21 декабря

Канон преподобному Патапию Фивскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

В тебе́, о́тче, изве́стно спасе́ся е́же по о́бразу: прии́м бо кре́ст, после́довал еси́ Христу́ и, де́я, учи́л еси́ презира́ти у́бо пло́ть, прехо́дит бо, прилежа́ти же о души́, ве́щи безсме́ртней. Те́мже и со Ангелы сра́дуется, преподо́бне Пата́пие, ду́х тво́й.

Кано́н преподо́бнаго, гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Преподобне отче Патапие, моли Бога о нас.

Све́тлаго твоего́ жития́ све́тлая хотя́щу исправле́ния похвали́ти, молю́ся тебе́, преподо́бне, лучу́ богатода́тну с небесе́ ми дарова́ти Го́споду помоли́ся, о́блак отгоня́щу неве́дения моего́, Пата́пие.

Припев: Преподобне отче Патапие, моли Бога о нас.

Еги́птяны пе́рвее глубино́ю покры́вый Боже́ственным манове́нием, я́ко из глубины́ мирска́го смеше́ния тя́ восприи́м, просвети́ Боже́ственными осия́нии и всесве́тлу тя́ показа́ звезду́, о́тче преподо́бне.

Сла́ва Отцу́ и Сы́ну и Свято́му Ду́ху:

Разже́гся, я́ко у́гль мы́сленный, теплото́ю Ду́ха, мра́з де́монский ты́ растопи́л еси́, разжже́нныя же стре́лы грехо́вныя угаси́л еси́, преподо́бне, и к безстра́стия высоте́ возве́лся еси́ чисте́йш.

И ны́не и при́сно и во ве́ки веко́в. Ами́нь.

Богоро́дичен: Дре́вния избавле́ние кля́твы ми́ру подава́я, Изба́витель из Тебе́, Де́во, ражда́ется, Челове́к бы́в, и́же преподо́бнаго Пата́пия показа́ исто́чник исцеле́ний все́м, ве́рою к нему́ прири́щущим.

Пе́снь 3.

Ирмос: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Припев: Преподобне отче Патапие, моли Бога о нас.

Сле́з тече́ньми напои́в изря́дно душе́вную твою́ бразду́, пшени́цу боже́ственную прине́сл еси́ дея́ний, в жи́тницах вы́шних соблюда́ему.

Припев: Преподобне отче Патапие, моли Бога о нас.

Любо́вию вооружа́емь, я́коже мече́м, преподо́бне, и щито́м покрыва́емь, боже́ственным твои́м смире́нием де́монов полки́ потреби́л еси́.

Сла́ва Отцу́ и Сы́ну и Свято́му Ду́ху:

Воздержа́ния цве́том, я́коже кри́н, процве́л еси́, благово́нствуя, преподо́бне, сердца́ воспева́ющих тя́ и соверша́ющих ве́рою па́мять твою́.

И ны́не и при́сно и во ве́ки веко́в. Ами́нь.

Богоро́дичен: На объя́тиях носи́мь ро́ждшия Тя́, Го́споди, еги́петския и́долы си́лою Твое́ю сокруши́л еси́, из него́же мно́жество преподо́бных прозябе́.

Седа́лен, гла́с 8. Подо́бен: Прему́дрости.

Воздержа́ния по́ты по́стническими угаси́л еси́ пла́мень страсте́й, все́м источи́в чуде́с пучи́ну, и в не́й, я́коже вторы́й Моисе́й, потопи́л еси́ ле́стная стремле́ния де́монов полки́. Те́мже, соше́дшеся, по до́лгу почита́ем всечестну́ю па́мять твою́ моле́бную, преподо́бне богоно́се Пата́пие: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не, Богоро́дичен:

Ми́лостиваго Сло́ва и милосе́рдаго я́ко ро́ждшая, Влады́чице все́х, поми́луй вся́, к Тебе́ прибега́ющия, и напа́стей, и боле́зней, и вся́каго озлобле́ния, и ве́чнующаго пла́мене свободи́, я́ко да благода́рственно мно́гих щедро́т Твои́х бога́тство просла́вим и безме́рную ми́лость, и вопие́м Ти́ всегда́: моли́ Христа́ Бо́га грехо́в оставле́ние пода́ти покланя́ющимся ве́рою Рождеству́ Твоему́.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Припев: Преподобне отче Патапие, моли Бога о нас.

Бе́здна те́плых твои́х сле́з потопи́ де́монская во́инства и грехо́вныя во́лны, пучи́на же чуде́с су́щим во глубине́ страсте́й показа́ся.

Припев: Преподобне отче Патапие, моли Бога о нас.

Смире́ние, бде́ние, и спротяже́нную моли́тву, и любо́вь нелицеме́рну, и ве́ру, и наде́жду стяжа́в, бы́л еси́ собесе́дник небе́сным Ангелом, о́тче преподо́бне.

Сла́ва Отцу́ и Сы́ну и Свято́му Ду́ху:

Успи́л еси́ страсте́й многообра́зных волне́ния боже́ственными восхожде́нии и непреста́нными очище́нии. Те́мже к невече́рнему сия́нию по успе́нии отше́л еси́.

И ны́не и при́сно и во ве́ки веко́в. Ами́нь.

Богоро́дичен: Возсия́л еси́ из Де́вы, я́ко из о́блака со́лнце, зве́зды озаря́ющия показа́в преподо́бныя Твоя́, ми́ру и страсте́м распе́ншихся, Ще́дре, си́лою Твое́ю.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Преподобне отче Патапие, моли Бога о нас.

Просвеще́ние во тме́ лежа́щих, возсия́й ми́ зарю́ боже́ственными преподо́бнаго Твоего́ моли́твами, разори́ о́блаки окая́нныя души́ моея́, одожди́ ми струю́ оставле́ния: ино́го бо, ра́зве Тебе́, Бо́га не ве́м.

Припев: Преподобне отче Патапие, моли Бога о нас.

Скве́рны страсте́й очи́стив о́ко мы́сленное, о́тче богоно́се, воздержа́нием, боже́ственною же моли́твою ты́ отве́рзл еси́ зе́ницы ослепле́нныя и разори́л еси́ сия́нием исцеле́ний лю́тых омраче́ние.

Сла́ва Отцу́ и Сы́ну и Свято́му Ду́ху:

Здра́вие душе́вное, здра́вие теле́сное, вси́ незави́стную благода́ть, прииди́те, почерпе́м, я́ко от исто́чника, боже́ственныя ра́ки му́драго Пата́пия: чудеса́ бо источа́ет, я́ко во́ды, ве́рою несомне́нною к нему́ притека́ющим.

И ны́не и при́сно и во ве́ки веко́в. Ами́нь.

Богоро́дичен: Да́теля жи́зни, вся́ческих содержа́щего, родила́ еси́ неизрече́нным Рождество́м, во святы́х сла́вимаго, Отрокови́це, и на преподо́бных почива́ющаго, Его́же о на́с моли́, Богоневе́сто.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Преподобне отче Патапие, моли Бога о нас.

Светле́йшими у́м просвеща́яй, о́тче, восхожд́нии, я́коже безпло́тен, с пло́тию пожи́л еси́, не умокри́вся грехми́, Пата́пие.

Припев: Преподобне отче Патапие, моли Бога о нас.

Илию́ Фесви́тянина подража́я и после́дуя Иоа́нну Предте́чи, в пусты́ню пе́рвее всели́лся еси́, безмо́лвием у́м очи́стив.

Сла́ва Отцу́ и Сы́ну и Свято́му Ду́ху:

Из Еги́пта свети́льник богоза́рнейший, в Константи́нове гра́де сия́нием исцеле́ний просвеща́емь, облиста́л еси́, светле́йший о́тче Пата́пие.

И ны́не и при́сно и во ве́ки веко́в. Ами́нь.

Богоро́дичен: На о́блаце ле́гце седя́й, дре́вле во Еги́пет Христо́с прии́де и, низложи́в и́долы, и преподо́бных ли́ки собра́.

Конда́к, гла́с 3. Подо́бен: Де́ва дне́сь.

Хра́м тво́й, свя́те, духо́вное врачевство́ лю́дие обре́тше, со тща́нием к нему́ приходя́ще, цельбу́ неду́гов про́сят прия́ти, реше́ние же в житии́ прегреше́нных: ты́ бо все́х су́щих в ну́ждах предста́тель яви́лся еси́, Пата́пие преподо́бне.

Пе́снь 7.

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Преподобне отче Патапие, моли Бога о нас.

Огне́м мы́сленным разже́гл еси́ душе́вная чу́вствия, о́гнь грехо́вный испепели́л еси́ соде́йством Ду́ха и светови́ден яви́лся еси́, воспева́я, Пата́пие: благослове́н еси́, Бо́же оте́ц на́ших.

Припев: Преподобне отче Патапие, моли Бога о нас.

Слепы́я воочи́вый соде́йством Боже́ственным, богоблаже́нне, стра́сти разли́чныя исцели́л еси́ и боже́ственными призыва́нии полки́ лука́выя де́монов отгна́л еси́, воспева́я: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Чуде́с глубина́, врачева́ний река́, исто́чник непреста́нен, струя́, ника́коже оскуде́ема, тво́й гро́б показа́ся, о́тче, ве́рно приступа́ющим и те́пле взыва́ющим: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Обожа́ет мя́ из Тебе́, Де́во, пребоже́ственный Бо́г, ра́бий зра́к прие́м, обновля́ет же стези́ зна́ния, я́коже преде́лы естества́, мно́жество мона́хов и преподо́бных приве́д, пою́щих: благослове́н еси́, Бо́же оте́ц на́ших.

Пе́снь 8.

Ирмос: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся́ ве́ки.

Припев: Преподобне отче Патапие, моли Бога о нас.

Очи́стив тя́ сама́го от ти́ны страсте́й попече́нием, светле́йше яви́лся еси́, о́тче, прия́телище Бо́жие, взыва́я: по́йте Го́спода и превозноси́те во вся́ ве́ки.

Припев: Преподобне отче Патапие, моли Бога о нас.

Устро́ив твою́ жи́знь боголе́пно, преподо́бне о́тче, строи́тель показа́лся еси́, служи́в до́бре потре́бам святы́х, преподо́бне, с ни́миже сподо́бился еси́ Вы́шняго насле́дия.

Сла́ва Отцу́ и Сы́ну и Свято́му Ду́ху:

Ко Го́споду моли́твами очи́сти ны́ от вся́кия скве́рны, те́плою твое́ю моли́твою от треволне́ния страсте́й, и боле́зней, и скорбе́й изба́ви тя́ досто́йно, Пата́пие, чту́щия.

И ны́не и при́сно и во ве́ки веко́в. Ами́нь.

Богоро́дичен: Яже онебеси́вшая на́ше земно́е и тле́нное, Чи́стая, существо́, Ангелов сла́ва и преподо́бных ра́дость, еди́на тва́рей Влады́чица, я́ко Бо́га ро́ждшая, да пое́тся во ве́ки.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Припев: Преподобне отче Патапие, моли Бога о нас.

Де́нь спаси́тельный — па́мять твоя́ возсия́, су́щая во тме́ сердца́ просвеща́ющий и страсте́й мглу́ реша́щий, сы́ны све́та показу́яй, о́тче, ны́не чту́щия тя́, Госпо́дня уго́дника.

Припев: Преподобне отче Патапие, моли Бога о нас.

Фиве́анов прозябе́ние, пусты́ни хвале́ние, мона́шествующих сла́ву и благоле́пие, византи́йскаго свети́льника, на земли́ Ангела я́вльшася, Пата́пия вси́ досто́йно ублажи́м.

Сла́ва Отцу́ и Сы́ну и Свято́му Ду́ху:

Ангелов собесе́дник, преподо́бных равностоя́тель, проро́ков и апо́столов, му́чеников, иера́рхов, преподо́бне, соприча́стник бы́в, и Честне́й Тро́ице служа́ ума́ чистото́ю, о все́х на́с моли́ся.

И ны́не и при́сно и во ве́ки веко́в. Ами́нь.

Богоро́дичен: Вели́кое та́инство, е́же па́че ума́, рождества́ Твоего́, ужаса́ет Ангелы, Богора́дованная, услажда́ет преподо́бных собо́ры, Чи́стая, свяще́нныя весели́т отцы́, боже́ственно пою́щия Тя́, Богоро́дице Неискусобра́чная.

Молитва

О свяще́нная главо́, преподо́бне о́тче, преблаже́нне а́вво Патапие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.