3 декабря

Канон святителю Проклу, архиепископу Константинопольскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь святителю Проклу, архиепископу Константинопольскому, глас 4

И́же Боже́ственным нача́лом прему́дрости, / стра́хом Госпо́дним утве́рждся, / отту́ду свяще́нными восхожде́нии возше́л еси́ / во учени́чество Златоу́ста, / и архиере́йскаго того́ престо́ла досто́ин быв чистоты́ добро́тами, / апо́стольским пра́вилом себе́ вообрази́в, / не себе́ живы́й, но Христу́ и ста́ду твоему́. / Тем в нетле́нный живо́т апо́стольски всели́лся еси́, / иера́рше Про́кле, / моли́ Христа́ Бо́га // спасти́ся душа́м на́шим.

Кано́н свята́го Про́кла, гла́с 1. Творе́ние Феофа́ново.

Пе́снь 1.

Ирмо́с: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Святителю отче Прокле, моли Бога о нас.

Дея́нием же и сло́вом и́стинным разу́мных арха́нгелов бы́в сообра́зен, богоприя́тне, и с ни́ми престо́лу предстоя́ честны́я Тро́ицы, Юже, Про́кле, моли́ спасти́ на́с.

Припев: Святителю отче Прокле, моли Бога о нас.

Стопа́м после́дуя я́ве Златоу́стаго, всеблаже́нне и приснопа́мятне, того́же боже́ственное свяще́нства, о́тче, одея́ние я́ко насле́дие взя́л еси́ оте́ческое, достосла́вне.

Сла́ва Отцу́ и Сы́ну и Свято́му Ду́ху:

Дре́вле Бо́га на зе́млю Иса́ии вопию́щу Ду́хом приити́, Несто́рий, умовре́дно оболгу́яй прелага́ет воплоще́ние, от тебе́, треблаже́нне, собо́рне низверга́ется.

И ны́не и при́сно и во ве́ки веко́в. Ами́нь.

Богоро́дичен: Словесы́ богодохнове́нными стра́шное от Де́вы уясни́л еси́ воплоще́ние Сло́ва Бо́га на́шего и Богоро́дицу Сию́ пропове́дав, догма́том всему́дрым апо́столов после́дуя.

Пе́снь 3.

Ирмо́с: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Припев: Святителю отче Прокле, моли Бога о нас.

Све́т из Све́та богови́дно, всеблаже́нне, прие́м, Це́ркве све́т бы́л еси́. Те́мже и Све́т тебе́ Боже́ственный возсия́ разу́мно, я́коже е́сть пи́сано, и́мже просвеща́емь, пою́щия озаря́еши па́мять твою́.

Припев: Святителю отче Прокле, моли Бога о нас.

Воструби́в догма́тов гро́мом, я́ко сте́ны низложи́л еси́ Иерихо́нския ересе́й де́рзости вся́, и во́инства, и одоле́ния побе́ду возста́вил еси́, воплоще́ние Бо́жие е́же от Де́вы пропове́дав я́сно.

Сла́ва Отцу́ и Сы́ну и Свято́му Ду́ху:

Исто́чнику му́дрости приложи́в уста́ твоя́, богоприя́тне, и духо́вныя поче́рпл еси́ му́дрости, Про́кле, боже́ственныя во́ды, му́тныя потопи́в ре́ки, всеблаже́нне, Несто́риева безбо́жная мне́ния.

И ны́не и при́сно и во ве́ки веко́в. Ами́нь.

Богоро́дичен: Иже горе́ Отцу́ Единоро́дный Сы́н неизрече́нно сразумева́емь, единоро́дный из Тебе́ до́ле, Пречи́стая, па́че вины́ и ра́зума роди́ся и обожа́ет челове́ка, Пречи́стая Влады́чице Богоро́дице: те́мже Тя́ сла́вим.

Седа́лен, Про́кла, гла́с 3. Подо́бен: Боже́ственныя ве́ры.

Боже́ственный бы́в священнопропове́дник, боже́ственным уче́нием Це́рковь обогаща́я, тайноучи́телю всехва́льне, и Богоро́дицу Де́ву Пречи́стую пропове́дал еси́ и Несто́рия посрами́л еси́. Те́мже вси́ чти́м ве́рно па́мять твою́, прося́ще прия́ти ве́лию ми́лость.

Пе́снь 4.

Ирмо́с: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святителю отче Прокле, моли Бога о нас.

Глаго́л веща́ния и догма́тов благогла́сный уче́ний твои́х гро́м Це́рковь Бо́жию му́дро веселя́т, ерети́ческое отго́нят свире́пство, священноявле́нне Про́кле всесла́вне.

Припев: Святителю отче Прокле, моли Бога о нас.

Якоже зла́то огне́м, свяще́ннейше, воздержа́нием честно́е те́ло твое́ очи́стив, му́дре, красно́ показа́л еси́ Творцу́. Сего́ ра́ди тебе́ одея́ние свяще́нства ве́чно дарова́.

Сла́ва Отцу́ и Сы́ну и Свято́му Ду́ху:

Зна́ние боже́ственное навы́к, бы́в я́ко иера́рх свяще́нный, благопода́тно про́чее все́м препо́дал еси́ просвеще́ние и боже́ственныя све́тлости во спасе́ние ду́ш, достосла́вне.

И ны́не и при́сно и во ве́ки веко́в. Ами́нь.

Богоро́дичен: Угль Боже́ственный во утро́бе, Всенепоро́чная, прие́мши па́че ума́, не опали́лася еси́ и́стинно: купина́ бо издале́ча обра́зно Твое́ Рождество́ прообразова́ во спасе́ние на́ше и обновле́ние.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Припев: Святителю отче Прокле, моли Бога о нас.

Светоно́сен, я́ко свети́льник, всеблаже́нне, бы́в, боже́ственныя Це́ркве яви́лся еси́ побо́рник, и Бо́жия уясни́л еси́ е́же из Де́вы Всесвяты́я Рождество́ невра́щное, сла́вне.

Припев: Святителю отче Прокле, моли Бога о нас.

Воплоще́ние Бо́жие из Де́вы сла́вное догма́тов в пра́щу вложи́в, я́ко иноплеме́нника Голиа́фа, низложи́л еси́ Несто́риев свире́пый нра́в, я́ко дре́вле боже́ственный Дави́д.

Сла́ва Отцу́ и Сы́ну и Свято́му Ду́ху:

Па́вловыми уче́нии сы́й испо́лнен и того́ виде́ния узре́в, всеизбра́нне, Елиссе́й вторы́й показа́вся, ма́стию боже́ственною, свяще́нством, пома́зан та́инственно.

И ны́не и при́сно и во ве́ки веко́в. Ами́нь.

Богоро́дичен: Ни смуще́ния, ни смеше́ния во утро́бе прия́т Де́вы Бо́г, пло́тию происходя́, но е́же бе́, пребы́сть, Бо́г и Челове́к, невра́щно де́йствы явля́емь.

Пе́снь 6.

Ирмо́с: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святителю отче Прокле, моли Бога о нас.

Обыше́дшия, я́ко зве́ри, отгна́л еси́ ересе́й от ста́да Христо́ва побо́рники жезло́м разу́мным твои́х уче́ний, Про́кле блаже́нне, к па́стве же правосла́вия па́ству испра́вил еси́.

Припев: Святителю отче Прокле, моли Бога о нас.

Яко и́н ковче́г, Це́ркви Христо́ве те́ло всеблаже́ннаго Златоу́ста вда́л еси́ твои́ми, Про́кле, поуче́ньми и возвесели́л еси́ правосла́вных ли́ки прису́тствием его́.

Сла́ва Отцу́ и Сы́ну и Свято́му Ду́ху:

На вели́кое возше́д седа́лище, преподо́бне, велича́йшими исправле́нии украси́л еси́ то́е боголе́пно. Те́мже, соше́дшеся, благохва́лим тя́, архиере́е, великому́дренне Про́кле сла́вне.

И ны́не и при́сно и во ве́ки веко́в. Ами́нь.

Богоро́дичен: Яви́лася еси́ херуви́мов, Богоблагода́тная Де́во, преиму́щи: на ра́мех бо носи́ма те́ми, Чи́стая, объя́тии Твои́ми носи́ла еси́. Те́мже Тя́ при́сно, Богоро́дице, вси́ сла́вим.

Конда́к Про́кла, гла́с 4. Подо́бен: Яви́лся еси́.

Досто́йно дне́сь торжеству́ет все́х градо́в честне́йший вои́стинну в честно́м преставле́нии твое́м, о́тче отце́в, Про́кле му́дре.

Пе́снь 7.

Ирмо́с: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святителю отче Прокле, моли Бога о нас.

Те́ло, и у́м, и ду́шу очи́стив отъя́тием страсте́й, иера́рше Про́кле му́дре, отту́ду догма́тствовал еси́, те́ло, и ду́шу, и у́м от Де́вы ро́ждшагося Бо́га кроме́ премене́ния, за е́же спасти́ ны, прие́мшаго.

Припев: Святителю отче Прокле, моли Бога о нас.

Ты́, ко Христу́ стяжа́в, свя́те, дерзнове́ние, на земли́ хва́лящим песнопе́сненно па́мять твою́ сла́вную вся́ких напа́стей изба́витися моли́, хва́льнаго пою́щим Бо́га пресла́внаго.

Сла́ва Отцу́ и Сы́ну и Свято́му Ду́ху:

Огнь разу́мный, в помышле́ниих вже́г твои́х, хвра́стную и гнилу́ю злочести́ваго Несто́рия е́ресь попали́л еси́. Те́мже ти́ мо́лимся: хвра́стныя на́ша сла́сти, е́же к Бо́гу мольба́ми твои́ми, поже́г, очи́сти, сла́вне.

И ны́не и при́сно и во ве́ки веко́в. Ами́нь.

Богоро́дичен: Но́сиши Бо́га, пло́тию обложе́на, на объя́тиях Твои́х, Чи́стая, я́коже престо́л херуви́мский, Нося́щаго вся́ глаго́лом си́лы Своея́, Ему́же песнопое́м, веселя́щеся: препе́тый отце́в Бо́же и препросла́вленный, благослове́н еси́.

Пе́снь 8.

Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святителю отче Прокле, моли Бога о нас.

Яко в горни́ле светоза́рнем, всесла́вне, чистото́ю стра́сти плотски́я очи́стив, я́ко зла́то, все́м возсия́л еси́, воспева́я: вся́ дела́ Го́спода по́йте и превозноси́те Его́ во ве́ки.

Припев: Святителю отче Прокле, моли Бога о нас.

Орга́ном, блаже́нне, честна́го твоего́ язы́ка, украша́ема веща́нием, Це́рковь Бо́жия на земли́ спаси́тельное низше́ствие воспева́ет, все́м глася́щи я́сно и вопию́щи: Тя́ превозно́сим, Христе́, во вся́ ве́ки.

Сла́ва Отцу́ и Сы́ну и Свято́му Ду́ху:

Гу́сль боже́ственная яви́лся еси́ и́стинно, веща́ние возглаша́ющая ве́рою прие́млющим Бо́жие, е́же к на́м, спаси́тельное воплоще́ние, Про́кле, о́тче блаже́нне, ве́рою зовы́й: Го́спода по́йте дела́ и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Сохрани́в зна́мения Твоего́, Де́во, де́вства невре́дна Влады́ка, про́йде Бо́г из Тебе́ па́че смы́сла, во е́же спасти́ вопию́щия: Го́спода по́йте и превозноси́те Его́ во ве́ки.

Песнь 9

Ирмо́с: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святителю отче Прокле, моли Бога о нас.

Образы и се́ни мимоте́к и и́стинно Христа́ разуме́в, породи́вся ба́нею креще́ния, свяще́нник же пома́зан свяще́ннейший. Те́мже и Богоро́дицу, Того́ ро́ждшую, пропове́дал еси́.

Припев: Святителю отче Прокле, моли Бога о нас.

Нра́вы свяще́нныя и догма́ты Златоу́стаго, блаже́нне, впе́рсил еси́, ре́вность же его́ свяще́нную ве́ры, изры́гнул еси́ догма́тов твои́х пучи́ну, ересе́й пото́ки изсуша́ющую благода́тию.

Сла́ва Отцу́ и Сы́ну и Свято́му Ду́ху:

Уста́ви свяще́нными твои́ми моли́твами воздвиза́емое на ны́ смуще́ние и отжени́ напа́стей омраче́ние и челове́к все́х озлобле́ние, я́ко име́я дерзнове́ние ко Влады́це и Бо́гу на́шему.

И ны́не и при́сно и во ве́ки веко́в. Ами́нь.

Богоро́дичен: О, па́че ума́ чуде́с Твои́х! Бо́жие бо Сло́во, пло́ть бы́вшее, еди́на родила́ еси́ преесте́ственно, Ма́ти Де́во, вся́ческая Боже́ственным хоте́нием му́дре Содержа́щаго, и окормля́юща, и соблюда́юща.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Прокле, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.