2 декабря

Канон иной святым преподобным Варлааму и Иоасафу Индийским

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бному Варлаа́му, глас 8:

Слез твои́х исто́чники пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоно́сил еси́,/ и был еси́ свети́льник вселе́нныя, сия́я чудесы́, Варлаа́ме о́тче наш,/ моли́ Христа́ Бо́га спасти́ся душа́м на́шим.

Тропа́рь преподо́бному Иоаса́фу, царю́ Инди́йскому, глас 4:

Из чре́ва ма́терня/ прекра́сное вселе́ние бысть Свята́го Ду́ха,/ пресла́вне Иоаса́фе,/ и от блаже́ннаго Варлаа́ма безце́нный би́сер, Христа́,/ в се́рдце свое́м прия́л еси́,/ и Боже́ственным Креще́нием И́ндию просвети́л еси́,/ оте́ческое же нече́стие испра́вль,/ приведе́ его́ от тьмы ко све́ту Богоразу́мия/ и, оста́вив тле́нное на земли́ ца́рство,/ пусты́ню дости́г и своего́ учи́теля,/ те́мже на Небесе́х от Живонача́льныя Тро́ицы/ венце́м ца́рским венча́ся,/ моли́ о нас, чту́щих честну́ю твою па́мять.

Кано́н иной. Гла́с 8.

Пе́снь 1.

Ирмо́с: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре,/ пои́м Ему́/ я́ко Изба́вителю на́шему Бо́гу, я́ко просла́вися.

Припев: Преподобные отцы Варлааме и Иоасафе, моли Бога о нас.

Сокруше́нна ми се́рдца в хвале́нии па́мяти ва́шей, преподо́бнии отцы́,/ в сокруше́нии припа́дающия прие́мля, Бог да не уничижи́т,/ помоли́ся, о́тче Варлаа́ме со Иоаса́фом,/ е́же ми воспе́ти Изба́вителю, я́ко просла́вися.

Припев: Преподобные отцы Варлааме и Иоасафе, моли Бога о нас.

Вы́шняго про́мысл, е́же всем хотя́й спасти́ся,/ посла́ тя от пусты́ни, преподо́бне Варлаа́ме, взыска́ти Иоаса́фа,/ в неве́дении Богови́дения су́ща,/ и показа́ти многоце́нный би́сер – Христа́,/ со́лнца светле́е блища́щийся,/ отъе́млющаго неве́рующим зра́ки.

Сла́ва Отцу́ и Сы́ну и Свято́му Ду́ху:

До́браго купца́ уподо́бивыйся нра́ву, о́тче Варлаа́ме,/ сам пе́рвие прода́л еси́ вся своя́ отверже́нием ми́ра/ и купи́л еси́ село́ до́брое – Сенахери́мскую пусты́ню,/ иде́же обре́т сокро́вище, искупи́ тем, а́ки долг, ду́шу преблаже́ннаго Иоаса́фа.

И ны́не и при́сно и во ве́ки веко́в. Ами́нь.

Богоро́дичен: До́брую Тя Еди́ну обре́т в жена́х и нескве́рную голуби́цу,/ одесну́ю Себе́ ста́ти повеле́ Сын Твой и Бог,/ скве́рну душ на́ших очи́сти и шу́яго стоя́ния свободи́,/ рожда́я к десно́й ча́сти всех Призыва́ющаго, Мари́е Де́во.

Пе́снь 3.

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Припев: Преподобные отцы Варлааме и Иоасафе, моли Бога о нас.

Ничто́же па́че любве́ предпочита́я, Варлаа́ме свя́те,/ е́же за ду́шу дру́га ду́шу свою́ положи́ти,/ упова́нием впери́ся, утверди́ся па́лицею ве́ры,/ изведе́ честно́е от недосто́йнаго/ и возвесели́ся о спасе́нии твое́м, Иоаса́фе.

Припев: Преподобные отцы Варлааме и Иоасафе, моли Бога о нас.

О, блаже́нныя твоея́ любве́, преблаже́нне Варлаа́ме!/ О, вы́шния и Богода́нныя ти прему́дрости!/ Вверг бо еси́, а́ки у́дицу, сло́во/ в многому́тное идолобе́сия мо́ре/ и ят, а́ки ры́бу, Иоаса́фа,/ о его́же взыска́нии возвесели́ся.

Сла́ва Отцу́ и Сы́ну и Свято́му Ду́ху:

Стра́нным о́бразом Бы́вшаго за ны стра́нна/ покры́лся еси́, преблаже́нне Варлаа́ме,/ и прии́де показа́ти и́стину по предуви́дению иму́щему я́тися пра́вды, Иоаса́фу преблаже́нному.

И ны́не и при́сно и во ве́ки веко́в. Ами́нь.

Богоро́дичен: Стра́нный о́браз прижи́тия Твоего́ ви́дяще,/ к Тебе́, Безму́жная Ма́ти, ра́бски припа́даем и мо́лимся:/ стра́нных нас на путь спасе́ния наста́ви,/ я́ко еди́на Наста́вница хотя́щим спасти́ся.

Седа́лен, гла́с 5.

Отце́м сла́ву и пусты́ни воспита́ние,/ преподо́бнаго Варлаа́ма пе́сньми пе́ти не земноро́дных подо́бне, но А́нгельским лико́м сво́йственно,/ я́ко земна́го А́нгела и Небе́снаго граждани́на,/ при́сно моля́щегося о душа́х на́ших.

Сла́ва и ны́не, Богоро́дичен:

Херуви́мов Честне́йшей и Серафи́мов Превы́шщей/ не земноро́дных уст песнь приноси́ти,/ но А́нгельскому ли́ку то сво́йственно,/ оба́че дерза́ем, кни́жнии, пе́ти и хвали́ти Тя, Пречи́стая,/ я́ко Неусы́пную Моли́твенницу о душа́х на́ших.

Пе́снь 4.

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.

Припев: Преподобные отцы Варлааме и Иоасафе, моли Бога о нас.

Усмотри́тельным Свои́м о́ком ве́дый Вы́шний коего́ждо пре́жде бытия́ его́/ призыва́ет и наставля́ет к Себе́,/ я́коже и тебе́, царе́вичу Иоаса́фе, блаже́нным Варлаа́мом,/ да возда́си сла́ву Призыва́ющему во спасе́ние, и́мже весть смотре́нием.

Припев: Преподобные отцы Варлааме и Иоасафе, моли Бога о нас.

Ви́дев, преблаже́нне Иоаса́фе, а́ще и стрего́м,/ немощно́е челове́ческое естество́,/ и, разуме́в кра́ткую жизнь, се́рдцем уязви́ся, лу́чшия взыска́ти жела́я,/ те́мже и жела́емое ти извести́ся разу́мне преподо́бным Варлаа́мом.

Сла́ва Отцу́ и Сы́ну и Свято́му Ду́ху:

Егда́ со́лнце пра́вды облиста́ тя, царе́вичу Иоаса́фе,/ уче́ньми преподо́бнаго Варлаа́ма,/ тогда́ идолопокло́нницы, а́ки зве́рие в ло́жах свои́х, неве́дением успо́ша/ и не разуме́ша та́йны, отверза́ющия ти врата́ Го́рняго Иерусали́ма.

И ны́не и при́сно и во ве́ки веко́в. Ами́нь.

Богоро́дичен: Со́лнцу предте́кшая денни́це, Богоневе́стная Де́во,/ сы́на дне́ви покажи́ ми и на путь покая́ния наста́ви,/ я́ко да тем улучу́ вход к ра́йскому селе́нию.

Пе́снь 5

Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́, ино́го не ве́мы,/ и́мя Твое имену́ем.

Припев: Преподобные отцы Варлааме и Иоасафе, моли Бога о нас.

Во при́тчах отве́рзл еси́ уста́ своя́, Варлаа́ме,/ сия́ показу́я гада́ний о́бразы,/ и научи́ ти, Иоаса́фе, Ева́нгельскому после́довати тече́нию,/ пе́рвие отро́ждшися водо́ю и Ду́хом.

Припев: Преподобные отцы Варлааме и Иоасафе, моли Бога о нас.

Ба́нею Креще́ния обно́влься, пречу́дне Иоаса́фе,/ ве́тхаго совле́кся челове́ка и в но́ваго обле́кся,/ я́коже наста́ви тя духо́вный твой оте́ц, Варлаа́м преподо́бный.

Сла́ва Отцу́ и Сы́ну и Свято́му Ду́ху:

Бу́ря идолобе́сия воста́ на тя, преподо́бне Иоаса́фе,/ но не поколеба́ твоего́ ве́ры хра́му,/ осно́ван бо бе на краеуго́льном ка́мени – Христе́/ и утвержде́н до́бре, я́коже устро́и Варлаа́м прему́дрыми уче́ньми.

И ны́не и при́сно и во ве́ки веко́в. Ами́нь.

Богоро́дичен: Бу́ря жите́йских страсте́й воста́ на ми отча́яния,/ и проти́вен ветр от до́браго тече́ния ми воспяща́ет,/ ускори́, Чи́стая, и путь мой от паде́ния к до́брому приста́нищу устро́й,/ Ты бо еси́ приста́нище жите́йских пла́ваний.

Пе́снь 6.

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мои́, Благоутро́бне Го́споди.

Припев: Преподобные отцы Варлааме и Иоасафе, моли Бога о нас.

Я́ко во́ды морски́я, во́лны искуше́ния воста́ша на тя, преподо́бне Иоаса́фе,/ но, а́ки крыло́ма, посто́м и моли́твою прелете́в на ти́хое приста́нище/ направле́нием до́браго учи́теля твоего́ Варлаа́ма.

Припев: Преподобные отцы Варлааме и Иоасафе, моли Бога о нас.

Кре́пка любы́ твои́, а́ки сме́рть, царю́ Иоаса́фе, к Бо́гу бя́ше,/ то́ю бо умори́л еси́ все Фе́вдино волхвова́ние,/ па́че же сама́го кня́зя тьмы́, хотя́щаго, твое́й чистоте́ одоле́в, от Бо́га отврати́ти.

Сла́ва Отцу́ и Сы́ну и Свято́му Ду́ху:

Ди́вен позо́р и взыска́ние мудрецо́в о ве́ре,/ но, егда́ Дух Святы́й возде́йствова,/ вся е́ллинская шата́ния ослабе́ша,/ проти́ву твоему́, царе́вичу Иоаса́фе, Боже́ственному раче́нию не возмого́ша ста́ти/ и отца́ твоего́ Варлаа́ма моли́твам.

И ны́не и при́сно и во ве́ки веко́в. Ами́нь.

Богоро́дичен: Ди́вен позо́р А́нгелом и челове́ком, Пречи́стая,/ я́ко без му́жа ражда́еши и де́вством запечатле́нна Ма́ти познава́ешися,/ Бог бо из Тебе́ роди́ся, побежда́яй естества́ чин.

Конда́к, глас 8:

Ве́дый твое́ из младе́нства благо́е изволе́ние, Иоаса́фе, еди́н сердцеве́дец Бог,/ и от ца́рствия земна́го в мона́шеское пребыва́ние приведы́й тя,/ вели́кому Варлаа́му после́довати сподо́би./ С ни́мже и ны́не го́рний Иерусали́м всесве́тлый оте́чество име́я,/ жела́емыя добро́ты красно́ наслажда́яся Святы́я Тро́ицы,/ мо́лим тя, ца́рская красото́,/ помина́й нас, ве́рою чту́щия тя.

И́кос:

Други́й, о́тче, яви́лся еси́ врач и предста́тель,/ неду́гом одержи́мых ско́рбию, Иоаса́фе чу́дне,/ исцеля́я вся ве́рныя, притека́ющия под Боже́ственный покро́в твой./ Тем и от нас слы́шиши:/ ра́дуйся, отца́ блага́го ко́реню,/ ра́дуйся, ма́тере благи́я ветвь,/ ра́дуйся, и́же тех любо́вь отри́нувый,/ ра́дуйся, и́же еди́наго Бо́га прие́мый,/ ра́дуйся, я́ко оста́вил еси́ на земли́ во́инство,/ ра́дуйся, я́ко низложи́л еси́ ва́рварскую горды́ню,/ ра́дуйся, стена́ и храни́тель ве́рных бы́вый,/ ра́дуйся, ору́жие и столп ми́ру я́влься,/ ра́дуйся, огне́м поже́г язы́чества,/ ра́дуйся, свети́льниче, сия́я чудесы́,/ ра́дуйся, наги́м мно́жицею покро́в,/ ра́дуйся, плене́нных изба́вителю,/ помина́й нас, ве́рою чту́щия тя.

Пе́снь 7.

Ирмо́с: Халде́йская пещь, огне́м распала́емая,/ ороша́шеся Ду́хом,/ Бо́жиим предстоя́нием, о́троцы поя́ху:/ благослове́н еси́, Бо́же оте́ц на́ших.

Припев: Преподобные отцы Варлааме и Иоасафе, моли Бога о нас.

В се́ти свое́й увязе́ гре́шник,/ псало́мник предви́де сие́,/ запина́яй бо прему́дрым,/ в кова́рстве устро́и, е́же бы ста́ти проти́ву ве́ры твоея́, царе́вичу Иоаса́фе,/ сей той вторы́й Варлаа́м яви́ся, благослови́ и восхвали́ премене́нием о́браза,/ я́коже сам той Варлаа́м Нахо́р бя́ше.

Припев: Преподобные отцы Варлааме и Иоасафе, моли Бога о нас.

Ка́мень мы́сленный был еси́, о́тче Варлаа́ме,/ источи́вший струю́ сла́дких уче́ний,/ и́хже испи́в, Иоаса́ф ди́вный, го́ресть ми́ра презре́в, и возопи́:/ благословен Бог оте́ц на́ших.

Сла́ва Отцу́ и Сы́ну и Свято́му Ду́ху:

Ца́рствия Христо́ва жела́я насле́дник бы́ти, Иоаса́фе прему́дре,/ ца́рство земно́е оста́ви и взыска́ти и́де Варлаа́ма,/ измени́в ме́ньше на бо́льшее и ху́ждшее покори́ лу́чшему, поя́:/ благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Царя́ Небе́снаго Черто́г све́тел и Пала́та кра́сна су́щи,/ я́ко Многомо́щная не забу́ди лю́де́й Твои́х,/ но приклони́ у́хо Твое́ на мольбу́/ и введи́ в черто́г Небе́сный ве́рно испове́дающих Тя, Ма́терь Бо́га оте́ц на́ших.

Пе́снь 8.

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Припев: Преподобные отцы Варлааме и Иоасафе, моли Бога о нас.

Покры́в себе́ во́льною нището́ю Христа́ ра́ди,/ нас ра́ди обнища́вшаго стопа́м после́дуя, царе́вичу Иоаса́фе,/ в пусты́ню всели́ся, а́ки пти́ца, избе́гшая се́тей ми́ра страсте́й,/ влеко́м любо́вию к Бо́гу и отцу́ своему́ Варлаа́му,/ с ни́мже ны́не Тро́ицу сла́вите во ве́ки.

Припев: Преподобные отцы Варлааме и Иоасафе, моли Бога о нас.

Любо́вь твоя́, преблаже́нне Иоаса́фе, и жела́ние бысть, а́ки желе́зо,/ влеку́щееся, а́ки магни́том, Богому́дрым Варлаа́мом,/ его́же обре́т в пусты́ни,/ ра́достным се́рдцем возда́сте хвалу́ во ве́ки.

Сла́ва Отцу́ и Сы́ну и Свято́му Ду́ху:

Во двои́х ли́цах бысть еди́но се́рдце в вас, преподо́бнии отцы́,/ еди́ным жела́нием, еди́ным раче́нием воскрыли́вшеся, на Богови́дение востеко́сте/ и, де́монов победи́вше полки́, со А́нгелы сла́вите Го́спода во ве́ки.

И ны́не и при́сно и во ве́ки веко́в. Ами́нь.

Богоро́дичен: Во двои́х во́лех и хоте́ниих,/ в еди́ном же соста́ве вопло́щся из Тебе́, Безму́жняя Ма́ти,/ просла́ви Тя в ро́дех родо́в/ и научи́ хвала́ми пе́ти во вся ве́ки.

Песнь 9

Ирмо́с: Тя, Неискусобра́чную Ма́терь Бо́га Вы́шняго,/ Тя, па́че ума́ ро́ждшую сло́вом вои́стинну Бо́га,/ вы́шшую Пречи́стых сил,/ немо́лчными славословле́нии велича́ем.

Припев: Преподобные отцы Варлааме и Иоасафе, моли Бога о нас.

Ле́ствицу доброде́телей утверди́вше, блаже́ннии отцы́,/ взыдо́сте на Го́рняя и всели́стеся в пресве́тлая места́ прекра́снаго Иерусали́ма,/ моли́тася и нам с ва́ми бы́ти, я́ко па́мять ва́шу велича́ем.

Припев: Преподобные отцы Варлааме и Иоасафе, моли Бога о нас.

По мно́гих труде́х и боле́знех прише́л еси́, о́тче Варлаа́ме,/ в поко́йная и безболе́зненная места́, во град нерукотворе́нный,/ и по себе́ не оста́вил еси́ духо́внаго ти сы́на Иоаса́фа,/ но ско́ро умоли́ всели́тися ему́ с то́бою/ и наслади́тися, е́же угото́ва Бог лю́бящим Его́.

Сла́ва Отцу́ и Сы́ну и Свято́му Ду́ху:

Я́ко единоу́мне в жи́зни сей пожи́сте,/ та́ко в бу́дущем ве́це неразлу́чно вселе́ние и́мате в оби́телях Небе́сных,/ иде́же и нам всели́тися моли́те, преподо́бне Варлаа́ме с Иоаса́фом,/ се бо па́мять ва́шу пе́сньми велича́ем.

И ны́не и при́сно и во ве́ки веко́в. Ами́нь.

Богоро́дичен: Жизнь присносу́щную ро́ждшая, Безневе́стная Де́во,/ жизнь вре́менную даждь нам до́бре премину́ти и доспе́ти ве́чныя жи́зни,/ раболе́пне Тя пе́сньми велича́ющим.

Свети́лен.

Ца́рскую диади́му и ски́петр держа́вы,/ све́тлыя черто́ги и златотка́нную порфи́ру оста́вль, царе́вичу Иоаса́фе,/ и измени́в та на убо́гую иноку́ющих оде́жду ску́дную,/ пусты́ню, а́ки простра́нныя черто́ги, возлюби́в за любо́вь возлюби́вшаго тя Христа́,/ Ему́же предстои́ши с Варлаа́мом достохва́льным,/ моли́те о всех чту́щих па́мять ва́шу.

Молитва

К вам, о святи́и преподобнии отцы Варлааме и Иоасафе, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.