31 декабря

Канон святому праведному Симеону Верхотурскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь праведному Симеону Верхотурскому, глас 4

Мирска́го мяте́жа бе́гая,/ все жела́ние обрати́л еси́ к Бо́гу,/ да в виде́ния восхо́д обря́щеши горе́,/ отню́дуже не уклони́вся в лука́вствия се́рдца,/ но очи́стив ду́шу и те́ло,/ прия́л еси́ благода́ть точи́ти цельбы́ ве́рным и неве́рным,/ притека́ющим к тебе́, пра́ведный Симео́не. Те́мже по да́нному ти да́ру,/ испроси́ у Христа́ Бо́га исцеле́ние нам,/ боля́щим душе́вными страстьми́,// и моли́ спасти́ ду́ши на́ша.

Кондак праведному Симеону Верхотурскому, глас 2

Ми́ра суе́тнаго отве́рглся еси́,/ да бла́га ве́чныя жи́зни насле́диши,/ возлюби́в незло́бие и чистоту́ души́ и те́ла./ Сниска́л еси́, е́же возлюби́л,/ свиде́тельствует бо о сем гроб и нетле́ние моще́й твои́х/ и благода́ть чудотворе́ния наипа́че./ То́чиши бо цельбы́ всем притека́ющим к тебе́ и непросвеще́нным,// Симео́не блаже́нне, чудотво́рче преди́вный.

Канон праведного, глас 3.

Песнь 1.

Ирмо́с: Воды древле манием Божественным во едино сонмище Совокупивый, / и разделивый море Израильтеским людем, / Сей Бог наш, препрославлен есть. / Тому Единому поим, яко прославися.

Припев: Святый праведный отче Симеоне, моли Бога о нас.

Омраченный грехами, недоумею, како по достоянию восхвалити тя, святе Симеоне, / сияюща по благодати Христовой, подвиг и чудес твоих светлостьми. / Ты ми, благосерде, помози, возсиявая в души моей свет, / имже осияваешися, яко да поне елико воспою в похваление твое явльшаяся на тебе чудная дела Господня, / воззывающа всех, празднующих память твою, пети Владыце Христу: / сей Бог наш, дивный и славимый во святых Своих, / препрославлен есть, Тому Единому поим, яко прославися.

Припев: Святый праведный отче Симеоне, моли Бога о нас.

Благочестия любовию и спасения объят быв, избегаяй того ради треволнений житейских, / удалился еси, блаженне Симеоне, от рода твоего и манием Божественным изведен был еси в малонаселенную иногда страну Сибирскую, / идеже пресельник быв земли отеческия, подобник явился еси праотцу Аврааму / и стяжав нрав его, в хижинах убо убогих витаяй, / яко же он в кущах. / Душу же вперив в Небеси, в горний Сион добродетелей стезею ходил еси, / ведущею на Небо, / всю жизнь твою, во славу Христа Спаса всех, ти споспешествующа. / Емуже вся сия научают нас радостно днесь звати: / Сей Бог наш, препрославлен есть, Тому Единому поим, яко прославися.

Припев: Святый праведный отче Симеоне, моли Бога о нас.

По рождению твоему, блаженне, быв отраслию благонарочитых людей и славных в народе своем, / егда манием Божественным Сибири дошел еси, / абие отгнал еси от себе самомнения прелесть, и смирению подклонил еси выю, себе вменяяй последнейша от всех, / таже труды многими тело твое удручил еси, и укротил свирепое страстей море воздержанием, / и тако возшел еси на высоту добродетелей, укрепляющу тя Христу, прославляемому твоими благими делы. / Емуже велегласно Того ради вопием: сей Бог наш, препрославлен есть, / Тому Единому поим, яко прославися.

Припев: Святый праведный отче Симеоне, моли Бога о нас.

В нищете пожил еси в Сибирстей стране, блаженне Симеоне, / и яко от корене благоплодна плод благоцветущ, добродетельми обогатился еси. / Темже, вельми украсивша тя Божественными добротами толико нам вожделенными, / и сими прославленна, Владыку Христа, песньми славословим зовуще: / сей Бог наш, препрославлен есть, Тому Единому поим, яко прославися.

Сла́ва Отцу́ и Сы́ну и Свято́му Ду́ху:

Столп добродетелей непреложен и благочестия жилище был еси, блаженне, / имеяй основание убо твердое Православную веру, пособие же непобедимо содействующую ти силу Христову. / И ныне, имеяй дерзновение ко Христу Спасителю всех, / моли Его, даровати к прославлению Имени Его всем нам утверждение силою Его, / в сей толико спасительной вере, яко да вси едиными усты согласно зовем Ему: / Сей Бог наш, препрославлен есть, Тому Единому поим, яко прославися.

И ны́не и при́сно и во ве́ки веко́в. Ами́нь.

Богоро́дичен: Преблагословенна еси. Богородице Дево, яко родила еси Христа Спаса нашего, / Егоже славословим, яко Единороднаго от Отца, / исполнь благодати и истины, и Емуже выну взываем: / Сей Бог наш, препрославлен есть, Тому Единому поим, яко прославися.

Песнь 3

Ирмо́с: Неплодная душе и безчадная, / стяжи плод благославный, веселящися возопий: / утвердихся Тобою, Боже, / несть свят и несть праведен, / паче Тебе, Господи.

Припев: Святый праведный отче Симеоне, моли Бога о нас.

Православною верою утвердившися, блаженне Симеоне, / стяжал еси благославный плод ея, обогативый тя добродетельми, обаче николиже велемудрствовал еси о себе, / и не дал еси человекоубийце искони обуяти тя тщеславием. / Но выну водился еси смиренномудрием, яко видети тя присно всем, / аки бы усвоиша себе песнь единаго от Богомудрых: / утвердихся тобою, Боже, несть свят и несть праведен, паче Тебе, Господи.

Припев: Святый праведный отче Симеоне, моли Бога о нас.

С нищетою телесною соединив нищету духовную, / яко корень всех благих, молчаливо и благочестие твою жизнь совершил еси, блаженне Симеоне, / и явил еси в себе плод благославный Православныя веры, предукрепив первее тело твое постом неослабным, / таже душу твою храм Божий пресвят соделав, Божественным храмом приседящи, / внегда петися тамо священным песнопениям, всем имущим един сей разум: / несть свят и несть праведен, паче Тебе, Господи.

Припев: Святый праведный отче Симеоне, моли Бога о нас.

Сугубо благороден был еси, блаженне Симеоне, и родом и нравы: / души бо твоея благородие, благородия свыше добротами уяснил еси, / Православия светом блистающи, и постничеством, и целомудрием, и смирением и терпением, и мужеством на гордаго змия, / егоже сими низложил еси, содействующу ти Христу, / и тако достигл еси блаженных селений святых. / Ихже во устах коегождо выну бысть песнь Церкви: / утвердихся Тобою, Боже, / несть свят и несть праведен, паче Тебе, Господи.

Сла́ва Отцу́ и Сы́ну и Свято́му Ду́ху:

Древо благосеннолиственное, насажденное при исходищих вод, / еже дает плоды во время свое, был еси, блаженне Симеоне. / Ты бо измлада напоен быв водами благочестия, / израстил еси добродетелей плоды благоприятны Богу, / Даровавшему ти за тая живот вечный. / Егоже и нас сподоби молитвами твоими ко Господу, / яко да и в грядущем веце, якоже днесь воспеваем Ему: / несть свят и несть праведен, паче Тебе, Господи.

И ны́не и при́сно и во ве́ки веко́в. Ами́нь.

Богоро́дичен: Терние и волчцы грехов неплодны содевают души наша, Милосердая Мати Христа Бога нашего, / моли с праведным Симеоном Сына Твоего сотворити ниву душ наших, / во еже приносити Ей плод благославный истинныя веры, несумненныя надежды и нелицемерныя любве. / Яко да выну воспеваем Рождшемуся от Тебе: / утвердихомся Тобою, Боже, / несть свят и несть праведен, паче Тебе, Господи.

Седален. Глас 4. Подобен: Вознесыйся:

Храм Богу хотя явити, сердце твое, блаженне Симеоне, / изволил еси неленостно присещати храмы Господни в часы песнопений. / Отонудуже и приял еси свет благодати Святаго Духа, / и явился еси звезда многосветлая, светлаго ради жития твоего, и чистоты душевныя же и телесныя, озаряяй верных собрания. / Темже празднующе память твою, радостно восхваляем тя, блаженне.

Слава, и ныне, Богоро́дичен:

Храм Света Неизреченного была еси, Всепетая Дево, / вмещши во чреве Твоем просвещающа и освещающа мира концы Христа Бога нашего. / И ныне, молитвами Твоими с праведным Симеоном соделай причастниками Того Света и нас, / Богородицу Тя воистинну именующих.

Песнь 4.

Ирмо́с: Положил еси к нам твердую любовь. Господи, / Единороднаго бо Твоего Сына за ны на смерть дал еси. / Темже Ти зовем благодаряще: / слава силе Твоей, Господи.

Припев: Святый праведный отче Симеоне, моли Бога о нас.

Непостыдно бысть твое, блаженне, / на силу и помощь Человеколюбца Господа, предавша Сына Своего за ны на смерть, / упование, имже укрепль душу твою, не ужаслся еси вступити в поприще подвиг твоих. / Господом бо помогаем, первое удержал еси в посте чрево твое, / таже воздержания росою добльственне страстей пещь погасил еси, / и тако мрака их избавлься, просиял еси безстрастия светлостию. / Сею же показал еси нам путь, ведущий в жизнь истинную. / Темже восхваляюще тя Господу, / Даровавшу ти силу и крепость, поем: / слава силе Твоей, Господи.

Припев: Святый праведный отче Симеоне, моли Бога о нас.

Насажден быв при водах воздержания, блаженне, / лоза явился еси благорасленна, благочестия грозде предлагающая. / К сим же показался еси всем и образ трудолюбия, / подобяся бо скинотворцу Апостолу, руками своими приобретавшему себе и сущим с ним вся потребная к жизни временней, / упражнялся еси в швении одежд другим и в ловлении рыб, на потребу к жизни, / яко да не отяготиши коего либо пропитанием тебе. / Темже укрепльшу тя о сем Христу Богу поем: / слава силе Твоей, Господи.

Припев: Святый праведный отче Симеоне, моли Бога о нас.

Труждаяся в швении одежд, блаженне, к смотрению мысленных твое художество управил еси, / помышляя одеяние души твоея, в нем же да внидеши в чертог Спасов. / Такожде, удицею рыбы ловяй, выну мысль к Богу имел еси, блюдый себе, яко да не удицею греха уловлен будеши от вселукаваго врага спасения нашего. / И тако непреложен имеяй помысл благочестия, / устроил еси жизнь твою по Бозе, Христу ти споспешествующу: Емуже, сведуще сия, велегласно поем: / слава силе Твоей, Господи.

Сла́ва Отцу́ и Сы́ну и Свято́му Ду́ху:

Тезоименно услышанию, имже преднареклся, еси в Крещении, блаженне, / поучался святому послушанию, самым делом исполнитель онаго был еси, / нрав сообразный имени твоему стяжав. / Готов бо был еси всегда послужим всем, требовавшим твоей, благосерде, помощи в житии твоем, / и служил еси, елико мог со усердием уветлив ко всем весь являяся, и честен и послушлив. / Разумеюще убо, яко и сие дарование ти дадеся от Христа Бога, / поем Ему: / слава силе Твоей, Господи.

И ны́не и при́сно и во ве́ки веко́в. Ами́нь.

Богоро́дичен: Имаши вся мощи, еже аще хощеши, Всеблагая Мати Христа Бога нашего, / употребляющи Матернее дерзновение к Нему. / Темже молим Тя, моли с праведным Симеоном, Сына Твоего, / даровати нам силу и крепость шествовати неуклонно путем добродетелей, / яко да благодарно выну зовем Ти: / слава, Владычице, всемощней силе Твоей.

Пе́снь 5

Ирмо́с: На земли невидимый явился еси, / и человеком волею сожил еси, Непостижимый. / И к Тебе утреннююще, воспеваем Тя, Человеколюбче.

Припев: Святый праведный отче Симеоне, моли Бога о нас.

Имеяй в сердцы своем образ восхищена до третияго Небесе в рай, апостола, рекша: / мы юроди Христа ради, ты, блаженне Симеоне, таковое юродство волею восприял еси на тя, / яко бо цветник благоуханнейший и добродетелей рай одушевлен, / воздержанием процвел еси. / Обаче хотя утаитися от человек, юрод был еси миру, сам ся не благороден сотворь, скудоумия притвореннии, / Христу же премудр был еси, совершая преславная, безстрастия достигл еси истиннаго. / Темже восхваляюще тя, песненно прославляем Давшаго ти таковую мудрость, Христа Человеколюбца.

Припев: Святый праведный отче Симеоне, моли Бога о нас.

Уму страсти твоя подчинив, блаженне, духовную мудрость стяжал еси. / И, сею управляем, нищету возлюбил еси и воздержание, и чистоту, и смиренномудрие. / И тако силе Христовой ти содействующей, на высоту добродетелей востекл еси, / имиже зря тя Христос обогатившася, человеколюбие призре на тя, / и славы Царства Небеснаго показа тя причастника, преславна: / Егоже моли и нас сподобити общники быти тоя, / яко да во веки воспеваем Его Человеколюбца.

Припев: Святый праведный отче Симеоне, моли Бога о нас.

Юродствуяй Христа ради, блаженне, / и тако бисер многоценный добродетелей, в селе сердца твоего сокровенный имевый, / яко безплотен на земли пожил еси, и соделался угодник Христу, / Иже тя, в возмездие того, прослави нетлением и чудесы, и постави молитвенника о людех Своих. / Сего ради ублажающе тя, величаем Прославльшаго тя, Господа Человеколюбца.

Сла́ва Отцу́ и Сы́ну и Свято́му Ду́ху:

Велию сотворил есть Господь милость Свою с нами, даровав нам тебе, блаженне, источника чудес и молитвенника о нас. / Темже ублажающе тя днесь в памяти твоей, / славим Давшаго ти и нам таковую благодать, вопиюще: / к Тебе утренююще, Господи, воспеваем Тя, Человеколюбче.

И ны́не и при́сно и во ве́ки веко́в. Ами́нь.

Богоро́дичен: Архангельский глас вопием Ти, Чистая Приснодево: / радуйся, Благодатная, / яко родила еси Спасителя миру, Христа Человеколюбца.

Песнь 6.

Ирмо́с: Глубина страстей воста на мя и буря противных ветров, / но предварив мя Ты спаси, Спасе, / и избави от тли, яко спасл еси от зверя пророка.

Припев: Святый праведный отче Симеоне, моли Бога о нас.

Воздержания ветрилом управляем в житии твоем, блаженне, / достигл еси в безстрастия славная пристанища, / и тако спаслся еси от тли душепагубных страстей. / Господь же, по преставлении твоем избави и тело твое от тли, / и яви е нетленно, аще и многа лета пребысть в недрах земных. / И ныне моли, благосерде, Господа, / яко да спасет и нас от всякия тли, / якоже спасл есть тебе от тли и от зверя пророка.

Припев: Святый праведный отче Симеоне, моли Бога о нас.

Враг спасения, искушаяй нас на грехи, сластьми палит, / но, коль сия пагубна суть, сущи тля смертная./ Тлят бо доброту души нашея, тлят и здравие тела, и к сим готовят нам огнь неугасающий, и червь неумирающий. / Блаженне Симеоне, предстоя с лики Ангелов и святых Божиих человеков Престолу Владыки, / моли Его с ними, яко да избавит от губительства сластей и спасет нас, вопиющих Ему: / спаси, Спасе, и избави от тли, яко спасл еси от зверя пророка.

Припев: Святый праведный отче Симеоне, моли Бога о нас.

Много согрешающе на всякий час и грехми присно растлеваемии, тако слячени есмы, / яко не мощи нам восклонити главы и воззрети когда к Небесной доброте, и бурею противных ветров тако уносими далеко от пути добродетелей и от стези покаяния, / яко колебатися в нас упованию спасения. / Ты же, блаженне, предстоя ныне Всесвятому, к Нему же и богатное стяжал еси дерзновение, / моли, избавити ны от тли греховныя и бурю тех противных ветров утолити, вопиющия: / спаси, Спасе, и избави от тли, яко спасл еси от зверя пророка.

Сла́ва Отцу́ и Сы́ну и Свято́му Ду́ху:

Блажен еси, святе Симеоне, и добро тебе есть, / понеже Господь зря тя праведна, вчини с лики святых во Обителех Небесных, избавль тако геенны, сущи тли вечныя. Еяже избавитися и нам моли, Христа Бога, поющим Ему: / спаси, Спасе, и избави от тли, яко спасл еси от зверя пророка.

И ны́не и при́сно и во ве́ки веко́в. Ами́нь.

Богоро́дичен: Пречистая Владычице, Царице Небесная, / страхом тли вечной смерти содержимии, молимтися, моли с праведным Симеоном, Сына Твоего Христа Бога нашего, / яко да избавити нас тоя вопиющих: / спаси, Спасе, и избави от тли, яко спасл еси от зверя пророка.

Кондак на пренесение мощей, глас 4:

Наста днесь всечестная память новаго целебника праведнаго Симеона, / созывает же людие в пречестный храм святаго Божия архиереа Николаа, / идеже радостно сошедшеся благочестивых множества, / весело празднуют пренесение честных и многоцелебных мощей твоих праздник. / Ты бо явился еси граду нашему, и всей Сибири врачевство безмездное, / подавая исцеление с верою приходящим к тебе, Симеоне всеблаженне! / Но яко имеяй дерзновение ко Владыце Христу, / Того моли спасти град и люди, молящияся тебе, / паче же ходатай буди ко Господу во дни нашествия печали рабом твоим, / да зовем ти: радуйся, Сибирстей стране похвало и утверждение граду нашему.

Ин кондак на прославление, глас 2:

Мира суетнаго отверглся еси, да блага вечныя жизни наследиши, / возлюбив незлобие и чистоту души и тела. / Снискал еси, еже возлюбил, свидетельствуют бо о сем гроб и нетление мощей твоих, и благодать чудотворения наипаче. / Точиши бо цельбы всем притекающим к тебе и непросвещенным, Симеоне блаженне, чудотворче предивный.

Икос:

Многоцелебнаго сокровища чудотворных мощей твоих недра подземная не сокрыша, / праведный Симеоне, но в обогащение издаша тая притекающим верным и неверным. / Темже приидите вси и приимите богатых ток цельбы. / Щедраго бо Владыки раб щедрит и дает, и есть в подаянии неоскуден. / Восхваляюще убо в песнех сицеваго заступника и благодетеля нашего, да зовем ему: / радуйся, Сибирстей стране похвале и утверждение граду нашему.

Песнь 7.

Ирмо́с: Якоже древле благочестивыя три отроки / оросил еси в пламени халдейстем светлым Божества огнем, / и нас озари, благословен еси, взывающия, / Боже отец наших.

Припев: Святый праведный отче Симеоне, моли Бога о нас.

Благочестие триех отрок вавилонских привлече к ним светлый Божества огнь, / сущую благодать Божию, сохраньшую их в пламени халдейстем невредимы. / Тоежде благочествие привлече и к твоему, блаженне, телу благодать, / сохраньшую е невредимо от тли в недрах земных. И ныне, пребывающий с нами, Симеоне, / яко причастник Божественнаго огня, возжги в нас огнь ревности по благочестию, / яко да и мы сим сохраньшеся пламене страстей, / восприимем песнь онех отроков, еже взывати Христу выну: / благословен еси, Боже отец наших.

Припев: Святый праведный отче Симеоне, моли Бога о нас.

Чудно бысть халдеем видение триех отроков, неопалившихся пламенем огня. / Такожде удивишася христоименитии людие и умилишася сердцем, / видевше твой гроб, блаженне, восходящ от земли. / Егда же узреша в нем нетленныя мощи твоя и точаща чудесы преславны Божественною силою, в них обитающею, / и паче почудишася и страхом и радостию объяти бывше со умилением славословяху Господа, / дивная Творящаго во святых Своих. / Темже и мы торжествующе днесь память твою, святе, / гласом триех онех отроков, благодарственно взываем Христу Спасу всех: / благословен еси, Боже отец наших.

Припев: Святый праведный отче Симеоне, моли Бога о нас.

Воистинну велие, якоже то триех отроков в Вавилоне, такожде и твое, блаженне, бысть оно чудо, / яко честныя мощи твоя, по толицех летех обретошася целы и неразрушимы, / быв сохраняемы в земли Божественною благодатию, и издавшеся силою ея от недр земных, яко светильник, егоже Господь постави не под спудом, но на свещнице, / да светит всем сиянием чудес, озариша и обогатиша православных разумением Божественным. / Уцеломудритеся ныне, вопиющий, и возлюбите паче всех Господа, да благодать обрящете вечную, еще же и подающу всем исцеление притекающим к тебе. Тебе же и мы покланяющеся, радостно поем песнь триех онех отроков, Христу сподобившу нас таковыя благодати. / Благословен еси, Боже отец наших.

Сла́ва Отцу́ и Сы́ну и Свято́му Ду́ху:

Яко финикс процвете тело твое нетлением, блаженне, / и яко кедр, иже в Ливане, умножися чудесы, приносящи / Божественную жизнь. / Сего ради Сибирская страна, имея тебя молитвенником, яко Божественный зрится рай, цветы различныя принося чудес. / Имиже, яко древле вавилоняне чудом триех отроков вразумляеми быша в истинной сих вере, / тако людие спасаемии присно утверждаются в истинней вере Божией, / вводящей в живот вечный, егоже дарует Господь Своим угодником, / благословен сый Бог отец наших.

И ны́не и при́сно и во ве́ки веко́в. Ами́нь.

Богоро́дичен: Зриши, Пресвятая Дево, яко в пламени греховном исчезают дние наша. / Молитвами Твоими с праведным Симеоном сотвори, яко да не погубит сий пламень нас до конца, / но росою светлаго Божественнаго огня утушен будет. / И мы тако невредимы от пламене его явившеся, Подателю того огня Сыну Твоему выну взываем: / благословен еси, Боже отец наших.

Песнь 8.

Ирмо́с: Нестерпимому огню соединившеся, / Богочестия предстояще юноши, / пламенем же невреждени Божественную песнь пояху: / благословите вся дела Господня, Господа, / и превозносите во вся веки.

Припев: Святый праведный отче Симеоне, моли Бога о нас.

Якоже благочестивии отроцы в пещи вавилонстей пламенем иногда невреждени быша, Божественною силою / тако сподобившийся помощи Твоея, блаженне, / спасени бывша от многоразличных зол, яко пламенем огня их обдержащих. Темже обновляющияся в душах верных чудеса твоя днесь в памяти твоей, / якоже чудо в пещи вавилонстей юношы оны, пети всех научают: / благословите вся дела Господня, Господа, и превозносите во вся веки.

Припев: Святый праведный отче Симеоне, моли Бога о нас.

Боготочный источник, орошающ страждущих в пламени нестерпимых зол, / Господь яви тя, блаженне, яко воистинну сокровище дарований, мы же, молитвами твоими, сподобляемся быти невредимы от злых. / От независтных бо вод духовныя благодати всем, с теплою верою прибегающим к тебе, подавши благопотребная ко спасению, / и тако твориши, яко да вси радостно торжествующе память твою, согласно вопием: / благословите вся дела Господня, Господа, и превозносите во вся веки.

Припев: Святый праведный отче Симеоне, моли Бога о нас.

Чудес твоих, блаженне, реки излиявшеся исцелении, / бездну тя явиша, точащу благодать Господа. Инии бо стражда нестерпимою болью во очию своею, перстию токмо от гроба твоего обложивше я, / и о сем укрепившеся, прозреша, друзии же прикосновением токмо к мощам твоим облегчение в болезни получиша; / прежде сущий немии глаголание прията: печальнии крепкое утешение, / хромии благотечение, разслабленнии исправление, болящий ногама здравие; / такожде мнози утробы неплодны соделашася многочадны, пиющи токмо воду от места явления твоих мощей, / мнози же елеем от кандила твоего исцелишася от неисцельных болезней. / И всем всяко проливаеши тучи врачеваний, уставляюще паление недугов, и люди сих свобождшияся устрояеши песнопети: / благословите вся дела Господня, Господа, и превозносите во вся веки.

Сла́ва Отцу́ и Сы́ну и Свято́му Ду́ху:

Вельми тя прослави Господь, блаженне, в чудесех, / от любве бо веры святое токмо имя твое призывающии, / абие услышаны бывают якоже плененнии иногда погаными, и страждущии от дух нечистых, и инии мнози болящии, / и николиже скудны помощи твоей оставляются. / И не точию тщащимся имя твое нарицати, но и образ твой, любовию, яже к тебе, написующим, велик помощник являешися. / К сим же и неведущим тя болящим, аще и во многи страны и веси произыде и слышана бысть слава имене твоего, / в сониих являяся, врачуеши я. / Темже память твою празднующе, в прославление Господа Прославльшаго тако тя велегласно взываем: / благословите вся дела Господня, Господа, и превозносите во вся веки.

И ны́не и при́сно и во ве́ки веко́в. Ами́нь.

Богоро́дичен: Образы носящи древле Твоего Рождества, / юноши не опаляет, Дево, пещь, якоже не опали утробу Твою Огнь Божественный. / Вся бо творит Иисус Сын Твой, Бог и Человек, / Егоже превозносим во вся веки.

Песнь 9.

Ирмо́с: Благословен Господь Бог Израилев, / воздвигнувый рог спасения нам в дому Давида отрока Своего, / милосердия ради милости, в них же посети нас восток с высоты, / и направил ны есть на путь мира.

Припев: Святый праведный отче Симеоне, моли Бога о нас.

Благословен Господь Бог, явивый тя, блаженне, споспешника всем ко спасению житием твоим и наставника словом. / Лествица бо Небовосходная житие твое бысть, слово же твое благодатию срастворено есть, / научающи трезвению души и тела, и воздержанию по благочестию, и тако направляющи всех на путь мира.

Припев: Святый праведный отче Симеоне, моли Бога о нас.

Благословен Господь Бог, Даровавый нам тебе, блаженне, чудотворца предивна, / купно же и стену и предградие от языкозлобия и озлобления заблуждших от истинныя веры. / Ихже чудесы от мощей твоих / далече отгнал еси от области Верхотурския, / не терпя рачителей ересей и хуления исполненных на Православие быти тамо, / идеже явишася мощи твоя: чудная бо знамения от сих, яко огнь палящь, явишася в посрамление еретиком, нам же всем во утверждение и на путь мира.

Припев: Святый праведный отче Симеоне, моли Бога о нас.

Благословен Господь Бог, Поставивый тя, блаженнее, ходатая на Небеси и молитвенника о нас. / Аще бо и земля сокрыла тя, но горе тя вси богатна имамы предстателя и молитвенника к Богу, / любовию чтущия тя, якоже иногда молитвами твоими, спасл еси иныя от потопления, иныя от огненнаго запаления, / призывающия святое имя твое и молящияся тебе о помощи, / и иныя от неизбежный смерти в болезни их: и тако всех направил еси на путь мира.

Сла́ва Отцу́ и Сы́ну и Свято́му Ду́ху:

Благословен Господь Бог, сподобивый прославление твое, блаженне, светозарное / и чудеса преславная воспети, елико мощно, есть нам. Ты же, благосерде, не отстави помощи твоея от нас, / со умилением просим тя, / и не помяни беззаконий наших, но обратися на милость, / и моли милостиваго Бога, даровати мир мирови, и всем согрешений прощение и душам, и телесем здравие / и направити всех на путь мира.

И ны́не и при́сно и во ве́ки веко́в. Ами́нь.

Богоро́дичен: Благословен Господь Бог, Тобою, Пресвятая Дево, / Посетивый нас восток свыше, просветити во тьме и сени седящия, / и направити ноги наша на путь мира.

Светилен, глас 2. Подобен: Твердыя:

Светло возсия днесь память твоя, блаженне Симеоне, / лучами много облистающи твоих добродетельных деяний, / и озаряющи верных разумы светом чудес твоих. / Сию убо празднующе, радостно славим тя и любовию ублажаем, угодниче Христа Бога нашего. / Егоже моли избавити ны от мрака греховнаго, и просветити светом заповедей, / разорити же и всю мрачную тму напастей, нас облежащих, / и облистати веселием сердца, и спасти души наша.

Молитва праведному Симеону Верхотурскому

О, святый и праведный Симеоне, чистою душею твоею в небесных обителех в лице святых водворяяйся, на земли же с нами неотступно пребывая! По данней ти благодати от Господа молитися о нас, милостивно призри на нас многогрешных, аще и недостойне, обаче с верою и упованием к тебе притекающих, и испроси нам от Бога прощение согрешений наших, в няже впадаем множицею во вся дни жития нашего. И якоже прежде овым убо от очныя зельныя болезни ни мало зрети могущим исцеление очес, овым же близ смерти бывшим от лютых недугов врачевание, и иным иная многая преславная благодеяния даровал еси: сице избави и нас от недугов душевных и телесных и от всякия скорби и печали, и вся благая к настоящему житию нашему и к вечному спасению благопотребная нам от Господа испроси, да тако твоим предстательством и молитвами стяжавше вся нам полезная, аще и недостойнии, благодарне восхваляюще тя, прославим Бога, дивнаго во святых Своих, Отца, и Сына, и Святаго Духа, ныне и присно и во веки веков. Аминь.