Шрифт

26 декабря

Канон мученикам Евстратию, Авксентию, Евгению, Мардарию и Оресту и святой мученице Лукии деве

Святых мученик Евстратия, Авксентия, Евгения, Мардария и Ореста и святыя мученицы Лукии девы
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Ин тропарь, глас тойже:

Му́ченик всечестны́х пяточи́сленных, сла́ву земну́ю презре́вших, со́лнца све́тлаго Евстра́тия, прему́драго вити́ю со страда́льцы, на о́гнь и му́ки дерзну́вших за все́х Царя́ Христа́ и от престо́ла Того́ сла́вы почестьми́ венце́в обдаре́нных, моли́твами, Христе́ Бо́же, спаси́ ду́ши на́ша.

Кано́н пе́рвый, гла́с 4.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святии мученицы, молите Бога о нас.

Раздава́яй на небесе́х да́ры су́щим на земли́ страда́льцем, Подвигополо́жник седи́т Христо́с, десни́цею Вседержи́тельною Евстра́тия су́щим обою́ду боже́ственныя венцы́ простира́я.

Припев: Святии мученицы, молите Бога о нас.

Ли́к му́ченический пяточи́слен, прииди́те, ви́дим, пресве́тлым блиста́ющийся све́том, име́яй чинонача́льника возжеле́ннаго Евстра́тия, благода́тию Боже́ственною венча́ема.

Сла́ва Отцу́ и Сы́ну и Свято́му Ду́ху:

По́яс земна́го во́инства отреши́вый, и́стинному привно́сиши Царю́ страда́ния, зна́мение от Христа́, Евстра́тие, чрез Авксе́нтия прие́м.

И ны́не и при́сно и во ве́ки веко́в. Ами́нь.

Богоро́дичен: Село́ вмести́тельно была́ еси́ Боже́ственнаго естества́, Богороди́тельнице Чи́стая. Те́м тя́ Луки́я возжела́вши, де́вственно в сле́д Тебе́ Твоему́ Сы́ну приведе́ся.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святии мученицы, молите Бога о нас.

Наде́ждею муче́ний, я́коже невеще́ственнаго сокро́вища, преесте́ственно бы́л еси́ испо́лнен вся́кия ра́дости, всеблаже́нне Евстра́тие.

Припев: Святии мученицы, молите Бога о нас.

Му́дростию духо́вною, терпе́нием же напа́стей обличи́л еси́, му́чениче Христо́в Авксе́нтие, мучи́тельское безбо́жие.

Сла́ва Отцу́ и Сы́ну и Свято́му Ду́ху:

Якоже красота́ пресве́тлая Це́ркве ве́рных, му́ченицы Христо́выми я́звами, я́ко цве́ты, обложе́ни бы́сте.

И ны́не и при́сно и во ве́ки веко́в. Ами́нь.

Богоро́дичен: Госпо́дственно и и́стинно Тя́, Богоро́дицу, ве́рнии чти́м: Ты́ бо Бо́га родила́ еси́, пло́ть бы́вша, Всенепоро́чная.

Конда́к, гла́с 2. Подо́бен: В моли́твах.

Свети́льник яви́лся еси́ светле́йший во тме́ неве́дения седя́щим, страстоте́рпче: ве́рою бо, я́ко копие́м, обложи́вся, враго́в шата́ния не убоя́лся еси́, Евстра́тие, ри́торов сы́й благоязы́чнейший.

Седа́лен, гла́с 8. Подо́бен: Прему́дрости.

Ни ме́чь, ни зве́рие, ни о́гнь, ниже́ и́но что́ страша́щих чу́вственных, отню́д устраши́ти твою́ тве́рдость возмого́ша: вра́жию бо попра́в тече́нием си́лу, я́ко безстра́стен премину́л еси́ житие́ и безпло́тен. Те́мже ве́рным исцеле́ния подава́еши, любо́вию притека́ющим в па́мять твою́, свя́те страстоте́рпче Евстра́тие. Моли́ Христа́ Бо́га грехо́в оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Егда́ прии́дет суди́ти все́й земли́ все́х Влады́ка и Творе́ц, овца́м мя́ причти́ десны́м, осужде́ннаго, и кроме́шния тмы́, и вся́каго муче́ния Твоего́ непотре́бнаго раба́ исхити́, молю́ся: да благода́рно велича́ю бога́тство Твоея́ бла́гости, Богоро́дице Всенепоро́чная, и вопию́ Ти, ра́дуяся: моли́ Христа́ Бо́га согреше́ний оставле́ние дарова́ти, Тя́ бо и́мам наде́жду, ра́б Тво́й.

Пе́снь 4.

Ирмо́с: Любве́ ра́ди, Ще́дре, Твоего́ о́браза, на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Припев: Святии мученицы, молите Бога о нас.

Отложи́л еси́ с я́звами пло́ти твоея́ душе́вныя скве́рны, стре́лы сокруши́л еси́ лука́ваго зми́я ве́рою, Евстра́тие.

Припев: Святии мученицы, молите Бога о нас.

Просла́вися твои́ми ра́нами, страстоте́рпче, Ца́рь Сла́вы и неизрече́нныя тя́ сла́вы си́лою испо́лни чуде́с, Евстра́тие.

Сла́ва Отцу́ и Сы́ну и Свято́му Ду́ху:

Ры́барскому поревнова́в дерзнове́нию, му́ченическою мре́жею Влады́це приво́диши му́драго Евге́ния, улови́в, Евстра́тие.

И ны́не и при́сно и во ве́ки веко́в. Ами́нь.

Богоро́дичен: Всенепоро́чная и Еди́на Святе́йшая херуви́мов я́вльшися, ду́ши на́ша спаси́ от вся́каго обстоя́ния ве́рою пою́щих Тя́.

Пе́снь 5

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святии мученицы, молите Бога о нас.

Ты́, я́коже звезда́ светоно́сная, возсия́л еси́ в полце́ му́ченик далечесия́тельно, непобеди́мый Евстра́тие.

Припев: Святии мученицы, молите Бога о нас.

О, жре́бия блага́го! О, ча́сти богода́нныя! О, жены́ добре́йшия, сове́том победи́вшия ле́сть прама́тернюю.

Сла́ва Отцу́ и Сы́ну и Свято́му Ду́ху:

Ты́ вся́ кра́сная вмени́л еси́, я́ко уме́ты, Марда́рие, победи́в естества́ зако́ны любо́вию страда́ния.

И ны́не и при́сно и во ве́ки веко́в. Ами́нь.

Богоро́дичен: Ум зе́млен Твоего́ па́че ума́ зача́тия не мо́жет разуме́ти, Де́во Ма́ти, Отрокови́це: Бо́га бо родила́ еси́.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святии мученицы, молите Бога о нас.

Христо́с мне́ вме́сто все́х е́сть, — Марда́рий велегла́сно вопия́ше, — и оте́чество, и че́сть, и и́мя; от тебе́ бо сему́ научи́хся, Евстра́тие.

Припев: Святии мученицы, молите Бога о нас.

Язы́к отре́зан пе́сней непреста́ет, отсе́ченныя же твоя́ ру́ки к Бо́гу, Евге́ние, возвыша́хуся, спасе́ния прося́ще пою́щим па́мять твою́.

Сла́ва Отцу́ и Сы́ну и Свято́му Ду́ху:

Нога́м проверте́нным пове́шен бы́сть стремгла́в, разжже́нными же рожны́ пали́мь по плеще́м, ду́х Влады́це пре́дал еси́, Марда́рие.

И ны́не и при́сно и во ве́ки веко́в. Ами́нь.

Богоро́дичен: Кре́пость Тя́ обре́тши, Де́во, и тве́рдь, страстоте́рпица ра́ны до́блественне терпи́т и, ра́дующися, в сле́д Тебе́, все́х Влады́це, приво́дится.

Конда́к, гла́с 3. Подо́бен: Де́ва дне́сь.

Вити́йствуя пред беззако́ннующими боже́ственная, бие́ния претерпе́л еси́ му́жественнейшим се́рдцем, облиста́л еси́ богозна́меньми, пречу́дне, угаси́л еси́ возвы́шенный пре́лести пла́мень, сего́ ра́ди тя́ честву́ем, всеблаже́нне му́чениче Христо́в Евстра́тие.

Икос:

Свяще́нный соверша́ет Це́рковь дне́сь пра́здник та́инственно, све́тло пропове́дающи твоя́ до́блести, боле́зни и труды́, я́же па́че естества́ боже́ственная боре́ния, я́же всю́ду ра́ны, и́миже низложи́ многоко́зненнаго, сла́ва страда́льцев ве́лия и хвала́, му́жества сто́лп, свети́льник все́х тя́ чту́щих благоче́стно, врачева́ний сокро́вище, богати́телю ни́щих, первопобе́дниче честны́х му́чеников, всеблаже́нне му́чениче Христо́в Евстра́тие.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святии мученицы, молите Бога о нас.

Непрело́жно испове́дания мудрова́ние име́я в Тро́ице чествова́ти Еди́наго Бо́га, му́ки преоби́дел еси́, зовя́й: благослове́н еси́ в хра́ме сла́вы Твоея́, Го́споди.

Припев: Святии мученицы, молите Бога о нас.

Яко блаже́н в непоро́чном пути́ ходи́л еси́, коле́ни благоразу́мно преклони́л еси́ Изба́вителю, ду́шу же преда́в Влады́це в ру́ки, я́ко благово́ннейшу же́ртву, Авксе́нтие.

Сла́ва Отцу́ и Сы́ну и Свято́му Ду́ху:

Иже вра́ном Илии́ пи́щу подава́яй Бо́г, То́й и о честне́й твое́й главе́ чудотворя́, жела́ющим откры́, я́ко многожела́нное чрежде́ние ми́ру, Авксе́нтие.

И ны́не и при́сно и во ве́ки веко́в. Ами́нь.

Богоро́дичен: Де́во Ма́ти, я́ко Чи́сту Тя́ и нетле́нну Сло́во Чи́стое возлюби́ и, из Тебе́ вопло́щся, возсозда́ всего́ челове́ка, и́же Луки́ю просла́вивый чудесы́.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святии мученицы, молите Бога о нас.

Устна́ разве́рз чи́сто, Боже́ственный привле́кл еси́ Ду́х, Евстра́тие, и душетле́нных у́бо обличи́л еси́ служе́ний не́мощь, в Тро́ице же Бо́га чествова́ти взыва́л еси́: благослови́те, вся́ дела́ Госпо́дня, Го́спода.

Припев: Святии мученицы, молите Бога о нас.

Му́дрыми наказа́нии твои́ми укрепи́в смы́сл, му́чениче Евстра́тие, на одре́ желе́знем просте́рт бы́в, непобеди́мый Оре́ст вопия́ше разори́телем пла́мене, де́тем подо́бяся: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Просте́р те́ло терпели́вно, Оре́сте сла́вне, ты́ на одре́ разжже́ннем сопричта́лся еси́ у́бо му́чеников, в Го́споде ра́дуяся, воспочи́л же еси́ в ски́ниях небе́сных, вопия́: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Яви́лася еси́ превы́шши небе́с, Бо́га небе́снаго поро́ждши, онебеси́вшаго, Всечи́стая, земноро́дных все́ смеше́ние и Луки́и честны́я па́мять уясни́вшаго, Ему́же вопие́м всегда́: благослови́те, вся́ дела́ Госпо́дня, Го́спода.

Песнь 9

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святии мученицы, молите Бога о нас.

Боже́ственных причасти́тися та́ин возжеле́в, страстоте́рпче, и богоявле́ния светоза́рнаго сподо́битися, блаже́нне Евстра́тие, к зову́щему тя́ на небеса́, жела́емому прибли́жился еси́ Христу́.

Припев: Святии мученицы, молите Бога о нас.

Зело́ веселя́ся, страстоте́рпче, ра́достному осужде́нию мучи́тельскаго пребезу́мия, Подвигополо́жника твоего́ велича́л еси́, песносло́вя, Евстра́тие, сме́рти разори́теля Христа́.

Сла́ва Отцу́ и Сы́ну и Свято́му Ду́ху:

Прииди́те, мучениколю́бцы вси́, пре́лести потреби́теля свяще́нными Евге́ния пе́сньми, му́драго Оре́ста же и Марда́рия, и с ни́ми Авксе́нтия со Евстра́тием возвели́чим.

И ны́не и при́сно и во ве́ки веко́в. Ами́нь.

Богоро́дичен: Све́т на́м возсия́ из ложе́сн Неискусому́жных Твои́х, Де́во, Его́же светосия́нии боже́ственно озари́вшися, све́т же бы́сть чу́дная Луки́я, Богороди́тельнице Де́во Ма́ти.

Свети́лен. Подо́бен: Ду́хом во святи́лищи.

Соверши́л еси́ чу́дное страда́ния тече́ние, Евстра́тие блаже́нне, и приве́д ку́пно Евге́ния честна́го и му́драго Авксе́нтия, Марда́рия же со Оре́стом, и́хже ве́ре и де́рзости удиви́шася челове́честии и Ангельстии собо́ри.

Сла́ва, и ны́не, Богоро́дичен:

Несказа́ннаго Рождества́ Твоего́ была́ еси́, Пренепоро́чная Неве́ста, я́ко су́щи честне́йший хра́м, Богоро́дице: Ты́ бо Преве́чное, в Тя́ все́льшееся, родила́ еси́ Бо́га Сло́во. Те́м, пою́ще, Рождество́ Твое́ велича́ем, о Всенепоро́чная Отрокови́це.

Молитва

Святи́и му́ченицы Христовы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святых мученик Евстратия, Авксентия, Евгения, Мардария и Ореста и святыя мученицы Лукии девы