5 декабря

Канон первый благовернаго великаго князя Михаила Ярославича Тверскаго.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Возвы́сив у́м тво́й к Бо́гу, и жития́ со Ангелы возжеле́л еси́, тле́нную сла́ву земну́ю оста́вил еси́, блаже́нне, и положи́л еси́ ду́шу твою́ за лю́ди твоя́, восприя́л еси́ вене́ц проти́ву трудо́в твои́х, богому́дре Михаи́ле, моли́ Христа́ Бо́га о чту́щих любо́вию святу́ю па́мять твою́.

Кано́н свята́го, гла́с 8.

Пе́снь 1.

Ирмо́с: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.

Припев: Святый княже Михаиле, моли Бога о нас.

В по́мощь Тебе́, Христе́, призыва́ю и дерза́ю воспе́ти страстоте́рпца Твоего́ па́мять устна́ми недосто́йными: Влады́ко Христе́, утверди́ помышле́ние на хвалосло́вие Твоего́ уго́дника.

Припев: Святый княже Михаиле, моли Бога о нас.

Росси́йское удобре́ние, и похвала и кре́пость тво́й показа́в доброу́мный смы́сл, богому́дре Михаи́ле досточу́дне.

Сла́ва Отцу́ и Сы́ну и Свято́му Ду́ху:

С де́рзостию прия́л еси́ Христо́во уче́ние в се́рдцы, е́же положи́ти ду́шу твою́ за дру́ги твоя́; я́коже Христо́с за ны́ кро́вь Свою́ пролия́.

И ны́не и при́сно и во ве́ки веко́в. Ами́нь.

Богоро́дичен: Засту́пнице скорбя́щих, спасе́ния Наде́жда ненаде́ющихся, Богоро́дице Всепе́тая, моли́ приле́жно изба́витися на́м от бе́д.

Пе́снь 3.

Ирмо́с: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Припев: Святый княже Михаиле, моли Бога о нас.

Оби́телище бы́сть Свята́го Ду́ха твое́ свято́е се́рдце, и́мже не убоя́лся еси́ непра́веднаго царя́ я́рости, страстоте́рпче Михаи́ле.

Припев: Святый княже Михаиле, моли Бога о нас.

От святу́ю боку́ богому́дрыя Ксе́нии, блаже́нне, роди́лся еси́, с не́юже тя́ блажи́м, страда́льче прехва́льне, спаси́ гра́д тво́й и лю́ди, пою́щия тя́.

Сла́ва Отцу́ и Сы́ну и Свято́му Ду́ху:

Заколе́н бы́л еси́ от непра́ведных твои́х уби́йц и вопия́л еси́ Влады́це Христу́: приими́ ду́х мо́й, Влады́ко, на Тя́ бо упова́ние мое́ возложи́х, Го́споди.

И ны́не и при́сно и во ве́ки веко́в. Ами́нь.

Богоро́дичен: Глаго́лы пропове́дник богогла́сных исполня́ются, сего́ роди́ Де́ва но́ваго Младе́нца, Ада́ма старе́йша и сопресто́льна Роди́телю.

Седа́лен свята́го, гла́с 8.

Му́дростию Бо́жиею уразуме́л еси́ мимоходя́щую жи́знь и о княже́нии небре́г, но на небе́сное Ца́рство прите́кл еси́, повину́яся сыновцу́, я́ко овча́ незло́биво, без пра́вды ноже́м закала́емь бы́л еси́, я́ко бо свире́пии зве́рие беззло́бива а́гнца без вины́ тя́ убива́ху. Те́м и со Ангелы веселя́ся, Михаи́ле свя́те, моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Сла́ва, и ны́не, Богоро́дичен:

Безневе́стная Чи́стая Богоро́дице Де́во, еди́на ве́рных предста́тельнице и покро́ве, бе́д, и скорбе́й, и лю́тых обстоя́ний вся́ изба́ви на Тя́ наде́жду, Отрокови́це, иму́щия и ду́ши на́ша спаси́ Боже́ственными мольба́ми Твои́ми.

Пе́снь 4.

Ирмо́с: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́.

Припев: Святый княже Михаиле, моли Бога о нас.

Прии́дем, бра́тие, к честне́й ра́це во́ина Христо́ва и му́ченика Михаи́ла и облобыза́ем серде́чными устна́ми, прие́млюще неоску́дныя да́ры от трудополо́жника Христа́ и Спа́са ду́ш на́ших.

Припев: Святый княже Михаиле, моли Бога о нас.

Бо́жиим про́мыслом и Свята́го Ду́ха де́телию твое́ свято́е те́ло от губи́тельныя страны́ принесено́ бы́сть, источа́ющее на́м ре́ки исцеле́ний струя́ми крове́й твои́х, Михаи́ле.

Сла́ва Отцу́ и Сы́ну и Свято́му Ду́ху:

После́довал еси́ Христу́ и му́це Его́ уподо́бился еси́, преблаже́нне богоно́се Михаи́ле, певцы́ твоя́ сохраня́й и гра́д на́ш заступи́ от нахожде́ния пога́ных и от все́х бе́д богоприя́тными твои́ми моли́твами.

И ны́не и при́сно и во ве́ки веко́в. Ами́нь.

Богоро́дичен: Просвети́, Чи́стая, души́ моея́ о́чи, Све́т роди́вшая, да не пости́гнет мене́ грехо́вная тма́ тя́жкая и глубина́ отча́яния покры́ет мя́, но Сама́ мя спаси́ и напра́ви к тишине́ Боже́ственнаго хоте́ния.

Пе́снь 5

Ирмо́с: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны, Го́споди ра́зве Тебе́ ино́го не ве́мы, и́мя Твое́ имену́ем.

Припев: Святый княже Михаиле, моли Бога о нас.

Го́споди Бо́же мо́й, — Михаи́л вопия́ше, — Ты́ у́бо, Го́споди, на́с ра́ди сме́рти вкуси́л еси́ и спа́сл еси́ ро́д челове́ческий Твое́ю кро́вию, Христе́ Бо́же.

Припев: Святый княже Михаиле, моли Бога о нас.

Го́споди Бо́же мо́й, сподо́би мя́ прия́ти небе́снаго селе́ния и сла́вы неизрече́нныя и в тле́нных ме́сто нетле́нная пода́ждь, Влады́ко, вопия́л еси́, богови́дче.

Сла́ва Отцу́ и Сы́ну и Свято́му Ду́ху:

Тезоимени́те вы́шняго воево́ды, Михаи́ле, огнезра́чнаго, с ни́мже умоли́ Христа́ пода́ти ми́ръИмпера́тору на́шему [и́мярек] и утиши́ти вра́жия стремле́ния.

И ны́не и при́сно и во ве́ки веко́в. Ами́нь.

Богоро́дичен: Укрепи́, Влады́чице, сла́вящаго Тя́ Импера́тора на проти́вныя враги́, я́ко Дави́да на Голиа́фа, да Тебе́, веселя́щеся, воспева́ем: ра́дуйся, Покро́ве святы́й и Засту́пнице ро́да на́шего.

Пе́снь 6.

Ирмо́с: Якоже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви, я́ко Человеколю́бец, и упра́ви живо́т мо́й, молю́ся.

Припев: Святый княже Михаиле, моли Бога о нас.

Све́том благода́ти озаря́емь, страстоте́рпче му́дре, невозвра́тно ше́ствовал еси́ путе́м, вводя́щим к вы́шнему Иерусали́му: Святы́й бо Ду́х наста́ви тя́, обита́яй в се́рдце твое́м, Михаи́ле.

Припев: Святый княже Михаиле, моли Бога о нас.

Тле́нная бу́дущими измени́л еси́, я́ко ме́чь обоюдуо́стр, вооружи́вся стра́хом Христо́вым, го́рькую сме́рть в ничто́же вмени́л еси́, сла́вы вы́шния жела́я.

Сла́ва Отцу́ и Сы́ну и Свято́му Ду́ху:

Ум тво́й к Бо́гу впери́в, наде́ждею и ве́рою укрепи́вся, я́ко во́ин непобе́дный, заколе́ния непра́веднаго не убоя́лся еси́, му́дре, богови́дче Михаи́ле.

И ны́не и при́сно и во ве́ки веко́в. Ами́нь.

Богоро́дичен: Тебе́ припа́дающе, Госпоже́, и ве́рою покланя́ющеся, мо́лим Тя́: ра́дуйся, Богоблаже́нная Де́во, покро́ве и огражде́ние на́ше, помо́щнице в беда́х су́щим, спаси́ ны, не иму́щия по́мощи, на Тя́ бо наде́емся.

Конда́к, гла́с 2. Подо́бен: Вы́шних ища́.

Вы́шних ища́ и земну́ю сла́ву презре́в, Це́рковь Бо́жию обагри́л еси́ твое́ю кро́вию, за Ню́же и пострада́л еси́, свя́те Михаи́ле, заколе́ние непра́ведное прие́мь, веселя́ся. Те́мже со Ангелы предстоя́ Христу́ Бо́гу, моли́ непреста́нно за вся́ ны́.

Икос:

Сла́ву возненави́дел еси́ тле́нную и мимотеку́щую, и доброде́тели яви́лся еси́ сосу́д, сла́вне, от ю́ности и, зако́н Бо́жий от души́ возлюби́в и зре́ние к жи́зни гряду́щей, о че́сти земне́й и сла́сти небре́г, нетле́нное Ца́рство восприя́л еси́; Христо́ве за́поведи после́дуя, положи́л еси́ ду́шу твою́ за ны́ и Христо́ве стра́сти уподо́бился еси́, заколе́н в ре́бра, и кро́вию твое́ю изба́вил еси́ ны́ пога́ных наше́ствия и го́рькия сме́рти. Сего́ ра́ди вопие́м ти́: страстоте́рпче Михаи́ле, со Ангелы предстоя́, моли́ся за вся́ ны́.

Пе́снь 7.

Ирмо́с: Халде́йская пе́щь, огне́м распаля́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

Припев: Святый княже Михаиле, моли Бога о нас.

Вели́чие на́ше и похвала́, ты́ еси́, Михаи́ле богому́дре, тобо́ю бо от пога́нския рабо́ты свободи́хомся. И ны́не моли́ за ро́д тво́й и лю́ди, вопию́щия: благослове́н Бо́г оте́ц на́ших.

Припев: Святый княже Михаиле, моли Бога о нас.

Ты́ уподо́бился еси́ Моисе́ю богови́дцу, сокруше́нным се́рдцем моля́ся о ста́де твое́м изба́вити гра́д тво́й и лю́ди от вра́жия рабо́ты, вопию́щия: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Всехва́льный гла́с и мольбу́ тебе́ возсыла́ем, к ра́це моще́й твои́х приходя́ще, блаже́нне Михаи́ле: проси́ ми́ра Импера́тору на́шему [и́мярек] и душа́м на́шим оставле́ния грехо́в, пою́щим: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Неиспи́санная мно́гими проро́ки, не све́дома же бы́сть, Де́во, небе́сными служа́щими Бо́гу Ангелы, ны́не же Тя́ вси́ ве́дуще, Богоро́дицу, Твоея́ тре́буем по́мощи и заступле́ния, Благослове́нная.

Пе́снь 8.

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Припев: Святый княже Михаиле, моли Бога о нас.

В наро́читый де́нь свята́го преставле́ния ра́достно пра́зднуем, пе́снь моле́бную Христу́ возсыла́юще, нетле́нным венце́м венча́вшу тя́, прехва́льне Михаи́ле: проси́ на́м оставле́ния грехо́в, сла́вящим тя́ ве́рно.

Припев: Святый княже Михаиле, моли Бога о нас.

Похва́льныя цве́ты, я́ко ца́рский вене́ц, богому́дрей твое́й главе́ в па́мять прино́сим, ю́же Христо́с нетле́нием венча́, преблаже́нне Михаи́ле: моли́ся о ста́де твое́м, изба́витися гра́ду твоему́ от вся́кия беды́.

Сла́ва Отцу́ и Сы́ну и Свято́му Ду́ху:

Лива́н ли го́ру нарече́м тя́, богому́драя Ксе́ние, или́ Фисо́н реку́, добре́йши сапфи́ра и ка́мения честна́го, блаже́ннаго Михаи́ла ро́ждшую? Имже просвети́ся Росси́йская страна́, и́же и мо́лится за на́с ко Го́споду.

И ны́не и при́сно и во ве́ки веко́в. Ами́нь.

Богоро́дичен: Горды́ню и шата́ния низложи́, и сове́ты непра́ведныя князе́й разори́, и зачина́ющия ра́ть погуби́, о Ма́ти Бо́жия, Пречи́стая Де́во! ро́г наш возвы́си, да Тво́й, Пречи́стая, пра́здник сла́вим, Богоро́дице Де́во, во ве́ки вся́.

Песнь 9

Ирмо́с: Чу́жде ма́терем де́вство, и стра́нно де́вам деторожде́ние; на Тебе́, Богоро́дице, обоя́ устро́ишася. Те́м Тя́, вся́ племена́ земна́я, непреста́нно велича́ем.

Припев: Святый княже Михаиле, моли Бога о нас.

Приими́ похвалу́ от ра́б недосто́йных и моли́тву о на́с сотвори́ к Бо́гу, че́стно творя́щих твою́ па́мять, да от бе́д, и печа́лей, и гре́х лю́тых свободи́мся, тя́ велича́юще.

Припев: Святый княже Михаиле, моли Бога о нас.

Яко голуби́ца целому́драя, на фи́никс доброде́тели возше́л еси́, кри́ла иму́щи свяще́нна и позлаще́нна, и́миже возлете́в, в ра́йстей пи́щи водворя́ешися, преблаже́нне.

Сла́ва Отцу́ и Сы́ну и Свято́му Ду́ху:

Предстоя́ у престо́ла все́х Влады́ки, богови́дче Михаи́ле, о творя́щих честно́е твое́ пра́зднество, гра́ду на́шему изба́витися от напа́стей и бе́д, здра́вие и побе́ду Благове́рному Импера́тору на́шему[и́мярек] и все́м князе́м на́шим на проти́вныя враги́, испроси́ моли́твами твои́ми.

И ны́не и при́сно и во ве́ки веко́в. Ами́нь.

Богоро́дичен: Высо́кий Царю́, со Отце́м седя́й и от Серафи́м пое́мый, при́зри на мольбу́ Ма́терню, ю́же Ти́ за ны́ дне́сь прино́сит. Очи́сти грехи́ на́ша, и спаси́ гра́д, и лю́ди умно́жи, и да́ждь здра́вие телеси́ и на пога́ныя побе́ду, моли́твами ро́ждшия Тя́.

Свети́лен:

Свети́ло, на́м просия́вшее в после́днее вре́мя, просвети́ ны, твоя́ певцы́, святы́й великому́чениче Михаи́ле, и моли́ за ны́ Го́спода, чту́щия па́мять твою́.

Молитва

Ди́вный во страда́льцех святы́й благове́рный вели́кий кня́же Михаи́ле! Ве́лия по́двиги и труды́ твоя́, я́же за правове́рие, за Це́рковь Бо́жию и за оте́чество твое́ град Тверь положи́л еси́. Ты, возжела́в вы́шних, оста́вил еси́ тле́нную сла́ву земну́ю, и ревну́я подви́жником Христо́вым, до́блественно противуста́л еси́ я́рости царя́ нечести́ваго и преще́нию зломы́шленнаго его́ воево́ды. Ты, прие́м непра́ведное осужде́ние и заколе́ние, восприя́л еси́ Небе́сное Ца́рствие, и кро́вными ка́плями, я́ко пречу́дным ка́менем, украси́в на главе́ свое́й вене́ц, предстои́ши ны́не на Небесе́х Престо́лу всех Влады́ки с ли́ки А́нгел и со все́ми святы́ми Его́. Сего́ ра́ди, притека́юще к ра́це моще́й твои́х, лобыза́ем о́ныя серде́чными устна́ми и уми́льно к тебе́ взыва́ем: о тезоимени́те небе́сному воево́де вы́шних сил, вели́кий кня́же Михаи́ле! Моли́ся непреста́нно Христу́ Бо́гу за град твой, за лю́ди и за вся правосла́вныя христиа́ны. Бу́ди спобо́рник кре́пок на враго́в правосла́вия Це́ркви Христо́вой. Бу́ди и нам помо́щник улучи́ти вся, к по́льзе на́шей и ко спасе́нию благопотре́бная, охраня́й нас от искуше́ний и напа́стей, приходя́щих во вре́менней жи́зни, и не лиши́ нас хода́тайства твоего́ ко Христу́ Бо́гу, во е́же получи́ти нам прегреше́ний проще́ние и сподо́битися Небе́снаго селе́ния со избра́нными Его́, я́ко да и в сем сла́вится пречестно́е и великоле́пое и́мя Его́ во ве́ки. Ами́нь.

Молитва 2-я благоверному князю Михаилу Тверскому

О, святы́й кня́же Михаи́ле! Испроси́ нам, раба́м Бо́жиим (имена), у Го́спода Бо́га предста́тельством твои́м мир, здра́вие, долгоде́нствие и во всем благоспе́шество. Бу́ди нам помо́щник вся, я́же ко спасе́нию и по́льзе на́шей, восприя́ти; охраня́й нас от искуше́ний и напа́стей, во вре́менней жи́зни приходя́щих, и не лиши́ нас хода́тайства твоего́ ко Христу́ Бо́гу, во е́же получи́ти нам прегреше́ний проще́ние и сподо́битися Небе́снаго селе́ния со избра́нными Его́, я́ко да и в сем сла́вится пречестно́е и великоле́пое и́мя Его́ во ве́ки веко́в. Ами́нь.