31 декабря

Канон святителю Модесту, патриарху Иерусалимскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4

Преподо́бно пожи́в, Богому́дре Моде́сте,/ и святи́тельскою оде́ждою укра́шен,/ па́стырю Иерусали́ма блаже́ннейший,/ в весели́и ны́не Христу́ предстои́ши/ и концы́ озаря́еши чудесы́,/ помо́щник у́бо бу́ди тя призыва́ющим,/ моля́ся, о́тче, о всех нас.

Канон, глас 6.

Песнь 1.

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Припев: Святителю отче Модесте, моли Бога о нас.

Страсте́й омраче́нием содержи́ма мя, Иису́се, просвети́в,/ очи́сти светоно́сными иера́рха Твоего́ моли́твами/ и сло́во вдохни́ ми сего́ воспе́ти, Человеколю́бче.

Припев: Святителю отче Модесте, моли Бога о нас.

От пеле́н, Богоизбра́нне, я́коже дре́вле Самуи́л,/ возложи́лся еси́ Бо́гу благочести́выми роди́тельми твои́ми,/ тому́ ду́ши своя́ в темни́це преда́вшими.

Припев: Святителю отче Модесте, моли Бога о нас.

Удали́вшуся тебе́ от нечести́вых гони́телей во Афи́ны,/ егда́ крести́ тя епи́скоп, столп о́гнен узре́,/ сходя́щ с Небесе́ на главу́ твою́,/ Бо́гу прославля́ющу тя.

Сла́ва Отцу́ и Сы́ну и Свято́му Ду́ху:

Огнь Боже́ственный прия́в в се́рдце свое́м,/ вве́рженный на зе́млю от всех Ца́рствующаго,/ и, любо́вию к Нему́ горя́, вся жития́ кра́сная нивочто́же вмени́л еси́.

И ны́не и при́сно и во ве́ки веко́в. Ами́нь.

Богоро́дичен: Избавле́ние кля́твы подава́я ми́ру Изба́витель и о́браз Свой взыску́я,/ погребе́нный страстьми́, из Тебе́, Де́во, ражда́ется,/ Челове́к быв нас ра́ди.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Припев: Святителю отче Модесте, моли Бога о нас.

Пра́зднуем тебе́ ны́не во хра́ме сем, великоимени́те,/ храм себе́ Творца́ всех соде́лавша/ очище́нием се́рдца своего́ от вся́кия скве́рны пло́ти и ду́ха.

Припев: Святителю отче Модесте, моли Бога о нас.

Умерщвле́ние живоно́сно на земли́, Богому́дре, име́я,/ ду́шу безстра́стием украси́л еси́/ и искуше́ний прираже́ния благода́тию Бо́жиею победи́л еси́.

Припев: Святителю отче Модесте, моли Бога о нас.

От ю́ности, достосла́вне, потща́лся еси́ просла́вити Бо́га све́тлыми исправле́нии жития́ твоего́,/ тем и тебе́ просла́ви Бог разли́чными дарова́нии.

Сла́ва Отцу́ и Сы́ну и Свято́му Ду́ху:

Я́ко пото́к Богото́чный, источа́я неду́жным врачева́ния, чу́дне,/ бра́та среброкузнеца́ от неду́га смертоносна возста́вил еси́,/ бесну́ющася исцели́л еси́.

И ны́не и при́сно и во ве́ки веко́в. Ами́нь.

Богоро́дичен: Не терпя́ Госпо́дь Свои́х рук созда́ние зре́ти от льсти́ваго му́чимо,/ прихо́дит рабозра́чным о́бразом челове́ческий род изба́вити,/ вопло́щся от Тебе́, Влады́чице.

Седален. Глас 4.

Да ра́дуются сы́нове Сио́ни днесь в па́мяти твоей, святи́телю Моде́сте,/ обре́тше тя те́плаго засту́пника вдов и сиро́т и всех предста́теля,/ сего́ ра́ди мо́лим тя:/ моли́ся Христу́ Бо́гу прегреше́ний оставле́ние дарова́ти/ пра́зднующим святу́ю па́мять твою́.

Слава, и ныне, Богоро́дичен:

Да ра́дуется Не́бо,/ да весели́тся земля́ с челове́ки,/ от Де́вы бо воплоща́ется Безпло́тный и Безнача́льный, о чудесе! начина́ется,/ верте́п и я́сли прие́млют Содержа́щаго вся/ на обновле́ние ми́ра и спасе́ние душ на́ших.

Песнь 4.

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чиста, о Го́споде пра́зднующи.

Припев: Святителю отче Модесте, моли Бога о нас.

Во Афи́нех жи́тельствутощу ти, преподо́бне,/ всем че́стен ра́ди доброде́тели яви́лся еси́,/ благочести́в, незло́бив, и́стинен,/ удаля́яйся от вся́каго зла.

Припев: Святителю отче Модесте, моли Бога о нас.

Рачи́тель сый нестяжа́ния,/ по кончи́не прия́вших тя вся их и́мения де́тем их вручи́л еси́,/ сам же в безмо́лвных ме́стех в поще́нии Бо́гу служи́л еси́.

Припев: Святителю отче Модесте, моли Бога о нас.

Сы́нове среброкузнеца́ и бра́та его́,/ не терпя́ще зре́ти тебе́, все́ми чти́ма,/ за́вистию снеда́еми, прода́ша тя, я́коже Ио́сифа бра́тия,/ неве́рну и лю́ту му́жу во Еги́пет.

Сла́ва Отцу́ и Сы́ну и Свято́му Ду́ху:

В пле́не сый, му́жественне терпя́ злая/ смире́ния ра́ди нра́ва своего́, купи́вша тя в кро́тость преложи́л еси́/ и, неду́ги его́ исцели́в, ве́рою просвети́л еси́, сла́вне.

И ны́не и при́сно и во ве́ки веко́в. Ами́нь.

Богоро́дичен: Не оста́вив Небе́сных, Пречи́стая,/ Бог истощава́ется ны́не во утро́бе Твое́й,/ и ме́рится Безме́рный, безме́рная ми́ра разреши́в прегреше́ния.

Пе́снь 5

Ирмо́с: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Припев: Святителю отче Модесте, моли Бога о нас.

Свяще́ннаго и ангелоподража́тельнаго чи́на мона́хов возжеле́вшу ти,/ удали́лся еси́ в пусты́ню свята́го Сина́я/ и равноа́нгелен яви́лся еси́, Богоно́се.

Припев: Святителю отче Модесте, моли Бога о нас.

На высоту́ доброде́телей, я́коже и на го́ру, возше́д/ и Боже́ственным, я́коже Моисе́й, покры́шся мра́ком,/ от Бо́га догма́тов скрижа́ли прия́л еси́, пребога́те.

Припев: Святителю отче Модесте, моли Бога о нас.

Всех благи́х о́браз был еси́, к Вы́шнему́ житию́ ве́дущ,/ те́мже, всече́стне, Бо́жиим манове́нием призыва́ешися во Иерусали́м,/ да стяжа́еши смире́нием высо́кая.

Сла́ва Отцу́ и Сы́ну и Свято́му Ду́ху:

Освяще́нный собо́р и сонм ве́рных тя, Богосве́тле, избра́ша свяще́нствовати в Сио́не святе́м,/ я́ко и́стиннаго ученика́ и подража́теля Началопа́стыря Иису́са.

И ны́не и при́сно и во ве́ки веко́в. Ами́нь.

Богоро́дичен: Восто́ку, свы́ше я́вльшуся на земли́,/ показа́лася еси́ всесве́тлая дверь, Присноде́во,/ ми́р озаря́ющи луча́ми чистоты́/ и ве́рным лучи́ чуде́с ниспосыла́ющи.

Песнь 6.

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Припев: Святителю отче Модесте, моли Бога о нас.

Ми́ром освяти́лся еси́,/ благода́ти священноде́тель быв свяще́ннейший и чудоде́латель пречу́дный,/ иде́же яви́ся Свет во открове́нии язы́ков и сла́ва Изра́иля.

Припев: Святителю отче Модесте, моли Бога о нас.

Я́ко А́нгел, благосла́вне, служи́л еси́ во хра́ме Воскресе́ния,/ иму́щем живоно́сный Гроб Христа́,/ воста́нием Свои́м воздви́гшаго паде́ние ро́да на́шего.

Припев: Святителю отче Модесте, моли Бога о нас.

Честны́я я́сли и Крест всех Влады́ки неукло́нною любо́вию созерца́я,/ Богови́дения поче́рпл тайноуче́ния/ и па́стве препо́дал еси́ сия́, всеизя́щне.

Сла́ва Отцу́ и Сы́ну и Свято́му Ду́ху:

Патриа́рха Авраа́ма до́блестем подо́бник был еси́,/ а́лчныя пита́я, жа́ждущия напая́я,/ неиму́щим неску́дна тре́бования подава́я и скоты́ врачу́я, свя́те.

И ны́не и при́сно и во ве́ки веко́в. Ами́нь.

Богоро́дичен: Ликовству́йте, вся ду́ши, и взыгра́йте:/ ны́не Земля́ плодоро́дит неора́нне Клас жизноно́сный,/ от него́же я́дше, не вза́лчут, благосты́ню того́ велича́ющи.

Кондак, глас 3:

Све́тлых по́двигов твои́х тве́рдость/ и сострада́ния ко всем бога́тство ви́дя,/ Всеблаги́й Подвигополо́жник Бог/ бога́тых дарова́ний Свои́х сподо́би тя, Моде́сте,/ сла́вный иера́рше и чудотво́рче./ Тем, моля́щеся тебе́, вопие́м:/ свобожда́й нас от лю́тых обстоя́ний/ и неду́гом на́шим пода́ждь исцеле́ние.

Икос:

Прииди́те, мы́сленно Святы́я Земли́ дости́гнем,/ да у́зрим в ней душе́вными очесы́ святи́теля и чудотво́рца Моде́ста./ Иде́же Небе́сный Началопа́стырь спасе́ния ра́ди на́шего вочелове́чися,/ та́мо того́ изволе́нием иера́рх бе святы́й сей,/ пасы́й лю́ди его́ и целя́ всяк неду́г их,/ Отроча́ же Мла́до бы́вшее нас ра́ди,/ и пропове́да всем преве́чнаго Бо́га,/ пра́зднующе у́бо преставле́ние блаже́ннаго, возопии́м:/ свобожда́й нас, свя́те, от лю́тых обстоя́ний/ и неду́гом на́шим пода́ждь исцеле́ние.

Песнь 7.

Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди, Бо́же оте́ц на́ших.

Припев: Святителю отче Модесте, моли Бога о нас.

Почита́ем па́мять твою́, приснопа́мятне,/ путеводи́вый но́ваго Изра́иля от земна́го Иерусали́ма в Небе́сный,/ его́же улучи́ти нам моли́ся, любо́вию сла́вящим тя.

Припев: Святителю отче Модесте, моли Бога о нас.

Недре́млющее о́ко Сио́на бы́вый, достосла́вне,/ па́ству свою́ стрегу́ще от волко́в губи́тельных,/ тех вреда́ соблюда́й нас, воспева́ющих тя.

Припев: Святителю отче Модесте, моли Бога о нас.

Собо́р богобо́рный иу́деев разоря́юща тя Богоше́ственная земля́ име́,/ христиа́нская же составле́ния умножа́юща и утвержда́юща, Богоно́сне иера́рше.

Сла́ва Отцу́ и Сы́ну и Свято́му Ду́ху:

От греха́ к доброде́тели,/ от иуде́йскаго и язы́ческаго мра́ка ко све́ту благоче́стия христиа́нскаго обрати́л еси́ мно́жества,/ па́стырю Богосве́тлый.

И ны́не и при́сно и во ве́ки веко́в. Ами́нь.

Богоро́дичен: Со́лнце пра́вды, возсия́вшее от Тебе́, Богоро́дице,/ звездо́ю созыва́ет волхвы́ с да́ры поклони́тися Младе́нствовавшему,/ его́же А́нгел мно́жества воспе́ша, сла́вяще.

Песнь 8.

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозноси́м во вся ве́ки.

Припев: Святителю отче Модесте, моли Бога о нас.

Свят еси́, гра́де Иерусали́ме,/ освяще́нный по́двигами святы́х твои́х, поне́сших благо́е и́го Христо́во./ От ни́хже есть Моде́ст, первопресто́льник твой.

Припев: Святителю отче Модесте, моли Бога о нас.

Кто твоя́ по́двиги, небоявле́нне, по достоя́нию воспе́ти возмо́жет,/ бе́ды же и ско́рби от неве́рных,/ их же пре́лесть сло́вом и де́лом изоблича́л еси́?

Припев: Святителю отче Модесте, моли Бога о нас.

Кто от сыно́в Сио́на не ублажи́ тя, ви́дя твое, свяще́нне, незло́бие,/ и́мже низложи́л еси́ всезло́бнаго миродержи́теля/ и укроти́л иуде́и, на тя злбо́ствовавшия?

Сла́ва Отцу́ и Сы́ну и Свято́му Ду́ху:

Ви́дя Христо́с вели́кое терпе́ние твое́, му́дре,/ непобеди́мую си́лу Свою́ низпосыла́ше тебе́,/ благода́тию Свое́ю укрепля́я тя на бо́льшее терпе́ние.

И ны́не и при́сно и во ве́ки веко́в. Ами́нь.

Богоро́дичен: Псалты́рь с гу́слию восприими́, Дави́де, и песновоспо́й:/ се одушевле́нный киво́т являе́тся во гра́де твое́м Вифлее́ме,/ нося́й святы́х Пресвята́го всем во освяще́ние.

Песнь 9.

Ирмо́с: Бо́га/ челове́ком невозмо́жно ви́дети,/ на него́же не смеют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ его́же велича́юще,/ с Небе́сными во́и Тя ублажа́ем.

Припев: Святителю отче Модесте, моли Бога о нас.

Име́я ду́шу ми́лостиву, и се́рдце чи́сто, и любо́вь нелицеме́рну,/ патриа́ршества же Иерусали́мскаго досто́инство,/ лико́м святи́телей днесь сопричта́лся еси́ на Небесе́х.

Припев: Святителю отче Модесте, моли Бога о нас.

Престо́лу предстоя́ всех Влады́ки,/ песнь Трисвяту́ю возглаша́еши, священнотаи́нниче, ра́достно,/ со избра́нными упокоява́яся и моля́ся о почита́ющих тя.

Припев: Святителю отче Модесте, моли Бога о нас.

Благода́ть ду́ха, все́льшаяся в тя,/ яви́ тя Богоно́сна па́стыря Свято́му Гра́ду/ и чудотво́рца сла́вна ве́рным,/ е́же показу́еши оста́нками те́ла твоего́.

Сла́ва Отцу́ и Сы́ну и Свято́му Ду́ху:

Свяще́нныя мо́щи твоя́ точа́т исцеле́ния с ве́рою приходя́щим,/ врачу́я вся́кия боле́зни, опаля́ют же и прогоня́ют де́моны,/ чудоде́йственниче сла́вне.

И ны́не и при́сно и во ве́ки веко́в. Ами́нь.

Богоро́дичен: Благословя́щии Тя, Благослове́нная, от Го́спода благословля́ются:/ ра́ждаеши бо в верте́пе Влады́ку,/ о Нем же благословля́ются вся племена́ земна́я.

Светилен:

Во святи́телех сия́еши, светоза́рне Моде́сте, я́ко со́лнце во дни,/ и в преподо́бных све́тиши, я́ко луна́ в звезда́х./ Тем воспева́ем твое успе́ние, свети́льниче Сио́на и ве́рных утвержде́ние.

Слава и ныне. Богоро́дичен:

Чи́стшая све́тлостей со́лнечных, Влады́чице,/ луча́ми и́стиннаго Све́та, неизрече́нно из Тебе́ Возсия́вшаго, ду́ши на́ша просвети́/ и благода́тию Твое́ю, о Благода́тная, сердца́ освяти́,/ к Го́рняго све́та раче́нию наставля́ющи ны.

Молитва

О, всехвальный святителю Христов и чудотворче Модесте! Приими сие малое моление от нас грешных, к тебе прибегающих, и теплым твоим предстательством умоли Господа и Бога нашего Иисуса Христа, яко да, призрев на ны милостивно, дарует нам согрешений наших вольных и невольных прощение, и по велицей Своей милости избавит нас от бед, печалей, скорби и болезней душевных и телесных, обдержащих нас; да подаст земли плодоносие, и вся, яже на пользу настоящаго жития нашего потребная; да дарует нам скончати житие сие привременное в покаянии, и да сподобит нас грешных и недостойных Небеснаго Царствия Своего, со всеми святыми славити Его безконечное милосердие, со Безначальным Его Отцем и Святым и Животворящим Его Духом, во веки веков. Аминь.