2 декабря

Канон святителя Филарета, митрополита Московскаго и Коломенскаго, чудотворца

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 4:

Ду́ха Свята́го благода́ть стяжа́в,/ богому́дре святи́телю Филаре́те,/ и́стину и пра́вду ра́зумом просвеще́нным/ лю́дем пропове́дал еси́,/ мир и ми́лость се́рдцем умиле́нным/ стра́ждущим яви́л еси́,/ я́ко учи́тель ве́ры и страж неусы́пный/ па́ству росси́йскую жезло́м пра́вости сохрани́л еси́./ Сего́ ра́ди дерзнове́ние ко Христу́ Бо́гу име́я,/ моли́ дарова́ти Це́ркви утвержде́ние// и душа́м на́шим спасе́ние.

Кано́н свята́го, глас 6.

Песнь 1

Ирмо́с: Помо́щник и Покрови́тель/ быстъ мне во спасе́ние,/ Сей мой Бог,/ и просла́влю Его́,/ Бог отца́ моего́/ и вознесу́ Его́,// сла́вно бо просла́вися.

Припев: Святителю отче Филарете, моли Бога о нас.

Всеми́лостиве Го́споди,/ даждь ми мысль бла́гу и наста́ви се́рдце мое́/ во е́же просла́вити ди́внаго во святи́телех Филаре́та прехва́льнаго.

Припев: Святителю отче Филарете, моли Бога о нас.

Я́ко плодоно́сная ветвь, от благочести́ваго ко́рене и свяще́нническаго дре́ва произше́д, свя́те Филаре́те,/ благода́ть архиере́йства досто́йно восприя́л еси́./ Сего́ ра́ди благода́рне псало́мски вопие́м:/ род пра́вых благослови́тся.

Сла́ва Отцу́ и Сы́ну и Свято́му Ду́ху:

Юн ра́зум к Боже́ственным уче́нием напра́вив, прему́дре Филаре́те,/ да́же до честны́х седи́н в зако́не Госпо́дни поуча́лся еси́ день и нощь,/ сего́ ра́ди плод стори́чный Бо́гу прине́сл еси́.

И ны́не и при́сно и во ве́ки веко́в. Ами́нь.

Богоро́дичен: Богоро́дице Де́во,/ я́коже во успе́нии Твое́м ми́ра не оста́вила еси́,/ бу́ди и нам Путеводи́тельница во Ца́рствие Сы́на Твоего́ и Бо́га на́шего.

Песнь 3

Ирмо́с: Утверди́, Го́споди,/ на ка́мени за́поведей Твои́х/ подви́гшееся се́рдце мое́,// я́ко еди́н свят еси́ и Госпо́дь.

Припев: Святителю отче Филарете, моли Бога о нас.

Филаре́та Ми́лостиваго и́мя прие́м, святи́телю Филаре́те,/ сосу́д доброде́телей твои́х ми́лостию украси́л еси́,/ сего́ ра́ди я́ко оте́ц чадолюби́вый лю́дем росси́йским яви́лся еси́.

Припев: Святителю отче Филарете, моли Бога о нас.

Во всем после́дуяй Боже́ственным отце́м,/ прему́дрость Бо́жию я́ко наста́вницу избра́л еси́, святи́телю,/ и, Це́ркве Росси́йския до́брый па́стырь быв,/ благоче́стию па́ству научи́л еси́.

Сла́ва Отцу́ и Сы́ну и Свято́му Ду́ху:

Златоу́сту сла́вному си́лою сло́ва подо́бяся,/ Бо́га Сло́ва вои́стину возсла́вил еси́, святи́телю Филаре́те,/ те́мже слове́сными венцы́ тя велича́ем.

И ны́не и при́сно и во ве́ки веко́в. Ами́нь.

Богоро́дичен: Несть пречи́ста, я́ко Ты, Де́во,/ и несть гре́шен, я́ко аз, окая́нный,/ те́мже, безнаде́жен сый, на Тя упова́ние мое́ возлага́ю.

Седа́лен, глас 8:

Ты еси́ па́стырь до́брый и учи́тель богому́дрый,/ святи́телю о́тче Филаре́те,/ тобо́ю Бог украси́ Це́рковь Свою́/ и те́ло твое́, многоле́тно покрове́нное в земли́, нетле́нно яви́ лю́дем Свои́м./ Те́мже не преста́й моли́тися о хва́лящих тя и чту́щих па́мять твою́,/ прося́ оставле́ния грехо́в и спасе́ния душа́м на́шим.

Сла́ва, и ны́не, Богоро́дичен:

Я́ко Всенепоро́чная Неве́ста Творца́,/ я́ко Неискусобра́чная Ма́ти Изба́вителя,/ прия́телище я́ко су́щи Уте́шителя, Препе́тая,/ све́тлое жили́ще доброде́телей соверши́ мя,/ отжени́ о́блак страсте́й и Вы́шняго прича́стия сподо́би/ и све́та невече́рняго моли́твами Твои́ми.

Песнь 4

Ирмо́с: Услы́ша проро́к/ прише́ствие Твое́, Го́споди, и убоя́ся,/ я́ко хо́щеши от Де́вы роди́тися/ и челове́ком яви́тися, и глаго́лаше:/ услы́шах слух Твой и убоя́хся,// сла́ва си́ле Твое́й, Го́споди.

Припев: Святителю отче Филарете, моли Бога о нас.

Христа́ Бо́га Помо́щника и Засту́пника при́сно име́я в се́рдце твое́м, святи́телю Филаре́те,/ я́ко дре́вле Моисе́й началово́ждь, в беда́х и искуше́ниих лю́ди укрепля́л еси́/ и науча́л еси́ взыва́ти к Нему́ я́ко Помо́щнику и Засту́пнику.

Припев: Святителю отче Филарете, моли Бога о нас.

Сугу́бое попече́ние о ю́ных лю́дех име́л еси́, святи́телю Филаре́те,/ е́же бы́ти им благочести́вым, трудолюби́вым и рачи́тельно уча́щимся зако́ну Госпо́дню/ и служи́ти Це́ркви на похвалу́ и Оте́честву на по́льзу.

Сла́ва Отцу́ и Сы́ну и Свято́му Ду́ху:

Любо́вь Небе́сную на земли́ ева́нгельски стяжа́вый,/ горе́ упра́вил еси́ ду́шу твою́, пресла́вне Филаре́те,/ наставля́я ве́рныя лю́ди го́рняя помышля́ти, а не себе́ угожда́ти.

И ны́не и при́сно и во ве́ки веко́в. Ами́нь.

Богоро́дичен: Сове́та преве́чнаго смотре́ние разуме́в проро́к,/ та́йну рождества́ Де́вы преднапису́яй, взыва́ше:/ возвеселю́ся о Бо́зе, Спа́се Мое́м.

Пе́снь 5

Ирмо́с: Сою́зом любве́ связу́еми апо́столи,/ влады́чествующему все́ми себе́ Христу́ возло́жше,/ кра́сны но́ги очища́ху,// благовеству́юще всем мир.

Припев: Святителю отче Филарете, моли Бога о нас.

Апо́стольское рече́ние, я́ко си́ла Бо́жия в не́мощи соверша́ется,/ на тебе́ испо́лнися, святи́телю./ Ты бо, не́мощен пло́тию, па́жить земли́ Ру́сския Боже́ственными словесы́ возде́лал еси́/ и мно́гия лю́ди ко Христу́ приве́л еси́.

Припев: Святителю отче Филарете, моли Бога о нас.

Благода́ти Свята́го Ду́ха испо́лнься,/ сло́во Бо́жие ре́вностно пропове́дал еси́/ и та́йну Пресвяты́я Тро́ицы и воплоще́ния Бо́га Сло́ва преизя́щно изъясни́л еси́./ Ны́не же Бо́гу предстоя́,/ моли́ся о почита́ющих тя, Филаре́те достопа́мятне.

Сла́ва Отцу́ и Сы́ну и Свято́му Ду́ху:

Я́ко зе́ницу о́ка и сокро́вище многоце́нное,/ храни́ти ве́ру Правосла́вную запове́дал еси́ нам, святи́телю Филаре́те,/ в ней бо есть утвержде́ние Це́ркве и Оте́чества благоде́нствие.

И ны́не и при́сно и во ве́ки веко́в. Ами́нь.

Богоро́дичен: О́тчую Прему́дрость во утро́бе Свое́й носи́вшая, Влады́чице,/ в нощи́ ми́ра блужда́ющих к све́ту Христо́ву наста́ви и сою́зом любве́ соедини́,/ я́ко Богоро́дица еси́ и Ма́ти Све́та.

Песнь 6

Ирмо́с: Возопи́х всем се́рдцем мои́м к Ще́дрому Бо́гу,/ и услы́ша мя от а́да преиспо́дняго,/ и возведе́// от тли живо́т мой.

Припев: Святителю отче Филарете, моли Бога о нас.

Прему́дростию Бо́жиею вразумля́емь,/ я́ко Соломо́н му́дрый, суд пра́вый и ми́лостивый потща́лся еси́ твори́ти,/ да ве́дают лю́дие, я́ко пра́ви суть пути́ Госпо́дни.

Припев: Святителю отче Филарете, моли Бога о нас.

Ве́дая го́рькия рабо́ты и тяготы́ жития́ земледе́лателей, святи́телю Филаре́те,/ потща́лся еси́ помощи́ росси́йскому госуда́рю/ провозгласи́ти лю́дем ча́емое свобожде́ние.

Сла́ва Отцу́ и Сы́ну и Свято́му Ду́ху:

О, любы́ Бо́га Отца́, распина́ющая,/ любы́ Сы́на, распина́емая,/ и любы́ Ду́ха Свята́го, торжеству́ющая си́лою кре́стною, / благогове́йне взыва́л еси́, святи́телю Филаре́те.

И ны́не и при́сно и во ве́ки веко́в. Ами́нь.

Богоро́дичен: О Де́во Пречи́стая,/ Сло́вом Бо́жиим, да бу́дет, отрази́ла еси́ от Себе́ зако́нное по естеству́ недоуме́ние,/ егда́ Гаврии́л Арха́нгел Ти предста́, благовеству́я рождество́ Емману́ила,/ благогове́йне взыва́л еси́, святи́телю Филаре́те.

Конда́к, глас 2:

Я́ко и́стинный подража́тель преподо́бнаго Се́ргия,/ доброде́тель измла́да возлюби́л еси́, богоблаже́нне Филаре́те,/ я́ко па́стырь пра́ведный и испове́дник непоро́чный,/ по святе́м преставле́нии от безбо́жных поруга́ние и поноше́ния прия́л еси́,/ Бог же зна́меньми и чудесы́ тя просла́ви// и засту́пника Це́ркве на́шея яви́.

Песнь 7

Ирмо́с: О́троцы в Вавило́не пе́щнаго пла́мене не убоя́шася,/ но, посреде́ пла́мене вве́ржени,/ ороша́еми поя́ху:// благослове́н еси́, Го́споди Бо́же оте́ц на́ших.

Припев: Святителю отче Филарете, моли Бога о нас.

Я́коже Елисе́й иногда́ ми́лоть Илиину́,/ клобу́к от гро́ба святи́теля Алекси́я прия́л еси́, святи́телю Филаре́те,/ да благода́ть сугу́бую получи́ши, воспева́я:/ благослове́н еси́, Бо́же оте́ц на́ших.

Припев: Святителю отче Филарете, моли Бога о нас.

А́ще и чтил еси́ царя́ земна́го,/ но раболе́пствовати пред ним не восхоте́л еси́, святи́телю,/ Царю́ же Небе́сному боголе́пную честь воздава́л еси́, взыва́я:/ благослове́н еси́, Бо́же оте́ц на́ших.

Припев: Святителю отче Филарете, моли Бога о нас.

Рабо́тая Го́сподеви со стра́хом,/ не взира́л еси́ на похвале́ния и поноше́ния, святи́телю Филаре́те,/ то́кмо в се́рдце с тре́петом взыва́л еси́ к Судии́ Пра́веднейшему:/ благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Ум чист, чу́вства до́брая и во́лю благу́ю,/ я́ко еди́но во о́браз Тро́ицы Святы́я име́я, святи́телю Филаре́те,/ Тро́ицы единосу́щие просла́вил еси́, взыва́я:/ благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Отрокови́це Пречи́стая,/ чудеси́ рождества́ Твоего́ дивя́щеся,/ Избра́вшему Тя зове́м:/ благослове́н еси́, Бо́же оте́ц на́ших.

Песнь 8

Ирмо́с: За зако́ны оте́ческия/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совокупле́ни, и́мже не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,// и превозноси́те во вся ве́ки.

Припев: Святителю отче Филарете, моли Бога о нас.

Егда́ благи́й Госпо́дь попусти́ пове́трие губи́тельное во гра́де Москве́,/ тогда́ ты, святи́телю Филаре́те, к покая́нию и моле́бствию наро́д призыва́л еси́ взыва́ти:/ Го́спода по́йте, дела́, и превозноси́те во вся ве́ки.

Припев: Святителю отче Филарете, моли Бога о нас.

И́же моли́твами твои́ми исцеле́ние обре́тшии/ и спасе́ние от сме́рти улучи́вшии,/ благода́рственное пе́ние принесо́ша, глаго́люще:/ Го́спода по́йте, дела́, и превозноси́те во вся ве́ки.

Сла́ва Отцу́ и Сы́ну и Свято́му Ду́ху:

Отце́м святы́м подража́я,/ уста́вы и́ночеству препо́дал еси́, свя́те,/ да А́нгелом сослу́жат и́ноков собо́ри и с ни́ми ли́ки неве́ст Христо́вых, взыва́юще:/ Го́спода по́йте, дела́, и превозноси́те во вся ве́ки.

И ны́не и при́сно и во ве́ки веко́в. Ами́нь.

Богоро́дичен: Цари́цу Небесе́ и земли́, А́нгелов со́нми и челове́ков собо́ри,/ по́йте и превозноси́те во вся ве́ки.

Песнь 9

Ирмо́с: Стра́нствия Влады́чня/ и Безсме́ртныя Трапе́зы/ на го́рнем ме́сте/ высо́кими умы́, ве́рнии, прииди́те, наслади́мся,/ возше́дша Сло́ва, от Сло́ва научи́вшеся,// Его́же велича́ем.

Припев: Святителю отче Филарете, моли Бога о нас.

Ре́вностию по Бо́зе на высоту́ доброде́телей возше́д,/ сла́вы ми́ра сего́ удаля́лся еси́, свя́те,/ взыску́яй сла́вы то́кмо от Христа́,/ Той бо есть еди́ный Царь ми́ра и Спас душ на́ших.

Припев: Святителю отче Филарете, моли Бога о нас.

Егда́ сверши́ся кончи́на свята́я твоя́,/ возскорбе́ша лю́дие росси́йстии, достохва́льне святи́телю,/ ты же не оста́вил еси́ их си́ры,/ дерзнове́нно моля́ся еди́ному Царю́ ми́ра и Спа́су душ на́ших.

Сла́ва Отцу́ и Сы́ну и Свято́му Ду́ху:

Торжеству́йте, лю́дие,/ святи́теля Филаре́та па́мять чту́ще,/ и́же служи́тель до́ма Богоро́дицы быв,/ просла́ви Ту, я́ко в моли́твах неусыпа́ющую Засту́пницу.

И ны́не и при́сно и во ве́ки веко́в. Ами́нь.

Богоро́дичен: Русь Свята́я, лику́й ны́не,/ за тя бо мо́лит Сы́на Своего́/ Пречи́стая Богоро́дица Де́ва с Филаре́том приснохва́льным/ и все́ми святы́ми твои́ми.

Свети́лен:

Я́ко благоче́стия лампа́ду светолу́чну,/ ри́тора преизя́щна, па́стыря милосе́рдна, судию́ прему́дра,/ прииди́те, ве́рнии, Филаре́та благопода́теля любо́вию ублажи́м.

Молитва

О преславне и богомудре святителю Христов Филарете, Российския Церкве светильниче, земли нашея похвало и граду Москве украшение! Ты житием и служением твоим трием вселенским святителем был еси подобник:

Василию Великому – яко бытие сущих изъяснил еси, Церкве Божия и Таин Христовых строитель добрый явился еси, иноческих уставов быв ревностный исполнитель и покровитель;

Григорию Богослову – яко неботаинственных созерцаний о Святей Троице и о Бозе Слове сподобился еси и сих искусный провозвестник явился еси;

Иоанну Златоустому – яко неустанный проповедник и учитель покаяния народа Божия был еси.

И ныне, вкупе с ними предстоя во славе Престолу Божию и ходатайствуя о нас, моли Церкви Российстей на камени исповедания Православныя веры утвержденней быти, стране нашей мир и единение даровати, пастырем слово Божественныя Истины право правити, град Москву и паству твою от всяких напастей сохранити.

Призри с Небесе, святителю, на ны, чада твоя, и даруй нам теплым твоим ходатайством ко Господу в заповедех Его преспевати, веру тверду, любовь нелицемерну и благочестие до последняго часа смертнаго сохранити, да непостыдно предстанем Спасителю нашему Господу Иисусу Христу, Емуже со Отцем и Святым Духом подобает слава, честь и поклонение ныне, и присно, и во веки веков. Аминь.