1 декабря

Канон преподобной игумении Елене Московской (Девочкиной)

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь глас 4.

От ю́ности Христа́ возлюби́вши/ и святы́х оте́ц заве́ты испо́лнивши,/ преподо́бная ма́ти на́ша Еле́но,/ страх Бо́жий и любо́вь нелицеме́рную стяжа́ла еси́/ и во оби́тели Пречи́стыя Одиги́трии житие́ мона́шеское устро́ила еси́./ Те́мже моли́ Человеколю́бца Христа́ Бо́га/ о ча́дех твои́х, к тебе́ усе́рдно притека́ющих/ и заступле́ния твоего́ прося́щих,// грехо́в оставле́ние нам дарова́ти.

Ин тропа́рь, глас 2:

От ю́ности Христу́ уневе́стившися,/ равноа́нгельно на земли́ пожила́ еси́/ и, подвиго́м отце́в поревнова́вши,/ прему́дрость Боже́ственную стяжа́ла еси́./ Те́мже яви́лася еси́ и́нокинь наста́вница/ и оби́тели Пречи́стыя Одиги́трии первонача́льница,/ преподо́бная ма́ти Еле́но,// моли́ Христа́ Бо́га спасти́ся душа́м на́шим.

Кано́н. Гла́с 4

Пе́снь 1.

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́ ра́дуяся То́я чудеса́.

Припев: Преподо́бная ма́ти Еле́но, моли́ Бо́га о нас.

Влады́ко Бо́же, при́зри с Небесе́, и устне́ моя́ отве́рзи, и язы́к уясни́ в похвалу́ уго́днице Твое́й, преподо́бней и блаже́нней Еле́не, дев наста́внице.

Припев: Преподо́бная ма́ти Еле́но, моли́ Бо́га о нас.

Словесы́ твои́ми к чистоте́ и целому́дрию призыва́ющи, наста́вница яви́лася еси́ лико́в деви́ческих, Еле́но, те́мже мо́лим тя, наста́ви нас на стези́ пра́вды.

Сла́ва Отцу́ и Сы́ну и Свято́му Ду́ху:

Еди́наго Го́спода взыску́ющи и Того́ Еди́наго жела́ющи, Тому́ Еди́ному вседу́шно от ю́ности послужи́ти потща́лася еси́, преподо́бная.

И ны́не и при́сно и во ве́ки веко́в. Ами́нь.

Богоро́дичен: И́стинную и су́щую Богоро́дицу Тя, Де́во, испове́дуем, я́ко вои́стину Тобо́ю Сло́во Бо́жие на земли́ яви́ся и с челове́ки поживе́ во спасе́ние на́ше и обновле́ние.

Пе́снь 3.

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.

Припев: Преподо́бная ма́ти Еле́но, моли́ Бо́га о нас.

Заря́ми богомы́слия ум твой уясни́вши, преподо́бная, а́нгельски на земли́ пожила́ еси́, Еле́но, и ны́не в Небе́сных селе́ниих лику́еши, досточу́дная.

Припев: Преподо́бная ма́ти Еле́но, моли́ Бо́га о нас.

Ре́вности боже́ственныя изде́тска испо́лнившися, блаже́нная Еле́но, пучи́ну волн мирски́х безбе́дно преплыла́ еси́ и приста́нища небу́рнаго дости́гла еси́.

Сла́ва Отцу́ и Сы́ну и Свято́му Ду́ху:

Яре́м благи́й и ле́гкий от ю́ности подъе́мши, Христо́ва вертогра́да, всечестна́я Еле́но, де́лательница иску́сная была́ еси́, от пе́рваго бо часа́ и до после́дняго неле́ностно потруди́вшися.

И ны́не и при́сно и во ве́ки веко́в. Ами́нь.

Богоро́дичен: Други́й рай Тя, Де́во, имену́ем, дре́вняго рая́ преиму́щий, Тобо́ю бо яви́ся но́вый Ада́м, Христо́с, ве́тхаго Ада́ма от паде́ния возставля́я.

Седа́лен, глас 2:

Всечестна́я па́мять твоя́, Еле́но, весели́т сердца́ ве́рных, и лик чи́стых дев пое́т тебе́ ра́достно, ты бо от ю́ности Христу́ уневе́стилася еси́, преподо́бная, чи́сте Тому́ соедини́вшися, те́мже вопие́м ти: моли́ Всеблага́го Бо́га согреше́ний оставле́ние дарова́ти ве́рою покланя́ющимся честно́му о́бразу твоему́.

Сла́ва, И ны́не, Богоро́дичен:

Моле́ние те́плое и Стена́ необори́мая, ми́лости Исто́чниче, ми́рови Прибе́жище, приле́жно вопие́м Ти: Богоро́дице Влады́чице, предвари́ и от бед изба́ви нас, Еди́на вско́ре предста́тельствующая.

Пе́снь 4.

Ирмо́с: Седя́й в сла́ве, на Престо́ле Божества́,/ во о́блаце ле́гце,/ прии́де Иису́с Пребоже́ственный,/ нетле́нною дла́нию, и спасе́ зову́щия:// сла́ва, Христе́, си́ле Твое́й.

Припев: Преподо́бная ма́ти Еле́но, моли́ Бо́га о нас.

Наста́вница нело́жная де́вственнаго чи́на и ма́ти чадолюби́вая дще́рем духо́вным яви́лася еси́, присносла́вная Еле́но, мно́гия ду́ши ко Христу́ приводя́щи.

Припев: Преподо́бная ма́ти Еле́но, моли́ Бо́га о нас.

Уста́ твоя́ богоглаго́ливая отве́рзла еси́, Еле́но преподо́бная, путь спасе́ния ча́дом твои́м указу́ющи и заве́ты святы́х оте́ц возвеща́ющи.

Сла́ва Отцу́ и Сы́ну и Свято́му Ду́ху:

Ю́ношески стра́сти препобеди́вши, ма́ти Еле́но, ду́шу твою́ я́ко зе́ницу о́ка храни́ла еси́, те́мже Госпо́дь, ви́дя твое́ благо́е изволе́ние, над мно́гими тя поста́ви.

И ны́не и при́сно и во ве́ки веко́в. Ами́нь.

Богоро́дичен: Исто́чниче живы́й, Богома́ти, пото́к сла́дости ве́рным всем незави́стно источи́ла еси́, от него́же пию́ще, не вжа́ждемся во ве́ки.

Пе́снь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ Безле́тнаго Сы́на,/ всем воспева́ющим Тя// мир подава́ющая.

Припев: Преподо́бная ма́ти Еле́но, моли́ Бо́га о нас.

Покро́вския оби́тели воспита́ние и гра́да Су́ждаля процвете́ние, Но́выя на Москве́ оби́тели досто́йная устрои́тельница, Еле́но, яви́лася еси́, до́ма Пречи́стыя Одиги́трии.

Припев: Преподо́бная ма́ти Еле́но, моли́ Бо́га о нас.

Ру́це твои́ возде́ющи во свята́я и благословя́щи Го́спода, преблаже́нная, в нощи́ и во дни́ при́сно за зе́млю Ру́сскую, царя́ и во́инство моли́лася еси́, Еле́но, те́мже и благослове́ние Вы́шняго тебе́ дарова́ся.

Сла́ва Отцу́ и Сы́ну и Свято́му Ду́ху:

Еле́ну преподо́бную днесь восхва́лим, та бо от ю́ности ко Христу́, Исто́чнику неиждива́емому, прите́кши, ду́шу свою́ Боже́ственныя прему́дрости вода́ми испо́лнила есть.

И ны́не и при́сно и во ве́ки веко́в. Ами́нь.

Богоро́дичен: Ма́ти Де́во Влады́чице, А́нгельских лико́в превы́шшая и све́тлостей со́лнечных светле́йшая, облагодати́ наш ум пе́ти Тебе́ при́сно: ра́дуйся, всех Цари́це.

Пе́снь 6.

Ирмо́с: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те рука́ми воспле́щим,// от Нея́ ро́ждшагося Бо́га сла́вим.

Припев: Преподо́бная ма́ти Еле́но, моли́ Бо́га о нас.

Уставополо́жница и́стинная и наста́вница прему́драя была́ еси́ де́вам, Еле́но, тобо́ю бо окормля́емы, вои́стину пра́выя пути́ позна́ша, ма́ти преблаже́нная.

Припев: Преподо́бная ма́ти Еле́но, моли́ Бо́га о нас.

Доброде́телей ле́ствицею возшла́ еси́, Еле́но, от до́лу влеку́щих страсте́й к све́ту богоразу́мия, и ны́не пи́щи неги́блющия сподобля́ешися, достохва́льная.

Сла́ва Отцу́ и Сы́ну и Свято́му Ду́ху:

Раче́нием боже́ственным при́сно распала́ема, де́вства добро́ту непоро́чне соблюла́ еси́, и житие́ твое́ чи́стое, Еле́но, я́ко ве́но, Жениху́ Христу́ принесла́ еси́.

И ны́не и при́сно и во ве́ки веко́в. Ами́нь.

Богоро́дичен: Умилосе́рдися о нас, Де́во Всепречи́стая, виждь обстоя́ние, и скорбь, и боле́знь рабо́в Твои́х, и не оста́ви нас без заступле́ния.

Конда́к, глас 8:

Изря́дную к Бо́гу моли́твенницу/ и де́вственнаго ли́ка наста́вницу,/ оте́ческих преда́ний и́стинную храни́тельницу,/ ны́не восхва́лим пе́сньми духо́вными,/ ты же, я́ко иму́щая дерзнове́ние ко Го́споду,/ от вся́ких нас бед свободи́, да зове́м ти:/ ра́дуйся, преподо́бная Еле́но,// оби́тели Новоде́вичия первонача́льнице.

Икос:

А́нгельскому житию́ от ю́ности поревнова́вши, преподо́бная, в моли́твах и посте́х, а́ки безпло́тна на земли́ пожила́ еси́, Еле́но, те́мже зе́млю кро́тких насле́довала еси́, иде́же ве́чнаго блаже́нства ны́не сподобля́ющися, услы́ши нас, зову́щих ти си́це: Ра́дуйся, гра́да Су́ждаля пречестно́е прозябе́ние; ра́дуйся, земли́ Моско́вския преди́вное украше́ние. Ра́дуйся, оби́тели Покро́вския благо́е воспита́ние; ра́дуйся, до́ма Одиги́трии до́брое устрое́ние. Ра́дуйся, ра́зуму боже́ственных писа́ний от ю́ности прилежа́вшая; ра́дуйся, святы́х оте́ц заве́ты в се́рдце свое́м слага́вшая. Ра́дуйся, роди́телей благи́х избра́нный плод; ра́дуйся, розго́ преди́вная виногра́да Христо́ва. Ра́дуйся, да́нный тебе́ тала́нт стори́цею умно́жившая; ра́дуйся, и́нокинь честны́х на па́жити спасе́ния упра́вившая. Ра́дуйся, по́стниц похвало́; ра́дуйся, чи́стых дев пресве́тлая добро́то. Ра́дуйся, преподо́бная Еле́но, оби́тели Новоде́вичия первонача́льнице.

Пе́снь 7.

Ирмо́с: Не послужи́ша тва́ри богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.

Припев: Преподо́бная ма́ти Еле́но, моли́ Бо́га о нас.

Юдо́ль на Москве́ реце́ труды́ твои́ми и моли́твами возде́лала еси́, ма́ти Еле́но, и та́мо, и́нокинь мно́жество собра́вши, упасла́ еси́ их на па́жити воздержа́ния.

Припев: Преподо́бная ма́ти Еле́но, моли́ Бо́га о нас.

Еле́ем богогла́сных слове́с твои́х, Еле́но всечестна́я, ча́дом твои́м врачева́ние незави́стно подава́ла еси́, стру́пы грехо́вныя умаща́ющи и я́звы страсте́й исцеля́ющи.

Сла́ва Отцу́ и Сы́ну и Свято́му Ду́ху:

Ла́стовица трудолю́бная и голуби́ца чи́стая ты еси́ вои́стину, всехва́льная, му́дрыми бо твои́ми веща́нии страстьми́ огорче́нныя ду́ши сла́дости нетле́нныя исполня́еши.

И ны́не и при́сно и во ве́ки веко́в. Ами́нь.

Богоро́дичен: Еди́на еси́ Ма́ти и Де́ва, Пречи́стая Богоро́дице, Ты бо Еди́наго от Тро́ицы родила́ еси́ и по рождестве́ стра́ннем Де́ва пребыла́ еси́; тем Тя вси ве́рнии велича́ем.

Пе́снь 8.

Ирмо́с: О́троки благочести́выя в пещи́,/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю́ воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.

Припев: Преподо́бная ма́ти Еле́но, моли́ Бо́га о нас.

Ны́не па́мять твоя́ собра́ нас, любо́вию тя почита́ющих, ма́ти Еле́но, ты же, я́ко пре́жде, оби́тель и ча́да твоя́ защити́, тя бо на по́мощь призы́ваем.

Припев: Преподо́бная ма́ти Еле́но, моли́ Бо́га о нас.

Увы́ нам, я́ко заве́ты оте́ц не сохрани́хом и за́поведи твоя́, о ма́ти на́ша, не соблюдо́хом! Ка́ко дади́м отве́т? Сего́ ра́ди к те́плому твоему́ заступле́нию прибега́ем, Еле́но преподо́бная.

Сла́ва Отцу́ и Сы́ну и Свято́му Ду́ху:

Вои́стину ты еси́ моли́твенница на́ша и споспе́шница ко спасе́нию, Еле́но достохва́льная, сего́ ра́ди вонми́ гла́су воздыха́ния чад твои́х, о ма́ти преподо́бная, и наста́ви нас на стези́ пра́вды.

И ны́не и при́сно и во ве́ки веко́в. Ами́нь.

Богоро́дичен: О́блак ле́гкий, его́же ви́де Иса́ия, на не́мже Бог яви́ся, Тя, Богоро́дице, прообража́ше, на Твое́ю бо руку́, я́ко на Престо́ле, держа́ла еси́ Содержа́щаго вся́ческая.

Песнь 9

Ирмо́с: Всяк земноро́дный/ да взыгра́ется Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.

Припев: Преподо́бная ма́ти Еле́но, моли́ Бо́га о нас.

Словесы́ твои́ми, я́ко ту́чами росоно́сными, всеблаже́нная, ду́ши на́ша, страстьми́ изсо́хшия, ороси́, и грехми́ иста́явшия обнови́, да плод оби́льный принесе́м покая́ния.

Припев: Преподо́бная ма́ти Еле́но, моли́ Бо́га о нас.

Па́мять твоя́, всечестна́я Еле́но, весели́т избра́нное твое́ ста́до, и лик дев тебе́ любо́вию прино́сит похвалы́, и́хже приими́, о ма́ти преподо́бная.

Сла́ва Отцу́ и Сы́ну и Свято́му Ду́ху:

О́крест Боже́ственныя трапе́зы, Еле́но, свесели́шися ны́не со все́ми святы́ми, от ве́ка Бо́гу угоди́вшими, ра́дости ве́чныя исполня́ющися, та́мо и нас помяни́, любо́вию тя велича́ющих.

И ны́не и при́сно и во ве́ки веко́в. Ами́нь.

Богоро́дичен: Ю́ница нескве́рная и А́гница непоро́чная Ты еси́, Пресвята́я Богоро́дице, я́ко породи́ Юнца́ Боже́ственнаго, И́же Кро́вию Свое́ю даде́ нам оставле́ние.

Свети́лен:

И́стинную наста́вницу тя почита́ем, всечестна́я Еле́но, све́том бо жития́ твоего́ науча́еми и слове́с твои́х богому́дрых сия́ньми просвеща́еми, све́тлыми стезя́ми ко Христу́, Све́ту И́стинному, веде́мся.

Сла́ва Отцу́ и Сы́ну и Свято́му Ду́ху И ны́не и при́сно и во ве́ки веко́в. Ами́нь.

Прииди́те, ве́рнии, чи́стыми смы́слы возвели́чим Ма́терь Бо́га на́шего, носи́вшую во чре́ве Спа́са Христа́. Та бо, ма́тернее дерзнове́ние к Нему́ иму́щи, непреста́нно мо́лит за ны и подае́т рабо́м Свои́м бога́тыя ми́лости.

Молитва

О преподо́бная ма́ти на́ша Еле́но, до́брая в жена́х подви́жнице, прехва́льная уго́днице Христо́ва, ско́рая помо́щнице и неусы́пная о нас моли́твеннице! Не посрами́ упова́ния на́шего, е́же по Бо́зе и Пресвяте́й Богоро́дице кре́пко на тя возлага́ем, помяни́ нас, доброде́тельное житие́ и по́двиги твоя́ восхваля́ющих. Поспешеству́й нам моли́твами твои́ми побежда́ти грехо́вныя на́выки, да не во зло обрати́м да́руемыя нам от Всеще́драго Бо́га тала́нты, но во сла́ву пресвята́го и́мене Его́. Не премолчи́ за ны ко Го́споду и хода́тайством твои́м вся зла́я от нас отврати́. Да́руй нам по́мощь в труде́х и ско́рбех на́ших, и я́коже в житии́ твое́м попече́ние о оби́тели твое́й и о подвиза́ющихся в ней име́ла еси́, та́ко и ны́не потщи́ся благопоспеши́ти нам во всем, да хо́дим досто́йно зва́ния на́шего в ве́це сем, и в бу́дущем сподо́бимся во Ца́рствии Небе́снем со все́ми святы́ми прославля́ти Пресвяту́ю и Единосу́щную Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.