28 декабря

Канон священномученика Елевферия Иллирийского

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

И нра́вом прича́стник, и престо́лом наме́стник, апо́столом бы́в, дея́ние обре́л еси́, богодохнове́нне, в виде́ния восхо́д, сего́ ра́ди, сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче Елевфе́рие, моли́ Христа́ Бо́га спасти́ся душа́м на́шим.

Кано́н священному́ченика. Гла́с 1.

Пе́снь 1.

Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Святый священномучениче Елевферие, моли Бога о нас.

Страсте́й омраче́нием порабоще́ннаго, све́тлыми моли́твами твои́ми, му́чениче Елевфе́рие, ны́не свободи́, да я́ко раба́ тя́ Христо́ва Боже́ственными воспою́ пе́сньми.

Припев: Святый священномучениче Елевферие, моли Бога о нас.

Страда́ния возсия́л еси́ чисте́йшими заря́ми, свяще́ннейше, обагри́л еси́ кро́вию свяще́нную твою́ оде́жду и бы́л еси́ светови́ден ду́хом.

Сла́ва Отцу́ и Сы́ну и Свято́му Ду́ху:

Бо́гу прилепля́яся чисте́йшим умо́м от ю́ности, плотска́го мудрова́ния ду́шу удали́л еси́ и чуде́с оби́льною благода́тию обогати́лся еси́.

И ны́не и при́сно и во ве́ки веко́в. Ами́нь.

Богоро́дичен: Яко престо́л огнезра́чен, но́сиши Зижди́теля, я́ко одушевле́н черто́г и красна́ пала́та, Царя́ вмеща́еши, бы́вшаго, е́же есмы́, кроме́ преложе́ния и смеше́ния.

Пе́снь 3.

Ирмо́с: Да утверди́тся се́рдце мое́ в во́ли Твое́й, Христе́ Бо́же, Иже над вода́ми не́бо утвержде́й второ́е и основа́вый на вода́х зе́млю, Всеси́льне.

Припев: Святый священномучениче Елевферие, моли Бога о нас.

За Христа́ страда́ти изво́ливый, я́звы терпи́ши теле́сныя, услажда́яся, му́дре, боле́зньми и скорбьми́; сего́ ра́ди неболе́зненну жи́знь ны́не восприя́л еси́.

Припев: Святый священномучениче Елевферие, моли Бога о нас.

Те́плым жела́нием сотво́ршаго, страда́льче богому́дре, держи́мь, разжже́нней тебе́ сама́го поверга́еши хи́трости, ороша́емь Ду́ха огне́м, Елевфе́рие.

Сла́ва Отцу́ и Сы́ну и Свято́му Ду́ху:

Во свяще́нницех свяще́ннейший и в му́ченицех му́ченик тверде́йший я́влься, вене́ц сугу́б прия́л еси́, блаже́нне, лице́ Бо́жие вы́ну ви́дя.

И ны́не и при́сно и во ве́ки веко́в. Ами́нь.

Богоро́дичен: Же́зл кре́пости прозябла́ еси́ — Христа́, Имже утвержда́емся: Тя́ бо вообража́ше Ааро́нов же́зл, иногда́ прозя́бший, неде́ланная земле́, Чи́стая Голуби́це Присноде́во.

Седа́лен священному́ченика, гла́с 1. Подо́бен: Гро́б Тво́й, Спа́се.

Свобо́ден у́м от страсте́й стяжа́в, бы́л еси́ Бо́жий и́скреннейший ра́б и от ле́сти свободи́л еси́ до́бре послу́шавшия тебе́: пострада́в же я́ко иере́й и му́ченик, Елевфе́рие, сугу́б прия́л еси́ вене́ц: моли́ спасти́ся на́м.

Сла́ва, И ны́не, Богоро́дичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Пе́снь 4.

Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том — позна́ешися, внегда́ приити́ вре́мени — пока́жешися. Сла́ва си́ле Твое́й, Го́споди.

Припев: Святый священномучениче Елевферие, моли Бога о нас.

Ни зия́ния льво́в, ни вре́ния огня́, ни лю́тых преще́ния кре́пости твоего́, священнотаи́нниче, разсла́биша терпе́ния, но, я́ко адама́нт, му́ками услажда́лся еси́, ре́вностию Боже́ственною распаля́емь.

Припев: Святый священномучениче Елевферие, моли Бога о нас.

Во́д живото́чных уста́ твоя́ испо́лнена, ре́ки источи́ша Боже́ственных уче́ний, священному́чениче, потопля́ющия беззако́ннующих руга́ния и напая́ющия сердца́ позна́вших Христа́ Бо́га.

Сла́ва Отцу́ и Сы́ну и Свято́му Ду́ху:

Вельми́ тя прославля́я тво́й Соде́тель, за Него́же усе́рдствовал еси́ страда́ти, страстоте́рпче, го́лубя тебе́ посыла́ет, приноша́юща пи́щу Ангельскую, равноа́нгельну бы́вшу страда́ний светле́йшими сия́ньми.

И ны́не и при́сно и во ве́ки веко́в. Ами́нь.

Богоро́дичен: Ужасо́шася зря́ще Ангельская во́инства, ка́ко Неви́димый зра́ком су́щим по на́м из Тебе́ ви́ден бы́сть, Де́во Богороди́тельнице: Его́же моли́ спасе́ния сподо́бити вся́, ве́рно Тя́ сла́вящия.

Пе́снь 5

Ирмо́с: Тво́й ми́р да́ждь на́м, Сы́не Бо́жий, ино́го бо, ра́зве Тебе́, Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Припев: Святый священномучениче Елевферие, моли Бога о нас.

Ле́стными ухищря́яй укра́сти тя́ словесы́, му́чениче, вра́г вселука́вый сме́х зри́тся, му́дростию твое́ю мудре́ц зло́бы прехищря́емь.

Припев: Святый священномучениче Елевферие, моли Бога о нас.

На колесни́це взима́емь Боже́ственных доброде́телей, сла́вне, высоту́ дости́гл еси́ муче́ния и низложи́л еси́ лука́вых бесо́в превознесе́нную горды́ню.

Сла́ва Отцу́ и Сы́ну и Свято́му Ду́ху:

Ви́дети красоту́ жела́я Иису́сову, преподо́бне, тебе́ сама́го украси́л еси́ муче́ния красото́ю и к Нему́ прише́л еси́, венча́вся све́тлым венце́м.

И ны́не и при́сно и во ве́ки веко́в. Ами́нь.

Богоро́дичен: Удивля́ет вся́к у́м чу́до Твое́, Чи́стая: ражда́еши бо Бо́га пло́тию и Пита́теля пита́еши млеко́м, искуше́ния му́жеска не позна́вши, Са́м я́ко ве́сть Еди́н.

Пе́снь 6.

Ирмо́с: Проро́ка Ио́ну подража́я, вопию́: живо́т мо́й, Бла́же, свободи́ из тли́ и спаси́ мя, Спа́се ми́ра, зову́ща: сла́ва Тебе́.

Припев: Святый священномучениче Елевферие, моли Бога о нас.

Наро́читый ове́н па́ств Христо́вых, па́стырь слове́снейший, по́двигов стезя́ прославля́ется, Бо́га просла́вив свои́ми удесы́.

Припев: Святый священномучениче Елевферие, моли Бога о нас.

Вжили́вся к Бо́гу воззре́нии, му́дре, обезжи́лил еси́ врага́ многоко́зненнаго тве́рдо, приснопа́мятне, му́чеников сла́во, свяще́нства пра́вило.

Сла́ва Отцу́ и Сы́ну и Свято́му Ду́ху:

К ра́нам терпя́, ко огню́ самоидя́, успи́л еси́ звере́й свире́пых стремле́ния, неусы́пну к Зижди́телю име́я любо́вь.

И ны́не и при́сно и во ве́ки веко́в. Ами́нь.

Богоро́дичен: Свяще́ния се́нь я́вльшися, Мари́е, оскверне́нную сластьми́ окая́нную мою́ ду́шу освяти́ и Боже́ственныя сла́вы прича́стницу сотвори́.

Конда́к священному́ченику, гла́с 2. Подо́бен: Тве́рдыя.

Яко удобре́ние свяще́нников, преподо́бне, и предувеща́ние страстоте́рпцев вси́ восхваля́ем и про́сим тя́, священному́чениче Елевфе́рие: любо́вию па́мять твою́ пра́зднующия бе́д многообра́зных свободи́, моля́ непреста́нно о все́х на́с.

Икос:

Пре́зри, Благоутро́бне Жизнода́вче, я́ко Человеколю́бец Еди́н и ще́дрый Бо́г, души́ моея́ омраче́ние и всемо́щною десни́цею Твое́ю, Сло́ве, страсте́й свободи́ стуже́ния, я́ко да Твоего́ иера́рха воспою́ Елевфе́рия, то́й бо и́стинно из утро́бы позна́ся Тебе́, и освяти́ся, и возложе́н бы́сть, я́ко Самуи́л, от ма́тере свяще́нныя Тебе́, Зижди́телю, моля́ непреста́нно о все́х на́с.

Пе́снь 7.

Ирмо́с: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Припев: Святый священномучениче Елевферие, моли Бога о нас.

Да велича́ется, — взыва́л еси́, му́дре, раздробля́емь, — ны́не во пло́ти мое́й Христо́с, не ужаса́юся распале́ний коно́бов, не бою́ся сме́рти, ни звере́й стремле́ний су́щия ра́ди жи́зни.

Припев: Святый священномучениче Елевферие, моли Бога о нас.

Еди́наго Бо́га добро́ты иски́й, еди́ну Того́ сла́ву получи́ти жела́ю, да раздробля́ется и опаля́ется все́ те́ло мое́, — взыва́л еси́, сла́вне, — свобожде́ния ищу́, порабоща́ющаго Христу́.

Сла́ва Отцу́ и Сы́ну и Свято́му Ду́ху:

Смотря́я бу́дущую жи́знь, блаже́нне, ми́ру умертви́лся еси́ и́стинно, и, я́ко зла́то, я́звенными искуше́нии разже́гся, просия́л еси́, и положи́лся еси́ в сокро́вищах небе́сных оби́телей.

И ны́не и при́сно и во ве́ки веко́в. Ами́нь.

Богоро́дичен: Чисте́йшу Тя́ Еди́ну обре́т, Всенепоро́чная, Сло́во Чисте́йшее Бо́жие, из чре́ва Твоего́ роди́вся, ве́рныя очища́ет оскверне́ния, Богоневе́сто, прибы́вшая на́м от неудержа́ния страсте́й.

Пе́снь 8.

Ирмо́с: Его́же ужаса́ются Ангели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки.

Припев: Святый священномучениче Елевферие, моли Бога о нас.

Процве́т, прозя́бл еси́ са́д красе́н муче́ний све́тлостьми, му́чеников добро́то, и ны́не рая́ цве́ти яви́стеся, Боже́ственно благово́ние испуща́юще Боже́ственне.

Припев: Святый священномучениче Елевферие, моли Бога о нас.

Кропле́ньми крове́й твои́х, рожде́ннаго из нея́, кро́вь свою́ ма́ти приобща́ет: твоему́ бо телеси́ объе́мшися, му́дре, мече́м скончава́ется и живе́т во ве́ки.

Сла́ва Отцу́ и Сы́ну и Свято́му Ду́ху:

Исцеле́ний во́ды, чуде́с ре́ки излива́ет тре́бующим ра́ка твоя́, му́дре, отмыва́юще скве́рны душетле́нных страсте́й, му́чениче иера́рше, во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Яко до́ждь, во утро́бу Твою́ сни́де Христо́с и всю́ напои́ тва́рь вои́стинну, изсуши́в, Де́во, му́тныя ре́ки идолонеи́стовства, Еди́н Благоде́тель.

Песнь 9

Ирмо́с: Живоприе́мный исто́чник приснотеку́щий, светоно́сный свети́льник благода́ти, хра́м одушевле́нный, се́нь пречи́стую, небесе́ и земли́ простра́ннейшую, Богоро́дицу, ве́рнии, велича́ем.

Припев: Святый священномучениче Елевферие, моли Бога о нас.

Уста́ Бо́жия бы́в, от у́ст чужда́го лю́ди суему́дренныя восхи́тив, показа́л еси́ насле́дники благода́ти и, пострада́в кре́пко, со иере́и и страда́льцы живе́ши, Елевфе́рие.

Припев: Святый священномучениче Елевферие, моли Бога о нас.

Чи́стая мирополо́жница Ду́ха, доброде́телей кра́сное жили́ще, а́гнец незло́бивый, свети́льник незаходи́мый, иера́рхов степе́нь и му́чеников, да восхва́лится ве́рно Елевфе́рий.

Сла́ва Отцу́ и Сы́ну и Свято́му Ду́ху:

Во све́те живе́ши и́стинно невече́рнем, све́т бы́в со́лнца светле́йший. Те́м па́мять твою́ светоно́сную дне́сь соверша́ющия страсте́й мглы́ изба́ви к Бо́гу твои́ми моли́твами, Елевфе́рие.

И ны́не и при́сно и во ве́ки веко́в. Ами́нь.

Богоро́дичен: Пощади́ на́с, пою́щих Твое́, Го́споди, е́же из Де́вы, неизрече́нное Рождество́, от напа́стей избавля́я, и страсте́й, и скорбе́й мольба́ми Ея́ Твоя́ рабы́, я́ко Благоде́тель и Еди́н Человеколю́бец.

Молитва

О святы́й уго́дниче Бо́жий, священному́чениче Елевферие! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.