24 декабря

Канон святых Праотец

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь пра́отцев. Гла́с 2:

Ве́рою пра́отцы оправда́л еси́, от язы́к те́ми предобручи́вый Це́рковь: хва́лятся в сла́ве святи́и, я́ко от се́мене и́х е́сть Пло́д благосла́вен — без се́мене Ро́ждшая Тя́. Те́х моли́твами, Христе́ Бо́же, поми́луй на́с.

Кано́н святы́х пра́отцев. Глас 1.

Пе́снь 1.

Ирмос: Христо́с ражда́ется — сла́вите! Христо́с с небе́с — сря́щите! Христо́с на земли́ — возноси́теся! По́йте Го́сподеви, вся́ земля́, и весе́лием воспо́йте, лю́дие, я́ко просла́вися.

Припев: Святии праотцы, моли Бога о нас.

Отце́м пе́ние принесе́м, пре́жде зако́на и в зако́не возсия́вшим, и из Де́вы возсия́вшему Го́споду и Влады́це во́лею пра́вою угоди́вшим, и незаходи́маго просвеще́ния ны́не наслажда́ющимся.

Припев: Святии праотцы, моли Бога о нас.

Ада́ма пе́рваго почти́м, руко́ю почте́ннаго Зижди́теля, и все́х на́с пра́отца уже́ бы́вшаго, и в ски́ниях небе́сных со все́ми избра́нными почива́юща.

Сла́ва Отцу́ и Сы́ну и Свято́му Ду́ху:

Авеля, да́ры прине́сшаго душе́ю благоро́днейшею, прия́т все́х Бо́г и Госпо́дь; сего́ же па́ки, скверноуби́йственною руко́ю умерщвле́на, принесе́ к све́ту я́ко боже́ственна му́ченика.

И ны́не и при́сно и во ве́ки веко́в. Ами́нь.

Богоро́дичен: Рече́ний боже́ственных услы́шим, вопию́щих Христо́во явле́ние: се́ бо в верте́пе ражда́ется из Отрокови́цы Неискусому́жныя, Его́же стра́шное Рождество́ провозвеща́ет звездосло́вцем звезда́ я́вльшаяся.

Пе́снь 3.

Ирмос: Пре́жде ве́к от Отца́ рожде́нному нетле́нно Сы́ну и в после́дняя от Де́вы воплоще́нному безсе́менно, Христу́ Бо́гу возопии́м: вознесы́й ро́г на́ш, Свя́т еси́, Го́споди.

Припев: Святии праотцы, моли Бога о нас.

Пое́тся в ми́ре Си́фово к Зижди́телю разжже́ние, и́бо в непоро́чнем жи́тельстве и душе́вней любви́ Тому́ и́стинно угоди́, и ны́не во стране́ живы́х вопие́т: Свя́т еси́, Го́споди.

Припев: Святии праотцы, моли Бога о нас.

Усты́, и язы́ком, и се́рдцем Ено́с чу́дный призва́ти богому́дрено Влады́ку все́х и Бо́га наде́яшеся в Ду́се и, благоуго́дно пожи́в на земли́, сла́ву восприя́т.

Сла́ва Отцу́ и Сы́ну и Свято́му Ду́ху:

Священносло́вии свяще́нными Ено́ха ублажи́м, благоугоди́в бо Го́споду, преста́вися в сла́ве, яви́вся лу́чши сме́рти, я́коже писа́ся, и́мже Бо́жий бы́в ра́б и́скреннейший.

И ны́не и при́сно и во ве́ки веко́в. Ами́нь.

Богоро́дичен: Ны́не ча́яние язы́ков от Де́вы предгряде́т, и Вифлее́м заключе́нный отверза́ет све́тло Еде́ма, Сло́во воплоща́емое прие́мля, и в я́слех пло́тию возле́гшаго.

Ипакои́, гла́с 2:

В ро́су де́тем о́гнь прелага́шеся, пла́чь в ра́дость жена́м пременя́шеся: Ангел бо во обои́х служа́ше чудесе́х, о́вым у́бо во упокое́ние претвори́вый пе́щь, си́м же воскресе́ние возвести́вый тридне́вное. Нача́льниче жи́зни на́шея, Го́споди, сла́ва Тебе́.

Пе́снь 4.

Ирмос: Же́зл из ко́рене Иессе́ева и цве́т от него́, Христе́, от Де́вы прозя́бл еси́, из горы́, Хва́льный, приосене́нныя ча́щи прише́л еси́, вопло́щся от Неискусому́жныя, Невеще́ственный и Бо́же, сла́ва си́ле Твое́й, Го́споди.

Припев: Святии праотцы, моли Бога о нас.

Хвалу́ принесе́м Бо́гу, чту́ще пе́сньми Но́я, вои́стинну су́ща пра́веднаго: во все́х бо за́поведех Боже́ственных украша́емь яви́ся, Христу́ благоугоди́в, Ему́же песнопое́м, ве́рнии: сла́ва си́ле Твое́й, Го́споди.

Припев: Святии праотцы, моли Бога о нас.

Ви́дев твое́ Бо́г благоро́дное нра́ва, и просто́е, и по всему́, Но́е, соверше́на, втора́го ми́ра я́ве началовождя́ тя показу́ет, спа́сшаго тому́ вся́каго ро́да от пото́па чу́вственнаго се́мя, я́коже Са́м повеле́.

Припев: Святии праотцы, моли Бога о нас.

Но́я, сохра́ньшаго Бо́жий зако́н невреди́мь, и обре́тшася тогда́ пра́ведна в ро́де свое́м, и дре́вяным спа́сша дре́вле ковче́гом безслове́сных ро́ды повеле́нием Вседе́тельным, пе́сньми благоче́стно ублажи́м.

Сла́ва Отцу́ и Сы́ну и Свято́му Ду́ху:

Вино́ умиле́ния на́м то́чит, чту́щим тя́, Но́е блаже́нне, па́мять твоя́, веселя́щее и ду́ши, и сердца́ всегда́ чи́сте блажа́щих нра́вы твоя́ честны́я и жи́тельство боже́ственное.

И ны́не и при́сно и во ве́ки веко́в. Ами́нь.

Богоро́дичен: Ны́не Избавле́ние на́ше в я́слех возлега́ет и пелена́ми повива́ется, я́коже Младе́нец. И волсви́, восто́чнии ца́рие, прихо́дят Сего́ я́ко Бо́га и Царя́ ро́ждшагося от Чи́стыя, ви́дети и поклони́тися с да́ры ве́рно.

Пе́снь 5

Ирмос: Бо́г Сы́й ми́ра, Оте́ц щедро́т, вели́каго Сове́та Твоего́ Ангела, ми́р подава́юща, посла́л еси́ на́м; те́м, богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче.

Припев: Святии праотцы, моли Бога о нас.

Хвала́ми боже́ственными да почти́тся Си́м, оте́ческое благослове́ние приплоди́в, и, пред Бо́гом благоуго́ден я́влься, к пра́отеческим лико́м причте́ся, и во стране́ живы́х ра́достно почива́ет.

Припев: Святии праотцы, моли Бога о нас.

Ви́дети сподо́бися я́ко дру́г Бо́жий Авраа́м де́нь Зижди́теля своего́ и испо́лнь быва́ет ра́дости духо́вныя; сего́ у́бо, ума́ пра́востию чту́ще, ублажи́м вси́, я́ко Христо́ва боже́ственна пра́отца.

Сла́ва Отцу́ и Сы́ну и Свято́му Ду́ху:

Ви́дел еси́, я́коже е́сть мо́щно челове́ку ви́дети, Тро́ицу и Ту́ю угости́л еси́, я́ко дру́г при́сный, преблаже́нне Авраа́ме; те́мже мзду́ прия́л еси́ стра́ннаго гоще́ния, е́же бы́ти тебе́ безчи́сленных язы́ков отцу́ ве́рою.

И ны́не и при́сно и во ве́ки веко́в. Ами́нь.

Богоро́дичен: По́лный истощава́ется пло́тию на́с ра́ди, и нача́ло Безнача́льный прие́млет; обнищева́ет же Бога́тый, и Сло́во — Сы́й Бо́г — в я́слех безслове́сных возлежи́т, я́ко Младе́нец, воззва́ние все́х су́щих от ве́ка соде́ловая.

Пе́снь 6.

Ирмос: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ истле́ния, Ро́ждшую сохрани́ неврежде́нну.

Припев: Святии праотцы, моли Бога о нас.

Образ Христо́вы стра́сти бы́л еси́ я́ве, Исаа́че преблаже́нне, возводи́мь о́тчим благопокоре́нием, е́же закала́тися. Сего́ ра́ди ублажи́лся еси́ и ра́б Бо́жий вои́стинну яви́лся еси́ бли́жний, со все́ми пра́ведными вселя́яся.

Припев: Святии праотцы, моли Бога о нас.

Яви́ся Иа́ков уго́дник, ве́рнейший все́х Бо́га; те́мже и бра́ся со Ангелом, у́м зря́ Бо́га нарече́ся и, спя́, Боже́ственную ле́ствицу ви́де, на не́йже Бо́г утвержда́шеся, пло́тию обложи́выйся за благосты́ню.

Сла́ва Отцу́ и Сы́ну и Свято́му Ду́ху:

Любя́ Ио́сиф ко отцу́ благопокоре́ние, в ро́в вве́ржен, продаде́ся во о́браз закла́ннаго и в ро́ве положе́ннаго Христа́; пшеницода́вец же Еги́пта бы́сть, целому́др бы́в и пра́веден, ца́рь же страсте́й и́стиннейший.

И ны́не и при́сно и во ве́ки веко́в. Ами́нь.

Богоро́дичен: Мла́до на земли́ Отроча́ познава́ется, Сы́й со Отце́м при́сно и Ду́хом, пелена́ми же повива́ется, Иже зе́млю повива́яй мгло́ю я́ве, и в я́слех безслове́сных возлежи́т. Сего́ ны́не предпра́зднуим, ра́дующеся, безсе́менное рождество́.

Конда́к, гла́с 6:

Рукопи́саннаго о́браза не поче́тше, но Неопи́санным существо́м защити́вшеся, треблаже́ннии, в по́двизе огня́ просла́вистеся, среде́ же пла́мене нестерпи́маго стоя́ще, Бо́га призва́сте: ускори́, о Ще́дрый, и потщи́ся, я́ко Ми́лостив, в по́мощь на́шу, я́ко мо́жеши хотя́й.

Икос:

Простри́ Твою́ ру́ку, е́юже дре́вле прия́ша искуше́ние еги́птяне борю́щии и евре́е бори́мии. Не оста́ви на́с, да не пожре́т на́с сме́рть, жа́ждущая на́с, и сатана́, ненави́дяй на́с, но прибли́жися на́м и пощади́ ду́ши на́ша, я́коже пощади́л еси́ иногда́ о́троки Твоя́, су́щия в Вавило́не, непреста́нно сла́вящия Тя́, и вве́рженныя Тебе́ ра́ди в пе́щь, и от сея́ вопию́щия Ти́: ускори́, Ще́дрый, и потщи́ся, я́ко Ми́лостив, на по́мощь на́шу, я́ко мо́жеши хотя́й.

Пе́снь 7.

Ирмос: Отроцы, благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но, посреди́ пла́мене стоя́ще, поя́ху: отце́в Бо́же, благослове́н еси́.

Припев: Святии праотцы, моли Бога о нас.

Да воспое́тся Ана́ния, Аза́рия, Мисаи́л с Дании́лом, пе́щь угаси́вше о́гненную, и льво́в обузда́вше стремле́ния, и Христу́ согла́сно пою́ще: отце́в Бо́же, благослове́н еси́.

Припев: Святии праотцы, моли Бога о нас.

Зако́нно пострада́в в напа́стех и неосла́бных ско́рбех, уго́дник нарече́ся Иов Бо́жий всеи́стиннейший, кро́ток, незло́бив, пра́в, соверше́н, непоро́чен, вопия́: отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Ве́рою Моисе́я, Ааро́на же и Ора почти́м, восхваля́юще Иису́са и Леви́ю свяще́ннейшаго, Гедео́на же и Сампсо́на, и взыва́ем: отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Се́, я́коже прорече́ проро́к, во чре́ве зача́ Неискусобра́чная Бо́га и роди́ти я́ве и́дет в верте́пе Вифлее́мле. Ему́же вси́ пое́м: отце́в Бо́же, благослове́н еси́.

Пе́снь 8.

Ирмос: Чу́да преесте́ственнаго росода́тельная изобрази́ пе́щь о́браз: не бо́, я́же прия́т, пали́т ю́ныя, я́ко ниже́ о́гнь Божества́ — Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки.

Припев: Святии праотцы, моли Бога о нас.

Дне́сь су́щих от ве́ка боже́ственную па́мять соверша́ем честны́х оте́ц, Ада́ма, Авеля же, Си́фа, и Но́я, и Ено́са, и Ено́ха, и Авраа́ма, Мелхиседе́ка и Иова, Исаа́ка и ве́рнаго Иа́кова, да благослови́т тва́рь, вопию́ще, Го́спода и превозно́сит во вся́ ве́ки.

Припев: Святии праотцы, моли Бога о нас.

По́лк богокра́сный боже́ственных оте́ц да восхва́лим, Вара́ка, и Нафа́на, и Елеаза́ра, Иоси́ю и Дави́да, Иеффа́я, Саму́ила же, пре́дняя зря́ща че́стне и взыва́юща: да благослови́т тва́рь вся́ Го́спода и превозно́сит Его́ во ве́ки.

Припев: Святии праотцы, моли Бога о нас.

Похвалу́ песнопе́сненно да принесе́м Бо́жиим проро́ком, восхваля́юще Иоси́ю и Михе́я, Софо́ния и Авваку́ма, Заха́рию и Ио́ну, Агге́я же и Амо́са и со Авди́ем Малахи́я и Нау́ма, Иса́ию, и Иереми́ю, и Иезеки́иля, ку́пно Дании́ла, Илию́ и Елиссе́я.

Сла́ва Отцу́ и Сы́ну и Свято́му Ду́ху:

Глаго́лы Тро́ическими Всесвяту́ю воспои́м, ве́рнии, Тро́ицу, Отца́ Безнача́льнаго, Сы́на же и Пра́ваго Ду́ха Свята́го — Еди́ницу Триипоста́сную, Юже вся́кое дыха́ние сла́вит, зову́ще: да благослови́т тва́рь вся́ Го́спода и превозно́сит во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Яви́лся еси́ от де́вственных, Христе́, крове́й, воплоща́емь неизрече́нным сло́вом и я́ко Младе́нец соверше́н в верте́пе премно́жеством благоутро́бия, Иису́се, ражда́яся; звезда́ же Тя́ издале́ча возвести́ звездосло́вцем, по́йте, ве́рою зову́щим, и превозноси́те Христа́ во ве́ки.

Песнь 9

Ирмос: Та́инство стра́нное ви́жу и пресла́вное: не́бо — верте́п; престо́л херуви́мский — Де́ву; я́сли — вмести́лище, в ни́хже возлеже́ Невмести́мый — Христо́с Бо́г, Его́же, воспева́юще, велича́ем.

Припев: Святии праотцы, моли Бога о нас.

Кре́постию Твое́ю дре́вле си́лы сотвори́ша дще́ри, Го́споди, Анна, и Иуди́ф, и Дево́ра, Олда́, Иаи́ль же, Есфи́рь, Са́рра, Мариа́м же Моисе́ева, Рахи́ль, и Реве́кка, и Ру́фь, велему́дрыя.

Припев: Святии праотцы, моли Бога о нас.

Яко угаси́вшия о́троки святы́я пе́щь свяще́нно почти́м ку́пно с Дании́лом проро́ком и все́ми пра́ведными я́ве, пре́жде зако́на облиста́вшими до́бре и в зако́не Влады́це угоди́вшими.

Припев: Святии праотцы, моли Бога о нас.

Прему́дрии боже́ственнии проро́цы бы́вше Авраа́мовы вну́цы, Еже от Авраа́ма и Иу́ды ро́ждшееся Сло́во Бо́жие провозвести́ша Ду́хом, те́х мольба́ми, Иису́се, вся́ уще́дри.

Сла́ва Отцу́ и Сы́ну и Свято́му Ду́ху:

Освяти́ся вся́ тва́рь па́мятию ва́шею и, торжеству́ющи, зове́т, ра́бски вопию́щи: мольбу́ Го́споду при́сно принеси́те, блаже́ннии, улучи́ти ве́чных бла́г благохва́лящим ва́с.

И ны́не и при́сно и во ве́ки веко́в. Ами́нь.

Богоро́дичен: Облеки́йся в мя́, от Де́вы предгряде́т, и в верте́пе ражда́ется Сло́во Отчее несли́тно: лику́й, тва́рь, гла́сы благода́рственными велича́ющи Того́ е́же за милосе́рдие всесвято́е снизше́ствие.

Свети́лен пра́отцев. Подо́бен: Жены́, услы́шите.

Ада́ма восхва́лим, Авеля, Си́фа и Ено́са, Ено́ха и Но́я, Авраа́ма, Исаа́ка и Иа́кова, Моисе́я, Иова и Ааро́на, Елеаза́ра и Иису́са, Вара́ка, Сампсо́на и Иеффа́я, Дави́да и Соломо́на.

Молитва

К вам, о святи́и праотцы, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.