25 декабря

Канон святителю Спиридону чудотворцу, епископу Тримифунтскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Собо́ра Пе́рваго показа́лся еси́ побо́рник и чудотво́рец, богоно́се Спиридо́не, о́тче на́ш. Те́мже ме́ртву ты́ во гро́бе возгласи́в, и змию́ в зла́то претвори́л еси́, и внегда́ пе́ти тебе́ святы́я моли́твы, Ангелы, сослужа́щия тебе́, име́л еси́, свяще́ннейший. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Кано́н преподобнаго. Гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Святителю и чудотворче Спиридоне, моли Бога о нас.

Кро́тких зе́млю дости́г, о́тче, я́ко кро́ток, и ми́лостив, и чи́ст бы́в, настоя́щую се́рдца моего́ укроти́ бу́рю, я́ко да, в тишине́ боже́ственней бы́в, песносло́влю тя́.

Припев: Святителю и чудотворче Спиридоне, моли Бога о нас.

Де́лании боже́ственными ду́шу, о́тче, очи́стив, богови́ден, Спиридо́не, бы́л еси́ и Боже́ственнаго Ду́ха пресве́тлым обогати́лся еси́ осия́нием; те́м озаря́еши чи́сто блажа́щия тя́.

Сла́ва Отцу́ и Сы́ну и Свято́му Ду́ху:

От па́ствы, я́коже Дави́д, тя́ восприе́м, Соде́тель слове́сныя тя́ поста́ви па́ствы па́стыря всеизя́щнейша, простото́ю и кро́тостию сия́юща и беззло́бием, преподо́бне па́стырю, украша́ема.

И ны́не и при́сно и во ве́ки веко́в. Ами́нь.

Богоро́дичен: Пресвята́я Де́во Чи́стая, просвети́ и освяти́ помышле́ния и ду́шу мою́, молю́ся, о́блаки разоря́ющи неве́жества моего́ и тму́ отъе́млющи грехо́вную, я́ко да по до́лгу ублажа́ю Тя́.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Припев: Святителю и чудотворче Спиридоне, моли Бога о нас.

Ум тво́й безстра́стием просвети́в и боже́ственным смире́нием украси́вся, дарова́ния Ду́ха прия́л еси́ отгони́ти ду́хи и реши́ти неду́ги ве́рно чту́щих тя́, свяще́ннейше.

Припев: Святителю и чудотворче Спиридоне, моли Бога о нас.

Зми́я началозло́бнаго уби́в, нра́в сребролю́бный попра́в, ми́луя тре́бующаго, святи́телю, зми́я преложи́л еси́ в злату́ю у́тварь свяще́нными твои́ми моли́твами, о́тче преподо́бне.

Сла́ва Отцу́ и Сы́ну и Свято́му Ду́ху:

Возше́л еси́ на го́ру безстра́стия, вше́л еси́ во хра́м боговиде́ния, в скрижа́ли же се́рдца твоего́ прия́л еси́ зако́н спаси́тельный, я́ко свяще́ннейший и уго́дник при́сный Влады́ки Твоего́.

И ны́не и при́сно и во ве́ки веко́в. Ами́нь.

Богоро́дичен: Уврачи́ стру́пы души́ моея́, у́м мо́й, омраче́нный нераде́нием, Богоневе́сто, озари́, да пою́: не́сть непоро́чны, па́че Тебе́, Непоро́чная, и не́сть чи́сты, па́че Тебе́, Влады́чице.

Седа́лен, гла́с 8. Подо́бен: Прему́дрости.

От па́ствы ове́ц предста́тельствовати Христо́ве Це́ркви вручи́вся, па́стырь богопроизведе́н ты́, Спиридо́не, возсия́л еси́, злосла́вия во́лки отгна́л еси́ словесы́ твои́ми, на благоче́стия па́жити сию́ воспита́в. Те́мже посреде́ богоно́сных отце́в ве́ру утверди́л еси́ му́дростию Ду́ха, иера́рше блаже́нне, моли́ Христа́ Бо́га, прегреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, богоро́дичен.

Яко Всенепоро́чная Неве́сто Творцу́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Всепе́тая, беззако́ния мя́ су́ща скве́рное оби́телище и де́монов игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, светоно́сная, нетле́нная. Отжени́ о́блак страсте́й и Вы́шняго прича́стия сподо́би и све́та невече́рняго, моли́твами Твои́ми.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Припев: Святителю и чудотворче Спиридоне, моли Бога о нас.

Угльми Честна́го разже́гся Ду́ха, страсте́й удобопопаля́емую ве́щь, всеблаже́нне, поже́гл еси́, ми́р же огнесия́ньми доброде́телей твои́х, Спиридо́не, просвети́л еси́.

Припев: Святителю и чудотворче Спиридоне, моли Бога о нас.

Умертви́в твоя́ плотска́я движе́ния, богодохнове́нне, ме́ртвыя возста́вил еси́ животво́рным твои́м приглаго́ланием. Те́мже молю́ тя: умерщвле́нную ду́шу мою́, о́тче, оживи́.

Сла́ва Отцу́ и Сы́ну и Свято́му Ду́ху:

Повину́ющися, ме́ртвая тебе́ гла́с, о́тче, даде́ и ре́чная стремле́ния твои́ми удержа́шася повеле́нии: яви́лся еси́ бо, блаже́нне, чудоде́латель, Боже́ственную благода́ть прие́мь.

И ны́не и при́сно и во ве́ки веко́в. Ами́нь.

Богоро́дичен: Проро́цы Твоего́ та́инства глубину́ провозвести́ша недомы́сленную: еди́на бо родила́ еси́, Чи́стая, Недоразумева́емаго, воплоще́нна за милосе́рдие неисповеди́мое.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Святителю и чудотворче Спиридоне, моли Бога о нас.

Река́ су́щих в тебе́ дарова́ний вся́кое напоя́ет, преподо́бне, се́рдце, все́м да́рует бога́тно здра́вие, вся́ Бо́га к сла́ве возставля́ет, тебе́ просла́вльшаго и чудоде́йствы вся́кими почествова́вшаго.

Припев: Святителю и чудотворче Спиридоне, моли Бога о нас.

Тя́ ца́рь земны́й, блаже́нне, Царя́ Небе́снаго я́ве позна́ и́скренняго раба́ и дарова́ний Боже́ственных испо́лненнаго, внегда́ приити́ тебе́ к нему́ вели́каго врача́ к Бо́гу возвеща́я.

Сла́ва Отцу́ и Сы́ну и Свято́му Ду́ху:

Авраа́мову страннолю́бному нра́ву ты́ уподо́бився, все́м до́ма твоего́ вхо́ды отве́рзл еси́, и все́м вся́к бы́л еси́, и промышля́я су́щими во обстоя́нии, Спиридо́не блаже́нне.

И ны́не и при́сно и во ве́ки веко́в. Ами́нь.

Богоро́дичен: Но́ва на́м породила́ еси́ Младе́нца, пре́жде веко́в, Отрокови́це, рожде́нна от Отца́ Безнача́льна. Его́же умоли́, я́ко Сы́на и Бо́га Твоего́, уще́дрити Богоро́дицу Тя́, Пречи́стая, душе́ю чи́стою возвеща́ющия.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Святителю и чудотворче Спиридоне, моли Бога о нас.

Зла́то, я́ко ка́л, тебе́ вмени́ся, па́че зла́та безстра́стием сия́ющу и обогати́вшуся, преподо́бне, дарова́нии всезлаты́ми Ду́ха.

Припев: Святителю и чудотворче Спиридоне, моли Бога о нас.

Чи́сто служа́ Влады́це Твоему́, мно́жество име́л еси́, преподо́бне, послу́шающее Тебе́ Ангельских си́л, неви́димыми гла́сы, свяще́ннейше.

Сла́ва Отцу́ и Сы́ну и Свято́му Ду́ху:

Пресла́вное, всему́дре, житие́ твое́ ми́ру тя́ пресла́вна, о́тче, соде́ла. Те́мже боже́ственную па́мять твою́, ра́дующеся, соверша́ем, пою́щии Тя́.

И ны́не и при́сно и во ве́ки веко́в. Ами́нь.

Богоро́дичен: Небе́с ши́рши чре́во Твое́ бы́сть, Неискусому́жная, Бо́га вмести́вшее, нигде́же вмести́маго, Всесвята́я Де́во Богоневе́сто.

Конда́к, гла́с 2. Подо́бен: Вы́шних ища́.

Любо́вию Христо́вою уязви́вся свяще́ннейший, у́м впери́в заре́ю Ду́ха, де́тельным виде́нием твои́м дея́ние обре́л еси́, богоприя́тне, же́ртвенник Боже́ственный бы́в, прося́ все́м Боже́ственнаго сия́ния.

Икос:

Из чре́ва освяще́ннаго иера́рха Госпо́дня, восхва́лим ны́не Спиридо́на, благода́ти скрижа́ли прие́мшаго Боже́ственныя сла́вы, и в чудесе́х пресла́внаго все́й тва́ри, и я́ко те́пла и самови́дца Боже́ственнаго осия́ния, я́ко ни́щих предста́теля и согреша́ющих душево́дца: то́й бо Боже́ственна престо́лу Христо́ву же́ртва бы́сть, прося́ все́м Боже́ственнаго сия́ния.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Святителю и чудотворче Спиридоне, моли Бога о нас.

Моисе́ево незло́бие, Дави́дову кро́тость, Иова Авси́тидскаго непоро́чное стяжа́в, Ду́ха бы́л еси́ жили́ще, поя́, свяще́ннейше: Сы́й благослове́н и препросла́влен.

Припев: Святителю и чудотворче Спиридоне, моли Бога о нас.

Ороше́ния на главу́ твою́ во вре́мя жа́твы небеса́ иска́паша, бу́дущее прозна́меноваша: Бо́г бо, я́коже рече́, боже́ственную па́мять твою́, преподо́бне, просла́ви, ве́рныя освяща́я хода́тайством твои́м.

Сла́ва Отцу́ и Сы́ну и Свято́му Ду́ху:

В собо́ре отце́в тя́ Бо́г прославля́ет, на суде́ словеса́ твоя́ сохра́ньша, блаже́нне, я́же ве́рою прине́сл еси́, безслове́снейшаго Ария обуя́ющая я́ве и упраздня́ющая сего́ противле́ние.

И ны́не и при́сно и во ве́ки веко́в. Ами́нь.

Богоро́дичен: Гро́зд возрасти́ла еси́ неизрече́нным сло́вом, я́ко лоза́, Де́во, Еди́наго невозде́ланнаго, вино́ источа́юща, вся́ веселя́щее, вся́ освяща́юща земны́я и вся́ко пия́нство лю́тых отъе́млюща.

Пе́снь 8.

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Припев: Святителю и чудотворче Спиридоне, моли Бога о нас.

Пе́щь страсте́й боже́ственными одожде́ньми Боже́ственнаго Ду́ха погаси́л еси́ и ро́су источи́л еси́ неду́гов, о́тче, зно́й отъе́млющую ве́рно к тебе́ приходя́щих всегда́, блаже́нне Спиридо́не пребога́те.

Припев: Святителю и чудотворче Спиридоне, моли Бога о нас.

Беззло́бив, пра́в, кро́ток же, и ми́лостив, и незлопа́мятлив бы́л еси́, любо́вен, страннолю́бец, иера́рх свяще́ннейший, му́дростию укра́шен, преподо́бне, Правосла́вия. Те́мже тя́ ве́рою почита́ем.

Сла́ва Отцу́ и Сы́ну и Свято́му Ду́ху:

Дре́вле тебе́ гла́с, я́ко жива́, уме́ршая вопро́шшу ти́, о́тче, даде́. О, чудесе́ изря́дна! О, пресла́внаго та́инства! О, благода́ти, ю́же получи́л еси́, житие́м украша́емь Ангельским, досточу́дне!

И ны́не и при́сно и во ве́ки веко́в. Ами́нь.

Богоро́дичен: Стра́сти моего́ се́рдца исцели́ ми́лостию Твое́ю, Всепе́тая, у́м мо́й умири́, и ду́шу мою́ просвети́, и ходи́ти мя́ возблагопу́тстви на стези́ спаси́тельныя, я́ко да при́сно пою́ Тя, Всепе́тая.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Припев: Святителю и чудотворче Спиридоне, моли Бога о нас.

Безнача́льна Роди́теля Сы́на я́сно пропове́дал еси́, Единосу́щна Отцу́ и Соприсносу́щна, посреде́ богоно́сных отце́в возвели́чився, и беззако́ннующих загради́л еси́ уста́, святи́телю всеблаже́нне.

Припев: Святителю и чудотворче Спиридоне, моли Бога о нас.

Многосве́тлое со́лнце, отце́в украше́ние, иере́ев сла́ва, Ангелов совсе́льниче, твою́ светоно́сную па́мять ра́достно ны́не соверша́ющия, све́та сподо́би невече́рняго моли́твами твои́ми.

Сла́ва Отцу́ и Сы́ну и Свято́му Ду́ху:

Боже́ственная селе́ния, гра́д небе́сный, пра́зднующих кра́сный ли́к освяще́нную ду́шу твою́ и доброде́тельми укра́шенную, всеблаже́нне, прия́т во гла́се ра́дования.

И ны́не и при́сно и во ве́ки веко́в. Ами́нь.

Богоро́дичен: Ве́лие та́инство па́че ума́ Рождества́ Твоего́ удивля́ет Ангелы, Богора́дованная, наслажда́ет преподо́бных собо́р, свяще́нныя же весели́т отцы́, боже́ственно пою́щия тя́, наде́жду ду́ш на́ших.

Молитва святителю Спиридону Тримифунтскому, чудотворцу

О великий и пречудный святителю Христов и чудотворче Спиридоне, Керкирская похвало, всея вселенныя светильниче пресветлый, теплый к Богу молитвенниче и всем к тебе прибегающим и с верою молящимся скоропредстательный заступниче! Ты веру православную на Никейстем Соборе посреде отцев преславно изъяснил еси, триединство Святыя Троицы чудесною силою показал еси и еретиков до конца посрамил еси. Услыши нас, грешных, святителю Христов, молящихся тебе, и сильным твоим предстательством у Господа избави нас от всякаго злаго обстояния: от глада, потопа, огня и смертоносныя язвы. Ты бо во временней жизни своей от всех сих бедствий избавлял еси людей твоих: от нашествия агарян и от глада страну твою сохранил еси, царя от неисцельнаго недуга избавил и многия грешники к покаянию привел еси, мертвых преславно воскрешал еси, за святость же жития твоего Ангелы, невидимо в церкви поющия и сослужащия тебе, имел еси. Сице убо прослави тебе, вернаго Своего раба, Владыка Христос, яко вся тайная человеческая деяния дарова тебе разумети и обличати неправедно живущия. Многим, в скудости и недостаточестве живущим, ты усердно помогал еси, люди убогия изобильно во время глада напитал еси и ина многа знамения силою в тебе живущаго Духа Божия сотворил еси. Сице и нас не остави, святителю Христов, поминай нас, чад своих, у Престола Вседержителя и умоли Господа, да подаст многих наших грехов прощение, безбедное и мирное житие да дарует нам, кончины же живота непостыдныя и мирныя, и блаженства вечнаго в будущем веце сподобит нас, да выну возсылаем славу и благодарение Отцу и Сыну и Духу Святому, ныне и присно и во веки веков. Аминь.