́ди дне́сь пра́зднуем твое́ успе́ние, лю́дие твои́ су́щии: моли́ спасти́ оте́чество твое́, и держа́ву Правосла́внаго Импера́тора на́шего [и́мярек] и вся́ притека́ющия к ра́це моще́й твои́х и ве́рно вопию́щия ти́: ра́дуйся, гра́ду на́шему утвержде́ние.

Ин конда́к, [гла́с 4]:

Якоже сро́дницы твои́ Бори́с и Гле́б яви́шася тебе́ с небесе́ в по́мощь, подвиза́ющемуся на Ве́лгера Све́йскаго и во́ев его́, та́ко и ты́ ны́не, блаже́нне Алекса́ндре, прииди́ в по́мощь твои́м сро́дником, и побори́ борю́щия ны́.

Икос:

Ве́лий чудотво́рец яви́лся еси́ Росси́йския земли́, блаже́нный Алекса́ндре, неви́димо Христо́вы лю́ди посеща́я и исцеле́ния подава́я бога́тно все́м от души́ приходя́щим и согла́сно вопию́щим си́це: ра́дуйся, сто́лпе пресве́тлый, просвеща́я на́с чуде́с светлостьми́; ра́дуйся, велехва́льнаго кра́ля победи́вый посо́бием Бо́жиим; ра́дуйся, свободи́вый гра́д Пско́в от неве́рных; ра́дуйся, лати́нская уче́ния презре́вый и пре́лесть и́х в ничто́же вмени́вый; ра́дуйся, я́ко восприя́л еси́ в тле́нных ме́сто нетле́нная; ра́дуйся, Све́та Непристу́пнаго зри́телю; ра́дуйся, я́ко лику́еши со Ангелы; ра́дуйся, о́блаче ро́сный, ве́рных мы́сли ороша́яй; ра́дуйся, те́мных страсте́й прогони́телю; ра́дуйся, Росси́йстей земли́ засту́пниче; ра́дуйся, Благове́рному Импера́тору помо́щниче, ра́дуйся, гра́ду на́шему заступле́ние.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Святый великий княже Александре, моли Бога о нас.

Яко звезда́ сия́я кра́сно, блаже́нне, заре́ю доброде́телей и благода́ти Бо́жия, те́м и на́с просвети́, вопию́щих ти́: ра́дуйся, Алекса́ндре благоче́стне.

Припев: Святый великий княже Александре, моли Бога о нас.

Ны́не сте́кшеся к ра́це пра́веднаго, свяще́нницы, и кня́зи, и вельмо́жи, бога́тии, и убо́зии, вку́пе вси́ ра́дующеся хвалу́ воздади́м Христу́ и уго́днику Его́ Алекса́ндру пресла́вному.

Сла́ва Отцу́ и Сы́ну и Свято́му Ду́ху:

Чудесы́ у́бо твои́ми, я́ко цве́т, процве́л еси́, блаже́нне, и исцеле́ния подава́еши притека́ющим в кро́в тво́й, му́дре и досточу́дне.

И ны́не и при́сно и во ве́ки веко́в. Ами́нь.

Богоро́дичен: От де́вственных ложе́сн Твои́х вопло́щься Бо́г, яви́ся на спасе́ние на́ше. Те́мже Тя́ Ма́терь ве́дуще, Богоро́дице, правове́рно вопие́м Ему́: оте́ц на́ших Бо́же, благослове́н еси́.

Пе́снь 8.

Ирмос: Богоглаго́ливии о́троцы, в пещи́ со огне́м пла́мень попира́юще, поя́ху: благослови́те, дела́ Госпо́дня, Го́спода.

Припев: Святый великий княже Александре, моли Бога о нас.

Яко у́тро, я́ко де́нь све́тлый тво́й пра́здник яви́ся, просвеща́я на́ша сердца́, и все́х с ве́рою восхваля́ющих тя́, Алекса́ндре пресла́вне.

Припев: Святый великий княже Александре, моли Бога о нас.

Де́нь све́тлаго торжества́ наста́, стеце́мся, ве́рнии, очи́стивше вку́пе ду́ши и телеса́: се́ бо на́с призыва́ет Алекса́ндр боже́ственный.

Сла́ва Отцу́ и Сы́ну и Свято́му Ду́ху:

Струя́ происхо́дит от ра́ки твоея́, Алекса́ндре, исцеле́ний вся́ческих, и омыва́ет скве́рны страсте́й, и гное́ния лю́тых очища́ет, и все́х ве́рных напая́ет сердца́ любо́вию чту́щих тя́, пресла́вне.

И ны́не и при́сно и во ве́ки веко́в. Ами́нь.

Богоро́дичен: Образы нося́щи дре́вле Рождества́ Твоего́, Де́во Ма́ти: пе́щь у́бо ю́ношей не опали́, та́кожде и о́гнь Боже́ственный утро́бы Твоея́, Чи́стая.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святый великий княже Александре, моли Бога о нас.

Ве́лий щи́т и кре́пость в Росси́йстей земли́, Алекса́ндре, обре́лся еси́, Правосла́вному же Импера́тору на́шему похвале́ние и сла́ва во все́х язы́цех, и ны́не мо́лимся ти́: сохраня́й оте́чество твое́ от язы́ка чужда́го.

Припев: Святый великий княже Александре, моли Бога о нас.

Незаходи́маго све́та луча́ми во тме́ су́щим сия́я, сла́вне, к све́тлому торжеству́ о Го́споде, Спа́се на́шем, наста́ви ны́, пою́щия тя́.

Сла́ва Отцу́ и Сы́ну и Свято́му Ду́ху:

Блаже́нне Алекса́ндре, ка́ко тя́ возмо́жем воспе́ти досто́йно? Вити́йствующий бо язы́к не мо́жет восхвали́ти дово́льно до́блести твоя́, и изглаго́лати мно́гая дарова́ния исцеле́ний от всечестна́го гро́ба твоего́.

И ны́не и при́сно и во ве́ки веко́в. Ами́нь.

Богоро́дичен: Яко у́тро, те́мным и блужда́ющим, Де́во, возсия́ пра́вды Со́лнце — Христо́с, Его́же на рука́х Твои́х носи́ла еси́, Чи́стая.

Свети́лен. Подо́бен: Жены́, услы́шите.

Слы́шана бы́сть, во дни́ жития́ твоего́ на земли́, во все́х страна́х превели́кая сла́ва твоя́, и тогда́ жены́ Моави́тския страша́ху де́ти своя́ гро́зным твои́м и́менем. И ны́не, блаже́нне, враги́ на́ша неви́димо устраша́й, ополча́ющияся на христолюби́вое твое́ во́инство.

Молитва святому благоверному Александру Невскому

Скорый помощниче всех усердно к тебе прибегающих и теплый наш пред Господем предстателю, святый благоверный княже Александре! Призри милостивно на ны недостойныя многими беззаконии непотребны себе сотворшия, к раце мощей твоих ныне притекающия и из глубины сердца тебе взывающия: ты в житии своем ревнитель и защитник православныя веры был еси, и нас в ней теплыми твоими молитвами непоколебимы утвер­ди. Ты великое, возложенное на тя служение тщательно проходил еси, и нас твоею помощию пребывати коегождо, в нейже призван есть, настави. Ты, победив полки супостатов, от пределов Российских отгнал еси, и на нас ополчающихся всех видимых и невидимых врагов низло­жи. Ты, оставив тленный венец царства земнаго, избрал еси безмолвное житие, и ныне праведно венцем нетлен­ным увенчанный, на небесех царствуеши, ходатайствуй и нам, смиренно молим тя, житие тихое и безмятежное и к вечному Царствию шествие неуклонное твоим предстательством устрой нам. Предстоя же со всеми святы­ми Престолу Божию, молися о всех православных христианах, да сохранит их Господь Бог Своею благодатию в мире, здравии, и благоденствии, и всяком благополучии в должайшая лета, да и присно славим и благословим Бога, в Троице Святей славимаго Отца, и Сына, и Святаго Духа, ныне и присно и во веки веков. Аминь.