3 декабря

Канон предпразднству Введения во храм Пресвятой Богородицы

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4

Ра́дость предобруча́ет всем А́нна ны́не,/ печа́ли сопроти́вный плод прозя́бши, еди́ну Присноде́ву,/ Ю́же и приво́дит, моли́твы исполня́ющи,/ днесь веселя́щися, в храм Госпо́день,/ я́ко су́щий храм Бо́га Сло́ва и Ма́терь чи́стую.

Кано́н, гла́с 4.

Пе́снь 1.

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся,/ Тоя́ чудеса́.

Припев: Пресвятая Богородице, спаси нас.

Святы́х во свята́я Всесвята́я и Непоро́чная всели́тися происхо́дит,/ Пресвята́го Бо́га я́ко да бу́дет храм освяще́н,/ и Той предтеку́т де́вы отрокови́цы.

Припев: Пресвятая Богородице, спаси нас.

Сове́т преве́чный Преве́чнаго Бо́га на́шего во исполне́ние гряде́т/ предгряду́щей Ти воспита́тися во свята́я святы́х,/ Сло́ва в жили́ще, Отрокови́це Всенепоро́чная.

Сла́ва Отцу́ и Сы́ну и Свято́му Ду́ху:

Роди́телие Боже́ственнии Тя, Бо́жию Роди́тельницу хотя́щу бы́ти,/ вво́дят воспита́тися во свята́я святы́х:/ моли́тву, е́юже моля́хуся, обеща́ние исполня́ют, Пречи́стая.

И ны́не и при́сно и во ве́ки веко́в. Ами́нь.

Укрепи́, Влады́чице, не́мощь се́рдца моего́/ и утверди́, страстьми́ коле́блемое,/ я́ко да ве́рою Тя и любо́вию ублажа́ю, Присноблаже́нную и Всенепоро́чную.

Пе́снь 3.

Ирмо́с: Твоя́ песносло́вцы, Богоро́дице,/ живы́й и незави́стный 170 исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Припев: Пресвятая Богородице, спаси нас.

Начина́ющия отрокови́цы де́вы,/ свещи́ нося́щия све́тло, бу́дущее подпису́ют:/ из Нея́ бо роди́тся просвеще́ние зна́ния,/ реша́щее пре́лести омраче́ние.

Припев: Пресвятая Богородице, спаси нас.

Ревну́ющи дре́вле Богому́дренно, А́нна моли́тву исполня́ет/ и Тебе́ привозлага́ет святи́лищу, Всенепоро́чная,/ свяще́ннейшее зача́тие име́ти хотя́щу и рождество́.

Сла́ва Отцу́ и Сы́ну и Свято́му Ду́ху:

Со́лнце простре́ лучи́, зря о́блак све́тлый, простира́емь/ ма́нием Боже́ственным внутрь во свята́я,/ из Нея́же одожди́т оставле́ние олядене́вшим страстьми́.

И ны́не и при́сно и во ве́ки веко́в. Ами́нь.

Обожа́ет мя Бог, всели́вся в Тя за милосе́рдие, Всенепоро́чная, Чи́стая,/ укра́дена сне́дию пре́жде ле́стию змии́ною,/ и тли нетле́ния па́ки пи́щу воздае́т.

Седа́лен, гла́с 1.

Восхвали́те, де́вы, ма́тери, предпра́зднуйте,/ лю́дие, славосло́вите, свяще́нницы, благослови́те Пречи́стую Ма́терь Бо́жию:/ пло́тию бо младе́нствующи пре́жде,/ во храм принесе́ся, я́ко храм Бо́жий святе́йший./ Те́мже пра́здник соверша́юще духо́вный, воспое́м Ю,/ я́ко Предста́тельницу ро́да челове́ческаго.

Пе́снь 4.

Ирмо́с: Неизсле́дный Бо́жий сове́т/ е́же от Де́вы воплоще́ния/ Тебе́, Вы́шняго, проро́к Авваку́м, усмотря́я, зовя́ше:/ сла́ва си́ле Твое́й, Го́споди.

Припев: Пресвятая Богородице, спаси нас.

Свяще́ннии провозвести́ша язы́цы Тебе́, Чи́стая,/ бы́ти село́ невмести́маго Естества́,/ сего́ ра́ди Тя ли́цы де́вственнии провожда́ют, свещи́ нося́ще во свята́я.

Припев: Пресвятая Богородице, спаси нас.

Сла́ву взят Иоаки́м со А́нною,/ ходя́ще и нося́ще Тя с весе́лием во святы́й храм, хра́ме Бо́жий пресвяты́й,/ Чи́стая и Всенепоро́чная Влады́чице.

Сла́ва Отцу́ и Сы́ну и Свято́му Ду́ху:

Разреша́ется изрече́ние прароди́тельное:/ се бо процвете́ Лоза́, я́же Грозд нетле́нный нам плодоно́сит,/ вино́ нося́щий весе́лия конце́м.

И ны́не и при́сно и во ве́ки веко́в. Ами́нь.

Еди́ну Тя Всенепоро́чную Соде́тель Сло́во обре́т,/ всели́ся во Твое́ чре́во, содева́я на́ше спасе́ние благода́тию, Пречи́стая,/ за неизглаго́ланную ми́лость.

Пе́снь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Припев: Пресвятая Богородице, спаси нас.

О́блацы да воска́плют пра́вду днесь,/ я́ко на Небеси́ бо простира́ется Боже́ственный о́блак во хра́ме Бо́жии,/ и́же ка́плет сла́дость, всю го́ресть душ на́ших изъе́млющу.

Припев: Пресвятая Богородице, спаси нас.

Стра́нно Твое́ зача́тие, стра́нно Твое́ и рождество́, стра́нно твое́ происхожде́ние, Де́во,/ е́же внутрь святи́лища введе́ние,/ стра́нна и пресла́вна Твоя́, сло́во превосходя́ща и помышле́ние, Пречи́стая.

Сла́ва Отцу́ и Сы́ну и Свято́му Ду́ху:

Всю Тебе́ освяти́ Дух Всесвяты́й, внутрь хра́ма пребыва́ющу/ и пита́ему пи́щею небе́сною, Неве́сто О́тча прекра́сная,/ сего́ ра́ди была́ еси́ и Сло́ва Роди́тельница.

И ны́не и при́сно и во ве́ки веко́в. Ами́нь.

К Тебе́ мою́ всю наде́жду, Отрокови́це, полага́я,/ к щедро́там твои́м прибега́ю:/ вре́да де́монскаго яви́ неприча́стну па́дшую ду́шу мою́/ и изнемо́гшую сласте́й потопле́нми.

Пе́снь 6.

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Припев: Пресвятая Богородице, спаси нас.

Укре́пльшеся Боже́ственно благода́тию, Боже́ственныя Де́вы родите́лие/ Сию́ я́ко непоро́чную голуби́цу во свята́я воспита́тися любо́вию возлага́ют.

Припев: Пресвятая Богородице, спаси нас.

Тебе́, хотя́щей приима́ти Свет, из Све́та происходя́щий,/ свещи́ вжига́юще, отрокови́цы, Чи́стая,/ предхло́дят светови́дно к Боже́ственному хра́му, ликовству́юще.

Сла́ва Отцу́ и Сы́ну и Свято́му Ду́ху:

Полна́ сла́вы Пала́та,/ вели́кое проро́ков оглаше́ние, Престо́л Святы́й внутрь свята́я вво́дится,/ Царю́ всех гото́вящися.

И ны́не и при́сно и во ве́ки веко́в. Ами́нь.

Пою́ Твое́, Отрокови́це, зача́тие, пою́ Твое́ и неизрече́нное рождество́,/ пою́ и покро́в Твой, и́мже вре́да вся́каго избавля́емся,/ к Твоему́ оти́шию прибега́ющии.

Кондак предпра́зднства, глас 4:

Весе́лия днесь вселе́нная испо́лнися вся/ в благознамени́том пра́зднице Богоро́дицы,/ зову́щи:/ Та есть сень Небе́сная.

И́кос:

И́же всех Творе́ц, Созда́тель и Влады́ка,/ неизрече́нным благоутро́бием приклони́выйся, еди́нем человеколю́бием Свои́м,/ его́же Свои́ма устро́и рука́ма, ви́дев па́дша, уще́дри/ и возста́вити сего́ благоволи́, зда́ние Боже́ственнейшее,/ и истоще́нием Свои́м, я́ко благ естество́м и ми́лостив./ Тем Мари́ю Хода́таицу прие́млет и я́ко Де́ву и чи́стую та́инства,/ из Нея́ на́ше естество́ носи́ти восхоте́:/ Та есть сень Небе́сная.

Пе́снь 7.

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Припев: Пресвятая Богородице, спаси нас.

Светоно́сное Тя я́ко со́лнце, прие́млет храм святы́й,/ внутрь сия́ющу зарю́ конце́м спасе́ния, Чи́стая,/ храм бы́ти иму́щую Сы́на Бо́жия, Де́во.

Припев: Пресвятая Богородице, спаси нас.

Рука́ми вси воспле́щем,/ избавле́ния нося́щую о́бразы Неискусобра́чную ви́дяще:/ руко́ю бо А́нгеловою пита́ется,/ Небе́сный Хлеб нам я́ко хотя́щу неизрече́нно породи́ти.

Сла́ва Отцу́ и Сы́ну и Свято́му Ду́ху:

Ду́ши вся пра́ведных подзе́мныя благовести́ша Тя, голуби́це злата́я,/ поко́й нося́щу пото́па разу́мнаго проявля́ют,/ и во святы́х свята́я благоче́стно ликовству́ющу.

И ны́не и при́сно и во ве́ки веко́в. Ами́нь.

Я́ко красна́, Кра́снаго родила́ еси́,/ неле́поту на́шу возвраща́ющаго в пе́рвый о́браз, Отрокови́це Всенепоро́чная,/ Ему́же и пое́м:/ отце́в Госпо́дь и Бог, благослове́н еси́.

Пе́снь 8.

Ирмо́с: Слы́ши, Отрокови́це, Де́во Чи́стая,/ да рече́т у́бо Гаврии́л/ сове́т Вы́шняго, дре́вний, и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и ра́дуяся, вопию́:/ благослови́те, вся дела́ Госпо́дня, Го́спода.

Припев: Пресвятая Богородице, спаси нас.

Слы́ши и разуме́й, ста́рче му́дрый,–/ Заха́рии А́нна глаго́лет,–/ сове́том Боже́ственным, Ю́же и́мам Отрокови́цу Чи́стую до́блественною душе́ю приими́,/ Тоя́ бо ра́ди бу́дет избавле́ние,/ и в храм святы́й введи́ Сию́, вопия́:/ благослови́те, вся дела́ Госпо́дня, Го́спода.

Припев: Пресвятая Богородице, спаси нас.

Благослове́н еди́н Госпо́дь, возопи́ свяще́нник:/ жи́зни вхо́ды ны́не указу́ют я́ве, нам объяви́вше,/ в ню́же хо́щет всели́тися, Боговмести́мую пала́ту, Христо́с, Царь вся́ческих,/ Ему́же вопие́т вся земля́:/ благослови́те, вся дела́ Госпо́дня, Го́спода.

Припев: Пресвятая Богородице, спаси нас.

Се, ста́рче мудре́йше,–/ А́нна рече́ благогове́йно,–/ до́брейшую Отрокови́цу, Ю́же даде́ мне Бог,/ све́тло приими́ и проро́чествуй еди́ну, хотя́щую в ве́щи произнести́ пропове́дания,/ с ни́миже вопие́ши проро́чески:/ благослови́те, вся дела́ Госпо́дня, Го́спода.

Припев: Пресвятая Богородице, спаси нас.

Ны́не позна́х, же́но, я́вственнейше,–/ разу́мно рече́ ста́рец,–/ дре́во возраста́ет посреде́ хра́ма,/ е́же процвете́т су́що Боже́ственный плод, в рай вводя́щий/ сне́дию изгна́нныя тле́ния, вопию́щия ра́достию:/ благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Глаго́л неизрече́нных уче́ний/ Твоя́ душа́, Отрокови́це Чи́стая, я́ве бу́дет,–/ ста́рец рече́ я́сно,–/ в Боже́ственный сей, Де́во, всели́шися храм:/ А́нгелом бо пита́ема, Сове́та Вели́каго А́нгела роди́ши. Ему́же пое́м:/ благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Глас Ти поем, Отрокови́це Чи́стая, ра́достно Гаврии́лов:/ ра́дуйся, всех вина́ еди́на ра́дости,/ ра́дуйся, душ очище́ние, яко ро́ждшая избавле́ние на́ше и воздание, песнопою́щих Тому́:/ благослови́те, вся дела́ Госпо́дня, Го́спода.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Припев: Пресвятая Богородице, спаси нас.

Се Бо́жия гора́ свята́я со свеща́ми све́тлыми внутрь во свята́я ше́ствует,/ от Нея́же Ка́мень отсече́тся и тре́бища и куми́ры демонския истни́т ,/ челове́ки же са́мыя соде́лает хра́мы и честна́я оби́телища.

Припев: Пресвятая Богородице, спаси нас.

Кля́тся Бог и ны́не испо́лни,/ от коле́на Иу́дова нам дав Присноде́ву,/ Ея́же чре́во дре́во возрасти́т Жи́зни,/ смертоно́сныя сне́ди избавля́ющее, паде́нию пи́щею подни́кшия/ и укра́деныя пре́лестию змии́ною.

Припев: Пресвятая Богородице, спаси нас.

Усты́ све́тлыми А́нна возопи́ в хра́ме Бо́жии:/ Тебе́ привозлага́ю, Ю́же мне дал еси́, Отрокови́цу, о Влады́ко!/ Из Нея́же за милосе́рдие неизглаго́ланное, Плотоно́сец яви́вся, спасе́ши мир,/ его́же созда́л еси́, возвели́чив Ю я́ко Ма́терь Твою́.

Сла́ва Отцу́ и Сы́ну и Свято́му Ду́ху:

Се озари́ся день спасе́ния су́щим в нощи́ лю́тых:/ дверь Небе́сная, хра́ма две́ри отве́рзши, со свеща́ми вхо́дит внутрь во свята́я/ от святы́я пита́тися си́лы, свято́е Бо́га вселе́ние.

И ны́не и при́сно и во ве́ки веко́в. Ами́нь.

Просвети́, Чи́стая, души́ моея́ о́чи, Свет ро́ждшая,/ да не пости́гнет мя грехо́вная тьма́ глубоча́йшая,/ ниже́ глубина́ да покры́ет мя отча́яния,/ но Сама́ мя спаси́ и окорми́ ко приста́нищу Боже́ственнаго хоте́ния.

Свети́лен предпра́зднства.

День предпра́зднственный/ храм приво́дит ны́не пречи́стым введе́нием Богоро́дицы Мари́и,/ Ю́же пою́т А́нгели, и челове́цы ублажа́ют,/ де́вы же провожда́ют, свещи́ нося́ще и игра́юще, в храм Госпо́день.

Молитва

Цари́це моя́ преблага́я, наде́ждо моя́ Богоро́дице, прия́телище си́рых и стра́нных предстáтельнице, скорбя́щих рáдосте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стрáнна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.