Шрифт

18 декабря

Канон преподобноого Саввы Освященнаго

Преподобнаго и богоноснаго отца нашего Саввы Освященнаго
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Сле́з твои́х тече́ньми пусты́ни безпло́дное возде́лал еси́, и и́же из глубины́ воздыха́ньми во сто́ трудо́в уплодоноси́л еси́, и бы́л еси́ свети́льник вселе́нней, сия́я чудесы́, Са́вво, о́тче на́ш, моли́ Христа́ Бо́га спасти́ся душа́м на́шим.

Кано́н преподо́бнаго. Гла́с 8.

Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Преподобне отче Савво, моли Бога о нас.

Светозаре́нием Свята́го Ду́ха, Са́вво, озари́ благоче́стною любо́вию пе́сньми восхваля́ющия тя́, по́стников похвалу́, мона́шествующих сла́ву, пусты́ни украси́теля, благоче́стия учи́теля.

Припев: Преподобне отче Савво, моли Бога о нас.

Всю́ любо́вь к Бо́гу возложи́в от ю́ности, и к Нему́, ра́дуяся, все́ твое́ жела́ние име́я, пло́ти движе́ния и страсте́й нахо́ды воздержа́нием умертви́л еси́, Са́вво богоно́се всехва́льне.

Припев: Преподобне отче Савво, моли Бога о нас.

Победи́в плодо́м, сокрове́ннаго зми́я попра́л еси́ и того́ се́ти легко́ премину́л еси́, богоче́стия крилы́ впери́вся, о́тче; жи́знь же, ра́дуяся, объя́л еси́ от са́да кре́стнаго.

Сла́ва Отцу́ и Сы́ну и Свято́му Ду́ху:

Просвеща́емь Све́том благода́ти, во о́гнь вше́л еси́, я́коже трие́ о́троцы пребы́л еси́ неопале́н, Бо́гу тя́ сохра́ншу и явля́ющу все́м бу́дущее тебе́ преспе́яние, по́слежде, о́тче, и соверше́ние.

И ны́не и при́сно и во ве́ки веко́в. Ами́нь.

Богоро́дичен: Неуде́ржными на на́с сме́рть стремле́ньми я́тся, но, Твоему́ Рождеству́ прибли́жившися, поги́бе и, прирази́вшися, упраздни́ся, Богоро́дице Де́во, Жи́знь бо вои́стинну присносу́щную воплоти́вшуюся родила́ еси́.

Пе́снь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Припев: Преподобне отче Савво, моли Бога о нас.

Ум влады́ку над страстьми́, всебога́те, поста́вив, пода́тель пра́вды показа́лся еси́, лу́чшему бо я́ве ху́ждшее повину́л еси́. Те́мже, я́ко фи́никс, о́тче, в пусты́нях процве́л еси́.

Припев: Преподобне отче Савво, моли Бога о нас.

После́довати разуме́в стопа́м Влады́ки, пресе́льник оте́чества бы́л еси́ и, в пусты́ни обита́я, побе́ду воздви́гл еси́ на противобо́рныя, Боже́ственною си́лою укрепля́емь.

Припев: Преподобне отче Савво, моли Бога о нас.

Тве́рдостию ра́зума, всеблаже́нне, укрепля́емь, разли́чная вра́жия кова́рства обличи́л еси́, му́дре, и все́м яви́л еси́ и горды́ню о́наго возвы́шенную низложи́л еси́.

Сла́ва Отцу́ и Сы́ну и Свято́му Ду́ху:

Свяще́нна тя́ душе́ю и простоты́ изволе́ния доброде́тельми укра́шена ви́дя, светле́йшая звезда́ Евфи́мий прия́т, проро́чески веща́я твою́, всеблаже́нне, све́тлость.

И ны́не и при́сно и во ве́ки веко́в. Ами́нь.

Богоро́дичен: Спаси́тельнаго на́с ра́ди Сло́ва строе́ния све́тлая Ты́, Ма́ти Де́во, две́рь позна́лася еси́ вои́стинну: Ты́ бо на́м ввела́ еси́ у́мную лучу́ Пребоже́ственнаго Божества́.

Седа́лен, гла́с 8. Подо́бен: Прему́дрости.

Земна́я вся́ оста́вив, в ми́ре сы́й теле́сно, ду́хом бы́л еси́ Ангелом соприча́стник: настоя́щия бо стра́сти теле́сныя умертви́в, Тро́ицы показа́лся еси́ служи́тель, блаже́нне. Те́мже и неду́гующих врачу́еши стра́сти и сло́вом ду́хи отго́ниши благода́тию, богоно́се о́тче на́ш; моли́ся Христу́ Бо́гу прегреше́ний оставле́нию дарова́тися пра́зднующим любо́вию святу́ю па́мять твою́.

Сла́ва:

Молвы́ жите́йския оста́вив, кре́ст тво́й на ра́мена взе́м, всего́ возложи́л еси́ тебе́ Бо́гу, пло́ти же и ми́ра вне́ бы́в, Ду́ху бы́л еси́ Свято́му собесе́дник. Те́мже и к ре́вности лю́ди воздвиза́я, гра́ды истощи́л еси́ и пусты́ни гра́ды сотвори́л еси́, богоно́се о́тче на́ш, моли́ Христа́ Бо́га прегреше́ний оставле́нию дарова́тися пра́зднующим любо́вию святу́ю па́мять твою́.

И ны́не, Богоро́дичен:

Яко Всенепоро́чная Неве́сто Творца́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Всепе́тая, беззако́нию мя́ су́ща скве́рное оби́телище и де́моном игра́лище в ра́зуме бы́вша, потщи́ся и те́х злоде́йствия мя́ изба́вити и све́тлое жили́ще доброде́телей соверши́, Светоно́сная, Нетле́нная, отжени́ о́блак страсте́й и вы́шняго прича́стия сподо́би и Све́та Невече́рняго моли́твами Твои́ми.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Преподобне отче Савво, моли Бога о нас.

Душе́вное очища́я устрое́ние и разширя́я Боже́ственными виде́нии, вме́стну сию́ вои́стинну Боже́ственных дарова́ний соде́лал еси́, богоблаже́нне: возложе́нием же ру́к твои́х немощству́ющия исцели́л еси́, подража́тель Влады́ки бы́в.

Припев: Преподобне отче Савво, моли Бога о нас.

Иже на тя́, о́тче, лю́те разсвире́пев, поглоти́ся, я́ко Дафа́н окая́нный, и, я́ко Авиро́н, потреби́вся: тя́ бо неви́димо Боже́ственная храня́ше благода́ть, мно́гих промышля́ющи спасе́ние, всеблаже́нне, сла́вный Са́вво богому́дре.

Припев: Преподобне отче Савво, моли Бога о нас.

Зако́ном Бо́жиим наказа́в, богоглаго́ливе, чу́вства, к разуме́нию безтеле́сных и мы́сленных твою́ худо́жную упра́вил еси́ мы́сль, проходя́ неосла́бно от сла́вы в сла́ву, от си́лы, о́тче, в си́лу.

Сла́ва Отцу́ и Сы́ну и Свято́му Ду́ху:

Благоде́тельствовати единоплеме́нныя предложи́в, в пусты́ни гра́ды созда́л еси́ боголе́пны и душеполе́зны, и в земли́ жа́ждущей исто́чники во́д изве́л еси́, и ту́чи с небесе́ пресла́вно, богому́дре, в безво́дных се́лех низве́л еси́.

И ны́не и при́сно и во ве́ки веко́в. Ами́нь.

Богоро́дичен: Новоцве́тный безсме́ртия ра́й и красе́н вои́стинну показа́лася еси́, дре́во жи́зни, в Тебе́ насажде́нное, богонача́льнейше чревонося́щи и ражда́ющи, все́м иска́пающее спаси́тельныя наде́жды, ве́рно Богоро́дицу му́дрствующим Тя́.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподобне отче Савво, моли Бога о нас.

Неукло́нною мы́слию к твоему́ Жела́емому простира́яся, от Него́ благода́ть велича́йших чуде́с незави́стну прия́л еси́, о́тче, и ве́рно приходя́щия сострада́тельно уврачева́л еси́, преподо́бне.

Припев: Преподобне отче Савво, моли Бога о нас.

Плотски́х тя́жестей дебельство́ отложи́в, сосу́д богоде́ланен избра́н бы́л еси́ Свята́го, чу́дне, Ду́ха, оша́янием сне́дей, и моли́твою, и терпе́нием, и смиреному́дрием украша́емь.

Припев: Преподобне отче Савво, моли Бога о нас.

Пропове́дник Боже́ственных догма́т велегла́снейший рукоположе́н еси́, собо́ров, о́тче, святы́х соо́бщник бы́л еси́, цари́ умудря́я, и́миже я́ве, благода́тию Боже́ственною огражда́емь, яви́лся еси́, блаже́нне.

Сла́ва Отцу́ и Сы́ну и Свято́му Ду́ху:

От Бо́га да́вшаяся благода́ть тебе́, богодохнове́нне, провозгласи́ся, раздаде́ся все́м бо вселе́нныя концы́, я́ве творя́щи боголе́пно показа́ния чуде́с Боже́ственное де́йство.

И ны́не и при́сно и во ве́ки веко́в. Ами́нь.

Богоро́дичен: Ве́рных Предста́тельница, стена́ неразруши́ма благохва́лящих Тя́, я́ко всему́ ро́ду челове́ческому я́вльшееся спасе́ние, Бо́га ро́ждши теле́сне я́вльшася, ду́шу мою́ спаси́, Пречи́стая.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподобне отче Савво, моли Бога о нас.

Любо́вь к Бо́гу и бли́жнему стяжа́в, зако́на и проро́ков исполня́я глави́зну, преиму́щую бо все́х несосу́дно доброде́тель, о́тче, испра́вил еси́.

Припев: Преподобне отче Савво, моли Бога о нас.

Равноа́нгельное на земли́ ты́ жи́тельство стяжа́л еси́, равноа́нгельну же че́сть Христо́с тебе́ дарова́, святы́х чи́ны спутьше́ствующия души́ твое́й посла́в.

Сла́ва Отцу́ и Сы́ну и Свято́му Ду́ху:

Прему́дрости поро́д яви́вся, нача́ло прему́дрости возжеле́л еси́ — стра́х Бо́жий, и́мже укрепля́емь, к соверше́нию вме́стному челове́ком, о́тче, дости́гл еси́.

И ны́не и при́сно и во ве́ки веко́в. Ами́нь.

Богоро́дичен: Спа́са и Изба́вителя, Бо́га все́х и Го́спода ро́ждши, на́м пло́тию приобщи́вшася, спаса́й, Пречи́стая, призыва́ющия Тя́ от бе́д, Влады́чице.

Конда́к, гла́с 8. Подо́бен: Взбра́нной.

Яко от младе́нства Бо́гу же́ртва непоро́чная прине́слся еси́ доброде́телию, Са́вво блаже́нне, садоде́латель бы́в благоче́стия; те́мже бы́л еси́ преподо́бных удобре́ние, граждани́н же пусты́нный достохва́лен. Те́мже зове́м ти́: ра́дуйся, Са́вво пребога́те.

Икос:

О, отце́в верхо́вниче и преподо́бных красото́, по́стников ко Христу́ дерзнове́ние, пусты́нный граждани́не и садоде́лателю! Ка́ко воспою́ твое́ житие́, преподо́бне? блиста́еши бо конце́м, я́ко со́лнце. Те́м вопию́ ти: ра́дуйся, кра́сная каппадо́ков сла́во; ра́дуйся, честно́е вселе́нныя зна́мение; ра́дуйся, пусты́ни добре́йшее прозябе́ние; ра́дуйся, пра́ведных боже́ственное наслажде́ние; ра́дуйся, я́ко презре́л еси́ теку́щая и тле́нная; ра́дуйся, я́ко на небесе́х со Ангелы обита́еши; ра́дуйся, мона́шествующих исправле́ние и пра́вило; ра́дуйся, леня́щихся к Бо́гу воздви́жение; ра́дуйся, исто́чниче чуде́с богото́чный: ра́дуйся, честны́й Ду́ха орга́не; ра́дуйся, и́мже украси́ся восто́к; ра́дуйся, и́мже за́падная сия́ют; ра́дуйся, Са́вво пребога́те.

Пе́снь 7.

Ирмо́с: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Преподобне отче Савво, моли Бога о нас.

Отложи́л еси́ привре́менная, ве́чными возме́здився, и со Ангелы лику́еши, я́ко Ангельское пожи́в житие́. С ни́миже и пе́л еси́: благослове́н Бо́г оте́ц на́ших.

Припев: Преподобне отче Савво, моли Бога о нас.

Вопие́т благода́рно ко Го́споду твоя́ вели́кая и всечестна́я Ла́вра, жи́теля, и зижди́теля, и граждани́на тя́ предлага́ющи, му́дре, и хва́лящися зове́т: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Непреста́нно моли́ Го́спода, Са́вво богому́дре, о па́стве твое́й, приле́жно же испроси́ твои́м трудо́м ве́чновати при́сно плодонося́щим и любо́вию зову́щим: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Неве́стник пречи́ст па́че словесе́ Сло́ва воплоще́ния, и черто́г, и престо́л пра́вая му́дрствующии Тя́ имену́ем и, ра́дующеся, Твоему́ Сы́ну зове́м: благослове́н Бо́г оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподобне отче Савво, моли Бога о нас.

С весе́лием, преподо́бне, святы́х чи́ны чисте́йшей твое́й души́ предтеку́т на ме́сто отра́дно в све́тлая селе́ния, иде́же пра́ведных ли́цы веселя́тся. С ни́миже ны́не пое́ши: свяще́нницы, воспо́йте, лю́дие, превозноси́те Христа́ во ве́ки.

Припев: Преподобне отче Савво, моли Бога о нас.

Стра́нна твоя́ чудеса́: зве́ри бо укроти́л еси́, ути́шив страсте́й во́лны, предглаго́леши бу́дущая проро́ческим да́ром, полки́ де́монския прогоня́я, язви́ши благомо́щными бде́нии же и моли́твами, и поще́ньми, и креста́ си́лою непобеди́мою, богоно́се.

Припев: Преподобне отче Савво, моли Бога о нас.

Иже Моисе́ю пе́рвее от столпа́ веща́вый, сто́лп от земли́ до небесе́ всесве́тел просте́рт тебе́ показа́, иде́же ны́не лежи́т терпели́вое твое́ и многострада́льное те́ло. Ему́же, ве́рою предстоя́ще, благоче́стно пое́м: лю́дие, превозноси́те Христа́ во ве́ки.

Сла́ва Отцу́ и Сы́ну и Свято́му Ду́ху:

Ра́достно па́мять твоя́ соверша́ется, всехва́льне: в радостотво́рную бо оде́ялся еси́ доброде́тель, и́стинную ри́зу спасе́ния, и чи́стую, и светови́дную весе́лия оде́жду, в не́йже ны́не, красу́яся, пое́ши непреста́нно: свяще́нницы, воспо́йте, лю́дие, превозноси́те Христа́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Неискусобра́чно родила́ еси́, Де́ва пребы́вши, и стра́нным Рождество́м Твои́м совокупи́ла еси́ вся́, вре́менную бра́нь и да́льнее разстоя́ние разруши́вши, Христа́, ми́ра да́теля, нося́щи в не́дрех Твои́х. Его́же ве́рно пое́м и превозно́сим во ве́ки.

Песнь 9

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподобне отче Савво, моли Бога о нас.

Благоуха́ет твоя́ ра́ка духо́вное благово́ние, бога́тно веселя́щи твоя́ сы́ны, тя́ обстоя́щия и́скренно, помина́ющия, преподо́бне, Ангельское твое́ пребыва́ние, и тебе́ да́нную све́тлость, и сла́ву, и присносу́щную красоту́.

Припев: Преподобне отче Савво, моли Бога о нас.

Прото́ржеся в пусты́ни вода́, и земля́ жа́ждущая в бла́то бы́сть, моли́твами претво́ршися, о́тче, твои́ми: по́стничестии бо полки́ сию́ населя́ют, я́ко ре́чну, страна́ Иорда́нова процвете́, я́ко кри́н, напая́ема твои́ми слеза́ми.

Припев: Преподобне отче Савво, моли Бога о нас.

Све́тлость святы́х на небесе́х я́ко пра́веднику тебе́ возсия́, о́тче, Христа́ бо пра́вду и́стинную проявле́нно возлюби́л еси́; Его́же жи́тельству после́дуя, всеблаже́нне, уподо́бився Сего́ живоно́сней, я́ко мо́щно бе́, святы́ни.

Сла́ва Отцу́ и Сы́ну и Свято́му Ду́ху:

Бога́тным, богоно́се, сия́я Све́том и ли́ки Ангельския ви́дя, светови́дны обходя́щия Тро́ический Све́т и прие́млющия благода́тию богови́дения лучи́, не преста́й моля́ оставле́ния грехо́в сподо́битися пою́щим тя́.

И ны́не и при́сно и во ве́ки веко́в. Ами́нь.

Богоро́дичен: Яко все́х превы́шши земноро́дных несравне́нными, Чи́стая, пе́рвенствы: Бо́га бо, все́х тва́рей Творца́, во утро́бу Твою́ вмести́ла еси́. Того́ моли́ я́ко Ми́лостива единомышле́ние, ми́р, благостоя́ние ти́хое Це́рквам дарова́ти.

Свети́лен:

Пусты́ню гра́д сотвори́л еси́ любому́дрыми нра́вы, отце́в красото́, Са́вво, о́тче богому́дре, и сию́ соверши́л еси́ мы́сленный ра́й, цвету́щь цве́ты боже́ственными, единонра́вных мно́жества, досто́йно соверша́ющих твою́ честну́ю па́мять.

Сла́ва, и ны́не, Богоро́дичен:

Яко иму́щи сострада́тельное и ми́лость ве́лию, при́зри, Всепе́тая Богоро́дице Де́во, на мое́ смире́ние и страсте́й молву́, и собла́знов жития́ разори́, Отрокови́це, и огня́ гее́нскаго изба́ви мя́ моли́твами Твои́ми.

Молитва преподобному Савве Освященному

О предивный и всехвальный угодниче Божий, преподобне отче Савво! Днесь (во святем храме твоем) благоговейно предстояще пред святою иконою твоею и радостно совершающе пресветлую память твою, ублажаем тя заступника нашего. Почитающе же твое велие дерзновение пред Господем, смиренно молим тя, преблаженне: приими милостивно от нас хвалебное пение сие, от любве и усердия тебе приносимое. И, яко имеяй велие дерзновение ко Господу, потщися богоприятным твоим ходатайством испросити у Царя царствующих и Господа господствующих, яко да пробавит великия и богатыя милости Своя на нас грешных, да подаст нам дух правыя веры, дух ведения и любве, дух мира и радости о Дусе Святе, да избавит от бед и напастей, да низпослет вся полезная ко спасению душ наших. Всем же православным да ниспослет мир, тишину, безмятежие, усердие ко исполнению заповедей его, изобилие плодов земных, и да избавит всю русскую страну от глада, труса, потопа, огня, меча, нашествия иноплеменных и междоусобныя брани, смертоносныя язвы и от всякаго зла. Ей, угодниче Божий! Не презри молений наших, но услыши нас молящихся тебе, и под кровом заступления твоего сохрани нас (и обитель твою) ненаветны от враг видимых и невидимых, да сподобимся скончати житие наше в покаянии и восприимем вечная благая во Царствии Христа Бога нашего, идеже восхвалим с тобою и всеми святыми достопоклоняемое имя Пресвятыя Троицы, Отца и Сына и Святаго Духа, во веки веков. Аминь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Преподобнаго и богоноснаго отца нашего Саввы Освященнаго