31 декабря

Канон мученика Севастиана и дружины его

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего, иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости, те́х моли́твами спаси́ ду́ши на́ша.

Канон Гла́с 1.

Пе́снь 1.

Ирмо́с: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Святый мучениче Севастиане, моли Бога о нас.

Боже́ственными уясня́емь заря́ми честны́я Тро́ицы, приснопа́мятне, ве́рою чту́щия твое́ светоза́рное и свяще́нное торжество́ твои́ми моли́твами све́та прича́стники покажи́.

Припев: Святый мучениче Севастиане, моли Бога о нас.

Име́я по́мысл светови́ден и прия́тен честны́х осия́ний, Еди́наго возжеле́л еси́, вои́стинну Су́щаго, я́ко смы́слен и му́др, му́чениче страстоте́рпче, и Сего́ ве́рою получи́л еси́.

Припев: Святый мучениче Севастиане, моли Бога о нас.

По́ты боже́ственными и́стинно плотска́я мудрова́ния очерни́л еси́, кровьми́ страда́ния му́тныя пото́ки изсуши́л еси́ многобо́жия, богому́дре му́чениче пребога́те.

Сла́ва Отцу́ и Сы́ну и Свято́му Ду́ху:

По́лк приве́л еси́ страда́льцев уче́нии твои́ми боже́ственными Зижди́телю, вся́кое злоче́стие гони́телей низложи́в благода́тию Свята́го Ду́ха, с ни́миже мо́лишися спасти́ся на́м.

И ны́не и при́сно и во ве́ки веко́в. Ами́нь.

Богоро́дичен: Мла́да породила́ еси́ Сы́на, пре́жде ве́к со Отце́м Су́щаго, естества́ обно́вльшая зако́ны, Чи́стая Де́во, Ма́ти Пречи́стая, преесте́ственным честны́м и боже́ственным Рождество́м Твои́м.

Пе́снь 3.

Ирмо́с: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Припев: Святый мучениче Севастиане, моли Бога о нас.

Во́инство веды́й честно́е, боже́ственными ору́жии ве́ры утвержде́нно, му́чениче непобеди́ме, ополче́ния борца́ и кова́рствия мучи́телей вся́ низложи́сте си́лою Ду́ха.

Припев: Святый мучениче Севастиане, моли Бога о нас.

Утверди́в на ка́мени у́мнем восхожде́ния се́рдца твоего́ благочестному́дренно, му́чениче многострада́льне, не преврати́лся еси́ кова́рствы льсти́ваго зми́я, но все́м утвержде́ние благоче́стия в Ду́се бы́л еси́.

Сла́ва Отцу́ и Сы́ну и Свято́му Ду́ху:

Члено́в боде́ния лю́тая претерпе́л еси́, свя́зан и на дре́ве, му́чениче, протяза́емь, Бо́га же Боже́ственною си́лою, сла́вне, неврежде́н, всеце́л а́бие показа́лся еси́, посрамля́я вра́жия кова́рствия.

И ны́не и при́сно и во ве́ки веко́в. Ами́нь.

Богоро́дичен: Свяще́ние яви́лася еси́ мы́сленное вся́ Освяща́ющаго и чи́сто, Всенепоро́чная, селе́ние: из Тебе́ бо яви́ся Бо́г воплоща́емь и сугу́б естество́м ми́ру познава́емь во еди́ной ипоста́си, Богоневе́сто.

Седа́лен, гла́с 4. Подо́бен: Вознесы́йся на Кре́ст.

Крове́й твои́х обагре́нии омочи́л еси́ страда́ния оде́жду, оде́ялся еси́, я́коже багряни́цею честно́ю, Севастиа́не. Те́мже и всели́лся еси́ со Христо́м в Вы́шнее безконе́чное Ца́рство, с страда́вшими с тобо́ю и венцы́ прия́л еси́, му́дре, с ни́миже лику́я, на́с при́сно помина́й.

Сла́ва, и ны́не, Богоро́дичен:

Иже на престо́ле херуви́мстем седя́й и в не́дрех Отчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х: вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́. Его́же умоли́ спасти́ся рабо́м Твои́м.

Пе́снь 4.

Ирмо́с: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святый мучениче Севастиане, моли Бога о нас.

Мо́щь тебе́, Тиву́ртие, да́рует Госпо́дь не́мощию плотско́ю побори́ти врага́: огню́ бо распаля́ему, ю́ношески вше́л еси́, му́чениче крепча́йше, и небе́сную ро́су восприя́л еси́.

Припев: Святый мучениче Севастиане, моли Бога о нас.

Совокупи́лся еси́ с го́рними служи́тели, о Тиву́ртие! я́ко послужи́в Христу́ и возне́сл еси́ чи́сты же́ртвы в Ду́се, священноде́телю, му́чеников сла́ва и хвала́; сего́ ра́ди ра́достно тя́ почита́ем.

Припев: Святый мучениче Севастиане, моли Бога о нас.

Пра́ве пове́шен, и остны́ стру́жемь, и зе́льными ра́н окружа́емь стремле́ньми, и в ро́ве засыпа́емь, и в не́м боже́ственную кончи́ну прие́м, доблему́дренный ра́довашеся Касту́л.

Сла́ва Отцу́ и Сы́ну и Свято́му Ду́ху:

Врачева́ния в Ду́се Святе́м, блаже́нне, соверша́я, ко просвеще́нию зря́щим благоче́стно лю́дем спасе́ние благоле́пно, Севастиа́не, возвести́л еси́, му́ченически же тече́ние соверши́л еси́.

И ны́не и при́сно и во ве́ки веко́в. Ами́нь.

Богоро́дичен: Еди́ну Тя́ от все́х родо́в избра́ пресу́щественный Бо́г и осуществова́ся ра́ди на́с, бы́в Челове́к, Зижди́тель челове́ческаго существа́, Богороди́тельнице Пренепоро́чная, Влады́чице.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Припев: Святый мучениче Севастиане, моли Бога о нас.

Стези́ твоя́ и ше́ствия, к еди́ному веду́щия Го́споду, безпу́тия враго́в уклони́ша и мно́гим бы́ша пу́ть пра́в и тве́рд, му́чениче Христо́в всече́стне.

Припев: Святый мучениче Севастиане, моли Бога о нас.

Вити́йствует Маркелли́н и Ма́рко мудре́йшая пред суди́щем, Христо́во спаси́тельное прише́ствие; привя́зана же бы́вша вку́пе, остна́ми в но́зе пригвожда́ются, му́ченически украша́ема.

Сла́ва Отцу́ и Сы́ну и Свято́му Ду́ху:

Страда́ние, стра́сти на́ша умертви́вшаго, Маркелли́н и Ма́рко кре́пко образу́юще, копие́м пробода́ются, и венцено́сцы с ли́ки страда́лец совокупля́ются.

И ны́не и при́сно и во ве́ки веко́в. Ами́нь.

Богоро́дичен: Пресве́тлый со́лнца о́блаче, Всенепоро́чная, отжени́ души́ моея́ о́блаки моли́твами Твои́ми и у́м мо́й просвети́, нераде́нием омрачи́вшийся, я́ко да пою́ Тя, Всепе́тая.

Пе́снь 6.

Ирмо́с: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святый мучениче Севастиане, моли Бога о нас.

Тве́рдостию ума́, честне́йше, показа́лся еси́ неутомле́н, егда́ бия́ху тя́ па́лицами неща́дно и стреца́ху мно́гими стрела́ми. Те́мже к Све́ту преше́л еси́, ра́дуяся, му́чениче, невече́рнему.

Припев: Святый мучениче Севастиане, моли Бога о нас.

Вжиля́ше тя́ Христо́с, подвиза́ющася, и де́моны ра́тующа, и ра́нам приобща́ющася лю́тым, Севастиа́не му́чениче непобеди́ме, и к Нему́ смотря́юща серде́чными очесы́.

Сла́ва Отцу́ и Сы́ну и Свято́му Ду́ху:

Заво́рами тве́рдыми прему́дрых слове́с твои́х пре́лесть сокруши́л еси́, и чти́лища разори́л еси́ враго́в, и и́дольския хра́мы потреби́л еси́, и тебе́ сама́го хра́м Боже́ственнаго Ду́ха воздви́гл еси́.

И ны́не и при́сно и во ве́ки веко́в. Ами́нь.

Богоро́дичен: Истле́вшее на́ше от преступле́ния существо́ обнови́ла еси́, Обновля́ющаго вся́ Боже́ственною во́лею ро́ждши, еди́на в жена́х Благослове́нная, Богора́дованная.

Пе́снь 7.

Ирмо́с: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святый мучениче Севастиане, моли Бога о нас.

Си́лою Твое́ю держа́вною укрепля́еми, страстоте́рпцы Твои́, Христе́, победи́ша врага́, ле́сть попра́ша, телеса́ преда́ша ра́нам, воспева́юще: хва́льный отце́в Бо́г и препросла́влен.

Припев: Святый мучениче Севастиане, моли Бога о нас.

Богоза́рнии страстоно́сцы му́ченицы, подви́гшеся до́бре, Маркелли́н, и сла́вный Ма́рк, и Тиву́ртий, и Касту́л всему́дрый к небеси́ преста́вишася, хва́льнаго воспева́юще Бо́га и препросла́вленнаго.

Припев: Святый мучениче Севастиане, моли Бога о нас.

Юношески, страда́льче Тиву́ртие, я́коже о́троцы, на пла́мень наступи́л еси́ мы́сленно, ро́су Ду́ха свы́ше прие́м и песнопоя́ усе́рдно: хва́льный отце́в Бо́г и препросла́влен.

Сла́ва Отцу́ и Сы́ну и Свято́му Ду́ху:

Якоже а́гница пове́шена, сла́вная, удави́ла еси́ врага́ жи́лами терпели́вных боле́зней твои́х, всехва́льная, живе́ши же по сме́рти, му́ченице Зои́, воспева́ющи: хва́льный отце́в Бо́г и препросла́влен.

И ны́не и при́сно и во ве́ки веко́в. Ами́нь.

Богоро́дичен: Ста́мну злату́ю, всесвяту́ю трапе́зу Боже́ственнаго хле́ба жи́зни, имену́ем Тя́, Чи́стая, ме́сто свяще́ния, престо́л высоча́йший, на не́мже Бо́г почи́, хва́льный отце́в Бо́г и препросла́влен.

Пе́снь 8.

Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святый мучениче Севастиане, моли Бога о нас.

Умертви́тися ми́ру восхоте́в и су́щим в ми́ре все́м, су́щия сподо́бился еси́, всече́стне, жи́зни, вопия́ усе́рднейше: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святый мучениче Севастиане, моли Бога о нас.

Положи́ша тя́ беззако́ннии лю́те, в ро́ве преиспо́днейшем, посыпа́юще и умерщвля́юще, воспева́юща те́пле, приснопа́мятне Касту́ле: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Блаже́нныя улучи́ла еси́ жи́зни, я́ко тезоимени́та сея́, удавле́нием бо ну́жднейшим тле́нную жи́знь оста́вила еси́, пою́щи: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Украси́лася еси́, ро́ждши Бо́га кра́снаго и Влады́ку, Боже́ственными уясня́ющаго ро́д челове́ческий, Чи́стая, красота́ми, Ему́же вопие́м: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Песнь 9

Ирмо́с: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святый мучениче Севастиане, моли Бога о нас.

Да Боже́ственныя све́тлости, и ве́чныя сла́вы и красоты́, Севастиа́не, сподо́бишися, всеблаже́нне, муче́ния, боле́зни и сме́рть претерпе́л еси́ му́жественне; те́мже тя́ вси́ велича́ем.

Припев: Святый мучениче Севастиане, моли Бога о нас.

Яви́лся еси́ среди́ зве́зд со́лнце, стра́ждущих с тобо́ю, му́чениче, и ны́не просвеща́ете страда́нии свяще́нными, чи́стыми светлостьми́, Це́ркве Боже́ственное утверже́ние, и все́ диа́воле разоря́ете киче́ние.

Припев: Святый мучениче Севастиане, моли Бога о нас.

Лю́бяще Христа́, Тиву́ртий, и Маркелли́н, и Ма́рк, Зои́ и Касту́л с Севастиа́ном наста́вником и богому́дрым стра́ждут и ра́вныя прие́млют побе́ды венцы́, о на́с при́сно моля́щеся.

Сла́ва Отцу́ и Сы́ну и Свято́му Ду́ху:

Взя́тся ко оби́телем, вселя́емь, светови́дным му́чеников ли́к боже́ственный, и небеса́ обхо́дит, ра́дуяся, о все́х на́с Человеколю́бца при́сно умоля́юще, блажа́щих и́х всегда́.

И ны́не и при́сно и во ве́ки веко́в. Ами́нь.

Богоро́дичен: Ужаса́ются мы́сленная во́инства, Отчее зря́ща Боже́ственное озаре́ние, на Твои́х рука́х несказа́нно держи́мо и Твое́ иму́щее подо́бие, да земны́я обожи́т, Де́во Ма́ти Всенепоро́чная.

Молитва

О святы́й уго́дниче Бо́жий, му́чениче Севастиане! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.