20 декабря

Канон иной преподобному Антонию Сийскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Жела́нием духо́вным распали́вся/ и мяте́жи мирски́я отри́нув,/ ко еди́ному же Бо́гу любо́вию прилепи́лся еси́/ и, того́ вседу́шне взыску́я,/ во вну́треннюю пусты́ню отше́л еси́, при вода́х всели́вся,/ иде́же во слеза́х и труде́х пребыва́я многоле́тное время,/ в терпе́нии мно́зем житие́ А́нгельское проходи́л еси́/ в наста́влении Боже́ственнаго ра́зума,/ и мно́жество мона́хов собра́л еси́, му́дре,/ и́хже посеща́я, и не оста́ви, Анто́ние преподо́бне, о́тче наш,/ Пресвяте́й Тро́ице моля́ся/ от зол вся́ческих изба́вити и спасти́ ду́ши на́ша.

Кано́н вторый, гла́с 8.

Пе́снь 1.

Ирмо́с: Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Припев: Преподобне отче Антоние, моли Бога о нас.

Весь Вседержи́телю Бо́гу возложи́в себе́, Богому́дре,/ и, к тому́ жела́нием и любо́вию ум твой впери́в,/ того́ ра́ди безмо́лвная и уедине́нная ме́ста возлюби́л еси́,/ да, со Христо́м пребыва́я, жи́знь ве́чную насле́диши.

Припев: Преподобне отче Антоние, моли Бога о нас.

Упова́нием на Бо́га всеблага́го укрепля́емь, блаже́нне Анто́ние,/ к бу́дущим благи́м прости́рался еси́/ и твое́й пло́ти неми́лостив, о́тче, был еси́.

Сла́ва Отцу́ и Сы́ну и Свято́му Ду́ху:

Лука́вый враг, опасно ве́дый, я́ко хо́щет тобо́ю изгна́н бы́ти от ме́ста сего́ свята́го,/ се́го ра́ди непра́ведныя челове́ки воздвиза́ет на тя;/ но си́и у́бо, ничто́же сотво́рше, вспять бежа́ша,/ лука́вый же побежде́н бысть ору́жием моли́тв твои́х:/ Бог бо снабдева́ше тя.

И ны́не и при́сно и во ве́ки веко́в. Ами́нь.

Богоро́дичен: Неискусому́жно Христа́ родила́ еси́, су́ща по нам нас ра́ди,/ непреме́нна естество́м, Пречи́стая, и невра́щна во обои́х пребы́вша./ его́же моли́ непреста́нно/ грехо́в мои́х дарова́ти и напа́стей избавле́ние.

Пе́снь 3.

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Припев: Преподобне отче Антоние, моли Бога о нас.

Утверди́в твоя́ помышле́ния, блаже́нне, упова́нием на Бо́га,/ вра́жиих наве́тов ника́коже убоя́ся,/ но мы́сленных рек стремле́ния, к душе́вней твое́й хра́мине приража́ющаяся,/ возрази́л еси́ о ка́мень терпе́ния.

Припев: Преподобне отче Антоние, моли Бога о нас.

Жела́я, преподо́бне, насыща́тися приснопребы́вающия сла́дости,/ бы́лии самора́сленными триле́тное вре́мя проводи́л еси́ жи́зни твоей;/ те́мже и ны́не получи́л еси́ трапе́зу о́ну неги́бнущия я́ди,/ но при́сно пребыва́ющия в жи́зни ве́чней.

Сла́ва Отцу́ и Сы́ну и Свято́му Ду́ху:

Во ум прие́м Ца́рствия Небе́снаго ве́чное наслажде́ние,/ земна́я вся пренебре́гл еси́/ и сего́ ра́ди ско́рбная наше́ствия мно́га и изгна́ния/ в жи́зни сей претерпе́л еси́,/ но от всех сих свободи́ тя тебе́ жи́знь ве́чную Дарова́вый.

И ны́не и при́сно и во ве́ки веко́в. Ами́нь.

Богоро́дичен: Твою́ по́мощь пода́ждь ми, рабу́ Твоему́ недосто́йному, Де́во Влады́чице,/ и, вразуми́вши Боже́ственное сие́ начина́ние,/ сотвори́ от недосто́йнаго досто́йная/ и изба́ви бед, и скорбе́й, и прегреше́ний мно́гих,/ я́ко ро́ждши всех избавле́ние.

Седа́лен, гла́с 3.

Мно́гомяте́жие ми́ра и непостоя́нную суету́, я́ко прах, вмени́в,/ к преми́рным возве́л еси́ ум твой,/ затво́ром безмо́лвия воздержа́в теле́сная чу́вства,/ и, стяжа́в жи́знь а́нгельску, Бо́гу угоди́л еси́,/ де́монов па́губник, страсте́й искорени́тель,/ челове́ков спаси́тель нело́жен был еси́./ Те́мже и нас от тлетво́рных страсте́й изба́ви, мо́лимся, твою́ па́мять при́сно в пе́снех почита́ющих,/ блаже́нне Анто́ние, о́тче наш.

Сла́ва, и ны́не, Богоро́дичен:

Я́ко невозде́ланная, Де́во, лоза́, красне́йший грозд прозя́бла еси́,/ источа́ющ нам вино́ спасе́ния, всех веселя́щее ду́ши же и телеса́./ Те́мже я́ко вину́ Тя до́брых блажа́ще,/ при́сно со А́нгелом вопие́м Ти:/ ра́дуйся, Обра́дованная.

Пе́снь 4.

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Припев: Преподобне отче Антоние, моли Бога о нас.

Пото́ки сле́зными пусты́ни напои́л еси́, блаже́нне,/ се́мя трудо́в твои́х се́я в них./ Те́мже и стори́чный плод ра́достне пожа́л еси́, вопия́:/ сла́ва си́ле Твое́й, Го́споди.

Припев: Преподобне отче Антоние, моли Бога о нас.

Стена́нием се́рдца и умиле́нием мно́зем жития́ по́прище преше́д, му́дре,/ и в страну́ безстра́стия пресели́ себе́,/ в не́йже Свет прие́м в се́рдцы твое́м, непреста́нно весели́шися,/ неизрече́ннаго Све́та – Христа́ наслажда́яся.

Сла́ва Отцу́ и Сы́ну и Свято́му Ду́ху:

Моля́ся не преста́й, о́тче, о ста́де твое́м,/ его́же мно́гими труды́ и по́ты стяжа́л еси́,/ избавле́ния прося́ злых обстоя́ний и скорбе́й вся́ческих,/ да тя вси, я́ко отца́ чадолюби́ва, непреста́нно воспева́ем.

И ны́не и при́сно и во ве́ки веко́в. Ами́нь.

Богоро́дичен: Ко́рень из чресл ца́рских, Царь всех,/ я́ко су́щу возлюби́в, и вы́шшу Херуви́м и Серафи́м показа́,/ весь, Богоро́дице, всели́ся в Тя.

Пе́снь 5

Ирмо́с: Вску́ю мя отри́нул еси́/ от лица́ Твоего́, Свете Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Припев: Преподобне отче Антоние, моли Бога о нас.

Пи́щи малоприя́тием ску́дным зело́ жела́ние пло́ти обузда́л еси́,/ во всено́щных же славосло́виих Бо́жественных сло́вес/ души́ слове́сное непоро́чно Бо́гу соблю́л еси́.

Припев: Преподобне отче Антоние, моли Бога о нас.

Ца́рство Небе́сное стяжа́в нището́ю самово́льною,/ отону́дуже источа́еши обильная дарова́ния духо́вных исцеле́ний/ ве́рно почита́ющим всесвятую́ твою́ па́мять.

Сла́ва Отцу́ и Сы́ну и Свято́му Ду́ху:

Свещу́ твою́ духо́вную, чистоты́ свети́ло вжегл еси́, блаже́нне,/ еле́ем ми́лости напоя́я непреста́нно./ Тем дости́гл еси́ Черто́га Небе́снаго, иде́же есть Жени́х Он,/ его́же измла́да возжеле́л еси́.

И ны́не и при́сно и во ве́ки веко́в. Ами́нь.

Богоро́дичен: Храм яви́лася еси́ че́стен, Де́во Ма́ти Мари́е,/ вся́ческая всеси́льно и прему́дро соста́вльшаго Христа́, и очи́стивша, и нося́ща,/ его́же нам ми́лостива сотвори́ ма́терними Твои́ми мольба́ми.

Пе́снь 6.

Ирмо́с: Моли́тву пролию́ ко Го́споду/ и тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Припев: Преподобне отче Антоние, моли Бога о нас.

В пусты́нях, я́ко пти́чищь, возгнезди́лся еси́, преподо́бне,/ от всех хотя́ Еди́ному Бо́гу еди́нствовати;/ но, я́ко на све́щнице, я́ве бы́ша всем твоя́ исправле́ния,/ Бо́гу тя прославля́ющу.

Припев: Преподобне отче Антоние, моли Бога о нас.

Нощь тебе́, я́ко день, блаже́нне, вменя́шеся и день, я́ко нощь./ Не дал еси́ покоя́ телеси́ твоему́, ни сна очесе́м, ни ве́ждом дрема́ния,/ до́ндеже дости́гл еси́ поко́я Небе́снаго.

Сла́ва Отцу́ и Сы́ну и Свято́му Ду́ху:

Сон и сень житие́ сие́, преподо́бне, вмени́л еси́,/ тем, и на ничто́же обраща́лся еси́ су́щих в нем,/ но все твое́ помышле́ние и ду́шу к бу́дущим просте́рл еси́,/ иде́же с преподо́бными все́ми ны́не весели́шися.

И ны́не и при́сно и во ве́ки веко́в. Ами́нь.

Богоро́дичен: Расто́ргни мои́х прегреше́ний рукопи́сание,/ одержа́щих мя печа́лей и страсте́й разреше́ние да́рующи и соблюда́ющи вы́ну неврежде́на, Влады́чице.

Конда́к, гла́с 8:

От ю́ности, преподо́бне, плоть твою́ в посте́х и моли́твах истончи́л еси́/ и, крест твой взем, Христу́ после́довал еси́./ Те́мже и к Вы́шним тече́ние ра́достно соверши́л еси́,/ иде́же со всеми святы́ми Свя́тей Тро́ице предстои́ши;/ и ны́не, ста́до твое́ посеща́я,/ помина́й чту́щих пресвяту́ю па́мять твою́,/ да вси благода́рне вопие́м ти:/ ра́дуйся, Богому́дре Анто́ние, наста́вниче пусты́нный.

Икос:

Ева́нгельскаго гла́са ревни́тель блаже́нне, обре́лся еси́,/ вся бо земна́я вмени́в уме́ты,/ Христо́в после́дователь в жи́зни сей изя́щен был еси́,/ от него́же и ра́зумом обогати́вся дарова́ний Боже́ственных,/ вразуми́ ны веща́ти тебе́ си́цевая:/ ра́дуйся, Богоно́се, Небе́сный челове́че, земны́й А́нгеле;/ ра́дуйся, чи́стый до́ме Пресвята́го ду́ха;/ ра́дуйся, я́ко в жи́зни сей служи́тель Пресвяты́я Тро́ицы был еси́;/ ра́дуйся, я́ко моли́твами твои́ми оби́тель твою́ изба́вил еси́ невре́дну от о́гненнаго возгоре́ния;/ ра́дуйся, я́ко пусты́ню слеза́ми напои́в, многопло́дну сотвори́л еси́;/ ра́дуйся, я́ко всено́щными Боже́ственными песнопе́нии сию́ просвети́л еси́;/ ра́дуйся, я́ко в ней се́мя Боже́ственное мно́готру́дно все́ял еси́,/ его́же уплоди́ Бог во мно́го;/ ра́дуйся, я́ко в той учени́к стада́ собра́в, стра́ху Бо́жию наказа́л еси́;/ ра́дуйся, я́ко моли́твами твои́ми нечи́стии ду́си от челове́к отгони́ми быва́ют;/ ра́дуйся, я́ко непреста́нно мо́лишися Пресвяте́й Тро́ице/ о соверша́ющих благоче́стно па́мять твою́,/ е́же соблюсти́ся от враг ненаве́тным, да зове́м ти:/ ра́дуйся, Богому́дре Анто́ние, пусты́нный наста́вниче.

Пе́снь 7.

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Припев: Преподобне отче Антоние, моли Бога о нас.

Я́ко высо́к ум, преподо́бне, от земны́х всех к Бо́гу име́я,/ высо́к в доброде́телех обре́лся еси́/ и, к Вы́шним тече́ние твое́ испра́вив,/ сла́виши с ни́ми непреста́нными гла́сы Пресвяту́ю Тро́ицу:/ оте́ц на́ших Бо́же, благослове́н еси́.

Припев: Преподобне отче Антоние, моли Бога о нас.

Ни́щия ми́луя, а́лчущия пита́л еси́, жа́ждущия напая́л еси́./ Тем прия́ тебе́ в ве́чныя кровы тебе́ ра́ди в ни́щих Бы́вый./ ему́ же пое́ши:/ оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Не устраши́ тебе́, блаже́нне,/ долгота́ ле́тняя, ни пусты́нное озлобле́ние,/ ни в потре́бных ску́дость, ни разбо́йник на́шествие,/ но еди́но пред очи́ма име́я,/ е́же Христа́ ра́ди смерть прия́ти в пусты́ни сей,/ да Христу́ жи́ти бу́деши.

И ны́не и при́сно и во ве́ки веко́в. Ами́нь.

Богоро́дичен: Украси́лася еси́ де́вства добро́тами/ и Е́вы покры́ла еси́ студ злообра́зный, Христа́ Ро́ждшая,/ одея́ние безсме́ртия да́рующаго Тебе́ чту́щим.

Пе́снь 8.

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Припев: Преподобне отче Антоние, моли Бога о нас.

А́ще и за́йде под зе́млю те́ло твое́,/ но, я́ко со́лнце, днесь возсия́, вся освеща́ющее,/ хваля́щия Христа́ во ве́ки.

Припев: Преподобне отче Антоние, моли Бога о нас.

Мно́госветлое жития́ твоего́, Богоблаже́ние Анто́ние,/ просвеща́ет душе́вныя о́чи/ и исправля́ет стопы́ к доброде́тели хваля́щих Христа́ во ве́ки.

Сла́ва Отцу́ и Сы́ну и Свято́му Ду́ху:

По сме́рти явле́нием твои́м, я́ко прокаже́ннаго, очи́стил еси́,/ та́ко, блаже́нне, и мене́, уя́звленна грехо́м,/ моли́тв твои́х иссо́пом очи́сти,/ пою́ща Христа́ во ве́ки.

И ны́не и при́сно и во ве́ки веко́в. Ами́нь.

Богоро́дичен: На Тя наде́жду возложи́х, Ма́ти Присноде́во, спасе́ния моего́/ и Тя Предста́тельницу име́ю жи́зни моея́,/ поя́ Христа́ во ве́ки.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Припев: Преподобне отче Антоние, моли Бога о нас.

Еди́наго ле́та ко осми́десятим в тече́нии твое́м не досконча́в, блаже́нне,/ Вы́шнее Ца́рствие восприя́л еси́,/ со Христо́м ца́рствуя во ве́ки.

Припев: Преподобне отче Антоние, моли Бога о нас.

Оста́вив земну́ю сла́ву, к Небе́сней взя́лся еси́ любо́вию/ и, я́ко А́нгел, в жи́зни сей Бо́гу послужи́в,/ к преми́рным духово́м преста́вился еси́,/ Боже́ственным та́мо све́том просвеща́йся.

Сла́ва Отцу́ и Сы́ну и Свято́му Ду́ху:

Руки́, Анто́ние свя́те, к Пресвяте́й Тро́ице на мольбу́ простри́,/ ми́лостивное прося́, и́же с любо́вию пе́ние Ти сие́ прине́сшим,/ и изба́ви всех напа́стей и бед/ ве́рою соверша́ющих па́мять твою́ святу́ю.

И ны́не и при́сно и во ве́ки веко́в. Ами́нь.

Богоро́дичен: Пе́ние с пе́снию и хвале́ние, исплете́нное от боле́зненны души́,/ принесо́х со стра́хом Тебе́, ро́ждшей Христа́,/ естество́м су́ща Бо́га,/ его́же моля́щи, Богоро́дице, благоприя́тна сотвори́ моле́ния на́ша/ и моли́твами Твои́ми соблю́дй лю́ди Твоя́.

Свети́лен.

Твое́ успе́ние в пе́снех пра́зднующих/ посеща́й моли́твами твои́ми,/ оставле́ние прося́ грехо́вных собла́зн/ и изба́вити всех от разли́чных напа́стей,/ да вси тя прославля́ем, блаже́нне Анто́ние.

Сла́ва, и ны́не, Богоро́дичен:

С Бо́гом упова́ние на Тя, Пречи́стая, возложи́хом, из Тебе́ проше́дшему распя́тому Христу́,/ Твои́ми к Нему́ мольба́ми невре́дны да́же до конца́ сохрани́ ны.

Молитва преподобному Антонию Сийскому

О, богоблаже́нне и приснопа́мятне о́тче наш Анто́ние, не мним тя ме́ртва су́ща, а́ще те́лом и преста́вился еси́ от нас, но жив в собо́ре А́нгелов водворя́ешися. Моли́ за ны, избра́нниче Христо́в, и не пре́зри нас, ве́рою и любо́вию чту́щих тя, помина́й нас недосто́йных у Престо́ла Царя́ Небе́снаго, тебе́ бо даде́ся благода́ть моли́тися за ны. О, засту́пниче и моли́твенниче наш до́брый! Се бо святы́х моще́й твои́х ра́ка, пред очи́ма на́шима ви́дима есть, сохраня́й нас всегда́ от сете́й вра́жиих; моли́ся ко Го́споду о спасе́нии душ на́ших, и испроси́ нам покая́ния вре́мя и христиа́нскую кончи́ну безболе́зненну, непосты́дну, ми́рну, да невозбра́нно пре́йдем мыта́рства возду́шных князе́й и сподо́бимся Небе́снаго Ца́рствия со все́ми угоди́вшими Влады́це Не́ба и земли́, Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние всегда́, ны́не и при́сно и во ве́ки веко́в. Ами́нь.