5 декабря

Канон второй благовернаго великаго князя Михаила Ярославича Тверскаго.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Возвы́сив у́м тво́й к Бо́гу, и жития́ со Ангелы возжеле́л еси́, тле́нную сла́ву земну́ю оста́вил еси́, блаже́нне, и положи́л еси́ ду́шу твою́ за лю́ди твоя́, восприя́л еси́ вене́ц проти́ву трудо́в твои́х, богому́дре Михаи́ле, моли́ Христа́ Бо́га о чту́щих любо́вию святу́ю па́мять твою́.

Други́й кано́н свята́го. Гла́с 6.

Пе́снь 1.

Ирмо́с: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святый княже Михаиле, моли Бога о нас.

Яко по зако́ну ходи́в, смире́нную му́дрость восприя́л еси́, вели́кий страда́льче, со святы́ми Тро́ице предстоя́, моли́ся очище́ние на́м дарова́ти, тебе́ похваля́ющим.

Припев: Святый княже Михаиле, моли Бога о нас.

Боже́ственное бога́тство исцеле́ний и мѵ́ро благово́нное источа́ет хра́м тво́й, свя́те, в не́мже пое́м Христа́ Бо́га, просла́вльшаго тя́.

Сла́ва Отцу́ и Сы́ну и Свято́му Ду́ху:

Незаходи́мое Со́лнце в себе́ стяжа́в — Христа́, Бо́га на́шего, пресла́вный Михаи́ле, освяти́ ны, честну́ю па́мять твою́ почита́ющия.

И ны́не и при́сно и во ве́ки веко́в. Ами́нь.

Богоро́дичен: Красну́ и избра́нну Всечи́стую, разуме́в Тя́, Сы́н Бо́жий, Всенепоро́чная, Сы́н Тво́й бы́сть, сы́ны сотвори́ благода́тию Богоро́дицу Тя́ чту́щия.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святый княже Михаиле, моли Бога о нас.

Весе́лием весели́тся Христо́ва Це́рковь в па́мять твою́, свя́те, и Творцу́ вопие́т: Ты́ моя́, Го́споди, кре́пость, и прибе́жище, и утвержде́ние.

Припев: Святый княже Михаиле, моли Бога о нас.

До́бляго вене́чника и страда́льца Христо́ва восхва́лим све́тло, научи́вшаго на́с Христу́ вопи́ти: свя́т еси́, Го́споди.

Сла́ва Отцу́ и Сы́ну и Свято́му Ду́ху:

Ни ца́рства жела́ние, ни пи́щи наслажде́ние, ни сребра́, ни зла́та возжеле́в, но Христу́ еди́ному вопия́ше: свя́т еси́, Го́споди, ино́го бо, ра́зве Тебе́, не зна́ю.

И ны́не и при́сно и во ве́ки веко́в. Ами́нь.

Богоро́дичен: Избавля́ющаго челове́ки преслуша́ния и лю́таго паде́ния, всему́ Вино́внаго, Чи́стая и Всенепоро́чная, родила́ еси́.

Седа́лен свята́го, гла́с 8.

Му́дростию Бо́жиею уразуме́л еси́ мимоходя́щую жи́знь и о княже́нии небре́г, но на небе́сное Ца́рство прите́кл еси́, повину́яся сыновцу́, я́ко овча́ незло́биво, без пра́вды ноже́м закала́емь бы́л еси́, я́ко бо свире́пии зве́рие беззло́бива а́гнца без вины́ тя́ убива́ху. Те́м и со Ангелы веселя́ся, Михаи́ле свя́те, моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Сла́ва, и ны́не, Богоро́дичен:

Безневе́стная Чи́стая Богоро́дице Де́во, еди́на ве́рных предста́тельнице и покро́ве, бе́д, и скорбе́й, и лю́тых обстоя́ний вся́ изба́ви на Тя́ наде́жду, Отрокови́це, иму́щия и ду́ши на́ша спаси́ Боже́ственными мольба́ми Твои́ми.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Святый княже Михаиле, моли Бога о нас.

Благода́тию из мла́да в ве́ре чи́сте воспита́н, ча́стыми труды́ и любо́вию Влады́це после́довал еси́ и наде́ждею Его́ льсти́ваго врага́ посрами́л еси́.

Припев: Святый княже Михаиле, моли Бога о нас.

Врачевство́ неистощи́мое ра́ка твоя́ показа́ся, блаже́нне, и приста́нище небу́рное: вси́, ве́рою притека́ющии, обрета́ем от злы́х избавле́ние.

Сла́ва Отцу́ и Сы́ну и Свято́му Ду́ху:

Любо́вию ко Христу́ привяза́емь, те́м и да́ра сподо́блься стра́сти разли́чныя исцеля́ти. Сего́ ра́ди твое́ соверша́ем пра́зднество, богому́дре.

И ны́не и при́сно и во ве́ки веко́в. Ами́нь.

Богоро́дичен: Просвети́ мя, Пречи́стая Госпоже́, омраче́ннаго грехо́вными страстьми́, в тле́нии лежа́ща, моли́твами Твои́ми свободи́.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Святый княже Михаиле, моли Бога о нас.

Наста́ всечестны́й пра́здник и свяще́нное торжество́ Михаи́ла сла́внаго, нося́щаго на́м ра́дость ве́чную, в не́йже сла́вим Го́спода, просла́вльшаго его́.

Припев: Святый княже Михаиле, моли Бога о нас.

Доброде́телей укра́шенный благоле́пием, све́тлый Михаи́ле, страда́нием венча́вся, врага́ же и сыновца́ посрами́в, по Христе́ прие́мля заколе́ние.

Сла́ва Отцу́ и Сы́ну и Свято́му Ду́ху:

Слы́шано бы́сть во все́м ми́ре честно́е и свяще́нное страда́ние твое́, и вся́к язы́к составля́ет сла́вити Христа́, тебе́ просла́вльшаго.

И ны́не и при́сно и во ве́ки веко́в. Ами́нь.

Богоро́дичен: Преста́ у́бо тле́ние, Де́ва бо роди́ нетле́нно Бо́га Сло́ва па́че естества́ и сло́ва, Де́ва и по Рождестве́ пребы́вши.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Святый княже Михаиле, моли Бога о нас.

Житие́ вре́менное презре́в и о княже́нии неради́в све́та сего́, не воспроти́влься врагу́ и сыновцу́, но па́че на Го́спода взира́ше мы́слию.

Припев: Святый княже Михаиле, моли Бога о нас.

Све́тлый тво́й пра́здник о соверша́ющих, блаже́нне, моли́ся, оте́чество твое́ сохрани́ти от вра́г ненаве́тно и ми́рно строе́ние дарова́ти моли́твами твои́ми.

Сла́ва Отцу́ и Сы́ну и Свято́му Ду́ху:

Княже́ние земно́е и ца́рское украше́ние оста́вив, восприя́л еси́ вене́ц из Бо́жия Влады́чни десни́цы и со Ангелы лику́еши. Моли́ Го́спода за ны́, чту́щия твою́ па́мять.

И ны́не и при́сно и во ве́ки веко́в. Ами́нь.

Богоро́дичен: Усты́, и по́мыслом, и се́рдцем, Пречи́стая, пропове́дуем Тя́, веселя́щеся: Тобо́ю бо Бо́гу примири́хомся, отринове́ннии преступле́нием пе́рвее пра́отца.

Конда́к, гла́с 2. Подо́бен: Вы́шних ища́.

Вы́шних ища́ и земну́ю сла́ву презре́в, Це́рковь Бо́жию обагри́л еси́ твое́ю кро́вию, за Ню́же и пострада́л еси́, свя́те Михаи́ле, заколе́ние непра́ведное прие́мь, веселя́ся. Те́мже со Ангелы предстоя́ Христу́ Бо́гу, моли́ непреста́нно за вся́ ны́.

Икос:

Сла́ву возненави́дел еси́ тле́нную и мимотеку́щую, и доброде́тели яви́лся еси́ сосу́д, сла́вне, от ю́ности и, зако́н Бо́жий от души́ возлюби́в и зре́ние к жи́зни гряду́щей, о че́сти земне́й и сла́сти небре́г, нетле́нное Ца́рство восприя́л еси́; Христо́ве за́поведи после́дуя, положи́л еси́ ду́шу твою́ за ны́ и Христо́ве стра́сти уподо́бился еси́, заколе́н в ре́бра, и кро́вию твое́ю изба́вил еси́ ны́ пога́ных наше́ствия и го́рькия сме́рти. Сего́ ра́ди вопие́м ти́: страстоте́рпче Михаи́ле, со Ангелы предстоя́, моли́ся за вся́ ны́.

Пе́снь 7.

Ирмо́с: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Святый княже Михаиле, моли Бога о нас.

Ле́стию прелука́ваго дре́вле, очервлена́ бы́сть земля́ кро́вию Авеля братоуби́йственною руко́ю Ка́ина, ны́не же кро́вию твое́ю окропи́вшися, благоуха́ния же́ртву Христу́ приноша́ет, вопию́ще: благослове́н Бо́г оте́ц на́ших.

Припев: Святый княже Михаиле, моли Бога о нас.

Боже́ственная и пресве́тлая па́мять твоя́, я́ко не́бо, светоза́рно показа́ся, я́ко со́лнце, светоно́сно просвеща́я без сумне́ния Христу́ вопию́щия: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Кто́ не удиви́тся и кто́ не воспое́т и просла́вит ве́рно пресла́внаго му́ченика Христо́ва Михаи́ла? Христо́ва ра́ди смире́ния возненави́девша диади́му и ца́рство.

И ны́не и при́сно и во ве́ки веко́в. Ами́нь.

Богоро́дичен: Тобо́ю на́м, Де́во, све́т возсия́, те́мным, и отпу́ст плене́нным, Ты́ бо родила́ еси́ Зижди́теля все́х, Бо́га, у Него́же испроси́, Пречи́стая, посла́ти ве́рным ве́лию ми́лость.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Святый княже Михаиле, моли Бога о нас.

Просия́вши дне́сь пресве́тлая па́мять твоя́, преблаже́нне, ве́рныя созыва́ет ны́ на торжество́ просла́вити терпе́ния твоя́, Христу́ же вопи́ти: благослови́те, вся́ дела́ Госпо́дня, Го́спода.

Припев: Святый княже Михаиле, моли Бога о нас.

Те́ло твое́ свято́е и преблаже́нное прии́мши, свята́я Це́рковь дне́сь весели́тся с ве́рными, преди́вная чудеса́ ви́дящи, Христа́ превозно́сим во ве́ки.

Сла́ва Отцу́ и Сы́ну и Свято́му Ду́ху:

Богоявле́нный но́вый страда́лец Тебе́, Христе́, еди́наго возлюби́ и лю́ди наста́ви пе́ти Тя́, Творца́ все́х: благослови́те и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Све́т и Светода́вца Сло́во зачала́ еси́ и неизрече́нно родила́ еси́ Пресу́щнаго: Ду́х Бо́жий, Де́во, в Тя́ всели́ся. Те́м Тя́ пое́м, Чи́стая, во ве́ки вся́.

Песнь 9

Ирмо́с: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Святый княже Михаиле, моли Бога о нас.

Укра́шен бы́в Боже́ственными добро́тами, страда́нии твои́ми к Бо́гу восте́кл еси́, вене́ц побе́ды от Него́ прие́мь. Те́м твоя́ певцы́ помина́й, да тя́ непреста́нно велича́ем.

Припев: Святый княже Михаиле, моли Бога о нас.

От мла́да во́зраста освяти́ тя Вседе́тель Бо́г и ко́рмчия изря́дна пла́вающим в мо́ри жития́ показа́в. Те́м согла́сно почита́ем па́мять твою́.

Сла́ва Отцу́ и Сы́ну и Свято́му Ду́ху:

Прии́м блаже́нный поко́й, не преста́й моля́ся, пресла́вне, святы́х блаже́нству причасти́тися на́м, чту́щим па́мять твою́, Михаи́ле, пресла́вную.

И ны́не и при́сно и во ве́ки веко́в. Ами́нь.

Богоро́дичен: Богоро́дице Де́во, ро́ждшая Сло́во па́че словесе́, Зижди́теля Твоего́, Того́ моли́ за ны́ с си́м блаже́нным Михаи́лом, ве́рно чту́щия Тебе́, Богоро́дице.

Свети́лен:

Свети́ло, на́м просия́вшее в после́днее вре́мя, просвети́ ны, твоя́ певцы́, святы́й великому́чениче Михаи́ле, и моли́ за ны́ Го́спода, чту́щия па́мять твою́.

Молитва

Ди́вный во страда́льцех святы́й благове́рный вели́кий кня́же Михаи́ле! Ве́лия по́двиги и труды́ твоя́, я́же за правове́рие, за Це́рковь Бо́жию и за оте́чество твое́ град Тверь положи́л еси́. Ты, возжела́в вы́шних, оста́вил еси́ тле́нную сла́ву земну́ю, и ревну́я подви́жником Христо́вым, до́блественно противуста́л еси́ я́рости царя́ нечести́ваго и преще́нию зломы́шленнаго его́ воево́ды. Ты, прие́м непра́ведное осужде́ние и заколе́ние, восприя́л еси́ Небе́сное Ца́рствие, и кро́вными ка́плями, я́ко пречу́дным ка́менем, украси́в на главе́ свое́й вене́ц, предстои́ши ны́не на Небесе́х Престо́лу всех Влады́ки с ли́ки А́нгел и со все́ми святы́ми Его́. Сего́ ра́ди, притека́юще к ра́це моще́й твои́х, лобыза́ем о́ныя серде́чными устна́ми и уми́льно к тебе́ взыва́ем: о тезоимени́те небе́сному воево́де вы́шних сил, вели́кий кня́же Михаи́ле! Моли́ся непреста́нно Христу́ Бо́гу за град твой, за лю́ди и за вся правосла́вныя христиа́ны. Бу́ди спобо́рник кре́пок на враго́в правосла́вия Це́ркви Христо́вой. Бу́ди и нам помо́щник улучи́ти вся, к по́льзе на́шей и ко спасе́нию благопотре́бная, охраня́й нас от искуше́ний и напа́стей, приходя́щих во вре́менней жи́зни, и не лиши́ нас хода́тайства твоего́ ко Христу́ Бо́гу, во е́же получи́ти нам прегреше́ний проще́ние и сподо́битися Небе́снаго селе́ния со избра́нными Его́, я́ко да и в сем сла́вится пречестно́е и великоле́пое и́мя Его́ во ве́ки. Ами́нь.