30 декабря

Канон святым трем отрокам Анании, Азарии и Мисаилу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 2:

Ве́лия ве́ры исправле́ния: во исто́чнице пла́мене, я́ко на воде́ упокое́ния, святи́и трие́ о́троцы ра́довахуся, и проро́к Дании́л, льво́м па́стырь, я́ко овца́м, явля́шеся. Те́х моли́твами, Христе́ Бо́же, спаси́ ду́ши на́ша.

Кано́н святы́х трие́х отроко́в. Гла́с 8.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святии трие отроцы, молите Бога о нас.

Безнача́льное Сло́во, из Отца́ пре́жде все́х веко́в рожде́нно боголе́пно, е́же в пещи́ ю́ношам обра́зно ви́денное, просла́вим.

Припев: Святии трие отроцы, молите Бога о нас.

Глаго́лы мучи́теля злочести́ваго благоро́днии о́троцы оплева́вше терпели́вно, сне́дьми пребеззако́нных оскверни́тися халде́йски не восхоте́ша.

Сла́ва Отцу́ и Сы́ну и Свято́му Ду́ху:

Пита́стеся у́бо сло́вом душе́вне, сне́дьми же самора́сленными пло́тски, па́че пита́ющихся дебе́лыми сне́дьми, царю́ красне́йшии ви́ды показа́стеся.

И ны́не и при́сно и во ве́ки веко́в. Ами́нь.

Богоро́дичен: Яд змии́н, в слу́хи го́рько излия́вшийся Евы, я́же из Дави́да возра́стшая, Отрокови́це, исцеля́еши, Изба́вителя поро́ждши.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Святии трие отроцы, молите Бога о нас.

Ра́зум стяжа́вше богонауче́нный, Влады́ко, о́троцы Дави́довы зако́ны оте́ческия богому́дренно соблюдо́ша.

Припев: Святии трие отроцы, молите Бога о нас.

Огнь не опали́ чисте́йшая телеса́ благочести́вых, посто́м бо душепита́тельным напая́хуся.

Сла́ва Отцу́ и Сы́ну и Свято́му Ду́ху:

Хвалу́ всеми́рную и многопе́тую пою́т о́троцы трие́, посреде́ пе́щи чу́дно ороша́еми.

И ны́не и при́сно и во ве́ки веко́в. Ами́нь.

Богоро́дичен: Да Рождество́, Влады́ко, из де́вствующаго телесе́ пока́жеши на́м, спаса́еши в пещи́ де́вствующая телеса́.

Седа́лен, гла́с 8. Подо́бен: Прему́дрости.

Тро́ицы о́браз проро́чески из невеще́ственных шаро́в в пла́мени о́троцы написа́ша тро́стию ве́ры, и Сло́ва кра́йнее на зе́млю низше́ствие та́инственно ви́деша, и все́м пропове́даша. Те́мже, и ро́су с небесе́ прие́мше духо́вную, источа́ют ве́рным дарова́ния и согла́сно вопию́щим Тебе́: да́руй, Христе́ Бо́же, прегреше́ний оставле́ние, я́ко благоутро́бен, пра́зднующим любо́вию святу́ю па́мять ва́шу.

Сла́ва, И ны́не, Богоро́дичен:

Ра́дуйся, престо́ле огнезра́чный Бо́жий; ра́дуйся, Отрокови́це, седа́лище Ца́рское, о́дре преиспещренноустла́нный, златопорфи́рный черто́же, хлами́до червленосве́тлая, укра́шенный хра́ме, молнено́сное ору́жие, свети́льниче многосве́тлый; ра́дуйся, Богоро́дице, дванадесятосте́нный гра́де, и две́ре златокова́нная, и черто́же светлообра́зный, светлопозлаще́нная трапе́зо, богоукраше́нная ски́ние; ра́дуйся, сла́вная Неве́сто, Со́лнце ка́плющая; ра́дуйся, еди́на души́ моея́ благоле́пие.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святии трие отроцы, молите Бога о нас.

Дании́л мудре́йший, боже́ственне умо́м просвеща́емь, со́ния разреши́ самоде́ржцев Боже́ственною благода́тию.

Припев: Святии трие отроцы, молите Бога о нас.

Облиста́ет чудесы́ е́же в пещи́ отроко́в страда́ние, мучи́теля бо улови́ша к позна́нию Твоему́, Всеси́льне.

Сла́ва Отцу́ и Сы́ну и Свято́му Ду́ху:

Согла́сия орга́ны и мусики́и пе́сни всесли́чныя до́блественных не привлеко́ша и злато́му о́бразу не подклони́ша.

И ны́не и при́сно и во ве́ки веко́в. Ами́нь.

Богоро́дичен: Пе́сньми, Всепе́тая, и́же в Вавило́не де́ти почита́ют Сы́на Твоего́ Пребоже́ственнаго, Его́же в пещи́ позна́ша.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святии трие отроцы, молите Бога о нас.

Научи́вшеся зако́ну, Спа́се, не отверго́шася Твои́ уго́дницы, Дании́л вели́кий с треми́ ю́ношами богоразу́мными, но, кре́пость прие́мше от Тебе́, Благоде́теля, мучи́телей му́жески победи́ша.

Припев: Святии трие отроцы, молите Бога о нас.

Мы́сленно науча́шеся Дании́л, Человеколю́бче, Твои́м та́йнам: на о́блаце бо я́ко Сы́на Тя́ челове́ча гряду́ща, язы́ков все́х я́ко Судию́ и Царя́ зря́ше ума́ чистото́ю.

Сла́ва Отцу́ и Сы́ну и Свято́му Ду́ху:

Украси́ся, о де́ти, па́че ка́мене сапфи́ра ва́ше совокупле́ние, я́ко заря́ злата́я; благоче́стия ре́вностию распа́льшеся, ходя́ще ра́достно в пещи́ и пле́щуще ли́к всеми́рный.

И ны́не и при́сно и во ве́ки веко́в. Ами́нь.

Богоро́дичен: Дании́л Тя́, Де́во, го́ру прописа́ я́ве боже́ственный, трие́ же о́троцы, ви́девше пла́мень ороша́ющь, Твое́ Боже́ственное Рождество́ пе́сненно восхваля́ют я́ко Спа́са, и Зижди́теля и Го́спода.

Пе́снь 6.

Ирмо́с: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю! и спаси́.

Припев: Святии трие отроцы, молите Бога о нас.

Облада́вше есте́ственными страстьми́ си́лою Сло́ва, стране́ язы́к халде́йских вла́стели бы́сте: ве́сть бо доброде́тель че́сть дарова́ти стяжа́вшим ю́, о Дави́довы му́дрии вну́цы!

Сла́ва Отцу́ и Сы́ну и Свято́му Ду́ху:

В ме́ртвость Дании́л живоно́сную оде́явся дре́вле, я́ко бо́га халде́ем злочести́вно мни́маго убива́ет сне́дию зми́я зле́йшаго, свяще́нники же злочести́выя му́дре уби́л е́сть.

И ны́не и при́сно и во ве́ки веко́в. Ами́нь.

Богоро́дичен: Ми́лостива ми́ Судию́ и Сы́на Твоего́, Богоро́дице Де́во, Твои́ми моли́твами бы́ти в де́нь Суда́, Изба́вителя же лю́тых, Ма́ти, умоли́, на Тя́ бо еди́ну наде́жду мою́ возлага́ю.

Конда́к, гла́с 6:

Рукопи́саннаго о́браза не поче́тше, но Неопи́санным существо́м защити́вшеся, треблаже́ннии, в по́двизе огня́ просла́вистеся, среде́ же пла́мене нестерпи́маго стоя́ще, Бо́га призва́сте: ускори́, о Ще́дрый, и потщи́ся, я́ко Ми́лостив, в по́мощь на́шу, я́ко мо́жеши хотя́й.

Икос:

Простри́ Твою́ ру́ку, е́юже дре́вле прия́ша искуше́ние еги́птяне борю́щии и евре́е бори́мии. Не оста́ви на́с, да не пожре́т на́с сме́рть, жа́ждущая на́с, и сатана́, ненави́дяй на́с, но прибли́жися на́м и пощади́ ду́ши на́ша, я́коже пощади́л еси́ иногда́ о́троки Твоя́, су́щия в Вавило́не, непреста́нно сла́вящия Тя́, и вве́рженныя Тебе́ ра́ди в пе́щь, и от сея́ вопию́щия Ти́: ускори́, Ще́дрый, и потщи́ся, я́ко Ми́лостив, на по́мощь на́шу, я́ко мо́жеши хотя́й.

Пе́снь 7.

Ирмо́с: Отроцы богочести́вии в Вавило́не, о́бразу злато́му не поклони́шася, но посреде́ пе́щи о́гненныя, ороша́еми, пе́снь воспева́ху, глаго́люще: превозноси́мый отце́в и на́ш Бо́же, благослове́н еси́.

Припев: Святии трие отроцы, молите Бога о нас.

Гла́с боголюбе́зен песнопоя́шеся из среды́ огня́ Вседержи́телю: Аза́рия бо, боже́ственный ли́к соста́вив, пе́снь воспева́я, глаго́лаше: благослове́н Бо́г оте́ц на́ших.

Припев: Святии трие отроцы, молите Бога о нас.

Цевни́ца ю́ношей богосло́вяше все́х Бо́га и Вседержи́теля, те́м в пещи́ я́сно я́вльшагося, и пе́снь воспева́ху, глаго́люще: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Три́, в пе́щь вве́рженныя, ви́дев ца́рь, я́ко узре́ четве́ртаго ви́д, Сы́на пронарече́ Бо́жия и все́м возопи́: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Име́я просвеще́н Боже́ственною заре́ю у́м, Дании́ле богоблаже́нне, Де́вы Рождество́ я́ве предви́дел еси́ та́инственными о́бразы образу́емо, благослове́н, вопия́, Бо́г оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святии трие отроцы, молите Бога о нас.

Авраа́мово благоро́дие сохрани́ти тща́щеся, сво́йственное к нему́ стяжа́сте основа́ние ве́ры и наде́жди, преподо́бнии, терпе́ние и напа́стем пожда́ние, вопию́ще: благослови́те, свяще́нницы, Влады́ку, лю́дие, превозноси́те Его́ во ве́ки.

Припев: Святии трие отроцы, молите Бога о нас.

Яко свети́ла просия́вше, и зе́млю онебеси́вше, и благоче́стия просвеще́нием осия́вшеся, всеми́рное соста́вльше ликостоя́ние, пою́т и́же от напа́стей спа́сшему Влады́це: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Юношески погаси́вше распали́мую пе́щь и льво́в че́люсти связа́вше, Дави́довы вну́цы, ны́не ра́дующеся, пою́т Тя́, Благоде́теля, Царя́ все́х: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Тайнонауча́ет, Пречи́стая, Дании́л мудре́йший, и предживопису́ют о́троцы трие́ Рождество́ Твое́ богому́дреннии, чрез о́бразы зря́ще из утро́бы Твоея́ проше́дшаго несказа́нно, Его́же о́троцы благословя́т, свяще́нницы воспева́ют, лю́дие превозно́сят во вся́ ве́ки.

Песнь 9

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Святии трие отроцы, молите Бога о нас.

Достиго́сте кончи́ну жела́нную и жела́ний Кра́йнейшему предстоите́ в небе́сных черто́зех, о́троцы всебога́тии.

Припев: Святии трие отроцы, молите Бога о нас.

Ра́дующеся, рукоя́тие, е́же от сле́з, до́браго ва́шего де́лания прия́сте, нетле́ния кла́с плодоноси́вше.

Сла́ва Отцу́ и Сы́ну и Свято́му Ду́ху:

Возсия́ све́тлость ны́не ва́м досто́йно, и весе́лие се́рдца процвете́: отону́дуже бо отбеже́ печа́ль, всели́стеся.

И ны́не и при́сно и во ве́ки веко́в. Ами́нь.

Богоро́дичен: Па́жить сме́рти уста́вила еси́, Де́во, Жизнода́вца ро́ждши и Го́спода, животворя́щаго ве́рою велича́ющия Тя́.

Свети́лен проро́ка:

Иже во проро́цех велича́йший Дании́л ны́не да почти́тся, Христа́ бо Бо́га на́шего ви́де, ка́мень отсе́чен кроме́ ру́к от горы́ — Чи́стыя Богоро́дицы. С ни́м да восхва́лятся и трие́ о́троцы, я́же спасе́ от пе́щнаго огня́ неврежде́ны, о́браз Де́вы боже́ственный и неизрече́нный, и́мже ми́р спасе́ся.

Сла́ва И ны́не:

Тайнонауча́ет, Всечи́стая, Ду́хом Боже́ственным Дании́л прему́дрейший, и пропису́ют ве́рою Авра́амстии трие́ о́троцы Твое́ безсе́менное Рождество́: Сы́й бо Божество́м неопи́санное Сло́во из Тебе́ пло́тию хотя́ опису́ется, Богоро́дице, в Вифле́еме ражда́емь на спасе́ние челове́ков.

Молитва

К вам, о святи́и отроцы, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.