20 декабря

Канон преподобной Филофее Терновской

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

От ма́терних пеле́н Бо́га возлюби́вши, / в Боже́ственных Писа́ниих при́сно поуча́вшися, / посто́м, слеза́ми, моле́ньми и воздыха́нии непреста́нными, / хра́м Бо́жий яви́лася еси́, Филофе́е достохва́льная, / те́мже и па́мять твою́ любо́вию пра́зднующим, / освяще́ния и цельбы́ неску́дно да́рующи, / сохраня́й гра́д тво́й / и вся́ лю́ди, ве́рно чту́щия тя́, / от вся́ких бе́д и напа́стей.

Кано́н, гла́с 5:

Пе́снь 1.

Ирмо́с: Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Припев: Преподобная матти Филофея, моли Бога о нас.

Ро́ждие честно́е лозы́ святы́я, Иоа́нна и Ири́ны прозябе́ние благосла́вное, Филофе́е, от пеле́н Бо́га возлюби́вшая, те́м и сердца́ роди́телей твои́х возвесели́вшая. Сердца́ на́ша, мо́лимся ти́, моли́твами твои́ми предочи́сти, да све́тло воспое́м па́мять твою́ светоно́сную.

Припев: Преподобная матти Филофея, моли Бога о нас.

Ангелом от младе́нчества поревнова́вши, по́стнически равноа́нгельное житие́ твое́ начала́ еси́, не хотя́щи ма́терняго млека́ вкуше́ния отню́д: благода́тию бо Боже́ственною, а́ки млеко́м небе́сным, воспита́лася еси́, боголю́бие вои́стину явля́я ангелонра́вное.

Припев: Преподобная матти Филофея, моли Бога о нас.

Деви́ческую чистоту́ изде́тска возлюби́вши, плотска́го жи́тельства возненави́дела еси́, Филофе́е де́во, и я́ко и́мене своего́ вои́стину досто́йна, боголю́бием супру́жника твоего́ Константи́на в Ангельское привела́ еси́ житие́, нетле́нием веселя́щи де́вственныя чи́ны Ангельския.

Сла́ва Отцу́ и Сы́ну и Свято́му Ду́ху:

Удруче́нием пло́ти положи́ла еси́ нача́ло подвиго́в твои́х, бде́нными же стоя́ньми, коленопреклоне́нии, воздыха́ньми и сле́зными струя́ми фарао́на мы́сленнаго удави́вши, среду́ боголюбе́знаго жития́ дости́гла еси́, его́же, я́ко Ангел во пло́ти, пречу́дная, сконча́ла еси́, мно́гими чудотворе́нии и богозаре́нными, прему́драя, наставле́нии.

И ны́не и при́сно и во ве́ки веко́в. Ами́нь.

Богоро́дичен: Исправле́ние да́руй рабо́м Твои́м, Пречи́стая Де́во, неисче́тныя не́мощи челове́ческия до́бре ве́дущи, и моли́твою твое́ю неду́ги на́ша неисце́льныя, я́ко Блага́я, изврачу́й.

Пе́снь 3.

Ирмо́с: Водрузи́вый на ничесо́мже зе́млю повеле́нием Твои́м, и пове́сивши неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Припев: Преподобная матти Филофея, моли Бога о нас.

Сла́сти неприча́стна яви́лася еси́, доброде́во Филофе́е, боголюбе́зную добро́ту души́ от истле́ния грехо́внаго му́дре соблюда́ющи, те́мже и́стинную сла́дость в небе́снем Ца́рствии обре́тши, непреста́нно моли́ся изба́витися го́рьких му́к сласте́м поработи́вшимся.

Припев: Преподобная матти Филофея, моли Бога о нас.

Якоже се́рна от ловя́щих сете́й изба́вльшися, о́стровным отше́ствием пре́лести ловле́ний избе́гла еси́, прему́драя Филофе́е, и та́мо Ангельски пожи́вши, не лиши́лася еси́ лу́г небе́снаго Ца́рствия ту́чныя травы́, ве́чныя у Христа́ Безсме́ртнаго жи́зни.

Сла́ва Отцу́ и Сы́ну и Свято́му Ду́ху:

Бла́то смра́дное страсте́й слеза́ми исся́че вся́чески твои́ми, и са́д прекра́сен доброде́телей душа́ твоя́ яви́ся, благопобе́дная боголю́бице, иде́же пти́цы небе́сныя гнезда́ своя́ сотво́рше, хвале́ньми Боже́ственными ду́шу ти́ на вся́к ча́с веселя́ху.

И ны́не и при́сно и во ве́ки веко́в. Ами́нь.

Богоро́дичен: Обновле́ние жития́ пода́ждь на́м, Преблагослове́нная Богоро́дице, я́ко на вся́к ча́с согреша́ем и лука́вых помышле́ний ника́коже отступа́ем. Изба́ви ны́, Многоми́лостивая, от порабоще́ния страсте́м, да чи́стым се́рдцем восхва́лим Ма́тернее Твое́ милосе́рдие.

Седа́лен, гла́с 5:

Исто́чник сле́з, сокро́вище моли́тв непреста́нных, е́зеро воздыха́ний глубо́кое и бде́ний сто́лп житие́м была́ еси́ достоди́вным, Филофе́е, несравне́нно Бо́га возлюби́вши. Те́мже и почте́на бы́вши от Него́, яви́лася еси́ исто́чник исцеле́ний, сокро́вище умиле́ния, е́зеро духо́вных утеше́ний и ве́ры и́стинныя сто́лп.

Сла́ва:

Зла́то очище́нное — души́ твоея́ к Бо́гу любы́, и мѵ́ро сладкоуха́нное — и́мене твоего́ призыва́ние, засту́пнице земли́ Бо́лгарския, яви́стася, Филофе́е ма́ти, те́мже ра́дуйся, доброде́во, все́м призыва́ющим тя́ ско́рая по́моще.

И ны́не, богоро́дичен, гла́с то́йже:

Ра́дости, Обра́дованная, сподо́бившися, Филофе́я вопие́т Ти́, Со́лнцу от Тебе́ возсия́вшему предстоя́щи: ра́дуйся, Живота́ Ма́ти; ра́дуйся, Присноде́во, ра́досте все́м чи́стым се́рдцем.

Пе́снь 4.

Ирмо́с: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Припев: Преподобная матти Филофея, моли Бога о нас.

Го́рним умо́м ни́жних похоте́ний попра́ла еси́, досточу́дная, Наго́рныя про́поведи блаже́нств вся́чески и́щущи и пои́стине получа́ющи, я́ко ве́рна. Помози́ и на́м, неве́рным, возлюби́ти Христа́ Бо́га на́шего и в се́й ча́с жития́ боголюби́ваго нача́ло тве́рдое поста́вити.

Припев: Преподобная матти Филофея, моли Бога о нас.

Острым житие́м твои́м вся́ стре́лы лука́ваго притупи́ла еси́, сокруши́вши вы́ю льстивому́дреннаго велиа́ра, и обостри́вши сугу́бо у́м сво́й бде́нно, мра́ком Боже́ственнаго ве́дения, све́т ми́ру яви́лася еси́.

Припев: Преподобная матти Филофея, моли Бога о нас.

Ладие́ю смире́ннаго жития́, треволне́ния душегу́бных страсте́й преплы́вши неботе́чне, приста́нище дости́гла еси́ многоти́хое нетле́ния, доброде́во благосе́рдая, отону́дуже ти́хими заря́ми пу́ть спасе́ния ве́рным показу́еши.

Сла́ва Отцу́ и Сы́ну и Свято́му Ду́ху:

Юность твою́ всерачи́тельне Бо́гу твоему́ освяти́ла еси́, ту́чныя па́жити греха́ оста́вивши, и по́стнически Фаво́рския све́тлости возлюби́вши, пусты́нная го́рлице, отону́дуже и от ка́мения воздержа́ния ме́д и млеко́ доброде́телей сса́ла еси́.

И ны́не и при́сно и во ве́ки веко́в. Ами́нь.

Богоро́дичен: Безкре́постным кре́посте, нему́дрым му́дросте, Де́во Всепе́тая, не оста́ви на́с си́рых: изнемога́ем от мно́жества грехо́в, и в отча́янии на́шем к Тебе́ еди́ней вопие́м: потщи́ся заступи́ти лю́ди смире́нныя, о́чи го́рдых де́монов до а́да смиря́ющи.

Пе́снь 5

Ирмо́с: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Припев: Преподобная матти Филофея, моли Бога о нас.

Издруче́нием немощны́я пло́ти, де́во, всю́ мни́мую мо́щь вра́жию в пе́рсть попра́ла еси́ Филофе́е, многомо́щную в не́мощех Боже́ственную по́мощь прему́дре взыска́вши.

Припев: Преподобная матти Филофея, моли Бога о нас.

Воскреси́вшему Ла́заря тве́рдо ве́ровавши, не отступи́ла еси́ от Него́, до́ндеже слеза́ми возставле́ние соверше́нное о́браза пречу́днаго Того́ прия́ла еси́.

Припев: Преподобная матти Филофея, моли Бога о нас.

Агницу Христо́ву Филофе́ю ны́не вся́ земля́ Бо́лгарская да пое́т любопра́здненственно, ублажа́ющи труды́ ея́: утеше́ний бо пото́ками напая́ет ду́ши лю́бящих ю́.

Сла́ва Отцу́ и Сы́ну и Свято́му Ду́ху:

Якоже кра́сный лу́г, цве́ты чудноуха́нными преиспещре́н, па́мять твоя́ вои́стину благоуха́нна, Филофе́е, воня́ми бо доброде́телей твои́х вся́ Це́рковь ны́не исполня́ется.

И ны́не и при́сно и во ве́ки веко́в. Ами́нь.

Богоро́дичен: Дави́дскую ве́твь, проро́ческое исполне́ние, ве́сну благоза́рную зиму́ющим во гресе́х, Де́ву Пречи́стую почти́м: неоскуде́им, ве́рнии, пе́сньми и хвале́ньми, Всепе́тую при́сно пою́ще.

Пе́снь 6.

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя, я́ко Благоутро́бен.

Припев: Преподобная матти Филофея, моли Бога о нас.

Евфи́миевыми словесы́ че́стно восхва́ленная, Филофе́е пресла́вная, и на́ша убо́гая хвале́ния не отри́ни ны́не: ле́н бо куря́щийся на́ша словеса́, ты́ же пла́мень боголю́бия в сердца́ на́ша возжжи́.

Припев: Преподобная матти Филофея, моли Бога о нас.

Возра́довася Те́рнов гра́д, чудоно́сную реку́ — мо́щи твоя́ приобре́т, и с патриа́рхом вку́пе вся́к во́зраст и сосло́вие вопия́ху тебе́: ра́дуйся, возвесели́вшая всю́ зе́млю Бо́лгарскую.

Сла́ва Отцу́ и Сы́ну и Свято́му Ду́ху:

Окрест святы́х моще́й твои́х со свеща́ми, кади́льницы и благоуха́ньми всему́ церко́вному при́чту собра́вшемуся, патриа́рх Те́рновский взыва́ше ти́, де́во преподо́бна: и́скренняя рабо́ Христо́ва, пти́це пусты́нная, ка́ко се́мо прелете́ла еси́?

И ны́не и при́сно и во ве́ки веко́в. Ами́нь.

Богоро́дичен: Фиа́л благово́ний Ду́ха светлопозлаще́н, освяти́вший ми́р ве́сь, Де́во Богома́ти, яви́лася еси́, в ро́дех родо́в Благослове́нная Пречи́стая, излива́ющий освяще́ний сту́дно зача́тым, светле́тися творя́щи но́вую тва́рь.

Конда́к преподо́бней, гла́с 5:

Наста́ дне́сь пра́здник лучеза́рный де́вы боголюбе́зныя, / в о́ньже вся́ Це́рковь Христо́ва све́тло лику́ет, / небеса́ ра́дуются, / сла́вный гра́д Те́рнов святы́х све́тлостей исполня́ется, / и земля́ Бо́лгарская, / све́тлая чудеса́ Филофе́и воспомина́ющи, / духо́вно торжеству́ет.

Икос:

Огнено́сною моли́твою врага́ попали́ла еси́ о́гненныя искуше́ния, о́гненныя язы́цы апо́столом дре́вле Низпосла́вшему, пе́сни де́нь и но́щь, а́ки слави́й, возсыла́ющи. Те́мже ны́не от все́х слы́шиши пе́снь сицеву́ю: ра́дуйся, сла́досте ве́рных; ра́дуйся, Ангельски на земли́ пожи́вшая; ра́дуйся, стори́чное весе́лие на небеси́ обре́тшая, о на́ших согреше́ний проще́нии Христу́ моля́щаяся.

Пе́снь 7.

Ирмо́с: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Припев: Преподобная матти Филофея, моли Бога о нас.

Имено́сно Бо́га возлюби́вшия Филофе́и светоно́сная па́мять дне́сь наста́. Ли́к соста́вльше, пое́м свято́е ея́ успе́ние и чу́дное Бо́гом чудоно́сное прославле́ние.

Припев: Преподобная матти Филофея, моли Бога о нас.

Лико́вне па́мять твою́ ны́не, достоди́вная, пра́зднует Бо́лгарская земля́ и Ромы́нская: пе́рвую бо вма́ле моще́й твои́х чуде́с струя́ми напои́вши, светода́рным же облагода́тствовавше втору́ю при́сным спребыва́нием, обою́ еси́, Филофе́е, чудоде́йное заступле́ние пред Бо́гом.

Сла́ва Отцу́ и Сы́ну и Свято́му Ду́ху:

Око не ви́де и у́хо челове́ческое николи́же слы́ша, и́мже досто́йно обогати́лася еси́ на небеси́, Филофе́е де́во, сокро́вища добро́ты: во сла́ве бо ли́ку пра́ведных сопричта́вшися, ли́к Спа́са Христа́ я́вственне созерца́еши.

И ны́не и при́сно и во ве́ки веко́в. Ами́нь.

Богоро́дичен: Фимиа́мник Ду́ха, кади́льница злата́я, же́зл, прозя́бший цве́т нетле́ния нетле́нно, Тя́ проро́ческих слове́с велича́ем сла́вное сбытие́, Богоро́дице Всепе́тая, и в моли́твах неусыпа́ющую ро́да челове́ческаго Засту́пницу.

Пе́снь 8.

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

Припев: Преподобная матти Филофея, моли Бога о нас.

Естество́м немощна́ су́щи, естества́ порабоще́ние стра́стное си́лою Христо́вою разори́ла еси́, богогла́сная го́рлице, и вла́сть безстра́стием на ду́хи нечи́стыя от Христа́ прия́ла еси́.

Припев: Преподобная матти Филофея, моли Бога о нас.

Егда́ вну́трь Те́рновских сте́н вошла́ еси́, вся́ земля́ Бо́лгарская устна́ми патриа́ршескими взыва́ше тебе́: бла́го на́м, иму́щим такову́ю покрови́тельницу, чи́сто моли́твы о на́с Бо́гу принося́щую, да житие́ на́ше во благоче́стии сконча́вше, сподо́бимся Ца́рствия небе́снаго.

Сла́ва Отцу́ и Сы́ну и Свято́му Ду́ху:

Стру́пы грехо́вныя, ра́ны многоле́тныя, вся́ я́зи, боле́зни и неду́ги, теле́сныя и душе́вныя, ма́ти на́ша преподо́бная Филофе́е, ны́не сла́вящих тя́ исцели́, я́ко да во све́те заступле́ния твоего́ све́т у́зрим Ца́рствия небе́снаго.

И ны́не и при́сно и во ве́ки веко́в. Ами́нь.

Богоро́дичен: Лучеда́тное ско́рое заступле́ние да́руй, Де́во, в бе́здну грехо́в угле́бшим, и к Тебе́ взо́ры по́мощи ча́юще просте́ршим, льще́ния и собла́зны ско́ро упраздни́ лука́ваго, пра́зднующия Филофе́и па́мять веселя́щи.

Песнь 9

Ирмо́с: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.

Припев: Преподобная матти Филофея, моли Бога о нас.

Аммо преди́вная на́ша, Филофе́е, мона́шествующих сла́во, от неприя́зни ве́рных огражде́ние, Ангелом гове́йное ра́дование и мирски́м конце́м торжество́, не оскудева́й моля́щися о воспева́ющих ра́дость твою́.

Припев: Преподобная матти Филофея, моли Бога о нас.

Ве́сненным пти́цам подо́бящися, на ве́тве боголю́бныя жи́зни до конца́ пребыла́ еси́, преподо́бная Филофе́е, среди́ цвето́в Боже́ственных Писа́ний Бо́гови пою́щи и ве́рных сердца́ веселя́щи.

Припев: Преподобная матти Филофея, моли Бога о нас.

Небе́сный кла́с златы́й, богоороше́нный зна́меньми и чудоде́йствии, правосла́вным яви́ тя́ Зижди́тель ми́ру, Его́же неувя́дными благодея́ний зерна́ми вся́ земля́ Бо́лгарская насыща́ется.

Сла́ва Отцу́ и Сы́ну и Свято́му Ду́ху:

Ангельское житие́ отны́не возлю́бим, ве́рнии, ангелонра́вныя отрокови́цы наслади́вшеся сия́ньми, ея́же вы́ну о́браз боголю́бия иму́ще, дости́гнем ве́чных ра́достей исто́чник неисчерпа́емый, Христа́.

И ны́не и при́сно и во ве́ки веко́в. Ами́нь.

Богоро́дичен: Язы́ком землере́тным не мо́щно восхвали́ти Тя́ досто́йно, Присноде́во Богоро́дице, всесве́тлый хра́ме Божества́, сия́нием Свои́м вселе́нную всю́ озари́вший и ро́д челове́ческий рождество́м па́че есте́ственным обожи́вший.

Свети́лен. Подо́бен: Жены́, услы́шите.

Жены́, услы́шите чу́дная Це́ркве веща́ния, отрокови́цы, взыгра́йте премно́гим весе́лием: ра́дуется дне́сь жена́м украше́ние и де́вам удобре́ние, земли́ на́шея заступле́ние, Филофе́я преди́вная.

Молитва

О свята́я мати Филофе́е. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.