28 декабря

Канон святителя Стефана Исповедника, архиепископа Сурожскаго

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Яко святи́тель со безпло́тными единожи́тель бы́в, священному́чениче Стефа́не, восприе́м бо Кре́ст, я́ко ору́жие, и ста́в кре́пко сопроти́в иконоукори́теля и духобо́рцев, не покланя́ющихся пречи́стому о́бразу Хри́ста Бо́га на́шего, и отсе́кл еси́ вся́ку е́ресь лука́вых. Того́ ра́ди прие́м муче́ния вене́ц, изба́вил еси́ гра́д тво́й Суро́ж от вся́кия неприя́зни. И ны́не мо́лим тя́, свя́те, да изба́виши на́с от вся́ких злы́х искуше́ний, и бе́д, и ве́чныя му́ки.

Кано́н свята́го, гла́с 6.

Пе́снь 1.

Ирмо́с: Волно́ю морско́ю скры́вшаго дре́вле, гони́теля мучи́теля — под земле́ю скры́ша спасе́нных о́троцы; но мы́ я́ко отрокови́цы, Го́сподеви пои́м, сла́вно бо просла́вися.

Припев: Святителю отче Стефане, моли Бога о нас.

Прииди́те, соше́дшеся, воспои́м вси́ свяще́ннаго на́шего Стефа́на и почти́м Суро́жу утвержде́ние, засту́пника душа́м на́шим и гра́ду на́шему храни́теля необори́ма.

Припев: Святителю отче Стефане, моли Бога о нас.

Преклони́ сердца́ на́ша, богоно́сче, во спаси́тельныя Христо́вы за́поведи не помышля́ти житейских, но да, душе́вных дости́гше добро́т, све́тло вни́дем в черто́г Христо́в.

Сла́ва Отцу́ и Сы́ну и Свято́му Ду́ху:

Стефа́не богому́дре, верхо́вный о́тче, Ангелом ра́вне, Суро́жу утвержде́ние, не отве́ржи, но пе́сненно приими́, я́ко кади́ло, от убо́жества моего́, е́же ти́ принесо́х, недосто́йный.

И ны́не и при́сно и во ве́ки веко́в. Ами́нь.

Богоро́дичен: Возопи́й, недосто́йная душе́, пре́жде сме́рти к Богома́тери в по́мыслех те́пле со слеза́ми вопию́щи: Пречи́стая Госпоже́, Сы́на Твоего́ моли́твами Твои́ми ми́лостива мне́ сотвори́.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святителю отче Стефане, моли Бога о нас.

Кто́ тебе́ не блажи́т, преблаже́нне Стефа́не богоно́сче, то́й ме́ртв е́сть душе́ю и те́лом пре́жде сме́рти и пре́жде суда́ во осужде́ние низпаде́.

Припев: Святителю отче Стефане, моли Бога о нас.

Сокруши́ супоста́ты, преподо́бне, и си́лу и́х вооруже́нную; покори́ на́м под но́ги вско́ре ви́димую ра́ть, рабы́ твоя́ утверди́ и держа́ву да́руй твое́й па́стве, блаже́нне и свяще́нне.

Сла́ва Отцу́ и Сы́ну и Свято́му Ду́ху:

Покры́й гра́д тво́й, о́тче на́ш Стефа́не богоно́сче, от сыно́в ага́рян. Се́ бо скреже́щут зубы́ свои́ми на ны́, пожре́ти ны́ разже́гшеся, я́ко зве́рие ди́вии, но сокруши́ зу́бы и́х.

И ны́не и при́сно и во ве́ки веко́в. Ами́нь.

Богоро́дичен: Ле́ствицу Тя́ прови́де, Препе́тая Ма́ти, Иа́ков во сне́, небесе́ досяза́ющу, в Ню́же Сло́во всели́ся и челове́ки возведе́, от человекогуби́тельнаго зми́я избавля́яй.

Седа́лен, гла́с 1.

Вели́кий святи́тель Христо́в да воспое́тся, сто́лп све́тлый, просвеща́яй на́с чуде́с све́тлостьми, и о́блак ро́сный, пла́мень страсте́й погаша́ющь и ороша́ющь ве́рных мы́сли, боже́ственный Стефа́н.

Сла́ва, и ны́не, Богоро́дичен:

Све́тлый свети́льниче, Боже́ственная трапе́зо, кади́льнице злата́я, ста́мно, ма́нну нося́щая живоно́сную, ве́рных мы́сли услажда́ющи, я́коже проро́цы Тебе́, Де́во, провозвести́ша.

Пе́снь 4.

Ирмо́с: На Кресте́ Твое́ Боже́ственное истоща́ние прови́дя, Авваку́м, ужа́сся, вопия́ше: Ты́ си́льных пресе́кл еси́ держа́ву, Бла́же, приобща́яся су́щим во а́де, я́ко Всеси́лен.

Припев: Святителю отче Стефане, моли Бога о нас.

Отлучи́хся от Бо́га, гре́шный, и удали́хся а́з, блу́дный, иногда́ во страну́ всели́хся дале́че, о́тче, обнажи́хся, послу́шав лестца́, неиспра́вленный.

Припев: Святителю отче Стефане, моли Бога о нас.

Ты́ пра́ведне озари́лся еси́ Трисо́лнечным Све́том Несозда́нныя Тро́ицы, того́ на́м посли́, пою́щим Его́, и на небеси́ Того́ сподо́би на́с в Тро́ице воспева́ти, блаже́нный о́тче, богоно́сный Стефа́не.

Сла́ва Отцу́ и Сы́ну и Свято́му Ду́ху:

Отче отце́в богоно́сный Стефа́не, Суро́жу утвержде́ние, сы́н правове́рия, рабы́ своя́ соблюди́ от вся́каго прегреше́ния и от безбо́жных ва́рвар, ви́димых же вра́г и неви́димых.

И ны́не и при́сно и во ве́ки веко́в. Ами́нь.

Богоро́дичен: Го́рестных сле́з мои́х не забу́ди и стена́ния души́ моея́ не пре́зри, Де́во Чи́стая и Непоро́чная, яви́ на мне́ ми́лость и человеколю́бие Сы́на и Бо́га Твоего́.

Пе́снь 5

Ирмо́с: Сою́зом любве́ связу́еми, апо́столи, влады́чествующему все́ми себе́ Христу́ возло́жше, кра́сны но́ги очища́ху, благовеству́юще все́м ми́р.

Припев: Святителю отче Стефане, моли Бога о нас.

Ду́шу мою́ очерни́х неподо́бными де́лы а́з, ни́щий, к тебе́ вопию́, засту́пнику моему́ те́плому: не оста́ви мене́, прече́стне Стефа́не, но моли́тву сотвори́ ко Спа́су.

Припев: Святителю отче Стефане, моли Бога о нас.

Мольбы́ твоего́ раба́ не забу́ди, о́тче люби́мый, но приими́ сия́ и ко Го́споду те́пле принеси́, да избу́дем ну́жды и огня́ негаси́маго.

Сла́ва Отцу́ и Сы́ну и Свято́му Ду́ху:

Отягче́ну во гресе́х и на земли́ лежа́щу, по́мощь твою́, о́тче, посли́ мне́, рабу́ твоему́, и возста́ви мя́, да стою́ пра́ве и хожду́ в путе́х Бо́жиих.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, еди́на Богоро́дице, Ра́дость ро́ждшая, Ангельская красото́ и челове́ков вели́кое прибе́жище, гре́шных просты́не, волну́ющихся приста́нище, Де́во.

Пе́снь 6.

Ирмо́с: Бе́здна после́дняя грехо́в обы́де мя́, и, волне́ния не ктому́ терпя́, я́ко Ио́на Влады́це, вопию́ Ти: от тли́ мя возведи́.

Припев: Святителю отче Стефане, моли Бога о нас.

Иму́ще тя́ твои́ раби́ засту́пника те́пла, не убои́мся супоста́тных си́л, но побежда́ем ты́я, Кресто́м Христо́вым укрепля́еми.

Припев: Святителю отче Стефане, моли Бога о нас.

Сохрани́ гра́д тво́й, о́тче преподо́бне Стефа́не, и от безбо́жных инове́рных нахо́да, и от усо́бныя ра́ти и вся́каго стра́ха и му́ки изба́ви.

Сла́ва Отцу́ и Сы́ну и Свято́му Ду́ху:

Даде́ на́м Христо́с честна́го Стефа́на посека́ти проти́вная вся́ ви́димая во́инства и исправля́ти благове́рное Свое́ ста́до.

И ны́не и при́сно и во ве́ки веко́в. Ами́нь.

Богоро́дичен: Свя́т еси́ Еди́н, во святы́х Почива́яй, све́том Свои́м мя́ осия́в, освяти́ ду́шу мою́ покая́нием, моли́твами Ма́тере Твоея́.

Конда́к, гла́с 3:

Вы́шняго си́лою, свяще́нне, укрепи́вся, царе́ва низложи́л еси́ иконобо́рная шата́ния; дне́сь Суро́жу и на́м ве́рным предлежа́т сла́ва и бога́тство — святы́я твоя́ мо́щи, и́хже свы́ше дароно́сят Ангельстии чи́нове, пе́сньми и пе́нием славосло́вят тя́, вели́кий свяще́нный Стефа́не.

Икос:

Твоего́ чиста́го и непоро́чнаго жития́ ки́й язы́к челове́ческий восхвали́ти когда́ и воспе́ти, преподо́бне Стефа́не, возмо́жет, ве́рою, и ра́зумом, и и́стиною? Ибо во все́х по́двизех до́блествен показа́лся еси́. Ты́ бо, всеблаже́нне, лю́таго царя́ посрами́л еси́, че́сть же ико́ны восходи́ти на первообра́зие научи́л еси́, свя́те, и отце́в догма́ты, всему́дре, испове́дал еси́; сего́ ра́ди тя́ ублажа́ем, вели́кий свяще́нный Стефа́не.

Пе́снь 7.

Ирмо́с: Неизрече́нное чу́до: в пещи́ Изба́вивый преподо́бныя о́троки из пла́мене, во гро́бе ме́ртв бездыха́нен полага́ется, во спасе́ние на́с пою́щих: Изба́вителю Бо́же, благослове́н еси́.

Припев: Святителю отче Стефане, моли Бога о нас.

Отве́рзи ми́ две́ри покая́ния, преподо́бне Стефа́не, и вся́к мра́к отжени́ от моея́ души́, и те́ла моего́ вся́ скве́рны очи́сти, да приношу́ ти́ пе́снь и зову́: Изба́вителю Бо́же, благослове́н еси́.

Припев: Святителю отче Стефане, моли Бога о нас.

Предста́ни души́ моея́ во исхо́де, Стефа́не прече́стне, и от лука́вствия сатанина́ изба́ви мя́, я́ко да сла́влю тя́ ве́рно, иера́рха вели́каго, поя́ Бо́гу: Изба́вителю Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Иера́рше, твоя́ лю́ди упа́стви, сохраня́я на́с, Стефа́не му́дре, и на небесе́х сподо́би с тобо́ю Тро́ице безпреста́нно воспева́ти: Изба́вителю Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: До́ждь пода́ждь ми́ сле́з, Влады́чице, стру́пы душе́вныя и пло́тную че́рность, омыва́ющи ми́, очи́сти, и приведи́ к Соде́телю, и муче́ния вся́каго изба́ви мя́.

Пе́снь 8.

Ирмо́с: За зако́ны оте́ческия блаже́ннии в Вавило́не ю́ноши, предбе́дствующе, царю́ющаго оплева́ша повеле́ние безу́мное и, совоку́плени, и́мже не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.

Припев: Святителю отче Стефане, моли Бога о нас.

Согреши́х ве́сь гре́шный па́че все́х челове́к, и не́сть греха́, его́же не сотвори́х, ни зла́, ниже́ клеветы́, и́хже не соде́ях; но ве́рою прихожду́ к Тебе́, Христе́, я́коже Манасси́ю о́наго, поми́луй мя́.

Припев: Святителю отче Стефане, моли Бога о нас.

Отче отце́в, святы́й Стефа́не, правове́рия сто́лп, сы́н ве́ры, рабы́ твоя́ спаса́й от вся́кия беды́, возмуще́нныя от человекоуби́йцы диа́вола, не пре́зри моля́щихся тебе́ и́стинным се́рдцем и пою́щих: Го́спода воспева́йте, дела́, и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Сы́нове ага́ряни вооружа́ются на смире́нныя лю́ди твоя́, Стефа́не прече́стне, но сокруши́ и́х неви́димо, лу́к и стре́лы и́х и мечи́ вонзи́ в сердца́ и́х, да ра́достию воспое́м пе́снь многогла́сную: Го́спода по́йте, дела́, и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Одержи́ма прегреше́нии и в по́хотех жите́йских погруже́на, свободи́ и спаси́ мя́, Свята́я Богоро́дице, и стена́ния серде́чная услы́ши, я́коже блудни́цы сле́зы, и мене́, пока́явшася, Деви́це, и со слеза́ми припа́дающа, приими́.

Песнь 9

Ирмо́с: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́г, ве́рою и любо́вию Тя́ велича́ющия.

Припев: Святителю отче Стефане, моли Бога о нас.

Вельми́ ра́дуется при́сно гра́д тво́й твои́ми чудесы́, и мы́ во вся́ка времена́ насыща́емся во ве́ки от свяще́нных моще́й твои́х. И ны́не не отходи́ от на́с, моли́тву творя́ ко Го́споду, я́ко да от безбо́жных ва́рвар на́с изба́вит.

Сла́ва Отцу́ и Сы́ну и Свято́му Ду́ху:

Суро́жстии наро́ди, прииди́те, собери́теся вси́ к боже́ственней ра́це отца́ на́шего, Стефа́на преподо́бнаго, и со слеза́ми воззови́те: изба́ви лю́ди своя́, не да́ждь достоя́ния твоего́ ро́ду Исма́ильтескому, да достодо́лжно воспое́м ми́лость твою́, святи́телю.

И ны́не и при́сно и во ве́ки веко́в. Ами́нь.

Богоро́дичен: Яко разбо́йник, я́ко блудни́ца, вопию́ Ти́ от се́рдца: согреши́вша, оживи́ мя, Свята́я Богоро́дице, не разгне́вайся на мя́, не отве́ржи мене́ от лица́ Твоего́, неразу́мна су́ща и отча́янна.

Свети́лен:

Дави́дски процве́л еси́ в дому́ Госпо́дни, я́ко фи́никс, о́тче преподо́бне, пло́д твои́х трудо́в стокра́тно ны́не умно́жил еси́. Те́мже о́блак де́монов ту́чами сле́з твои́х, блаже́нне, погрузи́в, от Христа́ по́честь и вене́ц побе́ды прия́л еси́ и чуде́с, прему́дре, незави́стно бога́тую ми́лость

Сла́ва, и ны́не, богоро́дичен.

Христо́ву ны́не престо́лу предстоя́, святи́телю, с Богома́терию и Пречи́стою Де́вою моля́ся не преста́й побе́ды на ва́рвары  дарова́ти и ми́р ми́ру и душа́м спасе́ние, прему́дре, соверша́ющим, о Стефа́не, па́мять твою́, святи́телем красото́.

Молитва Стефану исповеднику, архиепископу Сурожскому

О священная главо, крепкий наш молитвенниче и заступниче, святителю отче Стефане, услыши нас, с верою и любовию призывающих тя. Поминай нас у престола Вседержителева и не престай молитися за нас. Испроси предстательством твоим у всемилостивейшаго Спаса нашего: мир церкви его, пастырем Божиим ревность и силу, православней стране нашей мир и спасение. Умоли небеснаго Отца всем подати коемуждо благопотребен дар: веру истинную, надежду твердую, любовь неоскудную, градов наших утверждение, мира умирение, от глада и губительства избавление, от нашествия иноплеменников сохранение, юным благое в вере возрастание, старым и немощным утешение и укрепление, болящим исцеление, сирым и вдовицам милость и заступление, бедствующим помощь. Не посрами нас во уповании нашем, споспешествуй, яко отец чадолюбивый, и нам понести благое иго Христово во благодушии и терпении и всех нас управи в мире и покаянии непостыдно живот свой скончати и царствия Божия наследницы быти, идеже ты ныне водворяешися со ангелы и всеми святыми, выну хваля Бога в Троице славимаго, Отца и Сына и Святаго Духа. Аминь.