29 декабря

Канон преподобной матери благоверной великой княгине Софии Суздальской

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Вы́шняго красото́ю я́вственно украша́яся, по́стническими бо труды́ подвиза́ся преподо́бная Софи́я, и бы́сть насле́дница небе́сному Ца́рствию, и вни́де в небе́сный черто́г наслади́тися Христо́вы красоты́, Его́же моли́ спасти́ся гра́ду Су́ждалю от вра́жиих нахожде́ний и междоусо́бныя бра́ни и пода́ждь душа́м на́шим ве́лию ми́лость.

Велича́ние:

Ублажа́ем тя́, преподо́бная ма́ти, вели́кая княги́не Софи́е, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Кано́н преподо́бныя Софи́и, гла́с 8.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподобная мати Софие, моли Бога о нас.

Пе́снь Твое́й уго́днице Софи́и принести́, Бо́же, да́руй ми́, и́же на земли́ Тебе́ просла́вльшей, я́ко да Смыслода́вца пе́сньми Тя́ возвели́чу.

Припев: Преподобная мати Софие, моли Бога о нас.

Благочести́ваго ко́рене о́трасль была́ еси́, и роди́телей лише́ние никто́же ти́ возбрани́, но все́м жела́нием и тща́нием обрати́лася еси́ ко еди́ному Соде́телю.

Сла́ва Отцу́ и Сы́ну и Свято́му Ду́ху:

Спа́сову за́поведь послу́шала еси́ от ю́ности, прему́драя Софи́е, и жи́знь свою́ ни во что́же вмени́вши, [и кре́ст Госпо́день носи́ти возжеле́вши,] и земно́е ца́рство презре́вши, на небе́сное взира́юще.

И ны́не и при́сно и во ве́ки веко́в. Ами́нь.

Богоро́дичен: Мольбу́ Тебе́ прино́сим, Богоро́дице, от у́ст на́ших недосто́йных сию́ приими́, Влады́чице, я́ко вдовы́ о́ныя две́ ца́те, те́мже со умиле́нием вопие́м Ти́, о Преблагослове́нная Ма́ти, [прибега́юще к] покро́ву Твоему́.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Преподобная мати Софие, моли Бога о нас.

Безпомо́щным бу́ди помо́щница, преблаже́нная Софи́е, и печа́льным ми́лостивное утеше́ние, да твои́ми моли́твами от все́х зо́л избавля́еми, почита́ем тя́.

Припев: Преподобная мати Софие, моли Бога о нас.

Прему́дрости жела́нием ко гра́ду Су́ждалю, Софи́е преподо́бная, до́йде, я́ко пчела́ му́драя, и любоде́льно чистоте́ совоку́пльшися и неполе́зная оста́вила еси́.

Сла́ва Отцу́ и Сы́ну и Свято́му Ду́ху:

Уста́ льсти́вых звере́й загради́ла еси́, отве́рсты бо ю́ностныя, самоде́ржцу супру́га предо́брая была́ еси́ и ца́рство земно́е оста́вила еси́, наставле́ние восприи́м Боже́ственнаго ра́зума.

И ны́не и при́сно и во ве́ки веко́в. Ами́нь.

Богоро́дичен: Напа́стьми мно́гими одержи́ми есмы́, боле́зньми и пла́чем вопие́м Ти́: изба́ви, Богоро́дице, от обдержа́щих на́с скорбе́й и ве́чнаго муче́ния и Ца́рствия Сы́на Твоего́ сподо́би на́с моли́твами уго́дницы Твоея́ блаже́нныя Софи́и.

Седа́лен, гла́с 4:

Яко всесве́тлая звезда́, возсия́вши светолу́чными сия́нии, просвети́ла еси́ чудесы́ свои́ми, Софи́е преподо́бная, Святы́м Ду́хом наставля́ема, пришла́ еси́ во оби́тель Бо́жия Ма́тере, в не́йже трудолю́бно подвиза́ся, от земны́х к небе́сному селе́нию ны́не преста́вилася еси́, преблаже́нная Софи́е, моли́ся непреста́нно о творя́щих па́мять твою́.

Сла́ва, и ны́не, Богоро́дичен:

Сло́во Отчее, Христа́ Бо́га на́шего, из Тебе́ воплоти́вшагося, позна́хом, Богоро́дице Де́во, еди́на Чи́стая и Благослове́нная, непреста́нно Тебе́ велича́юще, воспева́ем.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобная мати Софие, моли Бога о нас.

Яко в небе́сных оби́телех с ли́ки преподо́бных и пра́ведных веселя́ся, предстои́ши Пресвяте́й Богоро́дице, непреста́нно моля́ся о душа́х на́ших.

Припев: Преподобная мати Софие, моли Бога о нас.

Прии́мши и́го ле́гкое Спа́са Христа́, Того́ бо стра́хом составля́ема, очи́щши ду́шу и те́ло воздержа́нием, и́нокиням наста́вница была́ еси́, преподо́бная.

Сла́ва Отцу́ и Сы́ну и Свято́му Ду́ху:

Лю́тый вселука́вый вра́г тща́шеся отлучи́ти от тебе́ жела́емая тобо́ю, Софи́е преподо́бная, ты́ же сего́ ни во что́ вмени́ла еси́, непреста́нно вопия́ше: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богоро́дичен: На престо́ле высо́це стра́шно седя́й на Ма́тернюю ру́ку Младе́нец бы́в, ниспа́дший о́браз возводя́ и обоже́ние су́щим подава́я.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподобная мати Софие, моли Бога о нас.

Освяти́ся пречестна́я оби́тель Бо́жия Ма́тере твое́ю ра́кою, Софи́е преблаже́нная, от нея́же источа́еши чудеса́, с ве́рою приходя́щим ти́ неоску́дно благода́ть подава́еши.

Припев: Преподобная мати Софие, моли Бога о нас.

Зако́ну Бо́жию после́дуя и повеле́нию Его́ повину́яся, наста́вница бо и пра́вило изве́стнейшее и́нокиням бы́сть, наказа́тельница заблу́ждшим и свети́льница земны́м, Софи́е преблаже́нная.

Сла́ва Отцу́ и Сы́ну и Свято́му Ду́ху:

Све́тлыми заря́ми по́двиг твои́х отгони́ми бы́ша лю́тых бесо́в мно́жество от жили́ща твоего́, поспе́шествова бо тебе́ благода́ть Свята́го Ду́ха, Его́же осене́нием исцеле́ние подава́еши, Софи́е преподо́бная.

И ны́не и при́сно и во ве́ки веко́в. Ами́нь.

Богоро́дичен: Ума́ моего́ превраще́ние исцели́, Пречи́стая, уврачу́й стра́сти души́ моея́ и ле́ностную тму́ отжени́, я́ко да хвала́ми Тя́ ублажа́ем, Всенепоро́чная.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподобная мати Софие, моли Бога о нас.

О, преподо́бная ма́ти Софи́е, вели́кая свети́льнице! Освяти́ и просла́ви святу́ю оби́тель Бо́жия Ма́тере и и́же любо́вию тя́ в пе́снех сла́вящих.

Припев: Преподобная мати Софие, моли Бога о нас.

Инокиням наста́вница и о́браз доброде́телей, все́х украси́ла еси́, во оби́тели су́щих без супру́жнаго пребыва́ния.

Сла́ва Отцу́ и Сы́ну и Свято́му Ду́ху:

Моли́твами, и бде́нием, и псало́мским пе́нием непреста́нным ду́шу свою́ ра́й живоно́сен сотвори́в, в не́мже просла́ви Спа́са Го́спода.

И ны́не и при́сно и во ве́ки веко́в. Ами́нь.

Богоро́дичен: Все́ вре́мя живота́ на́шего во страсте́х ижди́хом и ны́не на́ша моле́ния прино́сим Тебе́, Пречи́стая: разреше́ние пода́ждь на́м и ве́чнаго на́с изба́ви муче́ния.

Конда́к, гла́с 1:

Но́щи стра́стныя избе́гши, богому́драя Софи́е преподо́бная, к Незаходи́мому же Со́лнцу, Христу́, прише́дши, умертви́ла еси́ плотско́е мудрова́ние, посто́м же, воздержа́нием и моли́твами показа́ся равна́ Ангелом, на земли́ бо поживе́ и ду́хи нечи́стыя от челове́к отгна́ла еси́, [и разли́чная] исцеле́ния подава́еши, от мно́гих бе́д и зо́л избавля́еши, Софи́е преподо́бная, моли́ спасти́ся душа́м на́шим.

Икос:

Из мла́да Бо́гови вдала́ся еси́, Софи́е преподо́бная, я́ко зда́ние благо́е, и Госпо́дне благо́е и́го усе́рдно от ю́ности взе́мши, отлучи́ся своего́ самоде́ржца и невкуси́мо ло́жа жите́йскаго восхоте́ пребыва́ти во святе́й оби́тели Бо́жия Ма́тере. Те́мже, я́ко безпло́тная, подвиза́лася, воздержа́нием же и моли́твами равна́ Ангелам показа́лася, в не́йже отхо́диши в небе́сная селе́ния, и по преставле́нии свое́м от пречи́стыя твоея́ ра́ки разли́чная исцеле́ния подава́еши, и от мно́гих бе́д и зо́л избавля́еши, Софи́е преподо́бная, моли́ спасти́ся душа́м на́шим.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Преподобная мати Софие, моли Бога о нас.

В боле́знех и́же к тебе́ прибега́ющих избавля́еши от неду́г разли́чных и от духо́в нечи́стых, Софи́е преподо́бная, ко Христу́ вопию́щи: оте́ц на́ших Бо́же, благослове́н еси́.

Припев: Преподобная мати Софие, моли Бога о нас.

Всю́ обтече́ тва́рь житие́ твое́ и исправле́ние, Софи́е преподо́бная, и в пресла́вную оби́тель Бо́жия Ма́тере пришла́ еси́, в не́йже Христу́ вопию́щи: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Воздержа́нием истяза́ние жития́ своего́ показа́ла еси́, Софи́е преподо́бная, поще́нием бо кра́йним со безпло́тными соедини́вшися, вопия́ше: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Хра́м, освяще́н Бо́гови, бы́вши, Мари́е Богороди́тельнице, Сего́ моли́ я́ко Человеколю́бца, Чи́стая, уще́дрити лю́ди согреши́вшия и спасти́ от бе́д лю́тых и страсте́й треволне́ния.

Пе́снь 8.

Ирмо́с: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Преподобная мати Софие, моли Бога о нас.

Очи́сти и прости́ согреше́ния на́ша, Го́споди, моли́твами Твоея́ уго́дницы преподо́бныя Софи́и, да пое́м Тя́, Христа́, во ве́ки.

Припев: Преподобная мати Софие, моли Бога о нас.

На земли́ я́ко челове́к ходя́ и житие́ на небесе́х вои́стинну стяжа́ла еси́, со Ангелы непреста́нно пое́ши Христа́ во ве́ки.

Сла́ва Отцу́ и Сы́ну и Свято́му Ду́ху:

Твоя́ по́двиги воспе́ша Ангельския си́лы, Софи́е преподо́бная, и твое́ житие́ ли́ки святы́я похвали́ша, с ни́ми же согла́сно зове́ши Христа́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Твоя́ ми́лости и на мне́ удиви́, Чи́стая, уязвле́нную ду́шу мою́ исцели́, и бу́дущаго изба́ви муче́ния, и Ца́рствию Сы́на Твоего́ сподо́би мя́.

Песнь 9

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Преподобная мати Софие, моли Бога о нас.

Ра́дуйся, гра́де Су́ждалю, восприи́м бо от Бо́га сокро́вище некра́домо, помо́щницу вели́кую и засту́пницу те́плую и богоблаже́нную преподо́бную Софи́ю, и́же ны́не с ли́ки и́нокинь весели́тся и Богоро́дицу сла́вит.

Припев: Преподобная мати Софие, моли Бога о нас.

От ю́ности своея́ чи́сту со́весть иму́щи к Бо́гу и Его́ ра́ди благоче́стно пожи́вши, к вы́шнему пре́йде, моли́ Христа́ Бо́га о на́с, да тя́ любо́вию почита́ем.

Сла́ва Отцу́ и Сы́ну и Свято́му Ду́ху:

В чистоте́ и целому́дрии, и в чи́стем пребыва́нии, и в житии́ нескве́рне, я́ко безпло́тна, на земли́ поживе́, востекла́ еси́ в небе́сныя оби́тели, и с ли́ки святы́х ра́дуешися, с [преподо́бными и пра́ведными] моли́ о все́х Христа́ Человеколю́бца.

И ны́не и при́сно и во ве́ки веко́в. Ами́нь.

Богоро́дичен: Львы́, рыка́ющия на мя́, ути́ши, Пречи́стая, мене́ же цельбы́ Боже́ственныя сподо́би, Влады́чице, да узрю́ све́т богоразу́мия и с ра́достию воспою́ покро́в Тво́й, Богоро́дице.

Свети́лен:

Все́ житие́ оста́вила еси́ и Христа́ Еди́наго возжела́ла еси́, трудополо́жно пожи́вши, и сме́рть сла́вно восприя́ла еси́, те́мже па́мять твою́ почита́ем, Софи́е богому́драя. [Два́жды.]

Сла́ва, и ны́не, Богоро́дичен:

Бо́га на́м, Пречи́стая, родила́ еси́, и вси́, прароди́тельныя кля́твы изба́вльшеся, воспева́ем Тя́, Пречи́стая.

Молитва преподобной княгине Софии Суздальской

О, прехвальная и праведная мати Софие, Суздальския страны досточудная подвижнице! Славим твое богоугодное житие, чтим твоя великия добродетели, поклоняемся честным мощем твоим, с любовию лобызаем твой святый образ и с верою приносим тебе прилежныя наша молитвы. Помози нам, яко странним и пришельцем в мире сем, стати на истинный путь христианскаго жития, не отврати лица своего от всех прибегающих к твоему покровительству, духовне умудри подвизающихся в иночестве познати коемуждо образ спасения своея души, настави в подвизех смирения, терпения и покаяния, поспешествуй стяжати нам целомудрие, послушание и любовь Божию. Буди щит и ограждение обители сия от всякаго зла, в ней же сама ревностно подвизалася еси. Обрати и вразуми заблудшия люди на путь правый. Умоли Господа сил пощадити души наша и даровати нам время на покаяние, да твоим предстательством сподобимся безпагубне прейти поприще многоскорбнаго нашего земнаго жития и быти причастники вечнаго блаженства в небесных обителех Бога и Спаса нашего, Ему же подобает всякая слава, честь и поклонение, ныне и присно, и во веки веков. Аминь.