18 декабря

Канон святителю Гурию, первому архиепископу Казанскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пра́вило ве́ры и о́браз целому́дрия, учи́теля до́брых де́л и наста́вника спасе́ния даде́ тя́ Госпо́дь новопросвеще́нному гра́ду Каза́ни, в не́мже приобре́л еси́ но́выя от язы́к лю́ди и приве́л еси́ я́ Христо́ви. Сего́ ра́ди в па́мять твою́ ра́достно соше́дшеся, че́стне пра́зднуем свято́е твое́ успе́ние, ты́ же, о́тче на́ш, святи́телю Христо́в Гу́рие, моли́ Христа́ Бо́га спасти́ся душа́м на́шим.

Кано́н святи́телю Гу́рию, гла́с 8.

Пе́снь 1.

Ирмо́с: Изра́иля от рабо́ты изба́вил еси́, Го́споди, десни́цею Твое́ю держа́вною, я́ко о́наго спа́сл еси́, ны́не на́с спаси́.

Припев: Святителю отче Гурие, моли Бога о нас.

Тро́ице Пресвята́я, пе́снь Тебе́ принести́ и досто́йными похвала́ми уго́дника Твоего́, святи́теля Гу́рия, воспе́ти пода́ждь ми́, да, ра́дуяся, сла́влю Тя́ во ве́ки.

Припев: Святителю отче Гурие, моли Бога о нас.

Повеле́нием Самоде́ржца, Благочести́ваго Царя́ и Вели́каго Кня́зя, первопресто́льник церко́вный гра́ду новопросвеще́нному явля́ешися и апо́стольски научи́л еси́ ве́ровати Тро́ице во еди́ном Существе́.

Сла́ва Отцу́ и Сы́ну и Свято́му Ду́ху:

Моли́твенный хра́м в дому́ твое́м име́я, в то́м многотру́дне подвиза́лся еси́, всено́щная стоя́ния и моли́твы принося́ вы́ну Бо́гу.

И ны́не и при́сно и во ве́ки веко́в. Ами́нь.

Богоро́дичен: Бо́жия Ма́ти, ро́ждшая Еди́наго от Святы́я Тро́ицы, слове́сное ми́ недоуме́ние разреши́ и сло́во ми́ пода́ждь, и́мже Тя́ просла́влю.

Пе́снь 3.

Ирмо́с: Утвержде́й сло́вом небеса́ и зе́млю основа́вый на вода́х мно́гих, утверди́ мя к пе́нию славосло́вия Твоего́, Го́споди.

Припев: Святителю отче Гурие, моли Бога о нас.

Агнца Непоро́чнаго, Бо́жие Сло́во Соприсносу́щное, святи́телю Гу́рие, моли́, да пода́ст на́м здра́вие во благоде́нство и на сопроти́вных побе́ду.

Припев: Святителю отче Гурие, моли Бога о нас.

Его́же измла́да возлюби́л еси́, Того́ наслажда́тися жела́я, вся́ тле́нная ми́ра сего́ в ничто́же вмени́л еси́, преходя́щая презре́в, да в бу́дущем утверди́шися сла́вити Го́спода.

Сла́ва Отцу́ и Сы́ну и Свято́му Ду́ху:

Благове́рных зако́ну наказу́я благоче́стия, неве́рныя же научи́л еси́ позна́ти ве́ру благочести́ву и и́стинну и пе́ти при́сно пе́снь, Ангелы пева́емую в Тро́ице Бо́гу: Свя́т еси́, Го́споди.

И ны́не и при́сно и во ве́ки веко́в. Ами́нь.

Богоро́дичен: Под кро́в Тво́й держа́вный с ве́рою прибега́ем, Богоро́дице: покры́й и соблюди́, Госпоже́, моли́твами Твои́ми и спаси́ от бе́д и от злы́х челове́к рабо́в Твои́х, при́сно пою́щих Тя́.

Конда́к, гла́с 6:

Истине основа́ние и ве́ры утвержде́ние и в поуче́ниих преизя́щнаго све́мы тя́ благоче́стию споспе́шника, апо́столом сопресто́льника, страстоте́рпцем соприча́стника, по́стником купноревни́теля, похваля́ем тя́, Гу́рие святи́телю, и ве́лия таи́нника Бо́жия благода́ти.

Икос:

Хра́м Ду́ха Пресвята́го бы́л еси́, и река́, во́д духо́вных наполня́ема, и Це́ркве огражде́ние неподви́жимо, гра́ду же Каза́ни звезда́ пресве́тлая, чистото́ю душе́вною и теле́сною сия́ющая, Боже́ственныя уче́ния гро́м воспуща́я, трубо́ю же духо́вною гла́с ве́ры все́м провозвеща́я и си́м ага́рянское злоче́стие отсека́я, Тро́ицу во Еди́нице пе́ти научи́л еси́, о́тче на́ш, вели́кий святи́телю Гу́рие, ве́лий таи́нниче Бо́жия благода́ти.

Седа́лен, гла́с 5:

Чу́ден вои́стинну измла́да бы́л еси́, посто́м и моли́твами и долулега́нием Бо́гу угоди́в, и терпе́нием твои́м темни́цу отве́рзл еси́; чу́дно же и пресла́вно и То́й о тебе́ соде́ла, а́ки друга́го Па́вла с небеси́ позва́в, на архиере́йский престо́л по жре́бию тя́ избра́л е́сть. Того́ ра́ди мо́лим тя́, вели́кий святи́телю Гу́рие, моли́ спасти́ся ду́шам на́шим.

Сла́ва, и ны́не, Богоро́дичен:

Стра́шно чу́до зача́тия и несказа́нен о́браз Боже́ственнаго рождества́ в Тебе́ позна́ся, Чи́стая Присноде́во, ужаса́ет ми́ у́м и удивля́ет помышле́ния, сла́ва Твоя́, Богоро́дице, все́м воспростре́ся на спасе́ние душа́м на́шим.

Пе́снь 4.

Ирмо́с: Из горы́ приосене́нныя, Сло́ве, еди́ныя Богоро́дицы, хотя́ща Тя́ воплоти́тися, проро́к богови́дно усмотре́, и со стра́хом славосло́вяше си́лу Твою́.

Припев: Святителю отче Гурие, моли Бога о нас.

Бла́г нра́в и послуша́ние к твоему́ наста́внику име́л еси́ и, во све́те Святы́я Тро́ицы свеселя́ся, с ни́м пое́ши: сла́ва си́ле Твое́й, Го́споди.

Припев: Святителю отче Гурие, моли Бога о нас.

Благослове́нием первосвяти́теля поставля́ешися па́стырь и учи́тель новопросвеще́нному гра́ду Каза́ни, иде́же пре́лестию врага́ омраче́нныя лю́ди све́том богоразу́мия просвети́л еси́.

Сла́ва Отцу́ и Сы́ну и Свято́му Ду́ху:

Иова пра́веднаго терпе́нию подража́л еси́, в боле́зни слежа́ на одре́, но а́ще те́лом изнемога́л еси́, оба́че ду́хом бы́л еси́ си́лен, поя́ Творцу́ твоему́ пе́ние непреста́нно.

И ны́не и при́сно и во ве́ки веко́в. Ами́нь.

Богоро́дичен: Богоневе́сто и Богома́ти, Плотоно́сца без боле́зни ро́ждши и по рождестве́ Де́ва я́вльшися, Того́ моли́, Влады́чице, да изба́вимся бе́д и скорбе́й.

Пе́снь 5

Ирмо́с: Мра́к души́ моея́ разжени́, Светода́вче Христе́ Бо́же, началоро́дную тму́ изгна́в бе́здны, и да́руй ми́ све́т повеле́ний Твои́х, Сло́ве, да, у́тренюя, сла́влю Тя́.

Припев: Святителю отче Гурие, моли Бога о нас.

Архиере́й сы́й, архиере́ем на́шим в моли́твах спосо́бствуй, да возмо́гут всему́ христиа́нскому наро́ду испроси́ти у Христа́ ми́ра и ве́лия ми́лости.

Припев: Святителю отче Гурие, моли Бога о нас.

Ны́не, преблаже́нне Гу́рие, душа́ твоя́ почива́ет на небесе́х, предстоя́ престо́лу Христо́ву, честны́я же твоя́ мо́щи, нетле́нием почте́ны, даю́т исцеле́ния приходя́щим с ве́рою.

Сла́ва Отцу́ и Сы́ну и Свято́му Ду́ху:

Дре́вле помраче́нный зми́евою пре́лестию, ны́не же просвеще́нный Христо́вою благода́тию гра́д Каза́нь, ви́дя в себе́ мо́щи твоя́, ра́дуется; мы́ же, ча́да твоя́, чудесы́ обогаща́емы, весели́мся и, Христа́ сла́вяще, зове́м: спаси́ на́с, Го́споди.

И ны́не и при́сно и во ве́ки веко́в. Ами́нь.

Богоро́дичен: Богоро́дице, все́х Цари́це, на враги́ побе́ду да́руй, и сопроти́вных сове́ты разори́, и от междоусо́бныя бра́ни изба́ви, и клеветнико́в че́люсти сокруши́, Влады́чице, и от все́х бе́д моли́твами Твои́ми спаси́ на́с.

Пе́снь 6.

Ирмо́с: Яко во́ды морски́я, Человеколю́бче, волна́ми жите́йскими обурева́юся. Те́мже, я́ко Ио́на, та́ко вопию́ Ти: возведи́ от тли́ живо́т мо́й, благоутро́бне Го́споди.

Припев: Святителю отче Гурие, моли Бога о нас.

Утеша́я скорбя́щия, заступа́я оби́димыя, накормля́я а́лчущия и вся́ все́м подава́я неоску́дно, Гу́рие святи́телю, Христа́ Бо́га моли́ спасти́ся на́м.

Припев: Святителю отче Гурие, моли Бога о нас.

Недосто́йное на́ше моле́ние, усе́рдное пе́ние и приноси́мое твои́м трудо́м похвале́ние, преподо́бне чудотво́рче, не отри́ни, но приими́ и моли́ Христа́, да изба́вит на́с шу́ияго стоя́ния.

Сла́ва Отцу́ и Сы́ну и Свято́му Ду́ху:

Тече́ние наче́н до́бре, пу́ть по́двига соверши́л еси́ пресла́вно и зе́млю непло́дную моли́твами твои́ми добропло́дну показа́л еси́; умоли́ у́бо Христа́ и о на́с, принося́щих тебе́ пе́ние сие́, святи́телю, да пода́ст на́м принести́ покая́ния плоды́ и изба́вит ны́ ве́чнаго муче́ния.

И ны́не и при́сно и во ве́ки веко́в. Ами́нь.

Богоро́дичен: Богоблаже́нная, и от Ангел покланя́емая, и от земны́х всегда́ славосло́вимая, Творца́ Твоего́ и Бо́га, Его́же родила́ еси́, Пресвята́я Де́во, моли́ спасти́ся на́м.

Конда́к, гла́с 4:

Чу́вственныя стра́сти победи́в, чистото́ю, я́ко со́лнце, возсия́л еси́, чи́сто житие́ до конца́ сохрани́в, и от неве́рия в ве́ру мно́гих ко Христу́ приве́л еси́, того́ ра́ди от Бо́га нетле́нием почте́н, чудесы́ твои́ми вся́ удиви́л еси́. Мо́лим у́бо тя́, святи́телю Гу́рие, моли́твами твои́ми от бе́д изба́ви на́с, да зове́м ти́: ра́дуйся, о́тче преди́вный, гра́ду Каза́ни похвала́ и утвержде́ние.

Икос:

Пе́рвый се́ятель бы́л еси́ духо́вных доброде́телей, и пе́рвый па́стырь, и Це́ркви нача́льник, пе́рвый архиере́й и учи́тель христиа́нскому зако́ну в новопросвеще́ннем гра́де Каза́ни, ве́рныя лю́ди пита́я хле́бом уче́ния благода́тнаго зако́на, напоя́я пи́вом духо́вныя благода́ти, неве́рныя же уча́ позна́ти и́стину и крести́тися святы́м креще́нием, и мно́жество наро́да от неве́рия в ве́ру ко Христу́ приве́л еси́, чи́стым житие́м Бо́гу угоди́ти наста́вив и́х. Сего́ ра́ди Христо́с свято́му и трудолю́бному твоему́ те́лу дарова́ нетле́ние и да́р чудотворе́ния: приходя́щии бо с ве́рою к цельбо́носным твои́м моще́м прие́млют неоску́дныя страсте́й премене́ния, и боле́зней исцеле́ния, и грехо́в проще́ние, твои́ми, свя́те, ко Христу́ моли́твами. Те́мже зове́м ти́: ра́дуйся, о́тче преди́вный, гра́ду Каза́ни похвала́ и утвержде́ние.

Пе́снь 7.

Ирмо́с: Отроцы благочести́вии в Вавило́не о́бразу злато́му не поклони́шася, но посреде́ пе́щи о́гненныя, ороша́еми, пе́снь воспева́ху, глаго́люще: превозноси́мый отце́в и на́с Бо́же, благослове́н еси́.

Припев: Святителю отче Гурие, моли Бога о нас.

Не то́кмо те́ло твое́ нетле́нием просла́ви Бо́г, святи́телю Гу́рие, но и погреба́льная вся́ пребы́ша крепча́е но́вых. Мы́ же, си́м дивя́щеся, зове́м: благослове́н Бо́г оте́ц на́ших.

Припев: Святителю отче Гурие, моли Бога о нас.

По́двигов твои́х ра́ди и трудо́в, преподо́бне, те́ло твое́ нетле́нно показа́ Подвигополо́жник, гро́бу же и ри́зам вме́сто тле́ния кре́пость дарова́, благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Не еди́но те́ло твое́, святи́телю, тле́нию бы́сть неприча́стно, но и погре́бшихся с ве́рою во еди́ной гробни́це с тобо́ю: моли́твами твои́ми дву́ и́ноков нетле́нием одари́ Бо́г, Ему́же зове́м: благослове́н еси́, Го́споди, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: О, Всепе́тая и Всенепоро́чная Влады́чице, моли́ Сы́на Твоего́, Христа́ Бо́га на́шего, да изба́вит на́с ве́чнаго муче́ния, да пое́м: благослове́н Бо́г оте́ц на́ших.

Пе́снь 8.

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Припев: Святителю отче Гурие, моли Бога о нас.

Пречестна́я ра́ка, в не́йже положено́ бы́сть честно́е те́ло твое́, святи́телю Гу́рие, мѵ́ра благоуха́нна преиспо́лнися, и́мже с ве́рою ма́жущиися неоску́дна исцеле́ния приима́ху, зову́ще: да благослови́т тва́рь вся́ Го́спода и превозно́сит Его́ во ве́ки.

Припев: Святителю отче Гурие, моли Бога о нас.

Новопросвеще́нному гра́ду Каза́ни первопресто́льник посла́н бы́в, мно́жество неве́рных к твоему́ Влады́це Христу́ приве́л еси́ и научи́л я́ еси́ пе́ти: благослови́те, по́йте и превозноси́те Го́спода во ве́ки.

Сла́ва Отцу́ и Сы́ну и Свято́му Ду́ху:

Па́стырский же́зл прие́м, святи́телю, но́вым лю́дем учи́тель бы́л еси́, пресла́вне Гу́рие, и мно́ги лю́ди ага́рянска язы́ка святы́м креще́нием обнови́л еси́, да вси́ с тобо́ю зову́т: благослови́те, по́йте и превозноси́те Го́спода во ве́ки.

И ны́не и при́сно и во ве́ки веко́в. Ами́нь.

Богоро́дичен: Богоизбра́нная, еди́на Всенепоро́чная, Пречи́стая Богоневе́сто Богома́ти, приими́ мольбы́ ве́рою упова́ющих на Тя́ и сотвори́ моле́ние ко Святе́й Тро́ице, изба́витися на́м от все́х бе́д, Тя́ сла́вящим и превознося́щим Го́спода во ве́ки.

Песнь 9

Ирмо́с: Сне́дию дре́ва ро́ду прибы́вшая сме́рть Кресто́м упраздни́ся дне́сь, и́бо прама́терняя всеро́дная кля́тва разруши́ся прозябе́нием Чи́стыя Богома́тере, Юже вся́ си́лы небе́сныя велича́ют.

Припев: Святителю отче Гурие, моли Бога о нас.

Прия́л еси́ от Христа́ Боже́ственное дарова́ние: от мно́гих бо ле́т сокрове́нны честны́я твоя́ мо́щи в три́десять второ́е ле́то обрето́шася, ничи́мже вреди́мы, исцеле́ния разли́чна подава́юще.

Припев: Святителю отче Гурие, моли Бога о нас.

Па́мять преставле́ния твоего́ наста́ на́м све́тло пра́зднество, пречу́дный святи́телю Христо́в, прехва́льне Гу́рие, душа́ бо твоя́ свята́я, рука́ма Бо́жиима прия́та бы́вши, всели́ся в небе́сныя, те́ло же твое́ честно́е прия́т от Го́спода благода́ть нетле́ния и чуде́сных целе́б. Те́мже ти́ зове́м: уврачу́й на́ша душе́вныя боле́зни и теле́сныя неду́ги и изба́ви на́с от вра́г на́ших.

Сла́ва Отцу́ и Сы́ну и Свято́му Ду́ху:

Благода́рственныя пе́сни принесе́м Христу́ Бо́гу на́шему, такова́го на́м святи́теля дарова́вшему, Це́ркви Свое́й пречестно́е удобре́ние и гра́ду Каза́ни вели́кое утвержде́ние.

И ны́не и при́сно и во ве́ки веко́в. Ами́нь.

Богоро́дичен: Умири́ ми́р, Христе́, мольба́ми Чи́стыя Богоотрокови́цы, и низложи́ вра́жия си́лы под но́зе на́ша, и тишину́ неизглаго́ланну устро́й Ему́, и во ве́ки сохрани́.

Свети́лен. Подо́бен: Пло́тию усну́в.

Пло́ть умертви́л еси́, Гу́рие, посто́м, и бде́нием, и сухояде́нием, и диа́вола посрами́л еси́, и си́лу его́, свя́те, разруши́л еси́, нечести́вым Тро́ицу пропове́дав, треблаже́нне.

Молитва святителю Гурию, Казанскому и Свияжскому чудотворцу

Святителю отче Гурие, предстоя священной раке многоцелебных мощей твоих, молим тя усердно быти всегда и везде нашим ходатаем, заступником и покровителем. Исходатайствуй пастве твоей мир, тишину, благоденствие, здравие и спасение. Буди постоянным нашим заступником от всех врагов, видимых и невидимых: покрывай нас от нахождения всех бед, напастей и скорбей, паче же от искушений врага темнаго. Предстоящим же зде и молящимся испроси у Господа Бога вся, яже ко спасению своему они просят у Него в своих нуждах и скорбях, да все мы с тобою прославляем всесвятое имя Отца и Сына и Святаго Духа, ныне и присно, и во веки веков. Аминь.