Шрифт

1 декабря

Канон святого мученика Платона.

Святого мученика Платона
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь глас 4.

Му́ченик Твой, Го́споди, Плато́н,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

Кано́н свята́го Плато́на. Гла́с 8.

Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святый мучениче Платоне, моли Бога о нас.

Ве́чнаго Ца́рствия, сла́вне, чисте́йшую проходя́ широту́, от вся́кия ско́рби и напа́стей тесноты́, пою́щия тя́ спаси́, невозвра́тно ше́ствующия к небе́сней стези́ вводя́.

Припев: Святый мучениче Платоне, моли Бога о нас.

Огражде́н благоче́стия ору́жием, сто́лп незы́блен яви́вся, Плато́не, все́ свире́пство ра́н претерпе́л еси́ и боле́зней тесноты́ подъя́л еси́, Боже́ственною благода́тию простира́яся.

Сла́ва Отцу́ и Сы́ну и Свято́му Ду́ху:

Юношеское показа́в противле́ние, ме́ртвенную и тле́нную дебе́лость страда́нием отве́ргл еси́, всему́дре, и в нетле́нную ри́зу оде́явся, ра́дуяся, Влады́це предстои́ши.

И ны́не и при́сно и во ве́ки веко́в. Ами́нь.

Богоро́дичен: Воплоще́нна, Отцу́ Собезнача́льна и Соприсносу́щна, Единоро́дна Сло́ва па́че ума́ родила́ еси́, Благослове́нная Пречи́стая Богоро́дице. Сего́ ра́ди пра́во му́дрствующе, пропове́даем Тя́ и всече́стно сла́вим.

Пе́снь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Припев: Святый мучениче Платоне, моли Бога о нас.

Якоже нетле́нная и́скра, в пла́мень лю́тый терпели́во, всеблаже́нне, вше́л еси́, благоче́стия я́вственно ре́вностию распала́емь и огне́м Боже́ственным озаря́емь ве́ры.

Припев: Святый мучениче Платоне, моли Бога о нас.

Победи́в па́че естества́ де́монския слуги́, терпе́нием же кре́пких му́к боле́зни подъе́м, Ангелов все́льник и венцено́сец яви́лся еси́, Плато́не богому́дре блаже́нне.

Сла́ва Отцу́ и Сы́ну и Свято́му Ду́ху:

На земли́ за Христа́, всеблаже́нне, подвиза́вся, небе́сныя да́ры прие́м и венцы́, от Него́ приснопребыва́ющия, в чи́сте ме́сте рая́ вселя́ешися.

И ны́не и при́сно и во ве́ки веко́в. Ами́нь.

Богоро́дичен: Две́ре Све́та, све́тлыми Ду́ха заря́ми укра́шена Богома́ти су́щи, Тобо́ю бо к на́м Сло́во сни́де, просвеща́ющее вся́ Боже́ственным све́том пою́щия Тя́.

Седа́лен свята́го Плато́на, гла́с 8. Подо́бен: Прему́дрости.

Подвиго́в широто́ю, му́чениче му́дре, простира́яся ве́рою, всесла́вне, вра́жия, утесни́в, ко́зни погуби́л еси́ и, до́бре соверши́в тече́ние боже́ственное, ра́йскую широту́, ра́дуяся, дости́гл еси́. Те́мже Це́рковь, простра́нством благоче́стия сия́ющи дне́сь, пра́зднует па́мять твою́ и вопие́т ти́, блаже́нне: моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Сла́ва, И ны́не, Богоро́дичен:

По Бо́зе в Тво́й, Богоро́дице, прибега́ю, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу, моле́ние сотвори́, Чи́стая, к Сы́ну Твоему́ от си́х изба́вити мя́.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святый мучениче Платоне, моли Бога о нас.

Раствори́вся ве́сь любо́вию Созда́теля твоего́, не чу́вствовал еси́ боле́зней теле́сных, стра́стныя пло́ти ме́ртвенныя и ко́жныя ри́зы совле́кся и целому́дрия и спасе́ния оде́явся, Плато́не, ри́зою.

Припев: Святый мучениче Платоне, моли Бога о нас.

Священноде́латель Боже́ственный яви́лся еси́, я́ко непоро́чно овча́, му́жеский по́л и соверше́нное всесожже́ние, му́чениче, тебе́ сама́го за все́х закала́емому Христу́ прине́с, Изба́вителю, ду́шу бо разже́г Влады́чнею любо́вию, о сожига́емей пло́ти небре́гл еси́.

Сла́ва Отцу́ и Сы́ну и Свято́му Ду́ху:

Юноши три́, су́щия в Вавило́не, подража́я, всея́дца огня́ не убоя́лся еси́, но кре́пко и ю́ношески того́ претерпе́в пла́мень несте́рпный. Те́мже тя́ Росода́вец со о́неми досто́йно прия́т в черто́г сла́вы.

И ны́не и при́сно и во ве́ки веко́в. Ами́нь.

Богоро́дичен: Яко из ко́рене ца́рскаго су́щи, все́ми влады́чествующаго, Сло́во Бо́жие родила́ еси́ на́м, пло́ть бы́вша и пребы́вша непреме́нна. Те́мже Тя́, Богоро́дицу, и́стинно и госпо́дьственно, Всесвята́я Де́во, сла́вим.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святый мучениче Платоне, моли Бога о нас.

Дрема́ния твои́м ве́ждом и сна́ твои́м очесе́м не да́л еси́, му́чениче, до́ндеже сно́м блаже́нным и подо́бным, Бо́га лю́бящим, любе́зным усну́л еси́, блаже́нне, мече́м во главу́ усека́емь.

Припев: Святый мучениче Платоне, моли Бога о нас.

Якоже в чужде́м телеси́, всеблаже́нне, стражда́, подвиза́лся еси́, я́ко стра́ждущим ины́м ви́дец бы́в, ты́ пострада́л еси́, Боже́ственным бо раче́нием разже́гся, предлежа́щих му́к не убоя́лся еси́, сла́вне.

Сла́ва Отцу́ и Сы́ну и Свято́му Ду́ху:

Бога́тство обре́л еси́ неотъе́млемо и сла́ву неувя́дную, в небе́сных оби́телех со Ангелы ликовству́я и нетле́ннаго безсме́ртия в причаще́нии бы́в, всеизя́щнейше.

И ны́не и при́сно и во ве́ки веко́в. Ами́нь.

Богоро́дичен: Разреше́ние грехо́в Твои́ми моли́твами пода́ждь рабо́м Твои́м, избавля́ющи ты́я искуше́ний, и бе́д, и скорбе́й, и ху́льных еретико́в одержа́ния, Де́во Богоро́дице Всепе́тая.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святый мучениче Платоне, моли Бога о нас.

Вы́шши страсте́й и му́к бы́в, пло́ти отсече́ния претерпе́л еси́, сла́вне, Христа́ бо помо́щника и соде́теля име́л еси́ и споспе́шника.

Припев: Святый мучениче Платоне, моли Бога о нас.

Вы́шши страсте́й и му́к бы́в, пло́ти отсече́ния претерпе́л еси́, сла́вне, Христа́ бо помо́щника и соде́теля име́л еси́ и споспе́шника.

Сла́ва Отцу́ и Сы́ну и Свято́му Ду́ху:

Душе́вным ра́зумом благоле́пие Созда́теля взира́я всегда́ и созерца́я добро́ту неизрече́нную, ви́димых ху́дость небре́гл еси́.

И ны́не и при́сно и во ве́ки веко́в. Ами́нь.

Богоро́дичен: Яко одушевле́нный киво́т, Законода́вца вмести́ла еси́, я́коже хра́м святы́й, прия́ла еси́ Свята́го, бы́вша Челове́ка, на благодея́ния челове́ков, Всеблаже́нная.

Конда́к, гла́с 3. Подо́бен: Де́ва дне́сь.

Свята́я твоя́ па́мять вселе́нную весели́т, созыва́ющи ве́рныя вся́ в пречестны́й хра́м тво́й, иде́же ны́не, ра́достию совоку́пльшеся, пое́м в пе́снех и све́тлостех. Сего́ ра́ди, Плато́не, вопие́м ти́: язы́ческаго наше́ствия изба́ви гра́д тво́й, свя́те.

Икос:

Еллинское оста́вив все́ су́етство, Христо́вых ученико́в душеполе́зная уче́ния возлюби́ зело́ Плато́н богому́дрый. Те́м и яви́ся все́м че́стен, я́ко анки́ра ве́ры во оте́честве, его́же и зва́ние я́ве Анки́ра имену́ется. До́бре бо того́ воспита́вшее изве́стен покро́в на враги́ и засту́пника те́пла в ра́тех обрета́ет всегда́, вопию́щи: язы́ческаго наше́ствия изба́ви гра́д тво́й, свя́те.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Святый мучениче Платоне, моли Бога о нас.

Зако́нно пострада́вша и враги́ твоя́ попра́вша, побе́ды венце́м Законополо́жник тебе́ венча́, велегла́сно вопию́ща и глаго́люща: благослове́н еси́, Бо́же оте́ц на́ших.

Припев: Святый мучениче Платоне, моли Бога о нас.

Преста́вился еси́, ра́дуяся, к присножела́нному тебе́ дре́вле, Его́же пречи́стей стра́сти, спасе́ния челове́ком вине́ бы́вшей, подража́я, пе́л еси́: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Удиви́шася вся́ небе́сныя си́лы терпе́нию твоего́ страда́ния и челове́цы, тогда́ зря́щии. Преесте́ственно бо вопия́л еси́, секо́мый: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Избавля́емии, Пречи́стая, Боже́ственным Рождество́м де́вства Твоего́ у́з сме́ртных и кля́твы первозда́ннаго Ада́ма, Тя́, Богоро́дицу, му́дрствующе, зове́м: благослове́н Бо́г оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святый мучениче Платоне, моли Бога о нас.

Све́тлыми по́двиги у́бо подвиза́лся еси́, всехва́льне, светле́йше же мно́го благосла́вие Христо́с тебе́ дарова́ и ве́чно пребыва́ющее, в небе́сныя тя́ оби́тели всели́в, усе́рдно песнопою́ща: свяще́нницы, воспо́йте, лю́дие, превозноси́те Христа́ во ве́ки.

Припев: Святый мучениче Платоне, моли Бога о нас.

Яко моле́бника ве́рнейша, я́ко предста́теля тепле́йша Всецарю́ и Творцу́ тва́ри, тя́ ны́не предлага́ем; за ны́ моли́ся, му́ченическим твои́м дерзнове́нием хода́тайствуя о хва́лящих тя́ и ве́рно песнопою́щих: лю́дие, превозноси́те Христа́ во ве́ки.

Сла́ва Отцу́ и Сы́ну и Свято́му Ду́ху:

Прия́ти сподо́бился еси́ Ца́рство недви́жимое твое́ю де́тельною ве́рою, я́ко тебе́ да́ти обеща́ нелжи́вый Бо́г, за Него́же те́ло и огню́ и му́кам пре́дал еси́, зовы́й: свяще́нницы, воспо́йте, лю́дие, превозноси́те Христа́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Сло́ва Бо́жия, безнача́льнаго и Отцу́ сразумева́емаго, из не су́щаго Отчим сове́том все́ соста́вившаго, боголе́пно родила́ еси́, пло́ть бы́вша ра́ди на́с, челове́ков. Те́м Тя́, Богоро́дицу, правосла́вно му́дрствующе, Христа́ превозно́сим во ве́ки.

Песнь 9

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Святый мучениче Платоне, моли Бога о нас.

Прииди́те у́бо, боговенча́ннаго, мучениколю́бцы, воспои́м му́ченика, просте́ршаго благоче́стие своего́ ро́ждия: и́бо лозы́ жи́зни са́д бы́в, пло́д изно́сит, умиле́ния на́м вино́ точа́щий.

Припев: Святый мучениче Платоне, моли Бога о нас.

Честна́ пред Бо́гом му́ченическая яви́ся сме́рть, присносу́щныя бо и неги́блемыя быва́ет Хода́тай и́стинныя жи́зни и жре́бий нетле́нный, и сла́ву безсме́ртную, и бога́тное подае́т воздая́ние.

Сла́ва Отцу́ и Сы́ну и Свято́му Ду́ху:

Всю́ твою́ жи́знь, му́чениче, Вседержи́телю Бо́гу освяти́л еси́ и, я́ко благоуго́дну, жи́ву же́ртву, тебе́ сама́го, ра́дуяся, прине́сл еси́. Те́м сла́дости су́щия па́че ума́ я́ве сподо́бился еси́, но моли́ изба́витися искуше́ний пою́щим тя́.

И ны́не и при́сно и во ве́ки веко́в. Ами́нь.

Богоро́дичен: Спаси́ мя, Ма́ти Бо́жия, ро́ждшая Христа́ Спа́са моего́, Бо́га и Челове́ка, сугу́ба естество́м, но не Ипоста́сию: Единоро́дна у́бо из Отца́, из Тебе́ же перворожде́на всея́ тва́ри. Те́мже Тя́ вси́ при́сно велича́ем.

Молитва

О святы́й уго́дниче Бо́жий, му́чениче Платоне! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святого мученика Платона