25 декабря

Канон преподобному Герману, Аляскинскому чудотворцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пусты́ни се́верныя подви́жниче и о все́м ми́ре благода́тный моли́твенниче, правосла́вныя ве́ры обучи́телю и благоче́стия до́брый наста́вниче, Аля́ски украше́ние и всея́ Аме́рики ра́дование, преподо́бне Ге́рмане, моли́ Христа́ Бо́га, да спасе́т ду́ши на́ша.

Кано́н преподо́бнаго Ге́рмана, гла́с 3.

Пе́снь 1.

Ирмос: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре Изра́ильтеским лю́дем, Се́й Бо́г на́ш, препросла́влен е́сть, Тому́ Еди́ному пои́м, я́ко просла́вися.

Припев: Преподобне отче Германе, моли Бога о нас.

Воспе́ти помози́ ми́, Всеми́лостивый Спа́се, уго́дника Твоего́ Ге́рмана, просвеща́я помраче́нныя о́чи души́ моея́, да просла́вится се́й в концы́ вселе́нныя, сла́вный во святы́х Твои́х.

Припев: Преподобне отче Германе, моли Бога о нас.

Оте́чества небе́снаго, преподо́бне Ге́рмане, от ю́ности взыска́ти восхоте́в и Бо́гу Еди́ному порабо́тати, небе́сному покро́ву вда́лся еси́, засту́пники вы́ну име́я Се́ргия и Ге́рмана Валаа́мских.

Припев: Преподобне отче Германе, моли Бога о нас.

За́поведи Госпо́дни, преподо́бне, имы́й вы́ну в се́рдце свое́м, никогда́ же пу́том ле́ности вда́л еси́ те́ло твое́, при́сно тружда́яся и Боже́ственными озаре́нии просвеща́я ду́шу твою́.

Сла́ва Отцу́ и Сы́ну и Свято́му Ду́ху:

Любо́вь к Бо́гу име́яй превы́ше всего́, Тому́ все́ житие́ свое́ пре́дал еси́, бесе́ду с вы́шними ли́ки наипа́че возлю́бль; оба́че и я́же к бра́тии любве́ не чужда́лся еси́, преподо́бне, ку́пно моля́ся и вопия́ с ни́ми: Иису́се Сладча́йший, спаси́ на́с гре́шных.

И ны́не и при́сно и во ве́ки веко́в. Ами́нь.

Богоро́дичен: Юнаго Ге́рмана, Богоро́дице, от сме́ртнаго неду́га исцели́ла еси́, того́ горя́чему моле́нию вне́мля: те́мже и на́с не пре́зри, к Тебе́ припа́дающих и в моли́тву к Тебе́ того́ призыва́ющих.

Пе́снь 3.

Ирмос: Иже от не су́щих вся́ приведы́й, Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

Припев: Преподобне отче Германе, моли Бога о нас.

Богому́дрый Наза́рий на Валаа́м из Саро́ва прише́д, к вну́треннему де́ланию любо́вь водвори́, те́мже и ты́, преподо́бне, приобщи́вся сея́ благода́ти, духо́вными озаре́нии угото́вал еси́ ду́шу твою́ на по́двиг благове́стия.

Припев: Преподобне отче Германе, моли Бога о нас.

Иже виногра́да Христо́ва ро́ждие плодоно́снии су́ще, Се́ргие и Ге́рмане Валаа́мстии, гроздьми́ доброде́телей но́ваго Ге́рмана напита́вшии, вино́м Боже́ственнаго весе́лия испо́лните и на́ша сердца́.

Сла́ва Отцу́ и Сы́ну и Свято́му Ду́ху:

Моли́твою и дея́нием угото́вал еси́ ду́шу твою́ на вся́кое послуша́ние, те́мже и страны́ да́льния дости́гл еси́, ку́пно с бра́тиею благове́стническою приводя́ жи́тели Аля́ски ко Иису́су Сладча́йшему.

И ны́не и при́сно и во ве́ки веко́в. Ами́нь.

Богоро́дичен: Блага́го Царя́ Блага́я Ма́ти, благодея́ния на рабы́ Твоя́ при́сно излива́ющая, на вся́кое благо́е де́ло наста́ви на́с, от вся́ких де́йств злы́х огражда́ющи.

Седа́лен, гла́с 3. Подо́бен: Красоте́ де́вства.

Приспе́ дне́сь па́мять твоя́, о́тче Ге́рмане прехва́льне, веселя́щи избра́нное твое́ ста́до: просвеща́й на́с чуде́с твои́х светлостьми́, от честны́х твои́х моще́й исходя́щих, погаша́й пла́мень страсте́й на́ших и ороша́й ве́рных ра́зумы, любо́вию при́сно тя́ сла́вящих.

Сла́ва, и ны́не, Богоро́дичен:

Ра́дуйся, Благода́тная Де́во, я́ко избра́нника Твоего́ но́ваго на́м явля́еши, в се́верной пусты́ни прозя́бшаго и небе́сными да́ры новопросвеще́нный кра́й облагоуха́вшаго, те́м Тя́ Влады́чицу ми́ра благода́рными пе́сньми почти́м.

Пе́снь 4.

Ирмос: Положи́л еси́ к на́м тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м, благодаря́ще: сла́ва си́ле Твое́й, Го́споди.

Припев: Преподобне отче Германе, моли Бога о нас.

Образ до́браго па́стыря и чадолюби́ваго отца́ яви́л еси́ на́м, преподо́бне, я́ко убо́гим, немощны́м и боля́щим бы́л еси́ по́мощь и исцеле́ние, сирота́м же кро́в и науче́ние; те́мже и на́с я́ко си́рых не лиши́ своего́ моли́твенного покро́ва.

Припев: Преподобне отче Германе, моли Бога о нас.

Ге́рмане преподо́бне, дивля́хуся лю́дие, ка́ко мо́жеши в лесу́ еди́н жи́ти? Не еди́н а́з, ре́кл еси́, но со мно́ю Бо́г, Иже везде́ сы́й, и Ангели Его́ святи́и, те́мже ка́ко возмо́жно уныва́ти, таковы́я собесе́дники име́я? Ны́не же небе́сных сожи́телю, на́с су́щих на земли́ не оста́ви.

Сла́ва Отцу́ и Сы́ну и Свято́му Ду́ху:

Аля́ски храни́телю, но́вых наро́дов слугу́ и пе́стуна себе́ именова́вый, и по сме́рти свое́ попече́ние о си́х простира́еши. Се́ ны́не и мы́ твои́ми словесы́ взыва́ем ти́: бу́ди на́м оте́ц и покрови́тель, отри́ сле́зы беззащи́тных сиро́т, прохлади́ сердца́, жа́ром печа́ли та́ющая, да́ждь разуме́ти, что́ е́сть отра́да Госпо́дня.

И ны́не и при́сно и во ве́ки веко́в. Ами́нь.

Богоро́дичен: Прииди́те воспои́м Пречи́стую Де́ву, Свои́м смире́нием е́же Евы преле́стное испра́вившую, и но́ваго Ада́ма на́м я́вльшую, да но́вое усыновле́ние восприи́мше, насле́дницы бу́дем ве́чныя жи́зни.

Пе́снь 5

Ирмос: К Тебе́ у́тренюю, все́х Творцу́, преиму́щему вся́к у́м ми́рови, зане́ све́т повеле́ния Твоя́, в ни́хже наста́ви мя́.

Припев: Преподобне отче Германе, моли Бога о нас.

Ада́му первозда́нному уподо́бился еси́, егда́ мно́гими скорбьми́, бде́нии и моли́твами очи́стившу ти́ ду́шу твою́ и в красоту́ пе́рвую обле́кшу, лесни́и зве́ри повинова́хуся тебе́, е́же ра́йское и ца́рское в тебе́ обоня́в.

Припев: Преподобне отче Германе, моли Бога о нас.

Чу́вственныя стра́сти бразда́ми воздержа́ния и моли́твою непреста́нною препобежда́я, на высоту́ безстра́стия дости́гл еси́, сего́ ра́ди припа́даем ти́, я́ко к благода́тному врачу́: уврачу́й на́ша стра́сти и подви́гни на дела́ блага́я.

Припев: Преподобне отче Германе, моли Бога о нас.

Еди́ному Бо́гу та́йно порабо́тати хотя́, в пеще́ре посели́лся еси́, е́же стра́стное пло́ти тща́ся погребсти́, да душе́ю воскре́снеши, небе́сными озаре́нии осиява́емь, ве́чныя Па́схи предвкуша́я сла́дость.

Сла́ва Отцу́ и Сы́ну и Свято́му Ду́ху:

В ра́й мы́сленный доброде́телей вше́л еси́, иде́же произрасти́л еси́ многоразли́чныя цве́ты доброде́лания, и́миже в ми́ре благоуха́еши, о́тче Ге́рмане, да́же и до ны́не.

И ны́не и при́сно и во ве́ки веко́в. Ами́нь.

Богоро́дичен: Святы́х Ангелов ли́цы пою́т благоле́пие Твое́, а́з же гре́шный, Пренепоро́чная, молю́ Тя́: отжени́ от мене́ неле́пая бесо́вская мечта́ния, в тишине́ соблюда́ющи се́рдце мое́.

Пе́снь 6.

Ирмос: Бе́здна после́дняя грехо́в обы́де мя́, и исчеза́ет ду́х мо́й; но простры́й, Влады́ко, высо́кую Твою́ мы́шцу, я́ко Петра́ мя́, Упра́вителю, спаси́.

Припев: Преподобне отче Германе, моли Бога о нас.

Ева́нгельскаго ра́ди благовествова́ния да́же до коне́ц вселе́нныя преше́л еси́ и ме́сто но́вое, о́стров Ело́вый, но́вый Валаа́м наре́кл еси́, к оте́чественному Валаа́му любо́вь показу́я, в не́м же но́выя бра́тия, лю́ди новопросвеще́нныя, стяжа́л еси́ сло́вом пропове́дания и де́лы благоче́стия.

Припев: Преподобне отче Германе, моли Бога о нас.

Госпо́дь просла́ви собра́тий твои́х, преподо́бне, я́ко вои́стину апо́стольским подвиго́м уподо́бишася дея́ния и́х: в ли́це му́ченичестем пое́т Иувена́лий, в чи́не святи́тельстем, Иоаса́ф и Инноке́нтий и и́ны с ни́ми, и мы́ ку́пно к Бо́гу воспое́м: сла́ва Тебе́, показа́вшему на́м све́т.

Припев: Преподобне отче Германе, моли Бога о нас.

Освяще́ние и венча́ние прие́млют труды́ твои́ и твои́х соблагове́стников, преподо́бне, испове́данием и му́ченическими кровьми́ алеу́та Петра́, его́же кре́пкой ве́ре и терпе́нию подиви́лся еси́; те́мже тебе́ после́дующе, воззове́м: святы́й новому́чениче Пе́тре, моли́ Бо́га о на́с.

Сла́ва Отцу́ и Сы́ну и Свято́му Ду́ху:

Истинныя ве́ры оправда́ние яви́л еси́ житие́м твои́м, преподо́бне, те́мже и науче́ние сло́ва твоего́, я́ко сотво́ршаго, де́йством проявля́шеся, жа́ждущая сердца́ влеча́ ко исправле́нию, тебе́ зову́щу: сла́ва судьба́м святы́м Ми́лостиваго Бо́га.

И ны́не и при́сно и во ве́ки веко́в. Ами́нь.

Богоро́дичен: Гряди́те лю́дие, да ви́дим, я́ко во́ды бу́рныя, иму́щия о́стров поглоти́ти, кро́ткому Ге́рману повину́ются: пред ико́ною Бо́жия Ма́тери смиря́ются и в бе́здну океа́на па́ки возвраща́ются; мы́ же волна́ми жите́йскими обурева́еми, со избра́нником Бо́жия Ма́тери возопии́м: Пресвята́я Богоро́дице, спаси́ на́с.

Конда́к, гла́с 8:

Валаа́ма постри́женниче и Бо́жией Ма́тери возлю́бленне, подвиго́м дре́вних пусты́нников но́вый ревни́телю, моли́тву прие́м, я́ко копие́ и щи́т, стра́шен де́моном и тьме́ язы́честей яви́лся еси́, сего́ ра́ди вопие́м ти́: преподо́бне Ге́рмане, моли́ Христа́ Бо́га спасти́ся душа́м на́шим.

Икос:

От ро́да на́шего бы́в и от ю́ности ко Го́споду прибе́г, Ге́рману Валаа́мскому и́менем и по́двигом подо́бный, растя́ше в ме́ру дре́вних отце́в, в терпе́нии плодоприне́сших; и посла́ся кро́ткий се́й ко алеу́тским лю́дем, еще́ не просвеще́нным: же́стоко бе́ его́ жи́тельство между́ язы́ка препро́ста, же́стоко же па́че и от соплеме́нник до́брым увеща́нием противле́ние; оба́че и те́х и си́х ми́луя, пе́стоваше кро́тость Ге́рманова; за вся́ та́я сла́вяще па́мять твою́, Ге́рмане преподо́бне, взыва́ем ти́: моли́ Христа́ Бо́га, спасти́ся душа́м на́шим.

Пе́снь 7.

Ирмос: Якоже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́, благослове́н еси́, взыва́ющия, Бо́же оте́ц на́ших.

Припев: Преподобне отче Германе, моли Бога о нас.

Естества́ чи́н пременя́ется, Ду́ху Боже́ственному де́йствующу: Его́же озаре́нии, преподо́бне, просвети́в душе́вныя о́чи твои́, зре́л еси́ да́льняя, я́ко бли́з су́щая, и бу́дущая, я́ко настоя́щая, судьбы́ Боже́ственныя пове́дая к назида́нию и исправле́нию.

Припев: Преподобне отче Германе, моли Бога о нас.

Ревну́я о небе́сных на небеси́ сокро́вища своя́ полага́л еси́, те́мже и́щущии земны́х сокро́вищ ничто́же обрето́ша в ке́ллии твое́й; и на́с ны́не, о́тче безсре́бренниче, научи́ небе́сная сокро́виществовати и се́рдце свое́ к еди́ному безце́нному прилага́ти.

Сла́ва Отцу́ и Сы́ну и Свято́му Ду́ху:

Мно́ги ско́рби пра́веднику, и от все́х и́х избавля́ше тя́ Госпо́дь, небе́сною ра́достию наполня́я се́рдце твое́, ея́же ны́не наслажда́ешися в невече́рнем дни́ Ца́рствия Христо́ва. И о на́с моли́ся, преподо́бне, да на́ша ско́рби Госпо́дь в ра́дость претвори́т.

И ны́не и при́сно и во ве́ки веко́в. Ами́нь.

Богоро́дичен: Ангелов Ра́дование и мона́шескаго чи́на Наста́вницу и всего́ ро́да христиа́нскаго Покрови́тельницу, прииди́те вси́ почти́м и поклони́мся, я́ко Цари́це небесе́ и земли́ и земноро́дных к Бо́гу непреста́нной Предста́тельнице.

Пе́снь 8.

Ирмос: Нестерпи́мому огню́ соедини́вшеся, богоче́стия предстоя́ще, ю́ноши, пла́менем же неврежде́ни, Боже́ственную пе́снь поя́ху: благослови́те, вся́ дела́ Госпо́дня Го́спода, и превозноси́те во вся́ ве́ки.

Припев: Преподобне отче Германе, моли Бога о нас.

Не́мощь твоя́, ста́рость и слепота́ очи́ма, ничто́же можа́ше возбрани́ти ти́ хода́тайствующу за лю́ди пред вла́сть иму́щими, и́хже моли́л еси́ ми́лость твори́ти па́че же́ртвы, да са́ми у Го́спода обря́щут ю́; ны́не же сы́й на небеси́, та́кожде и на́с не лиши́ своего́ хода́тайства.

Припев: Преподобне отче Германе, моли Бога о нас.

Ангельским пе́нием оглаша́шеся лесна́я ке́ллия твоя́, тебе́ еди́ному пою́щу, я́ко лю́дем диви́тися зело́; та́же служа́ше ти́ Ангел, благослове́нием Иорда́новым освяти́в во́ды, я́ко зва́ти ти́: благослови́те вся́ дела́ Госпо́дня Го́спода и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

В ри́зу спасе́ния и в оде́жду весе́лия обо́лкся, сотка́нную от мно́гих трудо́в и скорбе́й, вше́л еси́ в небе́сный черто́г Царя́ Христа́, иде́же ку́пно с ли́ки апо́столов и преподо́бных пи́ра ра́дости ве́чно наслажда́ешися.

И ны́не и при́сно и во ве́ки веко́в. Ами́нь.

Богоро́дичен: Огня́ нестерпи́маго подо́бием греси́ на́ши сожига́ют души́ блага́я начина́ния, сего́ ра́ди припа́даем Ти́, я́ко к Влады́чице небесе́ и земли́: ороси́ на́ша сердца́, да произрасте́т вся́кое де́ло благо́е.

Песнь 9

Ирмос: Но́вое чу́до и боголе́пное, деви́ческую бо две́рь затворе́нную я́ве прохо́дит Госпо́дь, на́г во вхо́де, и плотоно́сец яви́ся во исхо́де Бо́г, и пребыва́ет две́рь затворе́на; Сию́ неизрече́нно, я́ко Богома́терь велича́ем.

Припев: Преподобне отче Германе, моли Бога о нас.

Сла́ва Тебе́ Бо́же, яви́вшему на́м ди́внаго уго́дника Твоего́, его́же моли́твами сохрани́ на́с от вся́каго наве́та вра́жия и душетле́нных страсте́й, вся́кому же бла́гу наста́ви, да ве́чнаго муче́ния избе́гше, дости́гнем Ца́рствия Твоего́.

Припев: Преподобне отче Германе, моли Бога о нас.

Приспе́ ве́чер живота́ твоего́, преподо́бне: кни́га твои́х дея́ний апо́стольских заверши́ся в невече́рнем осия́нии лица́ твоего́, зна́менуя сла́ву твою́ в оби́телех небе́сных; и́хже и на́м помози́ дости́гнути твои́м предста́тельством.

Припев: Преподобне отче Германе, моли Бога о нас.

Огненный сто́лп ви́ден бы́сть, зна́менуя отше́ствие преподо́бнаго от земли́ на не́бо, я́ко зело́ диви́тися лю́дем; сего́ ра́ди к нему́ воззове́м: бу́ди на́м при́сно о́гненный сто́лп, светя́й и указу́яй пу́ть в го́рняя.

Сла́ва Отцу́ и Сы́ну и Свято́му Ду́ху:

Истинному ученику́ Твоему́, Го́споди, недосто́йными усты́ вознесо́хом хвалы́, сла́вяще Тя́, ди́внаго во святы́х Твои́х, его́же моли́твенным предста́тельством сохрани́ страну́ сию́ и гра́ды ея́ от бе́д и губи́тельства, подая́ на́м ве́лию ми́лость.

И ны́не и при́сно и во ве́ки веко́в. Ами́нь.

Богоро́дичен: Мари́е, Бо́жие жили́ще и чистоты́ наста́внице, мене́ ста́вша жили́ще грехо́вных скве́рн и нечистоты́ и впа́дша в се́ти нечи́стых духо́в, Твои́м заступле́нием чи́ста покажи́ и па́ки жили́ще Бо́гу сотвори́, да Тя́ благоче́стно велича́ю.

Свети́лен. Подо́бен: Жены́, услы́шите.

Светода́вче Го́споди, моли́твами на́шего свети́льника благоче́стия, преподо́бнаго Ге́рмана, просвети́ невече́рним све́том Твои́м страну́ сию́ и на́с, ве́рою Тебе́ служа́щих и благоче́стно пра́зднующих светоно́сную па́мять его́.

Сла́ва, и ны́не, Богоро́дичен:

Богоневе́сто, свеще́ та́инственная, де́йством Ду́ха Боже́ственнаго, Предве́чный Све́т ми́ру яви́вшая, и на́м, су́щим во тьме́ неразу́мия, возсия́й све́т и́стины и спаси́ все́х благоче́стно Тя́, я́ко Ма́терь Бо́жию, велича́ющих.

МОЛИТВА преподо́бному Ге́рману, Аля́скинскому чудотво́рцу.

По́стнически пожи́вый на земли́, ра́достне же преше́дый к жи́тельству на небеси́, преподо́бне о́тче Ге́рмане, ты́ пресе́льник в стране́ да́льней бо́др и послушли́в показа́лся еси́: в се́рдце бо свое́м име́я ди́вный Валаа́м и оте́чество твое́ — зе́млю Ру́сскую; ве́ру Правосла́вную ты́ со апо́стольскою ре́вностию распространи́л еси́ и я́ко нача́тки трудо́в твои́х, алеу́тския и аля́скинския лю́ди, любо́вию в се́рдце свое́м нете́сно вмести́л еси́, пе́стуя и́х и науче́нием Ева́нгельским снабдева́я. Услы́ши ны́не моля́щияся в стране́ прише́льствия твоего́, слы́ши и стена́ния из страны́ оте́чествия твоего́, приими́ моля́щияся ти́ на вся́ком ме́сте влады́чествия Бо́жия! Хода́тайствуй на́м ско́рое умягче́ние ожесточе́нных ду́ш на́ших, испроси́ на́м разуме́ние: что́ е́сть во́ля Бо́жия? И а́ще ничто́же бла́го сотвори́хом пред Бо́гом, да поло́жим нача́ло благо́е. Якоже и ты́, кро́ткий пропове́дниче, ре́кл еси́, да поне́ от сего́ дне́ и часа́ потщи́мся возлюби́ти Бо́га превы́ше всего́. Бо́г бо на́ш вои́стину любы́ е́сть, Ему́же и сла́ва во ве́ки подоба́ет, Отцу́, и Сы́ну, и Свято́му Ду́ху, ны́не и при́сно и во ве́ки веко́в. Ами́нь.