27 декабря

Канон мученикам Фирсу, Левкию, Филимону и иже с ними

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь мученикам Фирсу, Левкию, Каллинику и иже с ними, глас 4

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ и́муще бо кре́пость Твою, мучи́телей низложи́ша,/ сокруши́ша и де́монов немощны́я де́рзости./ Тех моли́твами// спаси́ ду́ши на́ша.

Кондак мученикам Фирсу, Левкию, Каллинику и иже с ними, глас 2

Благоче́стия ве́ры побо́рницы, злочести́ваго мучи́теля оплева́вше,/ обличи́сте зверообра́зное его́ кровопроли́тие,/ и победи́сте того́ я́ростное противле́ние,/ Христо́вою по́мощию укрепля́еми, Фи́рсе и Ле́вкие,// с пострада́вшими, о нас моли́теся.

Канон гла́с 6.

Пе́снь 1.

Ирмо́с: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святии мученицы, молите Бога о нас.

Му́ченическими красота́ми Боже́ственному престо́лу предстоя́ще и Боже́ственными блиста́нии, страстоте́рпцы, сия́юще, на́с, пою́щих ва́шу па́мять, просвети́те.

Припев: Святии мученицы, молите Бога о нас.

Добро́ты Боже́ственныя жела́юще, жития́ кра́сная в ничто́же вмени́сте, страстоте́рпцы Христо́вы, и, уме́рше те́лом, жи́знь безконе́чную обрести́ сподо́бистеся.

Сла́ва Отцу́ и Сы́ну и Свято́му Ду́ху:

Безбо́жия ле́сть боголе́пно, страстоте́рпцы му́ченицы, обличи́вше, мно́гих боле́зней претерпе́сте разжже́ние и безболе́зненную жи́знь ны́не восприя́сте.

И ны́не и при́сно и во ве́ки веко́в. Ами́нь.

Богоро́дичен: Неопи́санное Сло́во, опи́сано бы́вшее те́лом, породила́ еси́, Чи́стая, Его́же моли́ изба́витися тли́ и страсте́й наведе́ния Тя́ сла́вящим.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святии мученицы, молите Бога о нас.

Те́ло стру́жуще, лю́те тмы́ предста́телие по́мысла твоего́ кре́пости не осла́биша, любо́вию Боже́ственною си́льне в любви́, Фи́рсе, укрепля́емаго.

Припев: Святии мученицы, молите Бога о нас.

Бы́сть, му́чениче чу́дне, внеза́пная твоя́ вои́стинну ко Го́споду ве́ра, е́юже посрами́л еси́ враго́в злове́рие, вопия́, о Филимо́не, — ра́б е́смь Христо́в.

Сла́ва Отцу́ и Сы́ну и Свято́му Ду́ху:

К боре́нию, му́чениче, врага́ де́рзостне изше́л еси́, не щито́м, ни копие́м, но ве́рою тве́рдою боже́ственне защити́вся, и му́жески сего́ на зе́млю низве́ргл еси́.

И ны́не и при́сно и во ве́ки веко́в. Ами́нь.

Богоро́дичен: В дву́х естества́х Еди́н Святы́я Тро́ицы, из чи́стых Твои́х крове́й воплоти́вся, боголе́пно про́йде, су́щия из Ада́ма спаса́я, Всечи́стая, бла́гостию.

Седа́лен, гла́с 4. Подо́бен: Удиви́ся Ио́сиф.

Благоче́стия щито́м покрыва́еми до́бре и ору́жием Креста́ оде́явшеся тве́рдо, ополче́ния низложи́ша мучи́теля му́ченицы Христо́вы досточу́днии и, венце́м от Него́ увя́зшеся побе́ды, лику́ют непреста́нно с го́рними си́лами и Спа́са мо́лят спасти́ ду́ши на́ша.

Сла́ва, и ны́не, Богоро́дичен:

Треволне́нии страстны́ми безсо́вестный а́з обурева́емь, Чи́стая, призыва́ю Тя́ те́пле: да не пре́зриши мене́, окая́ннаго, поги́бнути, бе́здну милосе́рдия ро́ждшая, ра́зве бо Тебе́ наде́жды не и́мам. Да не враго́м у́бо обра́дование и сме́х наде́явыйся на Тя́ явля́юся, и́бо мо́жеши, ели́ка хо́щеши, я́ко Ма́ти су́щи все́х Бо́га.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Святии мученицы, молите Бога о нас.

Еди́наго благоутро́бнаго, Еди́наго Го́спода и Бо́га все́х испове́дати му́ченицы возжеле́вше, чрез му́ки Того́ Ца́рство прия́сте.

Припев: Святии мученицы, молите Бога о нас.

Строга́ния теле́сная, о́гненная стремле́ния и звере́й, и мо́ря ю́ношески подъя́л еси́, пребога́те, си́лою Креста́, му́чениче Фи́рсе, укрепля́емь.

Сла́ва Отцу́ и Сы́ну и Свято́му Ду́ху:

Подвиго́в ра́нами удобря́яся, ду́шу светле́йшу со́лнечнаго сия́ния соде́лал еси́, я́ко во́ин Христо́в, страстоте́рпче му́чениче Левки́е.

И ны́не и при́сно и во ве́ки веко́в. Ами́нь.

Богоро́дичен: Ма́терь безму́жну, Де́ву непоро́чну, нерастле́нну Отрокови́цу, в жена́х еди́ну Тя́ зна́ем, Благослове́нная Мари́е, челове́ков исправле́ние.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Святии мученицы, молите Бога о нас.

Боже́ственнейшими богосия́нно, му́ченицы всехва́льнии, заря́ми освяще́ни, преидо́сте безбо́жия непостоя́нную пучи́ну и к Боже́ственней тишине́ премину́сте.

Припев: Святии мученицы, молите Бога о нас.

Влачи́ми по земли́, му́ченицы всехва́льнии, лю́те и му́ками ураня́еми, небе́сных че́сти получи́сте, Ангелов согра́ждане ны́не бы́вше.

Сла́ва Отцу́ и Сы́ну и Свято́му Ду́ху:

Любя́ умре́ти за Христа́, возлю́бльшаго тя́ я́ве, му́чениче Филимо́не, вмени́л еси́ приноси́мыя я́звы телеси́ твоему́ младе́нцев стреля́ния, богоблаже́нне.

И ны́не и при́сно и во ве́ки веко́в. Ами́нь.

Богоро́дичен: Богоро́дицу Тя́ от души́, Влады́чице ми́ра Блага́я, испове́дующия спаса́й: Тя́ бо Предста́тельницу непобеди́му стяжа́хом, су́щую Богороди́тельницу.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Святии мученицы, молите Бога о нас.

Ве́тры дви́жими Боже́ственнаго Ду́ха, му́дрии, душе́вная вожде́ния во у́мная приста́нища прера́достно спасо́сте, му́ченицы, наслажда́ющеся ку́пно обоже́ния.

Припев: Святии мученицы, молите Бога о нас.

На колесни́цу пла́менну все́дше, страда́льцы, излия́нною кро́вию к небесе́м восхи́тистеся и Бо́жию сла́ву получи́сте, от Него́ венцы́ побе́ды прии́мше.

Сла́ва Отцу́ и Сы́ну и Свято́му Ду́ху:

Филимо́н и Левки́й, Аполло́ний ку́пно и Фи́рс приснопа́мятный, четвери́ца боже́ственная и светоза́рная, Тро́ическое осия́ние, прича́стием невеще́ственным, обогати́шася.

И ны́не и при́сно и во ве́ки веко́в. Ами́нь.

Богоро́дичен: Иже вся́кия превы́шши мы́сленныя — я́ко Бо́г — и ви́димыя тва́ри, вопло́щся, про́йде из Твоего́ чре́ва, соблю́д Тя́ нетле́нну, я́коже была́ еси́ пре́жде рождества́, Ма́ти Де́во.

Конда́к гла́с 2. Подо́бен: Тве́рдыя.

Благоче́стия ве́ры побо́рницы, злочести́ваго мучи́теля оплева́вше, обличи́сте зверообра́зное его́ кровопроли́тие и победи́сте того́ я́ростное противле́ние, Христо́вою по́мощию укрепля́еми, Фи́рсе и Левки́е, с пострада́вшими о на́с моли́теся.

Пе́снь 7.

Ирмо́с: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Святии мученицы, молите Бога о нас.

Одожде́нии Боже́ственными угаси́сте многобо́жия пе́щь, разже́гшеся Боже́ственною любо́вию прера́достно, и ны́не песнопое́те, страда́льцы: благослове́н еси́, Бо́же оте́ц на́ших.

Припев: Святии мученицы, молите Бога о нас.

Гоня́щаго Боже́ственною улови́вше мре́жею, досточу́днии, извлеко́сте из глубины́ ле́стныя и Христу́ приведо́сте, пою́ще те́пле: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Поколеба́сте ле́сти основа́ния, неколе́бленно произволе́ние показу́юще и му́жествен ра́зум, страда́льцы, и ны́не песнопое́те благоче́стно: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Па́че сло́ва Твое́ зача́тие, Богоневе́сто, Бо́га бо Сло́ва родила́ еси́, избавля́ющаго безслове́сия вся́каго челове́ки и сло́во подаю́щи вопи́ти: благослове́н еси́, Бо́же оте́ц на́ших.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Святии мученицы, молите Бога о нас.

Щито́м благоче́стия защити́вся и кре́ст, я́коже копие́, восприе́м, полки́ вра́г неви́димых ссе́кл еси́, Фи́рсе доблему́дренне, му́чеников Боже́ственная сла́во.

Припев: Святии мученицы, молите Бога о нас.

Разжига́емь любо́вию Вседержи́теля, вше́л еси́ му́жественно в му́ченическое суди́ще и, терпели́вно пострада́в, расто́ргл еси́ зми́я вели́каго, Филимо́не страда́льче.

Сла́ва Отцу́ и Сы́ну и Свято́му Ду́ху:

Погруже́ну показа́в вра́жию си́лу, глубино́ю му́жества и терпе́ния твоего́, о Ариа́не, Ца́рствия сподо́бился еси́, неподви́жимаго во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Истинную Богоро́дицу испове́дающе Тя́, я́ко Ангел, — ра́дуйся, — вопие́м Ти́: еди́на бо Ра́дость на земли́ родила́ еси́, о Обра́дованная, Чи́стая, Благослове́нная!

Песнь 9

Ирмо́с: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Святии мученицы, молите Бога о нас.

Христо́ву стра́сть изобража́юще, искуше́ние мно́гих му́к претерпе́сте, блаже́ннии; глава́ми же усе́чени бы́вше, сопричто́стеся чино́м небе́сным, сла́вою облиста́юще и Боже́ственными луча́ми украша́еми.

Припев: Святии мученицы, молите Бога о нас.

Твои́ми кровьми́ багряни́цу омочи́л еси́, Фи́рсе му́дре, и в сию́ сла́вно оде́явся: и, я́ко ски́птр боже́ственный, держа́ Кре́ст, со все́ми страстоно́сцы ра́дуяся, ны́не сца́рствуеши Христу́, богоблаже́нне.

Сла́ва Отцу́ и Сы́ну и Свято́му Ду́ху:

Ва́шим, блаже́ннии, удиви́шася Ангельския си́лы подвиго́м, ра́нам, противле́нием, ну́ждней сме́рти; с ни́миже живу́ще, воспомина́ние сотвори́те о соверша́ющих ва́шу па́мять, всехва́льнии.

И ны́не и при́сно и во ве́ки веко́в. Ами́нь.

Богоро́дичен: В подо́бии челове́чи пло́ти из Твоего́ чре́ва Сло́во яви́ся ражда́емое и му́чеников мно́жество привлече́, стра́сти претерпе́в, Преблаги́й, Чи́стая Де́во Мари́е Богора́дованная.

Молитва

Святи́и му́ченицы Христовы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.