30 декабря

Канон преподобным новомученикам Паисию и Аввакуму, и иже с ними страдавшим в Белграде

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Яко и́стиннии во́ини Христо́вы, кро́тостию и смире́нием возсия́сте, и за Христа́ до́блественно пострада́сте, преподобному́ченцы Паи́сие и Авваку́ме, но сме́рть ва́ша велегла́сно возвеща́ет все́м: лу́чше е́сть за Христа́ и оте́чество страда́ти, не́жели без Христа́ и всеце́лый ми́р се́й стяжа́ти.

Кано́н преподобному́чеников, гла́с 8.

Пе́снь 1.

Ирмо́с: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.

Припев: Святии новомученицы Белгородстии, молите Бога о нас.

Посли́ мне́, Го́споди, согреше́ний мои́х мно́гих оставле́ние, и да́руй ми́ сло́во, я́ко да возмогу́ похвали́ти до́блести и страда́ния преподо́бных Паи́сия и Авваку́ма.

Припев: Святии новомученицы Белгородстии, молите Бога о нас.

Разжиза́емии любо́вию Христо́вою, вся́ земна́я преоби́десте, преподобному́ченцы Паи́сие и Авваку́ме, те́мже и венцы́ муче́ния от десни́цы Вы́шняго прия́сте.

Сла́ва Отцу́ и Сы́ну и Свято́му Ду́ху:

Естество́м земни́и, житие́м же я́ко Ангели яви́стеся, те́мже и ча́шу муче́ния усе́рдно испи́сте, Христа́ испове́дающе.

И ны́не и при́сно и во ве́ки веко́в. Ами́нь.

Богоро́дичен: Ма́ти Свята́я, Богоро́дице, Тя́ ору́жие непобеди́мое на враги́ предлага́ем: Тя́ бо и́мамы, Всенепоро́чная, наде́жду на́шего спасе́ния.

Пе́снь 3.

Ирмо́с: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден па́че Тебе́, Го́споди.

Припев: Святии новомученицы Белгородстии, молите Бога о нас.

Пе́снь воспое́м, отечестволю́бцы, Вы́шнему Бо́гу, целому́дренным смы́слом сла́вяще, богому́драго Паи́сия и до́бляго Авваку́ма.

Припев: Святии новомученицы Белгородстии, молите Бога о нас.

Оба ку́пно сла́вяще, Паи́сия и Авваку́ма, воспева́ем с ни́ми и мно́жество му́ченик, и́же не восхоте́ша отрещи́ся Христа́, но на дреко́лех умро́ша за́нь за Него́.

Сла́ва Отцу́ и Сы́ну и Свято́му Ду́ху:

Душа́ми же соверше́ни, святи́и, Христа́ возлюби́ли есте́ па́че все́х, и злочести́вый о́н ага́рянин, не возмо́же прельсти́ти ва́с тле́нною сла́вою.

И ны́не и при́сно и во ве́ки веко́в. Ами́нь.

Богоро́дичен: Изба́ви на́с от ну́жд на́ших, Ма́ти Христа́ Бо́га, ро́ждшая все́х Творца́, да вси́ зове́м Ти́: ра́дуйся еди́но Предста́тельство ду́ш на́ших.

Седа́лен, гла́с 8:

Огнепа́льныя страсте́й двиза́ния умертви́вше воздержа́нием, преподо́бнии, после́дующе стопа́м Влады́це Христу́, я́коже же́ртва жи́ва и освяще́нна принесо́стеся Бо́гу, закала́еми рука́ми ага́рянскими.

Сла́ва, и ны́не, богоро́дичен, гла́с то́йже:

Одержи́мы прегреше́нии мно́гими, Чи́стая, Тя́ Предста́тельницу еди́ну стяжа́вше, Де́во, вопие́м благода́рственно: спаси́ ны, Пресвята́я Богоневе́сто, Ты́ бо еси́ ми́ра прибе́жище.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святии новомученицы Белгородстии, молите Бога о нас.

Образ бы́ли есте́ кро́тости и воздержа́ния, но и непребори́ми бы́сте мучи́телей преще́нием, сего́ ра́ди прославля́ем ва́с, страда́льцы сла́внии.

Припев: Святии новомученицы Белгородстии, молите Бога о нас.

Богоме́рзских и злочести́вых ага́рян не убоя́стеся, но вся́ увеща́ния и́х ле́стная отри́нусте, и, я́ко а́гнцы, за Христа́ закла́ни бы́сте.

Сла́ва Отцу́ и Сы́ну и Свято́му Ду́ху:

Непобеди́ми яви́стеся, святи́и, Светода́вца же Бо́га возлюби́сте, Его́же си́лою укрепи́вшеся, мучи́теля посрами́сте.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, Пречи́стая Богоро́дице, Ангелов удивле́ние, проро́ков про́поведь, и апо́столов немо́лчная уста́: моли́ся Сы́ну Твоему́ и Бо́гу на́шему, да сохрани́т на́с, и ме́сто сие́, преподобному́ченик моле́нием.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святии новомученицы Белгородстии, молите Бога о нас.

О, непра́веднаго убие́ния! О, чу́днаго терпе́ния, непобеди́мых страда́лец! Иже кро́тостию и терпе́нием победи́ша горды́ню мучи́телей.

Припев: Святии новомученицы Белгородстии, молите Бога о нас.

Мно́жества му́ченик, и́же на дреко́лех за Христа́ умро́ша, ку́пно с Паи́сием и Авваку́мом, воспои́м па́мять, глаго́люще: му́ченицы святи́и, моли́те Бо́га о на́с.

Сла́ва Отцу́ и Сы́ну и Свято́му Ду́ху:

Ума́лили есте́ страсте́й но́щь, и безстра́стия де́нь пости́гли есте́, сме́рть за Христа́ прия́сте до́блественно, сего́ ра́ди вопие́м ва́м: моли́те Бо́га о на́с.

И ны́не и при́сно и во ве́ки веко́в. Ами́нь.

Богоро́дичен: Красота́ Це́ркве — Ты́ еси́, Де́во Влады́чице, царе́й держа́ва и похвала́, спаси́ ме́сто сие́ и лю́ди, на Тя́ наде́ющияся, Богоневе́стная.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святии новомученицы Белгородстии, молите Бога о нас.

Чи́сто яви́ся житие́ ва́ше, дарова́нием Пресвята́го Ду́ха, посреде́ злочести́вых мучи́телей не убоя́стеся, и ны́не на небесе́х при́сно весели́теся.

Припев: Святии новомученицы Белгородстии, молите Бога о нас.

Еже во Христе́ си́лу стяжа́сте, преще́ния мучи́телей, ниже́ сме́рти, убоя́стеся, но, умира́юще, яви́стеся кре́пльшии мучи́телей.

Сла́ва Отцу́ и Сы́ну и Свято́му Ду́ху:

Не довле́ют уста́ челове́ческа испове́дати по́двиги ва́ша и боле́зни, я́же за ве́ру Госпо́дню му́жески претерпе́сте.

И ны́не и при́сно и во ве́ки веко́в. Ами́нь.

Богоро́дичен: Облаче мы́сленнаго Со́лнца и неизрече́ннаго, изсо́хшую ду́шу мою́ ороси́ свы́ше, молю́ Тя́, и бу́ди ми́ вы́ну Покро́в и Помо́щница.

Конда́к, гла́с 3. Подо́бен: В Мѵ́рех, свя́те.

В ми́ре се́м Ангельским о́бразом пожи́вше, житие́м же Ева́нгелие исполня́юще, положи́сте ду́ши своя́ за ве́ру и оте́чество, умира́юще, яви́стеся кре́пльшии мучи́телей, сего́ ра́ди прославля́ем ва́с, святи́и преподобному́ченцы Паи́сие и Авваку́ме.

Икос:

Аще не вы́, святи́и, пода́сте ми́ сло́во, гре́шному и недосто́йному рабу́ ва́шему, ка́ко возмо́гл бы изрещи́ вся́ труды́ и злострада́ния ва́ша? Вы́ бо есте́ мона́хом похвала́ и утвержде́ние, му́чеником сла́ва и удобре́ние, и все́м ве́рным о́браз благоче́стия и тве́рдости. Сего́ ра́ди прославля́ем ва́с, святи́и преподобному́ченцы Паи́сие и Авваку́ме.

Пе́снь 7.

Ирмо́с: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Святии новомученицы Белгородстии, молите Бога о нас.

Истинно вмести́лище Христа́ Сама́го бы́ли есте́, и́стиною и любо́вию послужи́сте Бо́гу, Ему́ же Еди́ному вопия́ли есте́: благослове́н еси́, Го́споди Бо́же, во ве́ки.

Припев: Святии новомученицы Белгородстии, молите Бога о нас.

Ко́ль мно́гое мно́жество по́двиг и боле́зней ва́ших, я́же за Христа́ и оте́чество свое́ до́блественно подъя́сте, зову́ще и вопию́ще: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Иму́ще кре́пость Госпо́дню, мучи́телей свои́х низложи́сте, и сокруши́сте де́монов немощны́я де́рзости, зову́ще и вопию́ще: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богоро́дичен: Мои́х страсте́й пла́мень угаси́, и изба́ви мя́ льсти́ваго, я́ко Препросла́вленна еси́, во ве́ки.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Святии новомученицы Белгородстии, молите Бога о нас.

Страда́ния ва́ша боже́ственная, вои́стинну превзыдо́ша похвале́ния, я́ко те́лом тле́нным да́же и безпло́тныя враги́ победи́сте, вопию́ще: благослови́те, вся́ дела́ Госпо́дня, Го́спода.

Припев: Святии новомученицы Белгородстии, молите Бога о нас.

Ласка́ния богоме́рзских ага́рян отри́нусте, взира́я на воздая́ния, су́щая на небесе́х, я́же Христо́с предугото́ва вопию́щим Ему́ от души́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Ангелов во́инства удиви́шася, и согла́сно просла́виша Христа́, таково́е терпе́ние дарова́вшаго ва́м, вопию́щим Ему́: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Ра́дость, и Покро́в, и Приста́нище на́ше — Ты́ еси́, Благослове́нная, и Тя́ славосло́вим, я́ко Ро́ждшую Христа́ Бо́га на́шего: Его́же пое́м вся́ дела́, я́ко Го́спода, и превозно́сим во вся́ ве́ки.

Песнь 9

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Святии новомученицы Белгородстии, молите Бога о нас.

Ви́дев Всеви́дящее Око по́двиги ва́ша, и побе́дную хра́брость на враги́, венча́ет ва́с венцы́ одоле́ния.

Припев: Святии новомученицы Белгородстии, молите Бога о нас.

Лику́юще на небесе́х ны́не, непобеди́мая преподобному́ченик дво́ица, согла́сно со мно́жеством му́ченик, помина́йте и все́х на́с, непреста́нно ва́с велича́ющих.

Сла́ва Отцу́ и Сы́ну и Свято́му Ду́ху:

Юже Бо́г предугото́ва сла́ву на небесе́х, насле́довасте святи́и, и́бо а́ще и я́ко ме́ртви положе́ни на земли́, но в небе́сная пресели́стеся.

И ны́не и при́сно и во ве́ки веко́в. Ами́нь.

Богоро́дичен: Пресла́вная Богороди́тельнице, христиа́н Предста́тельнице, изми́ ны́ вся́кия ну́жды, да Тя́ пое́м во вся́ ве́ки.

Свети́лен.

Све́тлостию жития́ своего́ на земли́ возсия́сте, в терпе́нии же и испове́дании све́тльшии небе́сных зве́зд яви́стеся, кро́вию же ва́шею гра́д Бе́лград освяти́ся и вся́ страна́ Се́рбская. Те́мже досто́йно ва́с почита́ем, творя́ще честну́ю па́мять ва́шу.

Молитва

К вам, о святи́и новомученицы Белгородстии, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.