25 декабря

Канон иной преподобному Герману, Аляскинскому чудотворцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Ло́зу Правосла́вия прине́сл еси́ в Аме́рику из Росси́и благочести́выя/ и, удобри́в ко́рень по́стническими труда́ми/ и напои́в оби́льне моли́твенными слеза́ми,/ плоды́ прине́сл еси́ – вино́гра́д возлю́бленный,/ Ге́рмане преблаже́нне о́тче наш./ Те́мже и Бог тя просла́ви, я́ко апо́стола преподо́бнаго,/ нетле́нием моще́й и благода́тию чудес,/ от них же почерпа́юще благодея́ния, восхваля́ем тя:/ сла́ва Да́вшему ти кре́пость,/ сла́ва Венча́вшему тя,/ сла́ва Дарова́вшему тя Аме́рице свети́ло Правосла́вия.

Тропа́рь, гла́с 3:

Преподо́бне о́тче наш Ге́рмане,/ пе́рвый свети́льниче, в земли́ на́шей просия́вый,/ прино́сим вси тебе́ похвалы́ сия́,/ ты же, я́ко име́яй дерзнове́ние ко Го́споду,/ бу́ди засту́пник нам, и уте́шитель,/ и Це́ркви на́шея покрови́тель ди́вный,/ да вси со умиле́нием зове́м ти:/ ра́дуйся, о́тче наш Ге́рмане, Аля́ски и всея́ Аме́рики пресла́вный чудотво́рче.

Кано́н иной, гла́с 4.

Пе́снь 1.

Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Припев: Преподобне отче Германе, моли Бога о нас.

Госпо́дь тя избра́, я́коже Моисе́я иногда́, в вождя́ ве́ры алеу́том,/ я́ко да, изве́д я из тьмы фараони́тския,/ введе́ши во свет спаси́тельный вопию́щих:/ Го́сподеви пои́м, сла́вно бо просла́вися.

Припев: Преподобне отче Германе, моли Бога о нас.

Еги́пет идолослуже́ния воспла́кася го́рце лише́нием наро́да избра́ннаго,/ и́же тобо́ю проидо́ша скво́зе мо́ре Креще́ния/ в зе́млю обетова́ния Христо́ва, вопию́ще:/ Го́сподеви пои́м, сла́вно бо просла́вися.

Сла́ва Отцу́ и Сы́ну и Свято́му Ду́ху:

Ра́довахуся А́нгели о спасе́нии чад твои́х духо́вных, Ге́рмане преподо́бне,/ я́коже Госпо́дь рече́,/ и́же и прия́т я в лоно Це́ркве Правосла́вныя, воспева́ющих:/ Го́сподеви пои́м, сла́вно бо просла́вися.

И ны́не и при́сно и во ве́ки веко́в. Ами́нь.

Богоро́дичен: Ма́ти Бо́жия Благослове́нная,/ сохраня́й ны, неопятне́нных в бе́лой оде́жди Креще́ния и покая́ния, воспева́ющих:/ Го́сподеви пои́м, сла́вно бо просла́вися.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Припев: Преподобне отче Германе, моли Бога о нас.

Алеу́тов просвети́в, спасл еси́ от неприя́зни врага́,/ ни бога́тством, ни си́лою приобрета́я их,/ но прему́дростию ду́ха, и по́двигом преподо́бия, и про́поведию благоче́стия,/ я́ко несть свят, я́коже Бог наш,/ и несть пра́веден, па́че Го́спода.

Припев: Преподобне отче Германе, моли Бога о нас.

Не му́дростию хвали́лся еси́,/ но му́дростию всех учил еси́ благоче́стию,/ люби́ти Христа́, и ве́ровати в него́, и греха́ боя́тися, глаго́ля:/ несть свят, я́коже Бог наш,/ и несть пра́веден, па́че Го́спода.

Сла́ва Отцу́ и Сы́ну и Свято́му Ду́ху:

А́ще и в труде́х и в страда́ниих по́двиг твой соверши́л еси́,/ но ра́дости испо́лнен был еси́,/ на сие́ бо еди́но то́кмо зря, я́ко Бо́жие де́ло твори́ши,/ и я́ко несть свят, я́коже Бог наш,/ и несть пра́веден, па́че Го́спода.

И ны́не и при́сно и во ве́ки веко́в. Ами́нь.

Богоро́дичен: Роди́вши без се́мене му́жняго от Тро́ицы Еди́наго, Богоро́дице Пречи́стая,/ дерзнове́ние и́маши бога́тно помога́ти всем в по́двизе и страда́нии пребыва́ющим и испове́дающим:/ несть свят, я́коже Бог наш,/ и несть пра́веден, па́че Го́спода.

Ин Конда́к, глас 8.

Валаа́ма постри́жник,/ честны́й возлю́бленник Бо́жией Ма́тери бы́вый,/ ревни́тель по́двигов дре́вних подви́жников но́вый,/ моли́тву, я́ко копие́ и щит, прие́мый,/ стра́шен демо́ном и тьме язы́честей ста́вый,/ Ге́рмане преподо́бне, моли́ Христа́ Бо́га спасти́ ду́ши на́ша.

Седа́лен, гла́с 4.

Вознесе́н быв Христо́м в зва́ние апо́стола/ и испо́лнив де́лом зва́ние сие́,/ ра́дость имел еси́ со дерзнове́нием рещи́ Го́споду:/ се аз и де́ти, я́же ми дал еси́ жребий мой!/ И, прие́м тя во оби́тели апо́столов,/ венце́м тя украси́ ми́лости Своея́,/ и тобо́ю да́рует благода́ть всем, творя́щим любо́вию честну́ю па́мять твою́.

Сла́ва, и ны́не, Богоро́дичен:

Вознесе́ну па́че всех чино́в а́нгельских, ве́мы Тя Хода́таицу пред Бо́гом о нас, Богоро́дице./ Те́мже, припа́дающе пред о́бразом Твои́м честны́м, мо́лим Тя:/ не отста́ви от нас ми́лости Твоея́,/ но всегда́ покрыва́й от вся́каго нахожде́ния вра́жия/ и путеводи́ ны ко приста́нищу небу́рному жи́зни благочести́выя и спасе́ния душа́м.

Пе́снь 4.

Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Припев: Преподобне отче Германе, моли Бога о нас.

О́вцы твоя́ из родо́в во́лчиих воспита́в,/ ста́ду Христо́ву сопричи́слил еси́ и, до́бро́му Па́стырю Христу́ я вручи́в,/ ми́рною душе́ю взыва́л еси́:/ сла́ва си́ле Твое́й, Го́споди.

Припев: Преподобне отче Германе, моли Бога о нас.

Спа́сову доброде́тель, покры́вшую Небеса́, пропове́дал еси́ во вся дни живота́ твоего́/ и хвалы́ его́ испо́лнил еси́ всю зе́млю Алеу́тскую,/ Помо́щнику Бо́гу взыва́я:/ сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Си́лою Бо́га твоего́ вся сотвори́в ди́вная и ужа́сная в животе́ твое́м, не возне́слся еси́ мы́слию,/ па́че же смиря́яся, взыва́л еси́ вы́ну:/ сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богоро́дичен: Иму́ще Тя, Ма́ти Бо́га на́шего,/ Хода́таицу за нас пред Судо́м Сы́на Твоего́ Боже́ственнаго,/ любве́ и наде́жды испо́лнены есмы́, взыва́ша:/ сла́ва си́ле Твоей, Го́споди.

Пе́снь 5

Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Припев: Преподобне отче Германе, моли Бога о нас.

И́менем Госпо́дним моля́ся непреста́нно,/ нищету́ в бога́тство вмени́л еси́/ и, ду́хом богате́я, я́коже Па́вел, глаго́лал еси́:/ ничто́же име́я, вся содержу́ души́ челове́ческия в Го́споде.

Припев: Преподобне отче Германе, моли Бога о нас.

И́же тя в алеу́ты посла́,/ Той тя и утеша́ше на всяк день поспе́шеством Свои́м,/ до́ндеже всех приобре́л еси́ Христу́ и ду́шу твою́ спасл еси́ в Го́споде.

Сла́ва Отцу́ и Сы́ну и Свято́му Ду́ху:

А́ще и еди́н изше́л еси́ на врага́ лука́ваго, я́коже Дави́д на Голиа́фа,/ но си́лою Креста́ низложи́л еси́ его́ паде́нием вели́ким/ и люде́й изба́вил еси́ в Го́споде.

И ны́не и при́сно и во ве́ки веко́в. Ами́нь.

Богоро́дичен: Мо́жеши спа́сати от обстоя́ний вра́жиих, Богоро́дице, и́хже хо́щеши,/ дана́ бо Ти есть благода́ть от Сы́на Твоего́,/ в ни́хже и нас помяни́, Чи́стая.

Пе́снь 6.

Ирмос: Жите́йское мо́ре,/ воздви́гаемое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Припев: Преподобне отче Германе, моли Бога о нас.

Еже люби́ти Бо́га непщева́л еси́ пе́рвое коему́ждо от христиа́н,/ и други́м пропове́дал еси́,/ и сам к сему́ все́ми си́лами подвиза́лся еси́.

Припев: Преподобне отче Германе, моли Бога о нас.

Руко́ю кре́пкою нача́в де́ло апо́стольства твоего́,/ до конца́ неотсту́пно соверши́л еси́ е,/ до́ндеже всех ко Христу́ приве́л еси́ и венца́ от Христа́ сподо́бился еси́.

Сла́ва Отцу́ и Сы́ну и Свято́му Ду́ху:

И́стину Христо́ву глубино́ю души́ восприи́м,/ раб был еси́ неключи́м Го́спода твоего́,/ вся бо повеле́нная испо́лнив, ме́ньша всех себе́ смире́нием непщева́л еси́.

И ны́не и при́сно и во ве́ки веко́в. Ами́нь.

Богоро́дичен: Ка́ко не диви́мся Бо́гомужному рождеству́ Твоему́, Пречи́стая?/ я́ко бо Ма́ти безму́жно низвела́ еси́ на зе́млю Спа́са на́шего Иису́са Христа́,/ в Не́мже спа́саемся и жи́знь насле́дствуем.

Конда́к, гла́с 8:

Взбра́нному Воево́де сво́инствовався,/ в брань вступи́л еси́ на ду́ха зло́бы в по́ле преподо́бия и апо́стольства./ И, пожа́в побе́ды обою́дныя,/ воздвиза́еши нас вопи́ти тебе́:/ ра́дуйся, свя́те Ге́рмане, апо́столе преподо́бный.

Икос:

Несть на́ша брань проти́ву кро́ви и пло́ти,/ но к духово́м зло́бы поднебе́сным, я́коже рече́ апо́стол./ Сего́ ра́ди обле́к на ся всеору́жие Бо́жие в Валаа́ме/ и, обу́вся до́бре в благове́ствование Правосла́вия,/ отше́л еси́ в Аме́рику, я́ко всеору́жник Бо́жий победи́тельный./ И по́двигом до́брым подвиза́вся, ве́ру Правосла́вную насади́в/ и тече́ние земна́го пути́ сконча́в, вене́ц сла́вы восприя́л еси́ от Бо́га по достоя́нию/ и нас воздвиза́еши вопи́ти тебе́:/ ра́дуйся, свя́те Ге́рмане, апо́столе преподо́бный.

Пе́снь 7.

Ирмос: Росода́тельну у́бо пещь/ содела́ А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Припев: Преподобне отче Германе, моли Бога о нас.

Из Росси́и изше́д благочести́выя и в Америку дости́г,/ соверши́л еси́ де́ло апо́стольства и преподо́бия,/ отту́ду же в ве́чное отше́д оте́чество, пое́ши Го́сподеви:/ благослове́н еси́, Бо́же оте́ц на́ших.

Припев: Преподобне отче Германе, моли Бога о нас.

Посто́м и моли́твою вла́гу стра́стную пло́ти изсуши́в,/ дух возвы́сил еси́ в ме́ру во́зраста Христо́ва,/ во е́же всем естество́м пе́ти возмо́жеши:/ благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Опасно проходя́ путь доброде́тели и не уклоня́яся ни одесну́ю, ни ошу́юю,/ люде́й твои́х води́л еси́ безпоро́чно к Бо́гу,/ и сам дости́гл еси́ Ца́рство, иде́же пое́ши:/ благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Христа́ Емману́ила Ма́ти Благослове́нная,/ предста́тельствы Твои́ми всели́ Дух Сы́на Твоего́ в сердца́ на́ша,/ я́ко да с на́ми Бо́га иму́ще, злых свободи́мся и пе́ти вы́ну возмо́жем:/ благослове́н еси́, Бо́же оте́ц на́ших.

Пе́снь 8.

Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́си́м во вся ве́ки.

Припев: Преподобне отче Германе, моли Бога о нас.

Вол, за любо́вь твою́ возлюби́в тя/ и не еди́наго дне не стерпе́в сме́ртнаго лише́ния твоего́,/ сам уби́ся в печа́ли свое́й по тебе́,/ я́ко тварь си́це воспева́я Го́сподеви.

Припев: Преподобне отче Германе, моли Бога о нас.

А́нгелы име́л еси́ смоли́твенники в та́йне убо́гия ке́ллии твоей,/ и́же и извести́ша тя о дни и ча́се преставле́ния твоего́/ и прия́ша тя последи́ в ли́ки святы́х воспева́ти во веки Го́сподеви.

Сла́ва Отцу́ и Сы́ну и Свято́му Ду́ху:

Люде́й твои́х возлюби́в па́че всего́ на земли́/ и вся бла́гая им соде́яв, Небе́сная пре́жде и земна́я,/ научи́л еси́ я до́брому благочести́ю,/ во е́же вку́пе с ни́ми зде и та́мо воспева́ти Го́сподеви.

И ны́не и при́сно и во ве́ки веко́в. Ами́нь.

Богоро́дичен: Утро́бу твою́ освяти́ Роди́выйся от Тебе́, Богома́ти,/ и ши́ршую Тя Небе́с сотвори́ благоутро́бием ма́терним,/ и́мже всех нас покрыва́вши от вся́ческих бед, Благода́тная.

Песнь 9

Ирмос: Бо́га/ челове́ком невозмо́жно ви́дети,/ на него́же не сме́ют чи́ни а́нгельсти́и взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ его́же велича́юще,/ с Небе́сными во́и Тя ублажа́ем.

Припев: Преподобне отче Германе, моли Бога о нас.

Призре́ на смире́ние твое́ Госпо́дь,/ его́же душа́ твоя́ велича́ше/ и о Не́мже дух твой ра́довашеся вся дни живота́ твоего́ на земли́,/ и вознесе́ тя в Ца́рствии Свое́м, я́ко еди́наго от избра́нных Свои́х.

Припев: Преподобне отче Германе, моли Бога о нас.

О́бщаго Влады́ку зри́ши ны́не лице́м к лицу./ Не забыва́й у́бо в моли́твах твои́х всех, почита́ющих па́мять твою́,/ но сохраня́й от лю́тых бед и поги́бели ве́чныя.

Сла́ва Отцу́ и Сы́ну и Свято́му Ду́ху:

Ю́ность твоя́ благочести́ва, му́жество твое́ пра́ведно,/ ста́рость твоя́ свя́та и во ве́ки жи́знь блаже́нна./ моли́ у́бо спасти́ся нам.

И ны́не и при́сно и во ве́ки веко́в. Ами́нь.

Богоро́дичен: Парфе́ну Де́ву Тя вси ублажа́ем,/ прама́тернюю кля́тву разруши́вшую Рождество́м Твои́м/ и Ада́мово изгна́ние испра́вившую./ Люде́й у́бо Твои́х сохраня́й змии́ных искуше́ний всемогущим предста́тельством Твои́м/ и введи́ ны в блаже́нство ра́я.

Свети́лен.

Свет Боже́ственный возсия́л еси́ алеу́том потемне́нным/ и претвори́л еси́ я из бе́лых волко́в Се́вера в овча́та кро́тка ста́да Христо́ва./ Не преста́й у́бо и ны́не моля́ся, Ге́рмане преподо́бне,/ о назда́нии в Аме́рице Правосла́вия.

Сла́ва, и ны́не, Богоро́дичен:

Све́та невече́рняго нас прича́стники сотвори́ла еси́, Богоро́дице, Боже́ственным Рождество́м Твои́м,/ Бо́га бо роди́вши Челове́ка,/ Кресто́м и сме́ртию и Воскресе́нием его́ победи́тели нас яви́ла еси́ тьмы кроме́шныя/ и насле́дники Ца́рствия Небе́снаго.

Молитва преподо́бному Ге́рману, Аля́скинскому чудотво́рцу.

О, преди́вный уго́дниче Бо́жий, преподо́бне о́тче наш Ге́рмане, ты по́двигом до́брым подвиза́лся еси́, хлад и ины́я тяготы́ в земли́ Алеу́тстей претерпе́л еси́.

Ны́не же испо́лнися сло́во Госпо́дне на тебе́, в ма́лем ве́рным Ему́ бы́вшем, те́мже и поста́ви тя Госпо́дь я́ко Небе́снаго покрови́теля Це́ркве Америка́нския. Мы же вси взыва́ем ти те́плою моли́твою: моли́ся за Це́рковь на́шу Святу́ю, да огради́т Ю́ Госпо́дь от темных сил вра́жиих, нас да сохрани́т в чистоте́ и благоче́стии, да утверди́т в ве́ре кре́пкой и несумне́нной. И испроси́ всем нам ду́ха ми́ра и любве́, ду́ха кро́тости и смире́ния, горды́ни отгна́ние, от самопревозноше́ния огражде́ние, боля́щим по́мощь и исцеле́ние, скорбя́щим утеше́ние, а́лчущим пра́вды духо́вныя пи́щу Небе́сную. Да, улучи́вше жела́емая, обря́щем пра́ведное воздая́ние в день Стра́шнаго Суда́ и со все́ми святы́ми воспое́м и просла́вим Живонача́льную Тро́ицу, Отца́ Непости́жимаго, И́стиннаго и Единоро́днаго Сы́на и Свята́го Уте́шителя Ду́ха, во ве́ки. Ами́нь.