1 декабря

Канон святого мученика Романа.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь глас 4.

Му́ченик Твой, Го́споди, Рома́н, / во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

Кано́н свята́го Рома́на, Гла́с 4.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святый мучениче Романе, моли Бога о нас.

Незаходи́мыми луча́ми сия́я Тро́ичными я́сно и со страстоте́рпческими ли́ки просвеща́емь, просвеще́ние ми́ посли́, тму́ стра́стную отгоня́я богоприя́тными твои́ми, Рома́не, моли́твами.

Припев: Святый мучениче Романе, моли Бога о нас.

Мо́ря и́дольскаго волне́нием не обурева́емь, я́ко на Христо́ве ка́мени утверди́вся, треволне́ния разреши́л еси́ тишино́ю Боже́ственнаго Ду́ха многомяте́жнаго безбо́жия.

Сла́ва Отцу́ и Сы́ну и Свято́му Ду́ху:

Цветни́к я́ко благосла́вный и благопло́дный, Це́рковь Христо́ву, гобзу́ющу все́ми благи́ми, Рома́не, соблю́л еси́ от волко́в непристу́пну, твои́м уче́нием утвержда́я сию́.

И ны́не и при́сно и во ве́ки веко́в. Ами́нь.

Богоро́дичен: Поми́ловася Тобо́ю, Всенепоро́чная, естество́ челове́ческое и́стинно: Творе́ц бо, из Тебе́ воплоти́вся па́че сло́ва и смы́сла, за ны́ на сме́рть приведе́ся, избавля́я от а́да на́с.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святый мучениче Романе, моли Бога о нас.

Зве́ря разу́мнаго пра́щею уби́в, Рома́не, словесы́ твои́ми па́ству Христо́ву спа́сл еси́ от и́дольскаго вре́да нетле́нну.

Припев: Святый мучениче Романе, моли Бога о нас.

Возмога́я ору́жием кре́стным, прило́ги вра́жия возврати́л еси́ и не́мощь и́х обличи́л еси́, Рома́не му́дре достоблаже́нне.

Сла́ва Отцу́ и Сы́ну и Свято́му Ду́ху:

Низложи́л еси́ вра́жия, сокруши́в, че́люсти Рома́не сла́вне, за Христа́, блаже́нне, лани́те стру́жиме, приснопа́мятне.

И ны́не и при́сно и во ве́ки веко́в. Ами́нь.

Богоро́дичен: Естество́м еди́н Бо́г Сло́во Отчее и соесте́ственное Ду́ху, пло́тию из Тебе́ оде́явся, земны́я обожи́, Богома́ти.

Седа́лен свята́го Рома́на, гла́с 4. Подо́бен: Вознесы́йся.

По́стнически лука́ваго попра́в и страда́льчески, му́чениче Христо́в, просла́вился еси́, претерпе́в му́жески соверше́нным умо́м. Те́мже причта́лся еси́ лико́м му́ченическим и ве́чнующее Ца́рство стяжа́л еси́; в не́мже лику́я, помяни́ на́с, соверша́ющия ве́рою па́мять твою́.

Сла́ва, И ны́не, Богоро́дичен:

По Бо́зе в Тво́й, Богоро́дице, прибега́ю, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу, моле́ние сотвори́, Чи́стая, к Сы́ну Твоему́ от си́х изба́вити мя́.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святый мучениче Романе, моли Бога о нас.

Направля́емь, я́ко ле́ствицею, на дре́во возне́слся еси́, блаже́нне, неизглаго́ланною добро́тою и пребыва́ющий ли́к пости́гл еси́, му́чениче Рома́не достосла́вне.

Припев: Святый мучениче Романе, моли Бога о нас.

Совле́кся ме́ртвенныя оде́жды в му́ках, блаже́нне, и спасе́ния в све́тлую ри́зу све́тло, всесла́вне му́чениче Рома́не, обле́клся еси́.

Сла́ва Отцу́ и Сы́ну и Свято́му Ду́ху:

Умудри́вся вдохнове́нием Уте́шителя, о́трочища язы́к Тя́, Го́спода сла́вы, Творца́ пропове́да все́х, Человеколю́бче, и Бо́га, спасти́ могу́щаго.

И ны́не и при́сно и во ве́ки веко́в. Ами́нь.

Богоро́дичен: Благослове́н, Де́во, Пло́д Твоего́ чре́ва, Имже изба́вихомся кля́твы сме́ртныя, вся́ оте́чествия язы́ков, и Тобо́ю благослове́ннии я́ко жи́зни пое́м Тя́ Хода́таицу.

Пе́снь 5

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святый мучениче Романе, моли Бога о нас.

Струя́ми страда́льческими крове́й твои́х потопи́л еси́ мо́ре безбо́жия, ре́ки же исцеле́ния, Рома́не, источи́л еси́.

Припев: Святый мучениче Романе, моли Бога о нас.

Яко да́р избра́нный, же́ртву я́ко непоро́чну, прине́сл еси́ Влады́це, Рома́не, богосло́вствующаго младе́нца закала́ема.

Сла́ва Отцу́ и Сы́ну и Свято́му Ду́ху:

Юро́дство вра́жие му́дростию Свята́го Ду́ха уязви́л еси́, уязви́в твое́ те́ло ра́нами, Рома́не всесла́вне.

И ны́не и при́сно и во ве́ки веко́в. Ами́нь.

Богоро́дичен: Потреби́ла еси́ кля́тву, я́ко ра́дость ро́ждши, и обнови́ла еси́ челове́ки Твои́м Рождество́м, Де́во Мари́е Неискусобра́чная.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святый мучениче Романе, моли Бога о нас.

Ме́ртвость и тлю́ строга́нием отложи́в, жи́зни нетле́нныя в добро́ту одея́вся, му́чениче, укра́шен светлостьми́, Рома́не, духо́вными, незаходя́щими.

Припев: Святый мучениче Романе, моли Бога о нас.

Источи́в я́ко кро́вныя то́ки уче́ния отре́заный тво́й язы́к, и́миже непогиба́ющее насле́довал еси́, страстоте́рпче, блаже́нство, при́сно пребыва́ющее.

Сла́ва Отцу́ и Сы́ну и Свято́му Ду́ху:

Прему́дрости пото́к жажда́в, испи́л еси́ сове́том ро́ждшия уста́ богосло́вна младе́нца, мече́м к жи́зни прише́дша неконча́емей.

И ны́не и при́сно и во ве́ки веко́в. Ами́нь.

Богоро́дичен: Ско́рое прибе́жище бу́ди мне́, Пречи́стая, наси́лия избавля́ющи мя́, и стра́стнаго студа́ изыма́ющи, и к Боже́ственней стези́ направля́ющи, Богома́ти.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святый мучениче Романе, моли Бога о нас.

Удавле́нием твои́м, страстоте́рпче, удави́в зми́я, обре́л еси́ жи́знь и́стинно, пресла́вне Рома́не, зовы́й всегда́: благослове́н еси́ в хра́ме сла́вы Твоея́, Го́споди.

Припев: Святый мучениче Романе, моли Бога о нас.

Све́та незаходи́маго луча́ми озаря́емь, пла́мень высо́кий угаси́л еси́, Рома́не, проро́ческим дарова́нием украша́емь и с му́ченическими ли́ки сочета́емь, зовы́й: благослове́н еси́ в хра́ме сла́вы Твоея́, Го́споди.

Сла́ва Отцу́ и Сы́ну и Свято́му Ду́ху:

Яко от са́да многоцве́тнаго, ма́терними уче́нии, ши́пок благово́нный, младе́нческий во́зраст, му́ченическою кро́вию напая́емь, Христу́ нетле́нно прино́сится.

И ны́не и при́сно и во ве́ки веко́в. Ами́нь.

Богоро́дичен: Впа́дшия во глубину́ грехо́вную, Всепе́тая, еди́на Бо́га ро́ждшая без се́мене, изведи́ ны, пою́щия Тя́: благослове́нна Ты́ в жена́х, Всенепоро́чная Влады́чице.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святый мучениче Романе, моли Бога о нас.

Глаго́лов послу́шник Христо́вых бы́л еси́, сла́вне, ду́шу твою́ положи́в за па́ству твою́, усе́рдно за Него́ удавля́емь, му́чимь, и стру́жемь, и ураня́емь, вопия́л еси́: благослови́те вся́ дела́ Госпо́дня Го́спода.

Сла́ва Отцу́ и Сы́ну и Свято́му Ду́ху:

Вои́стинну уста́ твоя́ и язы́к ра́дости и весе́лия испо́лнися, благословя́ Бо́га непреста́нно: отре́зан бо и кро́вию ка́пля, зако́н ве́ры на́м, Рома́не, полага́ет, вопия́: благослови́те вся́ дела́ Госпо́дня Го́спода.

И ны́не и при́сно и во ве́ки веко́в. Ами́нь.

Богоро́дичен: Сло́во ро́ждши Отчее Боже́ственным Ду́хом, Де́ва пребыла́ еси́, Богороди́тельнице безму́жная, превозше́дши есте́ственныя зако́ны рождество́м Твои́м. Те́мже, ра́дующеся, пое́м: благослови́те вся́ дела́ Госпо́дня Го́спода.

Песнь 9

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святый мучениче Романе, моли Бога о нас.

Все́ твое́ жела́ние, му́чениче, ко Влады́це просте́рл еси́ и, многови́дныя ра́ны претерпе́в, Рома́не сла́вне, сла́вы неизглаго́ланныя получи́л еси́ и блаже́ннаго наслажде́ния.

Сла́ва Отцу́ и Сы́ну и Свято́му Ду́ху:

Се́ вме́сто боле́зни сла́дость тебе́ пото́ка даде́ся, му́чениче, вене́ц нося́щу ти́, Рома́не, и от кро́ве багряни́цу иму́щу: я́ко ши́пок благоуха́ющ и неувяда́ющ, младе́нец закла́н бы́л еси́ Христа́ ра́ди.

И ны́не и при́сно и во ве́ки веко́в. Ами́нь.

Богоро́дичен: Ты́ началороди́тельныя кля́твы, земны́я, Де́во, изба́вила еси́ и отве́рзла еси́ на́м жи́знь Еде́ма Рождество́м Твои́м па́че естества́. Те́мже, веселя́щеся, Тя́, Богоро́дице, велича́ем.

Молитва

О святы́й уго́дниче Бо́жий, му́чениче Романе! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.