Шрифт

2 декабря

Канон святаго пророка Авдия

Святаго пророка Авдия

Кано́н проро́ка. Гла́с 5.

Пе́снь 1.

Ирмо́с: Спаси́телю Бо́гу, в мо́ри лю́ди немо́крыми нога́ми наста́вльшему и фарао́на со всево́инством пото́пльшему, Тому́ еди́ному пои́м, я́ко просла́вися.

Припев: Святый пророче Авдие, моли Бога о нас.

Спаси́телю Бо́гу, проро́чески предстоя́ ны́не, со дерзнове́нием моли́ся свеща́тельными луча́ми просвеща́ти, ве́рою, богодохнове́нне, тя́ блажа́щия.

Припев: Святый пророче Авдие, моли Бога о нас.

Иже вся́ я́ве прозна́тельно зря́й, твоего́ се́рдца нему́тное, и чи́стое, и светоза́рное, блаже́нне, ви́дя, проро́ка богоприя́тна тя́ поставля́ет.

Сла́ва Отцу́ и Сы́ну и Свято́му Ду́ху:

Виде́ния ви́дев и́стинно, от Бо́га тебе́ изъявля́емая, пропове́дал еси́ злоче́стие бра́тий, и па́губу лю́тую, и те́х пра́ведное, блаже́нне, искорене́ние.

И ны́не и при́сно и во ве́ки веко́в. Ами́нь.

Богоро́дичен: Спа́сшиися Твои́м, Богороди́тельнице Чи́стая, безсе́менным Рождество́м, мо́лим Тя́: мирски́я напа́сти изба́ви ны́, согла́сно зову́щия пе́снь побе́дную.

Пе́снь 3.

Ирмо́с: Си́лою Креста́ Твоего́, Христе́, утверди́ мое́ помышле́ние во е́же пе́ти и сла́вити спаси́тельное Твое́ Вознесе́ние.

Припев: Святый пророче Авдие, моли Бога о нас.

Во́д та́инственных река́, из пучи́ны происходя́ даро́в Ду́ха, боговеща́телю, бы́л еси́.

Припев: Святый пророче Авдие, моли Бога о нас.

Хоте́нием и про́мыслом Бо́жиим провозвеща́ти бу́дущая предложи́лся еси́, достосла́вне.

Сла́ва Отцу́ и Сы́ну и Свято́му Ду́ху:

Просвеща́емь Боже́ственным све́том и небе́сным, провозвести́л еси́ бу́дущее язы́ком спасе́ние, всеблаже́нне.

И ны́не и при́сно и во ве́ки веко́в. Ами́нь.

Богоро́дичен: Всели́ся Сло́во в Тя́, Де́во Ма́ти, спаса́ет же, Богоро́дицу, му́дрствующия Тя́ хода́тайством Твои́м, Всенепоро́чная.

Седа́лен проро́ка, гла́с 1. Подо́бен: Гро́б Тво́й, Спа́се.

Вели́кий Авди́й, Боже́ственными сия́нии у́м светови́дный стяжа́в, сказу́ет бу́дущая, Ду́хом Святы́м веща́я. Сего́ дне́сь благочестивому́дренно чту́ще, соверша́ем свяще́нную его́ па́мять, сердца́ просвеща́ющую.

Сла́ва, И ны́не, Богоро́дичен:

Иже на престо́ле херуви́мстем седя́й, и в не́дрех Отчих пребыва́яй, я́ко на престо́ле святе́м седи́т Свое́м, Влады́чице, в не́дрех Твои́х; вопло́щься бо, Бо́г вои́стинну, воцари́ся над все́ми язы́ки, и разу́мно ны́не пои́м Ему́. Его́же умоли́ спасти́ся рабо́м Твои́м.

Пе́снь 4.

Ирмо́с: Услы́шах слу́х си́лы Креста́, я́ко ра́й отве́рзеся и́м, и возопи́х: сла́ва си́ле Твое́й, Го́споди.

Припев: Святый пророче Авдие, моли Бога о нас.

Проро́чества благода́ть, от страсте́й я́ко предъочи́стив твою́ ду́шу, Ду́хом Святы́м прие́м, возопи́л еси́: сла́ва си́ле Твое́й, Го́споди.

Припев: Святый пророче Авдие, моли Бога о нас.

Проро́к Авди́й, заре́ю светода́тельныя мо́лнии озаря́емь, просвети́ на́с зва́ти Тебе́: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Невестокраси́тель яви́лся еси́, всеблаже́нне, церко́вный, от Сио́на пропове́дав Спа́са изы́ти, Ему́же зове́м: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богоро́дичен: Собезнача́льное и соприсносу́щное Сло́во Отчее родила́ еси́, Чи́стая, боголе́пно, Ему́же зове́м: сла́ва си́ле Твое́й, Го́споди.

Пе́снь 5

Ирмо́с: Утренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве бо Тебе́, ино́го не ве́мы.

Припев: Святый пророче Авдие, моли Бога о нас.

Утреневав ко Го́споду, прия́л еси́ с небесе́ да́р Ду́ха Пресвята́го, всехва́льне.

Припев: Святый пророче Авдие, моли Бога о нас.

Спомо́щника, житие́ боже́ственное стяжа́в, ви́дети сподо́бился еси́, неви́димо Разумева́емаго.

Сла́ва Отцу́ и Сы́ну и Свято́му Ду́ху:

Возсия́ тебе́ све́т, всеблаже́нне, я́ко проро́ку, и того́ супру́жница тебе́ весе́лие дарова́ся.

И ны́не и при́сно и во ве́ки веко́в. Ами́нь.

Богоро́дичен: Хоте́нием вся́ческая, Пречи́стая, сотвори́вый, из Тебе́ созда́ся е́же по на́м Пребоже́ственный.

Пе́снь 6.

Ирмо́с: Обы́де мя́ бе́здна, гро́б мне́ ки́т бы́сть, а́з же возопи́х Тебе́, Человеколю́бцу, и спасе́ мя десни́ца Твоя́, Го́споди.

Припев: Святый пророче Авдие, моли Бога о нас.

Си́лою Ду́ха Боже́ственнаго зре́л еси́, проро́че, бу́дущая, о́бразы прие́мля Боже́ственных явле́ний, я́ко в зерца́ле, души́ све́тлостию.

Припев: Святый пророче Авдие, моли Бога о нас.

Умоли́ Го́спода, проро́че всеблаже́нне, моли́твами твои́ми ве́рою соверша́ющим па́мять твою́ прося́ прегреше́ний дарова́ти проще́ние.

Сла́ва Отцу́ и Сы́ну и Свято́му Ду́ху:

Уми́лостивися рабо́м Твои́м и си́м прегреше́ний проще́ние пода́ждь, Человеколю́бче, име́яй моля́щаго Тя́ Твоего́ проро́ка, ми́ру Тебе́ провозвести́вшаго.

И ны́не и при́сно и во ве́ки веко́в. Ами́нь.

Богоро́дичен: Вся́ческая нося́й сло́вом, Боже́ственною си́лою, объя́тии Твои́ми но́сится, Неискусобра́чная, Его́же ны́не моли́ спасти́ся душа́м на́шим.

Седа́лен проро́ка, гла́с 1. Подо́бен: Гро́б Тво́й, Спа́се.

Вели́кий Авди́й, Боже́ственными сия́нии у́м светови́дный стяжа́в, сказу́ет бу́дущая, Ду́хом Святы́м веща́я. Сего́ дне́сь благочестивому́дренно чту́ще, соверша́ем свяще́нную его́ па́мять, сердца́ просвеща́ющую.

Пе́снь 7.

Ирмо́с: В пещи́ о́гненней песносло́вцы спасы́й о́троки, благослове́н Бо́г оте́ц на́ших.

Припев: Святый пророче Авдие, моли Бога о нас.

Преесте́ственна и́стинно проро́к Твои́х сла́ва, благослове́нный Бо́же оте́ц на́ших.

Припев: Святый пророче Авдие, моли Бога о нас.

С Бо́гом обита́ти сподо́бився, воспева́еши: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Во проро́цех Твои́х Боже́ственную благода́ть Твою́ явля́еши, благослове́нный Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Изба́вленнии Твои́м Рождество́м, Пречи́стая Де́во, песнопое́м: благослове́н Бо́г оте́ц на́ших.

Пе́снь 8.

Ирмо́с: Из Отца́ пре́жде ве́к рожде́ннаго Сы́на и Бо́га и в после́дняя ле́та воплоще́ннаго от Де́вы Ма́тере, свяще́нницы, по́йте, лю́дие, превозноси́те во вся́ ве́ки.

Припев: Святый пророче Авдие, моли Бога о нас.

От Бо́га просве́щшеся, проро́цы провозвеща́ют бу́дущих зна́ние, богому́дренно взыва́юще: свяще́нницы, по́йте, лю́дие, превозноси́те во вся́ ве́ки.[Два́жды.]

Сла́ва Отцу́ и Сы́ну и Свято́му Ду́ху:

Якоже заря́ в пучи́не, во тме́ су́щия просвети́л еси́, Боже́ственными луча́ми, боговеща́телю, озаря́емь, зовы́й: свяще́нницы, по́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: По Боже́ственному существу́ Отцу́ Твоему́ Единосу́щне и на́м единоесте́ствен яви́лся еси́, воплоти́вся от неискусому́жныя Ма́тере. Те́м Тя́ пое́м, Христе́, и благослови́м во вся́ ве́ки.

Песнь 9

Ирмо́с: Тя́, па́че ума́ и словесе́ Ма́терь Бо́жию, в ле́то Безле́тнаго неизрече́нно ро́ждшую, ве́рнии, единому́дренно велича́ем.

Припев: Святый пророче Авдие, моли Бога о нас.

Сло́вом боже́ственным и дея́нием украша́емь впери́вся Ду́хом, проро́че чу́дный, бу́дущая зре́ти сподо́бился еси́.

Припев: Святый пророче Авдие, моли Бога о нас.

Иде́же проро́честии ли́цы вселя́емь и святы́х све́тлости, моли́ Го́спода спасти́ ве́рою благохва́лящия тя́, сла́вне.

Сла́ва Отцу́ и Сы́ну и Свято́му Ду́ху:

Ве́сь Бо́гу те́пле прилежа́, чи́сто бесе́довал еси́ Боже́ственными явле́нии, и́хже и ны́не наслажда́ешися, всеблаже́нне.

И ны́не и при́сно и во ве́ки веко́в. Ами́нь.

Богоро́дичен: Тя́, Све́та свети́льник, пое́м, Чи́стая, Тя́, и скрижа́ль благода́ти, Сло́во воплоще́нное прие́мшу, ве́дяще, велича́ем.

Свети́лен. Подо́бен: Ученико́м зря́щим.

Авди́е проро́че, лику́й и весели́ся, твои́х глаго́л зря́ сбытие́. Те́мже, Тро́ице предстоя́, соверша́ющия светоно́сную твою́ па́мять помяни́ и тебе́ чту́щия, всеблаже́нне.

Святаго пророка Авдия