29 декабря

Канон святаго пророка Аггея

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь пророку Аггею, глас 2

Проро́ка Твоего́ Агге́я па́мять, Го́споди, пра́зднующе,/ тем Тя мо́лим:// спаси́ ду́ши на́ша.

Канон. Гла́с 7.

Пе́снь 1.

Ирмо́с: Изме́ншему Бо́гу Изра́иля от мо́ря Чермна́го побе́дную пе́снь пои́м, я́ко просла́вися.

Припев: Святый пророче Аггее, моли Бога о нас.

Богови́днейший, Бо́гу предстоя́, я́ко проро́к и́стинен, пою́щих честну́ю па́мять твою́, блаже́нне, помина́й.

Припев: Святый пророче Аггее, моли Бога о нас.

На основа́нии тве́рдем доброде́телей тебе́ сама́го назда́в, возложи́лся еси́ хра́м одушевле́н, богоблаже́нне.

Сла́ва Отцу́ и Сы́ну и Свято́му Ду́ху:

Чисте́йший тво́й у́м, при́сно зря́ Бо́га, я́ко мо́щно, та́мошними далечесия́тельно дарова́нии, блаже́нне, облиста́.

И ны́не и при́сно и во ве́ки веко́в. Ами́нь.

Богоро́дичен: Тя́, безма́терня пе́рвее, Сло́во Бо́жие, Де́ва, во утро́бе заче́нши пло́тски, родила́ е́сть, Сы́на безо́тча.

Пе́снь 3.

Ирмо́с: Утверди́ся ве́рою Христо́ва Це́рковь, и́бо непреста́нно пе́сньми вопие́т, пою́щи: Свя́т еси́, Го́споди, и Тя́ пое́т ду́х мо́й.

Припев: Святый пророче Аггее, моли Бога о нас.

Си́лою Боже́ственною де́монскаго лю́таго плене́ния на́с разреши́в, хра́мы твоя́ че́стны, Спа́се, покажи́, Свя́т еси́, — зову́щия, — спаса́яй ду́ши на́ша.

Припев: Святый пророче Аггее, моли Бога о нас.

В высоча́йших обита́яй и исполня́я вселе́нную святы́ни, проро́че, хра́м тя́ показу́ет, Свя́т еси́, — зову́ща, — спаса́яй ду́ши на́ша.

Сла́ва Отцу́ и Сы́ну и Свято́му Ду́ху:

Боже́ственный Ду́х, все́м благода́ть раздава́яй, в твое́ се́рдце всели́вся, вопи́ти тя́ науча́ет: Свя́т еси́, Го́споди, спаса́яй ду́ши на́ша.

И ны́не и при́сно и во ве́ки веко́в. Ами́нь.

Богоро́дичен: Сло́вом всю́ тва́рь му́дре соде́тельствовавый, соде́тельствуется из Тебе́ по на́м, Богоро́дице, Челове́к бы́в за милосе́рдие, Человеколю́бец.

Седа́лен, гла́с 3. Подо́бен: Боже́ственныя ве́ры.

Боже́ственным Ду́хом просвеще́ну мы́сль име́я, проро́че, Бо́жия прорица́еши та́инства, открыва́я бу́дущих явле́ние и сказу́я веще́й сбытие́, Агге́е всеблаже́нне, Христа́ Бо́га моли́ дарова́ти на́м ве́лию ми́лость.

Сла́ва, и ны́не, Богоро́дичен:

Боже́ственнаго естества́ не отлу́чся, пло́ть бы́в во чре́ве Твое́м, но Бо́г вочелове́чся и пребы́сть, Иже по рождестве́ Ма́терь Тя́ Де́ву, я́ко пре́жде рождества́, сохрани́в всенепоро́чну, Еди́н Госпо́дь; Того́ приле́жно моли́ дарова́ти на́м ве́лию ми́лость.

Пе́снь 4.

Ирмо́с: Услы́шах слу́х Тво́й, Го́споди, я́ко яви́лся еси́ на земли́, за е́же спасти́ ны, те́м вопие́м: сла́ва си́ле Твое́й, Го́споди.

Припев: Святый пророче Аггее, моли Бога о нас.

Показа́л еси́ из Де́вы одушевле́нный прия́тый Тебе́ до́м Твоему́ проро́ку, Христе́, с ни́мже вопие́м: сла́ва си́ле Твое́й, Го́споди.

Припев: Святый пророче Аггее, моли Бога о нас.

Собра́л еси́ отринове́нныя, Го́споди, рабо́ты вра́жия свобожде́й на́с, я́коже проро́к глаго́лет богоприя́тный.

Сла́ва Отцу́ и Сы́ну и Свято́му Ду́ху:

Яви́л еси́ бу́дущее последи́ спасе́ние язы́ков Твоему́ проро́ку, Христе́, Тебе́ вопию́щу: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богоро́дичен: Преложи́ла еси́ на благослове́ние, Влады́чице, прокля́тство Ада́мово, на́м ро́ждши Христа́. К Нему́же вопие́м: сла́ва си́ле Твое́й, Го́споди.

Пе́снь 5

Ирмо́с: К Тебе́ у́тренюю и Тебе́ вопию́, благоутро́бне Го́споди: омраче́нную грехми́ ду́шу мою́, све́том озари́в за́поведей Твои́х, наста́ви.

Припев: Святый пророче Аггее, моли Бога о нас.

Хра́мы бы́ти Бо́га Жива́го, блаже́нне, сподо́би светоно́сный тво́й соверша́ющия пра́здник, на ка́мени утверди́в твои́х догма́тов моли́твами твои́ми.

Припев: Святый пророче Аггее, моли Бога о нас.

Яко Благоде́тель, Тво́й ми́р да́ждь на́м, Го́споди, я́же на устрое́ние, ми́р душе́вный, его́же боже́ственный Агге́й Ду́хом Боже́ственным предглаго́ла.

Сла́ва Отцу́ и Сы́ну и Свято́му Ду́ху:

Вели́ко бу́дет Це́ркве и́стинно благосла́вие, па́че пе́рваго Изра́илева со́нмища, вопло́щшагося Сло́ва, и челове́ком приобщи́вшася.

И ны́не и при́сно и во ве́ки веко́в. Ами́нь.

Богоро́дичен: Благослове́нная препросла́вленная Ма́ти неискусому́жная, умерщвле́нную грехми́ ду́шу мою́ и страстьми́ невоздержа́ния погребе́нную оживотвори́.

Пе́снь 6.

Ирмо́с: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: Всеси́льне Спа́се, поми́луй на́с.

Припев: Святый пророче Аггее, моли Бога о нас.

Юношески благоче́стию, блаже́нне, уча́, воздви́гл еси́ Влады́це все́х хра́м освяще́н, оби́лие благи́х обеща́я.

Припев: Святый пророче Аггее, моли Бога о нас.

Возве́л еси́ от да́льняго, Спа́се, плене́ния челове́ка, из глубины́ до́льнейшия, и к Го́рнему гра́ду возве́л еси́ его́ я́ко Человеколю́бец.

Сла́ва Отцу́ и Сы́ну и Свято́му Ду́ху:

Ра́дуяся, Ду́ха заре́ю, проро́че, проре́кл еси́ де́ятельных словеса́ и благоче́стия наказа́л еси́ на́с оправда́нием.

И ны́не и при́сно и во ве́ки веко́в. Ами́нь.

Богоро́дичен: Хоте́нием па́д, изгна́ся Ада́м из рая́, Сло́во же, вопло́щся из Де́вы, сего́ взыва́ет и к Го́рней сла́дости возво́дит.

Пе́снь 7.

Ирмо́с: В пе́щь о́гненную вве́ржени, преподо́бнии о́троцы о́гнь в ро́су преложи́ша, воспева́нием си́це вопию́ще: благослове́н еси́, Го́споди, Бо́же оте́ц на́ших.

Припев: Святый пророче Аггее, моли Бога о нас.

Очи́стив тво́й у́м, восприя́л еси́ сия́ния я́ве, проро́че, Ду́ха, све́тло прорица́я и взыва́я: благослове́н еси́, Го́споди, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Свяще́ннейшую тя́ жи́знь проходя́ща ви́дев Бо́г, проро́ка предлага́ет Своего́ прише́ствия, все́м вопию́ща: благослове́н еси́, Го́споди, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: В пещи́ о́гненней три́ о́троки спасы́й, Де́во, То́й, всели́вся во утро́бу Твою́, на Того́ наде́ющияся спаса́ет, вопию́щия: благослове́н, Всечи́стая, Пло́д чре́ва Твоего́.

Пе́снь 8.

Ирмо́с: Еди́наго Безнача́льнаго Царя́ Сла́вы, Его́же благосло́вят небе́сныя си́лы и трепе́щут чи́ни Ангельстии, по́йте, свяще́нницы, лю́дие, превозноси́те Его́ во ве́ки.

Припев: Святый пророче Аггее, моли Бога о нас.

Песносло́вим тя́, все́х Влады́ку, Его́же проро́к богови́дец Агге́й показа́ покланя́тися же и пе́ти: по́йте, свяще́нницы, лю́дие, превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Сло́ву Безнача́льному в после́дних времене́х яви́тися, богови́дче проро́че, провозвести́л еси́ явле́нно, взыва́я: по́йте, свяще́нницы, лю́дие, превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Пре́жде Неви́денный и Невмести́мый естество́м, во чре́во Твое́ вме́щся, ви́ден бы́сть, Всечи́стая. Ему́же ве́рно вопие́м: по́йте, свяще́нницы, лю́дие, превозноси́те Его́ во ве́ки.

Песнь 9

Ирмо́с: Всепе́тая, небе́с превы́шшая, Безнача́льное Сло́во безсе́менно заче́ншая и воплоще́ннаго Бо́га ро́ждшая челове́ком, те́м Тя́ вси́ велича́ем.

Припев: Святый пророче Аггее, моли Бога о нас.

Вкуси́в е́же па́че сло́ва боговиде́ния, оттря́сл еси́, проро́че, попече́ния земна́я и препросла́вленному Бо́гу предста́л еси́ досто́йно. Те́мже вси́ тя́, ве́рнии, ублажа́ем.

Припев: Святый пророче Аггее, моли Бога о нас.

Боже́ственное и чу́дное твое́, блаже́нне, житие́ предста́теля тя́ Бо́гу показа́, богому́дре, и со безпло́тными ли́ки весели́шися ве́чно. Те́мже вси́ тя при́сно ублажа́ем.

Сла́ва Отцу́ и Сы́ну и Свято́му Ду́ху:

Подоба́ше тебе́, я́ко благоче́стия учи́телю, с Бо́гом бы́ти и Сего́ страствори́тися Пречи́стейшему Све́ту, Его́же, блаже́нне, ны́не моли́ изба́вити искуше́ний ду́ши на́ша.

И ны́не и при́сно и во ве́ки веко́в. Ами́нь.

Богоро́дичен: Ты́ была́ еси́ преесте́ственно, Богороди́тельнице, жили́ще и́стинно все́х Царя́, и златови́дный ковче́г, Еди́наго Законода́вца вну́трь име́я, Христа́ воплоща́ема.

Молитва

О прехва́льный и пречу́дный проро́че Бо́жий Аггее! Услы́ши нас, гре́шных и непотре́бных, в час сей предстоя́щих пред свято́ю твое́ю ико́ною и усе́рдно прибега́ющих к хода́тайству твоему́. Моли́ о нас Человеколю́бца Бо́га, да пода́ст нам дух покая́ния и сокруше́ния о гресе́х на́ших и всеси́льною свое́ю благода́тию да помо́жет нам оста́вити пути́ нече́стия, преспева́ти же во вся́ком де́ле бла́зе; да укрепи́т нас в борьбе́ со страстьми́ и похотьми́ на́шими; да всади́т в се́рдце на́ше дух смире́ния и кро́тости, дух братолю́бия и незло́бия, дух терпе́ния и целому́дрия, дух ре́вности к Сла́ве Бо́жией и спасе́нию бли́жних. Упраздни́ моли́твами твои́ми, проро́че, злы́я обы́чаи ми́ра, па́че же поги́бельный и тлетво́рный дух ве́ка сего́, заража́ющий христиа́нский род неуваже́нием к Боже́ственней правосла́вной ве́ре, к уста́вом Святы́я Це́ркве и к за́поведем Госпо́дним, непочте́нием к роди́телем и власте́м предержа́щим, и низверга́ющий люде́й в бе́здну нече́стия, развраще́ния и поги́бели. Отврати́ от нас, пречу́дне проро́че, предста́тельством твои́м пра́ведный гнев Бо́жий и изба́ви вся гра́ды и ве́си Оте́чества на́шего от бездо́ждия и гла́да, от стра́шных бурь и землетрясе́ний, от смертоно́сных язв и боле́зней, от наше́ствия враго́в и междоусо́бныя бра́ни. Укрепи́ твои́ми моли́твами, пресла́вне, предержа́щия вла́сти на́ша в вели́цем и многотру́днем по́двизе народоправле́ния, благопоспе́шествуй им во всех благи́х дея́ниих и начина́ниих к водворе́нию ми́ра и пра́вды в стране́ на́шей. Посо́бствуй христолюби́вому во́инству во бране́х со врага́ми на́шими. Испроси́, проро́че Бо́жий, от Го́спода па́стырем на́шим святу́ю ре́вность по Бо́зе, серде́чное попече́ние о спасе́нии пасо́мых, му́дрость во уче́нии и управле́нии, благоче́стие и кре́пость, во искуше́ниих, судия́м испроси́ нелицеприя́тие и безкоры́стие, правоту́ и сострада́ние к оби́димым, всем нача́льствующим попече́ние о подчине́нных, ми́лость и правосу́дие, подчине́нным же поко́рность и послуша́ние ко власте́м и усе́рдное исполне́ние свои́х обя́занностей; да та́ко в ми́ре и благоче́стии пожи́вше в сем ве́це, сподо́бимся прича́стия ве́чных благ в Ца́рствии Го́спода и Спа́са на́шего Иису́са Христа́, Ему́же подоба́ет честь и поклоне́ние со безнача́льным Его́ Отце́м и Пресвяты́м Ду́хом во ве́ки веко́в. Ами́нь.