20 декабря

Канон святителя Амвросия, епископа Медиоланскаго

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пра́вило ве́ры и о́браз кро́тости, воздержа́ния учи́теля яви́ тя ста́ду твоему́ я́же веще́й и́стина. Сего́ ра́ди стяжа́л еси́ смире́нием высо́кая, нището́ю бога́тая, о́тче Амвро́сие, моли́ Христа́ Бо́га, спасти́ся душа́м на́шим.

Кано́н. Глас 4.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святителю отче Амвросие, моли Бога о нас.

Боже́ственными светоли́тии, преподо́бне, облиста́емь, све́тлое, и светоно́сное, и свято́е твое́ успе́ние благоче́стно чту́щия твои́ми моли́твами просвети́.

Припев: Святителю отче Амвросие, моли Бога о нас.

Сло́во Бо́жие прему́дрости тебе́ сло́во дарова́, укра́шенное зна́нием и́стинным, иера́рше Амвро́сие, ерети́чествующих безслове́сное отража́я зломы́слие.

Припев: Святителю отче Амвросие, моли Бога о нас.

Ума твоего́ зри́тельное, пребога́те, предочи́стив от страстны́я мглы́, прия́тно чи́стых блиста́ний Всесвята́го Ду́ха соде́лал еси́, всеблаже́нне.

Сла́ва Отцу́ и Сы́ну и Свято́му Ду́ху:

Всему́дрыми и свяще́нными твои́ми догма́ты ариему́дрственную отгна́в па́губу, я́ко па́стырь, на зла́це упа́сл еси́ Правосла́вия, всему́дре, слове́сныя твоя́ ве́рою о́вцы.

И ны́не и при́сно и во ве́ки веко́в. Ами́нь.

Богоро́дичен: Безсе́менно Отчею во́лею от Боже́ственнаго Ду́ха Бо́жия зачала́ еси́ Сы́на и пло́тию родила́ еси́, из Отца́ безма́терня и на́с ра́ди из Тебе́ безо́тча.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, Отчею ипоста́сною Му́дростию, Христе́: не́сть бо свя́т, па́че Тебе́, Человеколю́бие.

Припев: Святителю отче Амвросие, моли Бога о нас.

Велича́йшу благода́ть от Бо́га прие́м и си́лу, твои́м чу́вственным прикоснове́нием разли́чныя стра́сти, о́тче Амвро́сие, исцеля́л еси́ приходя́щих к тебе́.

Припев: Святителю отче Амвросие, моли Бога о нас.

Науче́н, я́ко иера́рх боже́ственный, преподо́бне, вся́кое разуме́ние Писа́ния неве́дущим, о́тче Амвро́сие, неудобопости́жная я́ве уясни́л еси́.

Сла́ва Отцу́ и Сы́ну и Свято́му Ду́ху:

Тебе́, му́дростию духо́вною сия́ющу, несмы́сленно прибли́житися де́рзостно скверне́йшую устре́мльшуюся скоре́йше умертви́л еси́ боже́ственным приглаго́ланием.

И ны́не и при́сно и во ве́ки веко́в. Ами́нь.

Богоро́дичен: Ро́д челове́ческий обнови́ла еси́ еди́на, ро́ждши естества́ на́шего Соде́теля же и Го́спода, те́мже Тя́ сла́вим, Богора́дованная.

Седа́лен, гла́с 8. Подо́бен: Прему́дрости.

Проро́ка Илию́ ревнообразу́я и Иоа́нна та́кожде Крести́теля, му́жески обличи́л еси́ царя́ беззако́нновавша, иера́рше; престо́л боже́ственне украси́л еси́ и чуде́с мно́жеством мі́р обогати́л еси́. Те́мже, и Боже́ственными Писа́нии науче́н, ве́рныя утверди́л еси́ и неве́рныя обрати́л еси́, иера́рше Амвро́сие, моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Помышле́ньми поползо́хся лука́выми, во глубину́ впадо́х грехо́вную и, стеня́, взыва́ю Ти́ от се́рдца, Пречи́стая: на мне́ удиви́ бога́тую ми́лость, и Твоего́ милосе́рдия неизме́рную пучи́ну, и щедро́т Твои́х неизче́тное бога́тство, и да́ждь ми́ покая́ние и прегреше́ний проще́ние, да любо́вию взыва́ю Тебе́: моли́ Христа́ Бо́га прегреше́ний оставле́ние дарова́ти ми́: Тя́ бо наде́жду име́ю, ра́б Тво́й.

Пе́снь 4.

Ирмо́с: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Припев: Святителю отче Амвросие, моли Бога о нас.

Иера́рх показа́лся еси́, пома́зався мѵ́ром свяще́нства, соверша́я свяще́нники, все́м спаси́тельное да́руя очище́ние.

Припев: Святителю отче Амвросие, моли Бога о нас.

Соблю́л еси́ па́ству твою́ от вся́каго вре́да проти́вных, блаже́нне, и Ариеву ле́сть всю́ омрачи́л еси́ сия́нием слове́с твои́х.

Сла́ва Отцу́ и Сы́ну и Свято́му Ду́ху:

Ду́ха си́лою огражде́н, лука́выя отгоня́еши зло́бы, всеблаже́нне, ду́хи, не терпя́щия твоего́ запреще́ния.

И ны́не и при́сно и во ве́ки веко́в. Ами́нь.

Богоро́дичен: Вся́ во́лею соде́тельствовавый, соде́тельствуется хотя́ от чи́стых Твои́х крове́й, спаса́я ве́дущия Тя́, Чи́стую Богома́терь.

Пе́снь 5

Ирмо́с: Ты́, Го́споди, мо́й Све́т, в мі́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святителю отче Амвросие, моли Бога о нас.

Ум, сия́ющ све́том невеще́ственным, стяжа́в, облиста́л еси́ врачева́ний и чуде́с зари́, Амвро́сие блаже́нне.

Припев: Святителю отче Амвросие, моли Бога о нас.

Воздви́гл еси́ тебе́ сама́го свяще́нное жили́ще Ду́ха, разори́л еси́ хра́мы и́дольския, Амвро́сие богодохнове́нне.

Сла́ва Отцу́ и Сы́ну и Свято́му Ду́ху:

Велича́йших доброде́телей светозаре́нием сия́юща, постыде́шася ца́рие тебе́ и преде́ла язы́ка твоего́ не поколеба́ша.

И ны́не и при́сно и во ве́ки веко́в. Ами́нь.

Богоро́дичен: Хоте́нием все́ му́дре соде́ловая, хотя́ обнови́ти челове́ки, Де́во, в Твою́ утро́бу всели́ся.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святителю отче Амвросие, моли Бога о нас.

Ри́м твоя́ честна́я благохва́лит исправле́ния: я́ко бо звезда́ светови́дна, всю́ду лучи́ чуде́с твои́х, иера́рше, испусти́л еси́, ве́рно удивля́емь.

Припев: Святителю отче Амвросие, моли Бога о нас.

Утреневав ко Христу́, та́мо су́щими светлостьми́ озари́лся еси́ бога́тно, и све́та напо́лнился еси́ Боже́ственнейшаго, и просвеща́еши ве́рно чту́щия тя́ всегда́.

Сла́ва Отцу́ и Сы́ну и Свято́му Ду́ху:

Те́ло и ду́шу твою́ Бо́гу освяти́в, и прия́тно соде́лал еси́ дарова́ний, о́тче, твое́ се́рдце, непреста́нно вне́млющее сла́дкому жела́нию.

И ны́не и при́сно и во ве́ки веко́в. Ами́нь.

Богоро́дичен: Исцели́ души́ моея́, Де́во, я́звы, осене́нием Твои́м боже́ственным и у́м мо́й просвети́, омраче́нный ле́ностию и зло́бою врага́ борца́.

Конда́к, гла́с 3. Подо́бен: Боже́ственныя ве́ры.

Боже́ственными догма́ты облиста́я, помрачи́л еси́ Ариеву пре́лесть, священнотаи́нниче и па́стырю Амвро́сие; чудоде́йствуя же си́лою Ду́ха, стра́сти разли́чныя я́ве исцели́л еси́, о́тче преподо́бне, Христа́ Бо́га моли́, спасти́ся душа́м на́шим.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святителю отче Амвросие, моли Бога о нас.

Боже́ственное веща́ние твои́х догма́тов, о́тче всему́дре, я́коже мо́лния, про́йде всю́ зе́млю и чуде́с показа́ньми, я́ко све́т, облиста́, я́же во мра́це сердца́ просвеща́ющее.

Припев: Святителю отче Амвросие, моли Бога о нас.

Законоположе́нием Спа́са ты́ после́дуя, о́тче, да́нный тебе́ тала́нт, я́ко ра́б блажа́йший, тща́тельно умногосугу́бил еси́, Влады́чния сподобля́емь ра́дости.

Сла́ва Отцу́ и Сы́ну и Свято́му Ду́ху:

Изостри́в богосло́вный тво́й у́м, струи́ свяще́нных догма́тов, я́ко реку́, испусти́л еси́, напоя́я ве́рных исполне́ние, священнотаи́нниче о́тче Амвро́сие.

И ны́не и при́сно и во ве́ки веко́в. Ами́нь.

Богоро́дичен: Се́, Де́во, во утро́бе Твое́й зачала́ еси́ Сло́во, Отцу́ собезнача́льно, и пло́тию породила́ еси́ да́рующее все́м воззва́ние, су́щим из Ада́ма па́дшим, Всенепоро́чная.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святителю отче Амвросие, моли Бога о нас.

Умертви́в у́ды и ме́ртво плотско́е мудрова́ние соде́лав, ду́шу оживи́л еси́, преподо́бне, и исто́чник чуде́с источи́л еси́ умерщвле́нным от страсте́й, жи́знь подаю́щи вопию́щим: благослови́те, вся́ дела́ Госпо́дня, Го́спода.

Припев: Святителю отче Амвросие, моли Бога о нас.

Уве́дел еси́ преставле́ние, му́дре, е́же от телесе́, Боже́ственным Ду́хом, проро́чески бо сие́ су́щим с тобо́ю сказа́л еси́ и ра́достно на небеса́, вопия́, восте́кл еси́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Те́ло, и се́рдце, и у́м предочи́стив от страсте́й смеше́ния, огнено́сну лучу́ свы́ше прия́л еси́ Ду́ха, я́коже боже́ственнии ученицы́, вопия́, Амвро́сие: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Яви́лася еси́ превы́шши небе́с, Бо́га небе́снаго поро́ждши, земна́я, Пречи́стая, небе́сным совоку́пльшаго и позна́ние Свое́ все́м подаю́щаго, вопию́щим: благослови́те, вся́ дела́ Госпо́дня, Го́спода.

Песнь 9

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святителю отче Амвросие, моли Бога о нас.

Ви́дел еси́, во изступле́нии бы́в, ве́чныя святы́м, о́тче, лежа́щия по́чести; к ни́мже преше́л еси́, восприе́м твои́х трудо́в, сла́вне, воздая́ния, веселя́ся.

Припев: Святителю отче Амвросие, моли Бога о нас.

Яко гро́зд зре́л, богому́дре, в точи́лех го́рних досто́йно сокро́вищствовался еси́, источа́я безсме́ртия вино́, Амвро́сие, и врачева́ний дарова́ния благоче́стно к тебе́ притека́ющим.

Припев: Святителю отче Амвросие, моли Бога о нас.

Тя́, златоза́рный о́тче, Боже́ственнаго Ду́ха свети́льник, све́т благочести́вых уче́ний и врачева́ний лучу́ испуща́ющ и ве́рныя просвеща́ющ, велегла́сно ублажа́ем.

Сла́ва Отцу́ и Сы́ну и Свято́му Ду́ху:

Днесве́тлую тя́ звезду́ Це́рковь стяжа́вши, тмы́ избега́ет вся́кия, всеблаже́нне, льсти́ и, све́тлостьми свяще́нных твои́х догма́тов озаря́ема, блажи́т тя́.

И ны́не и при́сно и во ве́ки веко́в. Ами́нь.

Богоро́дичен: Гла́с Тебе́ вопие́м, Де́во, ра́достне арха́нгелов: ра́дуйся, прокля́тства разреше́ние лю́тых все́х; ра́дуйся, избавле́ние, земны́я обожи́вшая па́че ума́ Рождество́м Твои́м.

Молитва

О, пресла́вный чудотво́рче, в ско́рбех ско́рый помо́щниче и усе́рдный о ми́ре к Бо́гу моли́твенниче, о́тче святы́й Амвро́сие! Ве́мы, я́ко ве́лие ко Спа́су и́маши дерзнове́ние, предстоя́ го́рнему Престо́лу Его́, и сего́ ра́ди смире́нно припа́даем ти́: моли́ся Ему́, уго́дниче Бо́жий, да пода́ст наро́ду Росси́йскому благоде́нственное и ми́рное житие́, да изба́вит от вра́г ви́димых и неви́димых, от наше́ствия иноплеме́нных, от неду́га и гла́да, от вся́кия ско́рби и смертоно́сныя я́звы и от вся́каго зла́; на́м же все́м, ве́рою пра́зднующим святу́ю па́мять твою́ и усе́рдно хода́тайства твоего́ ча́ющим, да ниспо́слет вся́ благопотре́бная ко вре́менному и ве́чному житию́ на́шему, па́че же оставле́ние грехо́в, ми́р по́мыслов, тишину́ серде́чную, здра́вие душа́м и телесе́м на́шим. Е́й, святи́телю Бо́жий, па́стырю Христо́в ми́лостивейший, покрови́телю на́ш гото́вейший! услы́ши на́с, еще́ еди́наго от тебе́ прося́щих: бу́ди те́плый моли́твенник и предста́тель ко Го́споду о духо́вных па́стырех и отце́х на́ших (имена́), и́же не́мощи на́ша но́сят и о на́с боле́знуют, до́ндеже вообрази́тся в на́с Христо́с, да сохрани́т О́н, всеблаги́й и вся́ могу́щий Влады́ка, дража́йшия дни́ жития́ и́х в неруши́мом ми́ре и кре́пости си́л духо́вных и теле́сных, да приведе́т на́с, недосто́йных рабо́в Свои́х, и́х окормле́нием и моли́твами, твои́м же хода́йтайством и заступле́нием ко приста́нищу жи́зни несконча́емыя, иде́же херуви́ми и серафи́ми, святи́и вси́ с Богоро́дицею и с тобо́ю, покрови́телем на́шим, непреста́нными гла́сы сла́вят Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.