26 декабря

Канон иной мученикам Евстратию, Авксентию, Евгению, Мардарию и Оресту и святой мученице Лукии деве

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Ин тропарь, глас тойже:

Му́ченик всечестны́х пяточи́сленных, сла́ву земну́ю презре́вших, со́лнца све́тлаго Евстра́тия, прему́драго вити́ю со страда́льцы, на о́гнь и му́ки дерзну́вших за все́х Царя́ Христа́ и от престо́ла Того́ сла́вы почестьми́ венце́в обдаре́нных, моли́твами, Христе́ Бо́же, спаси́ ду́ши на́ша.

Други́й кано́н, гла́с 6.

Пе́снь 1.

Ирмо́с: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святии мученицы, молите Бога о нас.

Небе́сных круго́в Ца́рь Дарода́тель председи́т, страда́вшим на земли́ со Евстра́тием, Христо́с, простира́я те́м побе́ды венцы́.

Припев: Святии мученицы, молите Бога о нас.

Песнослове́сный ли́к боговенча́нный страда́льцев пяточи́сленных восхва́лим, ве́рнии, му́драго Евстра́тия, ве́рна иму́ща о Христе́ боже́ственнаго чинонача́льника.

Сла́ва Отцу́ и Сы́ну и Свято́му Ду́ху:

Во́инства вы́шняго жела́я, по́честь Евстра́тие, отда́в обра́зно, Бо́гу приве́д, му́дре, твою́ жи́знь, свяще́нно очище́н.

И ны́не и при́сно и во ве́ки веко́в. Ами́нь.

Богоро́дичен: Добропобе́дных му́ченик ли́к, ра́дуйся, пое́т Тя́, Чи́стая, и́же побе́ды вене́ц прия́т: Тобо́ю бо не́бо челове́ком бы́сть вхо́дно, я́ко родила́ еси́ па́че ума́ Творца́ небесе́.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святии мученицы, молите Бога о нас.

Тве́рдостию ума́ упова́ние твое́ все́ возложи́в, блаже́нне, к Вы́шнему Бо́гу, наде́ждею ра́н утеше́ния испо́лнен ве́сь бы́л еси́.

Припев: Святии мученицы, молите Бога о нас.

Процве́л еси́ любо́вию Христо́вою, боже́ственною му́дростию, терпе́нием же му́к, Авксе́нтие, безу́мие облича́еши гони́телей, на́глость и су́етие.

Сла́ва Отцу́ и Сы́ну и Свято́му Ду́ху:

Неукроти́мый, му́дре, Лиси́ев гне́в вмени́ся Тебе́ со́н и о́гнь му́к си́льных, утве́рждся бо о Христе́, преоби́дел еси́, я́коже ино́му стра́ждущу.

И ны́не и при́сно и во ве́ки веко́в. Ами́нь.

Богоро́дичен: Священнослове́сными Тя́ гла́сы, Богома́ти Де́во, все́х вино́вную Вино́вника по на́м бы́ти, боголе́пно воспева́юще, ве́рнии, ублажа́ем.

Конда́к, гла́с 2. Подо́бен: В моли́твах.

Свети́льник яви́лся еси́ светле́йший во тме́ неве́дения седя́щим, страстоте́рпче: ве́рою бо, я́ко копие́м, обложи́вся, враго́в шата́ния не убоя́лся еси́, Евстра́тие, ри́торов сы́й благоязы́чнейший.

Седа́лен, гла́с 8. Подо́бен: Прему́дрости.

Ни ме́чь, ни зве́рие, ни о́гнь, ниже́ и́но что́ страша́щих чу́вственных, отню́д устраши́ти твою́ тве́рдость возмого́ша: вра́жию бо попра́в тече́нием си́лу, я́ко безстра́стен премину́л еси́ житие́ и безпло́тен. Те́мже ве́рным исцеле́ния подава́еши, любо́вию притека́ющим в па́мять твою́, свя́те страстоте́рпче Евстра́тие. Моли́ Христа́ Бо́га грехо́в оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Егда́ прии́дет суди́ти все́й земли́ все́х Влады́ка и Творе́ц, овца́м мя́ причти́ десны́м, осужде́ннаго, и кроме́шния тмы́, и вся́каго муче́ния Твоего́ непотре́бнаго раба́ исхити́, молю́ся: да благода́рно велича́ю бога́тство Твоея́ бла́гости, Богоро́дице Всенепоро́чная, и вопию́ Ти, ра́дуяся: моли́ Христа́ Бо́га согреше́ний оставле́ние дарова́ти, Тя́ бо и́мам наде́жду, ра́б Тво́й.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Святии мученицы, молите Бога о нас.

Всеси́льный боже́ственное жела́ние в души́ твое́й вже́г, чудоде́йственна показа́ изря́дно, всеце́лы плотски́я ра́ны твоя́ творя́.

Припев: Святии мученицы, молите Бога о нас.

Мре́жею духо́вною ры́барей, му́дре, улови́в, приво́диши Царю́ му́драго Евге́ния, его́же улови́в, Христу́ приве́л еси́, Евстра́тие.

Сла́ва Отцу́ и Сы́ну и Свято́му Ду́ху:

Гвоздьми́, всему́дре, но́зе разжига́емь, муче́нием сапо́г желе́зных, ве́сь себе́ обагри́л еси́, Царя́ Иису́са подо́бяся стра́сти.

И ны́не и при́сно и во ве́ки веко́в. Ами́нь.

Богоро́дичен: Необъе́млемый и неизме́нный, Бо́га Отца́ Сло́во, измени́вся виде́нием, Пренепоро́чная, из Тебе́ воплоща́емь, обожа́ет человеколю́бно мя́ челове́ка.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Святии мученицы, молите Бога о нас.

Чу́ден, я́коже звезда́, бы́в Це́ркви, издале́ча посреде́ му́ченик возсия́л еси́, му́ченическими осия́я заря́ми, Евстра́тие, ми́р па́че со́лнца.

Припев: Святии мученицы, молите Бога о нас.

Зарелу́чными сия́нии зарю́ испуща́юща тя́ ви́дев, богоглаго́ливый Марда́рий тебе́, я́коже а́гнец па́стырю незло́бив, простото́ю се́рдца после́дова.

Сла́ва Отцу́ и Сы́ну и Свято́му Ду́ху:

Превознесе́ся сро́днаго естества́ мужелю́бная жена́ и, разу́мная, и христолюби́вая, изря́дно предпобежда́ет и соверше́нне, пома́завши му́жа к муче́нию.

И ны́не и при́сно и во ве́ки веко́в. Ами́нь.

Богоро́дичен: Иже Богоро́дицу от души́ и Влады́чицу ми́ра, Блага́я, испове́дающия Тя́ спаса́й: Тя́ бо Предста́тельницу непобеди́му стяжа́хом, су́щую Богороди́тельницу.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Святии мученицы, молите Бога о нас.

Са́м вме́сто все́х мне́ Христо́с е́сть оте́ческих, — возопи́в, о Марда́рие. Пяте́ сокруше́нней рожны́, разжже́нным огне́м, стрела́ми же ра́мена, ра́дуяся, сконча́лся еси́.

Припев: Святии мученицы, молите Бога о нас.

Отре́зан бы́в, Евге́ние, тво́й язы́к Христа́ песносло́вити не преста́ет, ру́ки же отсе́чены к Бо́гу, блаже́нне, возвыша́ются, пою́щим тя́ избавле́ния прося́ще.

Сла́ва Отцу́ и Сы́ну и Свято́му Ду́ху:

Яко досточу́дна му́жественная твоя́ душа́, всеблагоро́дне Евге́ние, сокруше́нным бо ну́ждею твои́м го́ленем, ду́х пре́дал еси́ в ру́це Влады́ки все́х, ра́дуяся.

И ны́не и при́сно и во ве́ки веко́в. Ами́нь.

Богоро́дичен: Пречи́стая Влады́чице, ро́ждшая земны́х Ко́рмчию и Го́спода, страсте́й мои́х непостоя́нное и лю́тое утиши́ смуще́ние и тишину́ пода́ждь се́рдцу моему́.

Конда́к, гла́с 3. Подо́бен: Де́ва дне́сь.

Вити́йствуя пред беззако́ннующими боже́ственная, бие́ния претерпе́л еси́ му́жественнейшим се́рдцем, облиста́л еси́ богозна́меньми, пречу́дне, угаси́л еси́ возвы́шенный пре́лести пла́мень, сего́ ра́ди тя́ честву́ем, всеблаже́нне му́чениче Христо́в Евстра́тие.

Икос:

Свяще́нный соверша́ет Це́рковь дне́сь пра́здник та́инственно, све́тло пропове́дающи твоя́ до́блести, боле́зни и труды́, я́же па́че естества́ боже́ственная боре́ния, я́же всю́ду ра́ны, и́миже низложи́ многоко́зненнаго, сла́ва страда́льцев ве́лия и хвала́, му́жества сто́лп, свети́льник все́х тя́ чту́щих благоче́стно, врачева́ний сокро́вище, богати́телю ни́щих, первопобе́дниче честны́х му́чеников, всеблаже́нне му́чениче Христо́в Евстра́тие.

Пе́снь 7.

Ирмо́с: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Святии мученицы, молите Бога о нас.

Победоно́сец к небе́сному Ца́рству, Авксе́нтие, восте́кл еси́: по искуше́нии бо му́к многови́дных, Христа́ Бо́га испове́дая, сконча́лся еси́ за Него́, во главу́ усе́чен.

Припев: Святии мученицы, молите Бога о нас.

Пречу́дно е́сть благоразу́мное, Оре́сте, му́жество твое́, на суди́щи бо показу́еши ра́зум, ду́шу же Лиси́еву кресто́м унза́еши, поя́: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Муче́ния путе́м спу́тника тебе́ и с тобо́ю теку́ща сою́зника Оре́ста и сострада́льца име́я, обогати́л еси́, поя́ с ни́м: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Юноши три́ пе́щь не опали́, Рождество́ прообразу́ющи Твое́, Боже́ственный бо Огнь Тя́ не опали́, всели́вся в Тя́, и вся́ просвети́ вопи́ти: благослове́н Бо́г оте́ц на́ших.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Святии мученицы, молите Бога о нас.

Еди́наго естества́ Тро́ицы безме́рную си́лу со дерзнове́нием пропове́дая, богосло́вил еси́ и и́дольское служе́ние су́етное обличи́л еси́, всему́дре Евстра́тие, богому́дре.

Припев: Святии мученицы, молите Бога о нас.

Не ве́дый гони́тель терпе́ния твоего́, пла́менным ви́дом устраши́ти тя́ покуша́шеся, ты́ же, того́ суровство́ оплева́в, ра́дуяся, Влады́ку, Евстра́тие, воспева́л еси́.

Сла́ва Отцу́ и Сы́ну и Свято́му Ду́ху:

Веща́нии твои́ми боже́ственными наказу́емь, богому́дрый Оре́ст на о́др вскочи́, игра́я, я́ко а́гнец непоро́чен всесожига́емь, Бо́гу Венцеда́вцу вопия́: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Пречи́стая Де́во, Ты́ мя́ спаси́, мое́й не́мощи бу́ди по́мощь, скорбе́й мно́гих и лю́тых мя́ изба́ви, да Тя́ сла́влю, еди́ну Богоро́дицу.

Песнь 9

Ирмо́с: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Святии мученицы, молите Бога о нас.

Поя́, Евстра́тие, жела́емаго и о́бщник боже́ственных та́ин бы́в, богоявле́ния его́ в темни́це сподо́бился еси́, блаже́нне, зову́ща тя́ к небе́сней жи́зни Ца́рствия Его́.

Припев: Святии мученицы, молите Бога о нас.

Укрепи́вся си́лою Христо́вою, Евстра́тие, гони́телей ласка́нию посмея́лся еси́, велича́я, сла́вне, Христа́ пе́сньми: я́коже бо ю́ноши дре́вле в пе́щь, ра́дуяся, я́ко в кра́сный ра́й, блаже́нне, вну́трь вше́л еси́.

Сла́ва Отцу́ и Сы́ну и Свято́му Ду́ху:

Пе́сньми и пе́ньми восхва́лим, вси́ ве́рнии, боже́ственныя во́ины, Авксе́нтия, Евге́ния, вку́пе и Марда́рия, сла́внаго Оре́ста и чинонача́льника, и сострада́льца, и наста́вника му́драго Евстра́тия.

И ны́не и при́сно и во ве́ки веко́в. Ами́нь.

Богоро́дичен: Хра́м, Де́во, ца́рствующаго со Отце́м и Ду́хом Христа́ была́ еси́; Тебе́ ра́ди, Чи́стая, хра́мы и мы́ благода́тию бы́вше, сподо́бихомся сынотворе́ния Его́ креще́нием.

Свети́лен. Подо́бен: Ду́хом во святи́лищи.

Соверши́л еси́ чу́дное страда́ния тече́ние, Евстра́тие блаже́нне, и приве́д ку́пно Евге́ния честна́го и му́драго Авксе́нтия, Марда́рия же со Оре́стом, и́хже ве́ре и де́рзости удиви́шася челове́честии и Ангельстии собо́ри.

Молитва

Святи́и му́ченицы Христовы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.