20 декабря

Канон Святителю Амвросию, епископу Медиоланскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пра́вило ве́ры и о́браз кро́тости, воздержа́ния учи́теля яви́ тя ста́ду твоему́ я́же веще́й и́стина. Сего́ ра́ди стяжа́л еси́ смире́нием высо́кая, нището́ю бога́тая, о́тче священнонача́льниче Амвро́сие, моли́ Христа́ Бо́га, спасти́ся душа́м на́шим.

Ин тропа́рь, гла́с то́йже:

Боже́ственнаго вдохнове́ния орга́не, доброде́телей апо́стольских прича́стниче, Ри́ма кра́сное процвете́ние, Амвро́сие, иера́рше блаже́нне, царя́ обличи́л еси́ и вселе́нную в благоче́стии утверди́л еси́. Те́мже моли́ся Христу́, дарова́ти на́м ве́лию ми́лость.

Кано́н святи́теля. Гла́с 8.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святителю отче Амвросие, моли Бога о нас.

Аще и вы́ну со Христо́м ца́рствуеши, предстоя́ Боже́ственней Тро́ице на небеси́, уго́дниче Бо́жий Амвро́сие, оба́че и до́лу су́щия с ве́рою же прося́щия по́мощи твоея́, огражда́еши мощны́м покро́вом защище́ния твоего́ от бе́д и зо́л.

Припев: Святителю отче Амвросие, моли Бога о нас.

Медиола́ном че́стию взыска́нный, и недосто́йна таковы́я, вмени́вый себе́, преподо́бне, наста́ви и мене́ то́жде смиренному́дрствовати о себе́, да прие́млю поноше́ние и уничиже́ние, я́ко сла́ву и возвыше́ние; укори́зны и досажде́ния, я́ко че́сть и благохвале́ние.

Сла́ва Отцу́ и Сы́ну и Свято́му Ду́ху:

Во́лю Бо́жию, зову́щую тя́ на святи́тельство, уразуме́в, любому́дре, повину́лся еси́ о́ней, я́ко ра́б послушли́вый своему́ Влады́це, си́це и мене́ научи́ разуме́ти, что́ е́сть во́ля Бо́жия блага́я, уго́дная и соверше́нная, и при́сно сле́довати тоя́ хоте́нию.

И ны́не и при́сно и во ве́ки веко́в. Ами́нь.

Богоро́дичен: Ро́ждшая Зижди́теля моего́, Влады́чице, бу́ди ми́ обурева́ему от искуше́ний бесо́вских благонаде́жное окормле́ние, приста́нище и спасе́ние.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святителю отче Амвросие, моли Бога о нас.

Отче святы́й Амвро́сие, и́же Це́рковь Медиола́нскую от крамолы́ наро́дныя неврежде́нну соблюды́й и тишину́ в не́й уста́вивый, соблюда́й и ны́не мольба́ми твои́ми Це́рковь Христо́ву от мяте́жей, ересе́й и раско́лов, и испроси́ ми́р душа́м на́шим.

Припев: Святителю отче Амвросие, моли Бога о нас.

Спасти́ся хотя́ от избра́ния во епи́скопа, бе́гал еси́ сю́ду и сю́ду, благоче́стне, но нико́е же ме́сто можа́ше укры́ти тя́, его́же благоволи́ Бо́г, я́ко гра́д верху́ горы́, и я́ко свещу́ на све́щнице, на степе́ни святи́тельском поста́вити, да све́тиши все́м, и́же в Це́ркви Хри́стовей су́ть све́тлостию уче́ния жития́ твоего́.

Сла́ва Отцу́ и Сы́ну и Свято́му Ду́ху:

Иису́са, Его́же возлюби́л еси́, Иису́са, Ему́же усе́рдно послужи́л еси́, богому́дре, бы́в Це́ркви Медиола́нстей Ангел ми́ра, утеше́ния и просвеще́ния, моли́ утверди́ти на́с в любви́ святе́й, и спасти́ ду́ши на́ша.

И ны́не и при́сно и во ве́ки веко́в. Ами́нь.

Богоро́дичен: Юже Иа́ков в ле́ствице ви́де, Юже Моисе́й в купине́ усмотре́, к Се́й, во смире́нии се́рдца припаде́м, зову́ще: Ма́ти Изба́вителя, при́зри на на́с, погиба́ющих во гресе́х, со иера́рхом Амвро́сием моля́щи Того́ спасти́ ду́ши на́ша.

Седа́лен, гла́с 3:

Благода́тными твои́ми уче́ньми, я́ко ре́чными устремле́нии, веселя́щими гра́д Бо́жий — Це́рковь святу́ю, ду́ши ве́рных к плодоноше́нию ороси́шася, вити́йство Симма́ха злому́драго потопи́, Фритиги́лда к животу́ ве́чному привлече́ся, ариа́нстии полцы́ низложе́ни бы́ша. Те́мже, я́ко вторы́й Моисе́й, безбе́дно проше́дый мо́ре жите́йских волне́ний, и фарао́на мы́сленнаго глубино́ю богому́дрия своего́ потопи́вый, воспе́л еси́ побе́дную пе́снь Боже́ственней Тро́ице: Тебе́, Бо́га, хва́лим, Тебе́, Го́споди, испове́дуем, и не постыди́мся во ве́ки. Ами́нь.

Сла́ва, и ны́не:

Се́, я́коже прорече́ проро́к, во чре́ве зача́ Неискусобра́чная Бо́га и роди́ти я́ве и́дет в верте́пе Вифлее́мле. Ему́же вси́ пое́м: отце́в Бо́же, благослове́н еси́.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святителю отче Амвросие, моли Бога о нас.

Суде́й непра́вды изоблича́вый иногда́ в бесе́де свое́й к Валентиниа́ну царю́, святи́телю, умоли́ Всеблага́го Царя́ сла́вы, да не обличи́т моя́ сокрове́нная, ниже́ посрами́т мене́ пред Ангелы, егда́ прии́дет сотвори́ти пра́ведный су́д, но да́рует ми́ пре́жде конца́ покая́ние.

Припев: Святителю отче Амвросие, моли Бога о нас.

Ве́руяй улучи́ти спасе́ние во мно́зе сове́те, о́тче, я́коже са́м внима́л еси́ му́дрым сове́том дру́га души́ твоея́ — Симплитиа́на, та́ко и мене́ наста́ви твори́ти вся́ с сове́том богому́дрых пе́стунов и отце́в, да не отпаду́т исправле́ния моя́, я́коже ли́ствие злоде́йством вра́жиим.

Сла́ва Отцу́ и Сы́ну и Свято́му Ду́ху:

Якоже в до́льнем житии́ свое́м, а́ки зве́зды, на тве́рди За́падныя Це́ркве сия́л еси́ доброде́тельми твои́ми, святи́телю, та́ко и ны́не богода́нным ти́ сове́том возсия́й к ча́дом тоя́, воспряну́в от мра́ка заблужде́ний, обратя́тся к Правосла́вию, и благоуго́дни бу́дут Восто́ку восто́ком — Го́споду Иису́су.

И ны́не и при́сно и во ве́ки веко́в. Ами́нь.

Богоро́дичен: Ты́ еси́ наде́жда моя́, Богоро́дице, Ты́ све́т души́ мое́й, Ты́ поко́й и ра́дость се́рдцу моему́, Ты́ спору́чница о мне́ к Сы́ну Твоему́, те́мже спаси́ мя́, Влады́чице моя́, мно́го Ти́ согреши́вшаго.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святителю отче Амвросие, моли Бога о нас.

Иже в Ри́ме разсла́бленную здра́ву сотвори́вый, о́тче святы́й, ско́рое пода́ждь исцеле́ние и моему́ неду́гующему телеси́ и укрепле́ние сла́бой мое́й во́ли к де́ланию добра́.

Припев: Святителю отче Амвросие, моли Бога о нас.

Твои́м, свя́те, хода́тайством Гратиа́ну дарова́ся побе́да над го́тфы, Валентиниа́ну ми́р от Макси́ма царя́, и согреши́вшим во́ином проще́ние от Феодо́сия. Исхода́тайствуй подо́бне и мне́ от Царя́ си́л проще́ние мои́х грехо́в, ми́р помысло́в и побе́ду на враги́ — ми́р, пло́ть и диа́вола, — и́же при́сно бо́рются со мно́ю.

Сла́ва Отцу́ и Сы́ну и Свято́му Ду́ху:

Евфи́мий, хотя́й отвезти́ тя́ в заточе́ние, са́м отвезе́н бы́сть в не́, по веле́нию царе́ву; кувикула́рии Гратиа́новы, и жена́, я́же от Сири́и, оби́дящии тя́, внеза́пу изверго́ша ду́ши своя́; ариа́нин, ху́ляй тя́, а́бие пре́дан бы́сть бе́су. Моли́ся у́бо, святи́телю, да не пости́гнет и мене́, я́коже о́нех, недре́млющий су́д пра́вды Бо́жия, за беззако́ния моя́.

И ны́не и при́сно и во ве́ки веко́в. Ами́нь.

Богоро́дичен: Люде́й твои́х печа́ль на ра́дость преложи́, о Влады́чице, ми́р умири́, оби́тель сию́ от междоусо́бий и наве́тов вра́жиих сохрани́, и все́м на́м бу́ди покро́в и заступле́ние в де́нь зо́л.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святителю отче Амвросие, моли Бога о нас.

Иису́су: Юже в Медиола́не Це́рковь це́лу от ариа́н сохрани́вый, Го́споди, уго́дником Твои́м Амвро́сием, гото́вым любе́знее кончи́ну му́ченическую прия́ти, не́же огра́ду о́вчую преда́ти волко́м, сохрани́ и ны́не мольба́ми его́ Це́рковь святу́ю неприкоснове́нну от все́х наве́т вра́жиих.

Припев: Святителю отче Амвросие, моли Бога о нас.

Подража́тель кро́ткаго Иису́са яви́лся еси́, незло́биве, егда́ моли́твою исцели́л еси́ усо́хшую ру́ку злоде́я, дерзну́вшую занести́ но́ж на усече́ние главы́ твоея́, и на́м препо́дал еси́ о́браз любве́ ко враго́м на́шим, благотворе́ния ненави́дящим на́с и моле́ния за творя́щих на́м напа́сть.

Сла́ва Отцу́ и Сы́ну и Свято́му Ду́ху:

Рече́ не́кий во́лхв: вои́стину Амвро́сий стра́шен бесо́м, я́ко не то́чию к нему́, но ниже́ к две́рем до́му его́ приступи́ти мо́гут! — Толи́ко стра́шен бы́вый де́моном, святи́телю, огради́ ны́ предста́тельством твои́м от губи́тельных стре́л и́х.

И ны́не и при́сно и во ве́ки веко́в. Ами́нь.

Богоро́дичен: Испроси́ на́м у Сы́на Твоего́, о Ма́ти Бо́жия, избавле́ния от вся́кия ско́рби, гне́ва и ну́жды, здра́вие душе́вное и теле́сное, и проще́ние согреше́нием на́шим, во́льным же и нево́льным.

Конда́к, гла́с 3. Подо́бен: Боже́ственныя ве́ры.

Боже́ственными догма́ты облиста́я, помрачи́л еси́ Ариеву пре́лесть, священнотаи́нниче и па́стырю Амвро́сие; чудоде́йствуя же си́лою Ду́ха, стра́сти разли́чныя я́ве исцели́л еси́, о́тче преподо́бне, Христа́ Бо́га моли́, спасти́ся душа́м на́шим.

Икос:

Тако́в вои́стинну подоба́ше Медиола́ну архиере́й, яко́в бы́сть ему́ святы́й Амвро́сий — преподо́бен, незло́бив, умиле́н ду́хом, сокруше́н се́рдцем, пра́вило ве́ры, о́браз кро́тости, Правосла́вия побо́рник, злоче́стия Ариева потреби́тель. То́й посто́м, бде́нием, моли́твою небе́сная дарова́ния прии́м, боля́щия исцеля́ше, бе́сы изгоня́ше. Те́мже, и соверша́ющим па́мять его́, досто́йно дне́сь зва́ти к нему́: ра́дуйся, ди́вная ле́торосле Галли́йския страны́; ра́дуйся, чу́дная сла́во Медиола́на гра́да; ра́дуйся, светле́йший зве́зд небе́сных свети́льниче; ра́дуйся, благода́ти Бо́жия бога́тое сокро́вище; ра́дуйся, Амвро́сие, вели́кий чудотво́рче! Христа́ Бо́га моли́, спасти́ся душа́м на́шим.

Пе́снь 7.

Ирмо́с: Бо́жия снизхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Святителю отче Амвросие, моли Бога о нас.

Наставля́емый иногда́ от Ангела, глаго́люща ко у́ху, и мно́ги злове́рныя к со́нму правове́рных привлеки́й, уго́дниче Бо́жий, испроси́ у Го́спода того́жде Ангела, да ополче́нием его́ соблюда́еми, дости́гнем в соедине́ние ве́ры и в ра́зум и́стины.

Припев: Святителю отче Амвросие, моли Бога о нас.

Отче святы́й Амвро́сие, уго́дниче Христо́в вели́кий, покрови́телю на́ш ми́лостивый! Не отри́ни убо́гаго моле́ния на́шего к тебе́, но испроси́ у Го́спода ми́р и спасе́ние душа́м на́шим, да зове́м ти́: ра́дуйся, о́тче, избавле́ние на́ше.

Сла́ва Отцу́ и Сы́ну и Свято́му Ду́ху:

Ше́ствоваху иногда́ издале́ча слове́снейшии му́жи, ви́дети то́чию тебе́ хотя́ще, и, бесе́довавше с тобо́ю на мно́зе, чуди́шася глубине́ богове́дения твоего́. Осия́й о́нем и на́с, о́тче, да возлю́бльше и́стину, не вла́емся ве́тром вся́каго уче́ния.

И ны́не и при́сно и во ве́ки веко́в. Ами́нь.

Богоро́дичен: Егда́ от окая́ннаго телесе́ сего́ изы́ти и́мать убо́гая душа́ моя́, тогда́ приклоня́ема милосе́рдием Твои́м, предста́ни ми́, о Влады́чице, и простри́ ру́це Твои́, я́ко голуби́не криле́, под се́нию те́х сохрани́ мя́ от стра́шнаго взо́ра лю́тых де́монов, возду́шную бе́здну помози́ ми́ проити́ и го́рних селе́ний дости́гнути.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святителю отче Амвросие, моли Бога о нас.

Нечи́стаго ду́ха от Пансо́фия изгна́вый, последи́ же сего́ воскреси́вый, святи́телю и чудотво́рче, воскреси́ и мою́, грехми́ умерщвле́нную и во гро́бе нечу́вствия лежа́щую ду́шу, и бу́ди ми́ помо́щник на зла́го моего́ сопроти́вника.

Припев: Святителю отче Амвросие, моли Бога о нас.

Иусти́на зло́бяшеся на тя́, я́коже Иезаве́ль на Илию́, Ироди́я на Предте́чу, и па́кости мно́ги ти́ де́яше, но вся́ сия́ терпе́вый и враго́м свои́м благотвори́вый, незло́биве, наста́ви и мене́ не воздава́ти зло́м за зло́ оби́дящим мя́, супроти́вное же, благословля́ти.

Сла́ва Отцу́ и Сы́ну и Свято́му Ду́ху:

Егда́ гре́шнии испове́даху ти́ греси́ своя́, толи́ко тогда́ пла́кал еси́, о́тче, я́ко и жестосе́рдии от ни́х умиля́хуся. О, дабы́ и мое́ се́рдце сокруши́лось благода́тию моли́тв твои́х! Да слеза́ми покая́ния измы́л бы́х у́бо на вся́ку но́щь ло́же мое́ — нечи́стую со́весть мою́, и омочи́л бы́х и́ми посте́ль мою́ — скве́рную пло́ть мою́.

И ны́не и при́сно и во ве́ки веко́в. Ами́нь.

Богоро́дичен: Ма́ти Бо́жия Всеми́лостивая, не отступи́ от мене́, за е́же в ле́ности иждива́ю дни́е мои́, но бу́ди ми́ Одиги́трия в се́й юдо́ли многоско́рбнаго стра́нствования моего́, пла́чь мо́й приими́, и в го́рняя мя́ доведи́, да хвалю́, благословля́ю и покланя́юся та́мо Го́сподеви, поя́ и превознося́ Его́ во вся́ ве́ки.

Песнь 9

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святителю отче Амвросие, моли Бога о нас.

Аще и подобостра́стную мне́ приро́ду име́л еси́, святи́телю, оба́че воздержа́нием и моли́твою от страсте́й предочи́стився, еще́ в жи́зни вре́менней ви́димаго соше́ствия на тя́ Свята́го Ду́ха сподо́бился еси́, и чудотво́рец бы́л еси́, исцеля́я неду́жныя. Сотвори́ же и мене́ прича́стника сего́ Ду́ха Уте́шителя, и утоли́ боле́зни моя́ душе́вныя и теле́сныя.

Припев: Святителю отче Амвросие, моли Бога о нас.

Лише́ния и ско́рби, по́двиги и труды́ земна́го стра́нствования твоего́ кто́ изочте́т, святи́телю? Вся́ бо жи́знь твоя́ на земли́ — тру́д и боле́знь о спасе́нии бли́жних, и са́м ты́ бы́л еси́, я́ко же́ртва всесожже́ния Го́сподеви. Те́мже издале́ча прови́дев, и, я́ко го́стью вожделе́нную, сре́тив кончи́ну свою́, восте́кл еси́ в го́рняя со тща́нием к Царю́ царе́й.

Сла́ва Отцу́ и Сы́ну и Свято́му Ду́ху:

Отче святы́й Амвро́сие, и́же зде́ лице́м к лицу́ Го́спода узре́вый, и та́мо на небеси́ при́сно с Ни́м лику́яй, не забу́ди ны́ гре́шныя в мольба́х твои́х у престо́ла Его́, да на за́паде дне́й на́ших сподо́бит на́с христиа́нския кончи́ны безболе́знены, непосты́дны, ми́рны и до́браго отве́та на стра́шнем суди́щи Свое́м.

И ны́не и при́сно и во ве́ки веко́в. Ами́нь.

Богоро́дичен: Еди́но от о́чию Твое́ю, Ма́ти Бо́жия, еди́н Ма́терний хода́тайственный взо́р Тво́й к Сы́ну Твоему́ мно́го мо́жет ко умилостивле́нию Его́ о гре́шницех. Те́мже мо́лим Тя́: бу́ди о на́с при́сная к Нему́ хода́таица.

Свети́лен, гла́с 6:

Во пло́ти безпло́тных житие́ проходя́, о́тче Амвро́сие, и украси́в ду́шу твою́ пе́рлома доброде́телей, соде́лался еси́ жили́ще Ангельския чистоты́. Сего́ ра́ди Влады́ка Христо́с, восхи́тив ду́шу твою́ от мра́чныя юдо́ли сея́ к невече́рнему све́ту Ца́рствия Своего́, облече́ ю́ в ри́зу спасе́ния ве́чнаго, я́ко жениху́ возложи́ е́й вене́ц и, я́ко неве́сту Свою́, украси́ ю́ красото́ю Боже́ственнаго сия́ния.

Сла́ва:

Зде́ еще́ просия́вый лице́м, я́ко со́лнце, и убели́выйся, я́ко сне́г, по да́ру Уте́шителя Ду́ха, и та́мо в черто́гах ра́йских осиява́емый при́сно зре́нием Боже́ственныя Тро́ицы, святы́й Амвро́сие, моли́ светода́вца Го́спода просвети́ти одея́ние души́ моея́, да и а́з с му́дрыми де́вы — чи́стыми и святы́ми душа́ми, вни́ду не́когда в небе́сный черто́г Боже́ственныя сла́вы Его́.

И ны́не:

Богоро́дице Пречи́стая, Яже без се́мене ро́ждши все́х Влады́ку. Того́, со святи́телем Амвро́сием, моли́ изба́вити мя́ возду́шных мыта́рств и гее́нскаго муче́ния, да всегда́ прославля́ю Отца́ и Сы́на и Свята́го Ду́ха, и Твое́ ми́лостивное на мне́ предста́тельство, во ве́ки веко́в, ами́нь.

Молитва первая святителю Амвросию Медиоланскому

О преславный чудотворче, в скорбех скорый помощниче и усердный о мире к Богу молитвенниче, отче святый Амвросие! Веемы, яко велие ко Спасу имаши дерзновение, предстоя горнему престолу Его, и сего ради смиренно припадаем ти: молися Ему, угодниче Божий, да подаст народу Российскому благоденственное и мирное житие, да избавит от враг видимых и невидимых, от нашествия иноплеменных, от недуга и глада, от всякия скорби и смертоносныя язывы и от всякаго зла; нам же всем, верою празднующим святую память твою и усердно ходатайства твоего чающим, да ниспослет вся благопотребная ко временному и вечному житию нашему, паче же оставление грехов, мир помыслов, тишину сердечную, здравие душам и телесем нашим. Ей, святителю Божий, пастырю Христов милостивейший, Покровителю наш готовейший! услыши нас, еще единаг от тебе просящих: буди теплый молитвенник и предстатель ко Господу о духовных пастырех и отцех наших (имена), иже немощи наша носят и матерски о нас болезнуют, дондеже вообразится в нас Христов, да сохранит Он, всеблагий и вся могущий Владыка, дражайшия дни жития их в нерушимом мире и крепости сил духовных и телесных, да приведет нас, недостойных рабов Своих, их окормлением и молитвами, твоим же ходайтайством и заступлением ко пристанищу жизни нескончаемыя, идеже херувими и серафими, святии вси с Богородицею и с тобою, покровителем нашим, непрестанными гласы славят Отца, и Сына, и Святаго Духа, ныне и присно и во веки веков. Аминь.

Молитва вторая святителю Амвросию Медиоланскому

О всесвятый Амвросие, угодниче Божий изряднейший, покровителю мой милостивейший! Призри с высоты горняго жилища твоего на мя недостойнаго, нарадиваго, унылаго в настоящем житии сем. Виждь мене грешнаго, в толицем обстоянии сущаго, умом помраченнаго, волею ко злу преклоненнаго, и сердцем паче к земли, неже к небеси, прилепленнаго. Виждь страстное обуревание души моея и немощь и небрежение мое. Виждь при сем и коварство злоначальника и губителя моего, виждь, о святителю Христов, и умилосердися о мне, таковаго ради положения моего. Помози ми, о заступниче мой, скорым предстательством твоим. Исходатайствуй ми от Отца щедрот бодрость и силу, во еже творити волю Его, благую, угодную и совершенную, страсти моя умертвити, демона низложити, мир себе распяти и себе миру, и тако достигнути христианския кончину живота своего, безболезненны, непостыдны, мирны. По исходе же притрепетныя душе моея от окаяннаго и бреннаго телесе сего, буди ей ангел покровитель, добр спутник, верен хранитель и защитник от лютых нападений начальника воздушных мытарств, да безбедно прешед оныя, силою предстательства твоего, сподоблюся прочее и аз, последний из всех, иже в церстве благодати, узрети сладчайшее лице Господа нашего и славити Его со Отцем и Святым Духом, и твое милостивное о мне предстательство, во веки веков. Аминь.