5 декабря

Канон апостола Филимона и иже с ним

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь апо́столов, гла́с 3:

Апо́столи святи́и, моли́те ми́лостиваго Бо́га, да прегреше́ний оставле́ние пода́ст душа́м на́шим.

Кано́н. Гла́с 2.

Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Святый апостоле Филимоне, моли Бога о нас.

Ликоходя́ ра́достно небе́сная, священноде́лателю, селе́ния, благода́ть пода́ждь ми́, святу́ю твою́ па́мять боже́ственно воспева́ющему: ты́ бо просла́вился еси́.

Припев: Святый апостоле Филимоне, моли Бога о нас.

Струя́ми твои́х слове́с сердца́ напои́в, де́лати небе́сная, блаже́нне, разуме́ния пригото́вал еси́ ве́рою, апо́столе Филимо́не, досточу́дне.

Сла́ва Отцу́ и Сы́ну и Свято́му Ду́ху:

Священноде́йствуя свяще́нное Ева́нгелие, сия́нии Ду́ха ду́ши просвети́л еси́, изба́вив от тмы́ идолонеи́стовства, му́дре апо́столе.

И ны́не и при́сно и во ве́ки веко́в. Ами́нь.

Богоро́дичен: Тя́ проро́ков дре́вле боже́ственное собра́ние многови́дными, Чи́стая, о́бразы издале́ча проначерта́, и́стинно еди́ну Влады́ку поро́ждшую.

Пе́снь 3.

Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Святый апостоле Филимоне, моли Бога о нас.

Стра́сти Христо́вы и воста́ние пропове́дуя, воздви́гнул еси́ я́ко от гро́ба неве́рия и ме́ртвости челове́ки, Филимо́не, достосла́вне.

Припев: Святый апостоле Филимоне, моли Бога о нас.

Они́сима боже́ственнаго и Филимо́на, Апфи́ю и Архи́ппа, зве́зды, просвеща́ющия концы́, свяще́нными песнопе́ньми восхва́лим.

Сла́ва Отцу́ и Сы́ну и Свято́му Ду́ху:

Ума́ зри́тельное очи́стивше, Боже́ственнаго получи́сте боговиде́ния и сердца́ возврати́сте заблу́ждшия к зна́нию, свяще́ннейшии.

И ны́не и при́сно и во ве́ки веко́в. Ами́нь.

Богоро́дичен: Явльшися, Чи́стая и Всенетле́нная, прия́ла еси́ во утро́бе Бо́га Сло́ва, очи́стившаго естество́ на́ше, оскве́рншееся, Де́во, грехопаде́нием.

Та́же седа́лен, гла́с 8.

Ра́лом сло́ва доброде́лая олядене́вшая сердца́, священноде́телю, Боже́ственное позна́ние де́лати пригото́вал еси́ и, низложи́в и́дольския хра́мы, созда́л еси́ це́ркви, блаже́нне, в сла́ву Созда́теля твоего́. Те́мже, соше́дшеся, святу́ю твою́ па́мять, Филимо́не, сла́вим, священнопросвеща́еми, и согла́сно вопие́м ти́: моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Пе́снь 4.

Ирмо́с: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Припев: Святый апостоле Филимоне, моли Бога о нас.

Ве́трилом креста́ вперя́емь, преплы́л еси́ небу́рно лю́тую пучи́ну искуше́ний жития́, блаже́нне, мно́гия упра́вив пла́вающия к спасе́ния приста́нищу Боже́ственною благода́тию.

Припев: Святый апостоле Филимоне, моли Бога о нас.

Свети́ла светоза́рная предлага́ет боже́ственный гра́д Колосса́йский: свяще́ннаго Архи́ппа, Филимо́на же и Апфи́ю я́ве и Они́сима сла́внаго, просвеща́ющия ми́ра концы́.

Сла́ва Отцу́ и Сы́ну и Свято́му Ду́ху:

Боже́ственная река́ воскипе́ в се́рдце твое́м, богоглаго́ливе, и ре́ки уста́ви, и тече́ния безбо́жия, ду́ши же, иста́явшия зно́ем неве́дения, напои́ благода́тию, сла́вне.

И ны́не и при́сно и во ве́ки веко́в. Ами́нь.

Богоро́дичен: Пою́ Тя и́стинно, Всепе́тая, препе́таго Бо́га Сло́ва преесте́ственно роди́вшую, и молю́ся смире́нныя моея́ души́ исцели́ти неду́ги, я́ко блага́ су́щи, Богоневе́стная.

Пе́снь 5

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Святый апостоле Филимоне, моли Бога о нас.

Неду́гующия ви́дя острупле́нием злы́х, сла́вне, и де́тельным твои́м сло́вом исцели́л еси́, Филимо́не, иногда́, идолонеи́стовством лю́те бе́дствующия.

Припев: Святый апостоле Филимоне, моли Бога о нас.

Спаси́тельныя пути́ заблу́ждшим лю́те показа́л еси́, я́ко неле́стный путево́ждь, Филимо́не, еди́н пу́ть Христа́ возлюби́ти ди́вно путево́дствил еси́.

Сла́ва Отцу́ и Сы́ну и Свято́му Ду́ху:

Пое́т све́тлый пра́здник Колосса́йская честна́я дне́сь ра́достно Христо́ва Це́рковь, боже́ственнаго Архи́ппа и богоглаго́ливаго чту́ще Филимо́на.

И ны́не и при́сно и во ве́ки веко́в. Ами́нь.

Богоро́дичен: Влады́чице, спаси́ ны, обурева́емыя лю́тым волне́нием искуше́ний, и некро́тких ва́рварских нахожде́ний, и де́монских лю́тых наве́тов.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Святый апостоле Филимоне, моли Бога о нас.

Не́бо яви́лся еси́, все́м веща́я сла́ву спаси́тельную тебе́ Просла́вльшаго и ученико́м Сочета́вшаго седмодеся́тным, му́чениче всебога́те.

Припев: Святый апостоле Филимоне, моли Бога о нас.

Устрани́вся оте́чества, стра́нным твои́м сло́вом устрани́вшияся Бо́га улови́л еси́ и Сио́на жи́тели, иера́рше Филимо́не, показа́л еси́.

Сла́ва Отцу́ и Сы́ну и Свято́му Ду́ху:

Доброде́тельми свяще́нными сия́ющи и све́тло Бо́гу утожда́ющи, к небесе́м востекла́ еси́, и со Ангелы, Апфи́я, лику́ющи.

И ны́не и при́сно и во ве́ки веко́в. Ами́нь.

Богоро́дичен: Воплоща́ется Сло́во во чре́ве Твое́м и за благоутро́бие познава́ется Челове́к, да Бо́га челове́ка соде́лает, Отрокови́це Всенепоро́чная.

Конда́к апо́столов, гла́с 2. Подо́бен: Вы́шних ища́.

Яко зве́зды всесве́тлыя, просвеща́ющия концы́, апо́столы Христо́вы восхва́лим, Филимо́на сла́внаго, и Архи́ппа свяще́ннаго, и Они́сима, и Ма́рка, и Аполло́са, с ни́миже и Апфи́ю всему́друю, вопию́ще: моли́те непреста́нно о все́х на́с.

Пе́снь 7.

Ирмо́с: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Святый апостоле Филимоне, моли Бога о нас.

Кра́сны твоя́, Филимо́не, бы́вше честны́я но́зе, стези́ кро́тко ше́ствующия Ева́нгелия, и все́м ра́тным ми́р свяще́нный возвеща́ющия, и де́монская стремле́ния запина́ющия.

Припев: Святый апостоле Филимоне, моли Бога о нас.

Твои́х слове́с све́том Га́зян глубо́кая тма́ прогна́ся, священноде́латель я́ко свяще́ннейший в си́х бы́л еси́ изя́щнейший, вся́ упа́с и научи́в пе́ти, апо́столе: благослове́н Бо́г оте́ц на́ших.

Припев: Святый апостоле Филимоне, моли Бога о нас.

В пе́рвых твои́х приобщи́ся до́брых Га́зский гра́д: того́ бо яви́лся еси́ первопресто́льник и иера́рх спаси́тельный, я́ко священновеща́тель, Филимо́не, вопи́ти повелева́я: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Возлюби́в Христа́, возлюби́вшаго земны́я за благоутро́бие, любо́вию враги́ ненави́димыя су́ща, люби́мичи соде́ял еси́, Филимо́не, Бо́га воспева́ющия: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Кре́пость смире́нных и све́щник све́тлый, боже́ственная трапе́за, гора́ и две́рь непрохо́дная, престо́л Бо́жий и пала́та, же́зл же Ааро́нов и ста́мна златоза́рна су́щи, Христа́, Ма́нну жи́зни, Де́во, нося́щи.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Святый апостоле Филимоне, моли Бога о нас.

Сло́во, я́ко свети́льник све́тлый возже́н, в твое́м се́рдце нося́, пре́жде угаше́нныя и во тме́ мно́зей лежа́щия неве́дения, сла́вне, к богозна́ния воздви́гл еси́ дню́.

Припев: Святый апостоле Филимоне, моли Бога о нас.

Свяще́нное твое́ к Бо́гу изше́ствие свяще́нными возвели́чися провожде́ньми апо́столов и безпло́тных умо́в, и́хже име́л еси́ на земли́ житие́, я́ко священнотаи́нник, Филимо́не богоглаго́ливе.

Припев: Святый апостоле Филимоне, моли Бога о нас.

Мѵ́ро сладково́нное я́ве иска́пав свяще́нных чуде́с, блаже́нне, облагово́нил еси́ смы́слы и помышле́ния благочести́вым и стра́сти злосмра́дныя отгна́л еси́ превознося́щих Христа́, му́дре Филимо́не.

Сла́ва Отцу́ и Сы́ну и Свято́му Ду́ху:

Якоже зве́зды све́тлыя тве́рди, Це́ркве при́сно сия́юще, ку́пно Архи́пп чу́дный, Апфи́я, Филимо́н и Они́сим помышле́ния на́ша просвеща́ют.

И ны́не и при́сно и во ве́ки веко́в. Ами́нь.

Богоро́дичен: Но́в ра́й на́м чре́во Твое́ и́стинно, Чи́стая, яви́ся, жи́зни Дре́во возраща́я и уме́ршия плодо́м Дре́ва па́ки в ра́й, оживотвори́вши, введе́, Богоро́дице.

Песнь 9

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Святый апостоле Филимоне, моли Бога о нас.

Со свяще́ннейшим ли́ком свяще́нных апо́стол подо́бно жи́тельствуеши на небесе́х, Боже́ственным прича́стием обожа́емь, и све́том сия́я неизрече́нным, и ра́достию духо́вною, Филимо́не, при́сно исполня́емь.

Припев: Святый апостоле Филимоне, моли Бога о нас.

Яко чу́дный тво́й нра́в, я́ко добро́ и красно́ житие́ твое́, я́ко пресла́вно и успе́ние твое́, блаже́нне апо́столе, я́ко све́тлый де́нь, в не́мже оста́вив, я́же на земли́, на небе́сныя кру́ги возше́л еси́, веселя́ся.

Припев: Святый апостоле Филимоне, моли Бога о нас.

Дне́сь весели́тся вся́ Христо́ва Це́рковь, пра́зднственную ра́дость духо́вно соста́вльши в па́мяти твое́й, ю́же непоколе́блену спаси́ твои́ми к Спа́су и Бо́гу благоприя́тными моли́твами, Филимо́не свяще́ннейше.

Сла́ва Отцу́ и Сы́ну и Свято́му Ду́ху:

Ра́ка моще́й твои́х врачева́ний ка́пли источа́ет приходя́щим свяще́нно, блаже́нне Филимо́не апо́столе, неду́ги уставля́ет и все́х ду́ши освяща́ет, боже́ственную твою́ па́мять пра́зднующих всегда́.

И ны́не и при́сно и во ве́ки веко́в. Ами́нь.

Богоро́дичен: Но́сиши Нося́щаго вся́ и пита́еши Пита́ющаго, о́браз Рождества́ ника́коже ве́дящи, Всенепоро́чная, па́че ума́ Твое́ чу́до, Ангелы ужаса́ющее и челове́ки, ве́дущия Тя́ еди́ну Де́ву Богома́терь.

Свети́лен. Подо́бен: Жены́, услы́шите.

Юже дре́вле предвозвести́ проро́ческое сосло́вие, ста́мну, и же́зл, и скрижа́ль, и несеко́мую го́ру, Мари́ю Богоотрокови́цу ве́рно да восхва́лим: дне́сь бо вво́дится во свята́я святы́х воспита́тися Го́споду.

Молитва

Святы́й сла́вный и всехва́льный апо́столе Христо́в Филимо́не, мо́лим тя с ве́рою и любо́вию: умоли́ Христа́ Го́спода претвори́ти ду́ши на́ша из грехолюби́вых в боголюби́выя; сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных, и испроси́ нам свы́ше по́мощь во вре́мя уны́ния и беспо́мощия на́шего; да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же ты ны́не водворя́ешися и весели́шися. Ей, апо́столе Спа́сов! Не посрами́ нас, кре́пце на тя упова́ющих, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пное и́мя Отца́ и Сы́на и Свята́го Ду́ха, во ве́ки веко́в. Ами́нь.