28 декабря

Канон преподобнаго Павла Латрийского

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Яко безпло́тных единовсе́льника и все́м преподо́бным соо́бщника, всесла́вне Па́вле, пое́м тя́ и мо́лим тя́: моли́ся всегда́ о на́с, я́ко да обря́щем ми́лость.

Кано́н преподо́бнаго, гла́с 1.

Пе́снь 1.

Ирмо́с: Христо́с ражда́ется — сла́вите! Христо́с с небе́с — сря́щите! Христо́с на земли́ — возноси́теся! По́йте Го́сподеви, вся́ земля́, и весе́лием воспо́йте, лю́дие, я́ко просла́вися.

Припев: Преподобне отче Павле, моли Бога о нас.

Но́вое тебе́ пе́ние похва́льное привнести́ во отверзе́ние у́ст, Па́вле богоно́се, тща́щуся, пода́ждь ми́ глаго́лати твои́ми моли́твами, преподо́бне, благода́ть, я́ко да по́двиги твоя́ честны́я пропове́м.

Припев: Преподобне отче Павле, моли Бога о нас.

От ю́ности, преподо́бне, яре́м Госпо́день восприе́мь, и, в бразда́х твоего́ се́рдца пшени́цу се́яв духо́вную, кла́с пожа́л еси́, утвержда́ющь ду́ши, богоблаже́нне.

Сла́ва Отцу́ и Сы́ну и Свято́му Ду́ху:

По́ты мно́жайшими восприя́л еси́ вы́шнее Ца́рство, я́ко безпло́тен на земли́ жи́в и те́лом пожи́в Ангельское житие́. И ны́не у́бо, в высоча́йших Тро́ице предстоя́, на́с помина́й.

И ны́не и при́сно и во ве́ки веко́в. Ами́нь.

Богоро́дичен: Тле́нную мою́ пло́ть, Богоневе́сто, прие́м от Твои́х крове́й Безпло́тный и, в я́слех возлеги́й во́лею, сию́, ю́же прия́т, обожа́ет пло́ть, Богома́ти, от соедине́ния ея́ Преблаги́й.

Пе́снь 3.

Ирмо́с: Пре́жде ве́к от Отца́ рожде́нному нетле́нно Сы́ну и в после́дняя от Де́вы воплоще́нному безсе́менно, Христу́ Бо́гу возопии́м: вознесы́й ро́г на́ш, Свя́т еси́, Го́споди.

Припев: Преподобне отче Павле, моли Бога о нас.

О, твоего́ му́жества! О, ду́шевныя до́блести, сла́вне! Ты́ бо, члено́вныя льво́в сокруши́ти неви́димых жела́я, два́ ка́меня носи́л еси́ превели́ка во вре́мя но́щи, тяготу́ на ра́менах.

Припев: Преподобне отче Павле, моли Бога о нас.

Кто́ твоя́ по́двиги изрещи́ по достоя́нию возмо́жет? Ты́ бо, пути́ жесто́кия в пусты́ни ше́ствуя, суро́выя же́луди е́л еси́, вкуше́ние навыца́я твое́ услажда́ти боле́зньми воздержа́ния.

Сла́ва Отцу́ и Сы́ну и Свято́му Ду́ху:

Богови́дец дре́вле Моисе́й в купине́ сподо́бися та́инственнаго виде́ния, всечестны́й же Па́вел, огню́ я́вльшуся свы́ше, са́м позна́ я́ве себе́ сама́го, неопа́льно распаля́ема.

И ны́не и при́сно и во ве́ки веко́в. Ами́нь.

Богоро́дичен: Безнача́лен Сы́й естество́м я́ко Бо́г и Отцу́ Сло́во равноче́стное, е́же под ле́том прия́л еси́, ро́ждся от Де́вы, нача́ло, естество́м я́влься Челове́к, и, младе́нствовав, я́ко Отроча́, Ты́, Христе́, яви́лся еси́, пелена́ми пови́т.

Седа́лен преподо́бнаго, гла́с 8. Подо́бен: Прему́дрости.

Окормля́емь си́лою вседе́тельною и ве́трилом вкриля́емь кре́стным, легко́ преплы́л еси́ жите́йскую бу́рю и к боже́ственным и́стинно приста́нищем дости́гл еси́, доброде́телей ку́плю мно́гу стяжа́в, ю́же Влады́це все́х прине́сл еси́ и е́же, благи́й ра́бе, слы́шал еси́ и си́м после́дующая. Те́мже, Па́вле блаже́нне, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Пе́снь 4.

Ирмо́с: Же́зл из ко́рене Иессе́ева и цве́т от него́, Христе́, от Де́вы прозя́бл еси́, из горы́, Хва́льный, приосене́нныя ча́щи прише́л еси́, вопло́щся от Неискусому́жныя, Невеще́ственный и Бо́же, сла́ва си́ле Твое́й, Го́споди.

Припев: Преподобне отче Павле, моли Бога о нас.

Сно́м победи́вшуся тебе́ иногда́ во вре́мя ю́ности и ко всено́щному осла́бившуся стоя́нию, тво́й, ви́дев, честны́й учи́тель Пе́тр по лицу́, о́тче, ударя́ет и, тебе́ зауше́ние да́в, дае́т а́бие исцеле́ние.

Припев: Преподобне отче Павле, моли Бога о нас.

Бо́гу осо́бь бесе́дуя и Сему́ прибли́жився несре́дственне, Па́вел, оте́ц на́ш, никогда́же победи́вся, от сна́ пребы́сть по я́зве учи́телеве, но, я́коже безпло́тен сы́й, бо́др при́сно бы́сть.

Сла́ва Отцу́ и Сы́ну и Свято́му Ду́ху:

Сосу́д свяще́ннейший я́влься, мѵ́ро небе́сное — Христа́ прия́л еси́ се́рдцем твои́м и, свещу́ твоего́ терпели́внаго воздержа́ния жи́тельством доброде́тельным вже́г све́тло, к неве́стнику Боже́ственному восте́кл еси́.

И ны́не и при́сно и во ве́ки веко́в. Ами́нь.

Богоро́дичен: Име́я, Сло́ве, престо́л не́бо, зе́млю же подно́жие, в ложесна́ Де́вы, воплоща́яся, вше́л еси́ и во убо́г верте́п всели́лся еси́; от волхво́в же, царе́й перси́дских, я́ко Ца́рь да́ры и Богочелове́к прия́л еси́.

Пе́снь 5

Ирмо́с: Бо́г Сы́й ми́ра, Оте́ц щедро́т, вели́каго Сове́та Твоего́ Ангела, ми́р подава́юща, посла́л еси́ на́м; те́м, богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче.

Припев: Преподобне отче Павле, моли Бога о нас.

От ка́ла страсте́й очи́стив у́м, нескве́рно зерца́ло бы́л еси́, осия́ния Ду́ха прие́м при́сно. Те́мже тебе́ искуси́тель посрами́ся, прирази́вся, и́же са́да зло́бы не́мощь изучи́вый.

Припев: Преподобне отче Павле, моли Бога о нас.

Му́дрость су́що — Христа́ Бо́га во твое́м се́рдцы стяжа́в обита́ющую, нему́драго низложи́л еси́ зло́бы мудреца́ нога́ми твои́ми кра́сными, мудростьми́ разли́чными прельсти́ти тя́, Па́вле богому́дре, покуша́ющася.

Сла́ва Отцу́ и Сы́ну и Свято́му Ду́ху:

Све́та сы́й прия́телище, дне́ сы́н, тмы́ прельсти́л еси́ нача́льника, я́коже льва́, на тя́ наве́тующа, земны́ми тру́сы и колеба́нии ка́мений, безсту́дием устраша́юща, Па́вле, и мечта́нии свире́пствующа.

И ны́не и при́сно и во ве́ки веко́в. Ами́нь.

Богоро́дичен: Изве́рженна пе́рваго Ада́ма из Еде́ма, Присноде́во Отрокови́це Богоневе́сто, Сло́во Пребезнача́льное, из Тебе́ вопло́щся и в я́сли безслове́сных восклони́вся я́ко Младе́нец, на́ш ро́д от безслове́сия изба́ви.

Пе́снь 6.

Ирмо́с: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ истле́ния, Ро́ждшую сохрани́ неврежде́нну.

Припев: Преподобне отче Павле, моли Бога о нас.

Якоже Спа́с, Христо́с Бо́г на́ш, ма́лыми хле́бы наро́д насы́ти многочи́слен, та́кожде и Па́вел, таи́нник Христо́в, скуде́ла мале́йшаго ма́лою водо́ю мно́жества до сы́тости возвесели́, и сы́тость явля́ет оби́лие.

Припев: Преподобне отче Павле, моли Бога о нас.

Уставля́еши зно́й моли́твами твои́ми, чу́дне, и реши́ши гла́д прети́мый: вода́ми же, свы́ше пролия́вшимися, упая́еши зе́млю и напая́еши сухи́я сея́ бразды́, прозяба́я и богатя́ дарова́нии и умножа́яй сея́ де́лание.

Сла́ва Отцу́ и Сы́ну и Свято́му Ду́ху:

Неболе́зненную жи́знь в боле́знех восприя́л еси́ и боле́зней лю́тых уставля́еши озлобле́ние, ве́рою прося́щим прия́ти врачева́ния от тебе́, всече́стне, отце́в добро́то. Те́мже разреши́ боле́зни моя́ душе́вныя и теле́сныя, молю́ся.

И ны́не и при́сно и во ве́ки веко́в. Ами́нь.

Богоро́дичен: Сло́во Отчее, Сы́не Бо́жий безле́тне и порожде́ние Ма́тере Чи́стыя Богоотрокови́цы преве́чное, я́ко Бо́г и я́ко Челове́к младе́нец Сы́й в верте́пе вмести́ся Невмести́мый. Те́мже вси́, дивя́щеся, покланя́емся вели́кому та́инству.

Конда́к преподо́бнаго, гла́с 8. Подо́бен: Взбра́нной.

От ю́ности, му́дре, я́же па́че смы́сла вожделе́л еси́ му́жески, мирски́й мяте́ж оста́вил еси́, и бы́л еси́ Боже́ственнаго ра́ди жи́тельства Тро́ицы жили́ще, и просвети́л еси́ ве́рою приступа́ющия тебе́. Те́м зове́м: ра́дуйся, Па́вле пребога́те.

Пе́снь 7.

Ирмо́с: Отроцы, благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но, посреди́ пла́мене стоя́ще, поя́ху: отце́в Бо́же, благослове́н еси́.

Припев: Преподобне отче Павле, моли Бога о нас.

Яко со́лнце возсия́в, восто́к а́бие просвети́л еси́, на сто́лп же возше́д, я́ко посреде́ небесе́ стоя́, вселе́нную всю́ уче́нии возвесели́л еси́, — отце́в, — вопия́, — Бо́же, благослове́н еси́.

Припев: Преподобне отче Павле, моли Бога о нас.

Удали́лся еси́, бе́гая мирски́х во́лн, и, в пусты́ни псало́мски водвори́вся, богоблаже́нне, прия́л еси́ Бо́га в се́рдцы твое́м, Ангельским хране́нием тебе́ соблюда́юща.

Сла́ва Отцу́ и Сы́ну и Свято́му Ду́ху:

Зре́л еси́ муче́ния та́мошняя мы́сленными очесы́ и, человеколю́бною твое́ю душе́ю се́рдцем боле́знуя, слеза́ми себе́ при́сно омака́л еси́, не я́ко Дави́д во вре́мя но́щи посте́лю.

И ны́не и при́сно и во ве́ки веко́в. Ами́нь.

Богоро́дичен: Безпло́тный воплоща́ется, и Безле́тный в ле́то быва́ет, и пелена́ми повива́ется на́с ра́ди, Иже зе́млю повива́яй Госпо́дь мгло́ю, пло́ть Са́м па́че постиже́ния неизме́нно яви́вся от Неискусому́жныя.

Пе́снь 8.

Ирмо́с: Чу́да преесте́ственнаго росода́тельная изобрази́ пе́щь о́браз: не бо́, я́же прия́т, пали́т ю́ныя, я́ко ниже́ о́гнь Божества́ — Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки.

Припев: Преподобне отче Павле, моли Бога о нас.

Спротяже́ну с Дави́дом благогла́сну пе́снь всестро́йну пе́л еси́, глаго́ля: я́ко утеше́ния Твоя́ ду́шу мою́ боголе́пно человеколю́бным манове́нием, Всецарю́, возвесели́ша. Те́мже, ра́дуяся, взыва́л еси́: да благослови́т тва́рь вся́ Го́спода и превозно́сит Его́ во ве́ки.

Припев: Преподобне отче Павле, моли Бога о нас.

Подава́яй тебе́ я́же проти́ву любви́ Зижди́тель, от ю́ности соблюда́я тя́ десни́цею, и треми́ пита́ет тя́ сала́тами боголе́пно, я́ко от младе́нства вся́ко похоте́ние попра́вша, руко́ю же Ангела сия́ дае́т, я́ко Ангельскому житию́ ревну́ющу, препросла́вленному тебе́, Па́вле богоно́се.

Сла́ва Отцу́ и Сы́ну и Свято́му Ду́ху:

Возмого́ша убежа́ти осужде́ния трие́ осужде́ннии свя́зани му́жие, я́ко укло́ншеся служе́ния о́бщаго: у́з бо неви́димо и́менем разре́шшеся твои́м, о́тче всесла́вне, свя́занных от бе́д изба́ви, и еди́ною носи́мы руко́ю Содержа́щаго.

И ны́не и при́сно и во ве́ки веко́в. Ами́нь.

Богоро́дичен: Со́лнце пра́вды ро́ждшая звездо́ю созыва́ет волхвы́ со зла́том, и сми́рною же, и лива́ном, новоле́пно покланя́ющеся невра́щно Младе́нствовавшему, Его́же па́стырие возвели́чиша, и Ангел мно́жества воспе́ша, сла́вяще, я́ко и по существу́ Бо́га и Челове́ка естество́м.

Песнь 9

Ирмо́с: Та́инство стра́нное ви́жу и пресла́вное: не́бо — верте́п; престо́л херуви́мский — Де́ву; я́сли — вмести́лище, в ни́хже возлеже́ Невмести́мый — Христо́с Бо́г, Его́же, воспева́юще, велича́ем.

Припев: Преподобне отче Павле, моли Бога о нас.

Пове́дует е́же к Бо́гу дерзнове́ние твое́ и я́же соверши́л еси́, по е́же к Нему́ отше́ствии, чу́дная дела́: мно́гих бо еле́ем твоего́ световожде́ния от неду́г разли́чных свободи́л еси́.

Припев: Преподобне отче Павле, моли Бога о нас.

Всесве́тлу твою́ ду́шу име́я, преподо́бне, я́ко ми́ром благода́ти ве́сь напои́вся, еле́ем де́моны отго́ниши, прокаже́нныя очища́я и угрызе́нныя главы́ и кра́ст лю́тых уставля́я боле́зни.

Сла́ва Отцу́ и Сы́ну и Свято́му Ду́ху:

Распа́дся, па́дает сатана́ вселука́вый о́бразом всесвире́па зве́ря, зря́ просте́рта тебе́ еле́й канди́ла твоего́, я́ко ми́ро, на исцеле́ние разли́чных неду́гов, и, стра́хом одержи́мь, исчезе́.

И ны́не и при́сно и во ве́ки веко́в. Ами́нь.

Богоро́дичен: Зачала́ еси́ в после́дняя ле́та в ложесна́х Твои́х, Его́же Оте́ц роди́, Сы́на, пре́жде ве́к нетле́нно, Неискусому́жная Ма́ти. Сего́ звездо́ю небеса́ показу́ют и земля́ пеще́рою земно́ю.

Свети́лен преподо́бнаго.

Дави́дски процве́л еси́ в дому́ Госпо́дни, я́ко фи́никс, о́тче преподо́бне, плоды́ твои́х трудо́в во сто́ ны́не умно́жив. Те́мже по́лк де́монов ту́чами сле́з твои́х, Па́вле блаже́нне, погру́жь, от Христа́ по́честь и вене́ц побе́ды прия́л еси́ и чуде́с, прему́дре, незави́стнобогатую благода́ть.

Молитва

О свяще́нная главо́, преподо́бне о́тче, преблаже́нне а́вво Павле, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.