2 декабря

Канон преподобным Варлааму и Иоасафу Индийским

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

От духо́внаго наста́вника научи́вся, царю́ Иоаса́фе, Бо́га позна́ти, креще́нием же просвети́вся, лю́ди к ве́ре обрати́л еси́, и отцу́ твоему́ от купе́ли прие́мник бы́в, ца́рство оста́вив, пусты́ню дости́гл еси́ и в не́й трудолю́бне подвиза́лся еси́. Моли́ Христа́ Бо́га со учи́телем твои́м Варлаа́мом спасти́ся душа́м на́шим.

Кано́н, гла́с 8.

Пе́снь 1.

Ирмо́с: Сокруши́вшему бра́ни мы́шцею Свое́ю и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу, я́ко просла́вися.

Припев: Преподобные отцы Варлааме и Иоасафе, моли Бога о нас.

Царе́вы глаго́лы слы́шав, Нахо́р зело́ вострепета́: вме́сто бо развраще́ния изрече́ благослове́ние, облича́я иуде́и и е́ллины, пропове́дая же на земли́ Христо́во прише́ствие, я́ко просла́вися.

Припев: Преподобные отцы Варлааме и Иоасафе, моли Бога о нас.

Рече́ния Нахо́р о зако́не изложи́, вити́и же и жерцы́ посрами́шася и я́ко безгла́сни обрето́шася, царю́ же Иоаса́фу душе́ю веселя́щуся и сла́вящу Бо́га небе́снаго, я́ко просла́вися.

Сла́ва Отцу́ и Сы́ну и Свято́му Ду́ху:

Иоаса́ф ца́рь к Нахо́ру рече́: благода́ть ти́ испове́дую, я́ко по и́стине побо́рник бы́л еси́, и а́ще Христа́ возлю́биши, жи́знь насле́диши: обраща́ющимся бо к Нему́ отверза́ет врата́ небе́сная.

И ны́не и при́сно и во ве́ки веко́в. Ами́нь.

Богоро́дичен: Аще и недосто́йне принесо́х ти́ таково́е слове́с изви́тие, богому́дрый царю́ Иоаса́фе, приими́ сия́ с любо́вию и принеси́ к Богома́тери моле́ние за мя́, да ми́лость обря́щу в де́нь стра́шнаго испыта́ния.

Пе́снь 3.

Ирмо́с: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Припев: Преподобные отцы Варлааме и Иоасафе, моли Бога о нас.

Словесы́ любе́зными ца́рь Нахо́ра наказа́в, о́н же с пла́чем и ра́достию пусты́ню дости́же, на ве́ру обрати́ся и креще́нием просвети́ся, и, вме́сто во́лка, овча́ Христо́во обре́теся.

Припев: Преподобные отцы Варлааме и Иоасафе, моли Бога о нас.

Фе́вда к царю́ Авени́ру глаго́лаше: не убо́йся, царю́, галиле́йских мудре́ц: си́и бо ско́ро испаду́т, не и́мут пред лице́м мои́м ста́ти, ни слове́с проти́вных глаго́лати.

Сла́ва Отцу́ и Сы́ну и Свято́му Ду́ху:

Предста́виша отрокови́цы укра́шены царе́ву сы́ну на послуже́ние, да прельстя́т пра́веднаго о́трока; о́н же, а́ще и разжже́ние в се́рдце плотско́е прии́м, моли́твою же и поще́нием от се́ти о́ныя изба́влен бы́сть.

И ны́не и при́сно и во ве́ки веко́в. Ами́нь.

Богоро́дичен: Напа́стьми мно́гими одержи́мь, из глубины́ се́рдца вопию́ Ти́: Влады́чице, изба́ви мя́, непотре́бнаго раба́ Твоего́, лю́тых обстоя́ний и тишину́ пода́ждь се́рдцу моему́.

Седа́лен, гла́с 3:

Чи́стая и непоро́чная душа́ боже́ственнаго о́трока ополче́ния вра́жия не устраши́ся, на по́двиг му́жески укрепля́яся, свы́ше избавле́ния прося́, да не оскверни́т оде́жды, ю́же от свята́го креще́ния прия́т, да получи́т красоту́ и сла́ву Христо́ву.

Сла́ва, и ны́не, Богоро́дичен:

Ки́йждо иде́же спаса́ется, та́мо пра́ведно и притека́ет; и ко́е ино́е таково́е прибе́жище, я́ко Ты́, Богоро́дице, покрыва́ющее ду́ши на́ша?

Пе́снь 4.

Ирмо́с: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́.

Припев: Преподобные отцы Варлааме и Иоасафе, моли Бога о нас.

Егда́ посто́м и моли́твою те́ло свое́ удручи́, зри́т во сне́ па́жить прекра́сну и гра́да красоту́ недомы́сленну, во еди́ном у́гле жела́ет пребыва́ния, и гла́с слы́шит: подвиза́ющимся сия́ угото́вашася.

Припев: Преподобные отцы Варлааме и Иоасафе, моли Бога о нас.

Мину́в места́ о́на све́тлая, зри́т ме́сто, тмы́ испо́лнено, и пе́щь, стра́шным пла́менем шумя́щую, и гла́су глася́щу: сие́ муче́ние гре́шником, де́лы скве́рными себе́ оскверни́вшим.

Сла́ва Отцу́ и Сы́ну и Свято́му Ду́ху:

Лежа́ на одре́, убуди́вся от виде́ния, сле́зы, а́ки ре́ки, испуща́ше, и ве́сь стра́хом объя́т бы́в и в себе́ разсужда́я: ка́ко све́тло пра́ведным воздая́ние и гре́шным стра́шно муче́ние? и вопия́ Христу́: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богоро́дичен: Бо́га на руку́ носи́вши, вся́ческая руко́ю Содержа́щаго, о Де́во Всеблагослове́нная! Того́, Де́ва, роди́вши, и по рождестве́ па́ки Де́ва пребыла́ еси́.

Пе́снь 5

Ирмо́с: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны, Го́споди ра́зве Тебе́ ино́го не ве́мы, и́мя Твое́ имену́ем.

Припев: Преподобные отцы Варлааме и Иоасафе, моли Бога о нас.

Не здра́вствует тво́й сы́н, пове́даше царю́; о́н же ско́ро притече́ и уми́льно вопроша́ше: что́ ти бы́сть, сы́не мо́й люби́мый, уте́хо ста́рости моея́? что́ та́ко лежи́ши на одре́ твое́м, ни ма́ло к кому́ бесе́дуя?

Припев: Преподобные отцы Варлааме и Иоасафе, моли Бога о нас.

Препя́л еси́ се́ть нога́м мои́м: вма́ле всели́лася бы во а́д душа́ моя́, а́ще не Госпо́дь помо́гл бы ми́ и показа́ мне́ пу́ть ко спасе́нию, и ктому́ не возмо́гл бы еси́ мене́ ви́дети жи́ва и сы́на себе́ именова́ти.

Сла́ва Отцу́ и Сы́ну и Свято́му Ду́ху:

Рыда́ние и печа́ль с го́рьким пла́чем сплета́ше ца́рь, неутоли́мь мяте́ж име́яше, рече́ в себе́: ча́до, не то́кмо бого́в отступле́ния, но и живота́ твоего́ отрица́ешися.

И ны́не и при́сно и во ве́ки веко́в. Ами́нь.

Богоро́дичен: Неизглаго́ланно заче́нши Бо́га, и па́че естества́ родила́ еси́: Сего́ моли́, Всенепоро́чная, растле́вша безме́стными дея́нии, поми́ловати мя́ за неизрече́нную ми́лость.

Пе́снь 6.

Ирмо́с: Яко во́ды морски́я, Человеколю́бче, волна́ми жите́йскими обурева́юся, те́мже, я́ко Ио́на, та́ко вопию́ Ти́: возведи́ от тли́ живо́т мо́й, Благоутро́бне Го́споди.

Припев: Преподобные отцы Варлааме и Иоасафе, моли Бога о нас.

Шу́ияго стоя́ния изба́витися и десна́го стоя́ния сподо́битися жела́ти Иоаса́фу, та́ко и́стинствующу, и ничто́же чествова́ти па́че Христо́вы любве́: се́ бо и́стинная сла́дость, и весе́лие, и ве́чное пребыва́ние.

Припев: Преподобные отцы Варлааме и Иоасафе, моли Бога о нас.

Убо Фе́вда глаго́лаше: почто́ бого́в отступи́л еси́ и отца́ царя́ прогне́вал еси́? Сего́ ра́ди от все́х люде́й возненави́ден еси́. Не бо́зи ли отца́ твоего́, моли́твы послу́шавше, тебе́ ему́ дарова́ша?

Сла́ва Отцу́ и Сы́ну и Свято́му Ду́ху:

Возопи́ ца́рь Иоаса́ф: о, заблужде́ния глубино́, вавило́нское се́мя, столпотворе́ния вну́че, окая́нне чароде́ивый ста́рче! Почто́ укаря́еши спаси́тельную про́поведь Христо́ва прише́ствия, Его́же сла́вы не́бо и вся́ земля́ испо́лнишася?

И ны́не и при́сно и во ве́ки веко́в. Ами́нь.

Богоро́дичен: Помози́, Влады́чице, и услы́ши глаго́л мо́й, Всенепоро́чная, его́же из глубины́ души́ приношу́ Ти, и разреше́ние долго́в пода́ждь ми́.

Конда́к, гла́с 8:

Ве́дый твое́ из младе́нства благо́е изволе́ние, Иоаса́фе, еди́н сердцеве́дец Бо́г, и от ца́рствия земна́го в мона́шеское пребыва́ние приведы́й тя́, вели́кому Варлаа́му после́довати сподо́би. С ни́мже и ны́не го́рний Иерусали́м всесве́тлый оте́чество име́я, жела́емыя добро́ты красно́ наслажда́яся Святы́я Тро́ицы, мо́лим тя́, ца́рская красото́, помина́й на́с, ве́рою чту́щия тя́.

Икос:

Други́й, о́тче, яви́лся еси́ вра́чь и предста́тель, неду́гом одержи́мых ско́рбию, Иоаса́фе чу́дне, исцеля́я вся́ ве́рныя, притека́ющия под боже́ственный покро́в тво́й. Те́м и от на́с слы́шиши: ра́дуйся, отца́ блага́го ко́реню; ра́дуйся, ма́тере благи́я ве́твь; ра́дуйся, и́же те́х любо́вь отри́нувый; ра́дуйся, и́же еди́наго Бо́га прие́мый; ра́дуйся, я́ко оста́вил еси́ на земли́ во́инство; ра́дуйся, я́ко низложи́л еси́ ва́рварскую горды́ню; ра́дуйся, стена́ и храни́тель царе́й бы́вый; ра́дуйся, ору́жие и сто́лп ми́ру я́влься; ра́дуйся, огне́м поже́г язы́чества; ра́дуйся, свети́льниче, сия́я чудесы́; ра́дуйся, наги́м мно́жицею покро́в; ра́дуйся, плене́нных изба́вителю; помина́й на́с, ве́рою чту́щия тя́.

Пе́снь 7.

Ирмо́с: Халде́йская пе́щь, огне́м распаля́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

Припев: Преподобные отцы Варлааме и Иоасафе, моли Бога о нас.

Сла́ву же, и ца́рство, и о́бласть всю́ на́двое разде́льшему, о́ву себе́ оста́вль, о́ву же вруча́ет сы́ну, царя́ его́ поста́вив; кня́зи же мно́ги и страти́ги преда́в, любе́зно же и че́стно отпусти́ его́ на страну́ свою́.

Припев: Преподобные отцы Варлааме и Иоасафе, моли Бога о нас.

Не про́сто к ца́рству идя́ше, но честны́й кре́ст пред ни́м ноша́ху; вше́д же во гра́д, на все́х столпе́х о́браз креста́ водружа́ше и ка́пища разоря́ше, прекра́сну це́рковь Влады́ки Христа́ воздви́же и все́м собра́тися к не́й повелева́ше; са́м же приле́жно моля́шеся.

Сла́ва Отцу́ и Сы́ну и Свято́му Ду́ху:

Христу́ ве́ровати вся́ подру́чныя уча́ше, изгна́нныя же отце́м епи́скопы, иере́и и мона́хи ра́достно срета́ше, и свои́ми рука́ми но́ги и́х омыва́ше, и вся́ко промышле́ние о ни́х творя́ше; и усе́рдно взыва́ше: препросла́вленный Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Дре́вле у́бо Иа́ков Тя́ преднаписа́; Иса́ия же, у́глем Ду́ха очи́щся, Бо́га Емману́ила от утро́бы Твоея́ роди́тися прозна́менова. К Нему́же велегла́сно вопия́ше: оте́ц на́ших Бо́же, благослове́н еси́.

Пе́снь 8.

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Припев: Преподобные отцы Варлааме и Иоасафе, моли Бога о нас.

Убо Иоаса́фов до́м растя́ше, Авени́ров же умаля́шеся, а́бие ца́рь писа́нием сы́на призыва́ет, о́н же ско́ро прише́д, на ве́ру отца́ обрати́, и от купе́ли сему́ прие́мник бы́в, и возопи́ ра́достно: сла́влю Тя́, Христе́, во ве́ки вся́.

Припев: Преподобные отцы Варлааме и Иоасафе, моли Бога о нас.

Бы́сть чу́до преди́вно: сы́н роди́телю своему́ оте́ц яви́ся. Окре́стныя страны́ просвеща́хуся, це́ркви созида́хуся, епи́скопи и иере́и же́ртву Бо́гу приноша́ху, пе́снь воспева́юще и сла́вяще Христа́ во ве́ки вся́.

Сла́ва Отцу́ и Сы́ну и Свято́му Ду́ху:

Госпо́днею благода́тию ца́рь Авени́р веселя́шеся, всю́ ца́рскую вла́сть сы́ну предаде́, са́м же в молча́нии пребыва́ше: в толи́ку глубину́ смире́ния вложи́ себе́, я́ко и дре́вних превзы́ти благове́рием, и сла́вяше Христа́ во ве́ки вся́.

И ны́не и при́сно и во ве́ки веко́в. Ами́нь.

Богоро́дичен: Ины́я по́мощи не и́мамы, ра́зве Тебе́, Влады́чице: Ты́ кре́пость и утвержде́ние, Ты́ похвала́, и ра́дование, и храни́тельница ми́ра; к Тебе́ прибега́юще, спаса́емся вси́.

Песнь 9

Ирмо́с: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых си́л, немо́лчными славословле́нии велича́ем.

Припев: Преподобные отцы Варлааме и Иоасафе, моли Бога о нас.

Мину́вшим дне́м не́киим по креще́нии ца́рь Авени́р а́бие в неду́г теле́сный впаде́, и егда́ нача́т приближа́тися коне́ц жития́ его́, в до́брем испове́дании, с те́плыми слеза́ми ду́шу свою́ предаде́.

Припев: Преподобные отцы Варлааме и Иоасафе, моли Бога о нас.

Ра́достными слеза́ми сы́н почита́ше отца́, не украси́ его́ ца́рскими оде́ждами, но просты́м одея́нием те́ло его́ покры́; над гро́бом ста́в, ру́це возде́в, Бо́гу благодаре́ние возсыла́ше, в покая́нии того́ прии́мшу.

Сла́ва Отцу́ и Сы́ну и Свято́му Ду́ху:

К лю́дем глаго́лаше, седя́ на престо́ле ца́рстем: оте́ц мо́й, ца́рь Авени́р, у́мре, я́ко еди́н от ни́щих, ничто́же ему́ после́дова, ни бога́тство, ни ца́рская сла́ва; вы́ же избери́те себе́, его́же хо́щете, да ца́рствует над ва́ми.

И ны́не и при́сно и во ве́ки веко́в. Ами́нь.

Богоро́дичен: Ле́ствица Иа́ковля, Еюже дре́вле Ангелы ви́де сходя́ща; гора́ приосене́нная, от Нея́же ка́мень без ру́к отсече́ся; и две́рь небе́сная, Еюже Госпо́дь еди́н про́йде. Еди́на в жена́х Ты́ еси́, Пречи́стая.

Свети́лен:

Ца́рство оста́вив, к пусты́ни устреми́ся и в хра́мине убо́гаго обита́, ца́рскую оде́жду совле́к, убо́гому даде́, коне́чную ми́лостыню показа́в, Христу́ после́дова.

Молитва

К вам, о святи́и преподобнии отцы Варлааме и Иоасафе, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.