17 декабря
Канон святителя Геннадия, архиепископа Новгородского, во Святей Руси жидовскую прелесть попалившаго
![святителя Геннадия, архиепископа Великаго Новaграда святителя Геннадия, архиепископа Великаго Новaграда](img_i/059.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 5:
Уподо́бился еси́ дре́вним отце́м, святи́телю о́тче Генна́дие, Свяще́нныя Кни́ги собра́в и еретики́ посрами́в, ре́вность по Бо́зе показу́я, па́ству огради́л еси́, моли́ и ны́не Христа́ Бо́га ми́р Це́ркви дарова́ти и спасти́ся душа́м на́шим.
Кано́н свято́му, гла́с 4.
Пе́снь 1.
Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.
Припев: Святителю отче Геннадие, моли Бога о нас.
Сло́во да́руй мне́, Спа́се Всеси́льне, воспе́ти ди́внаго уго́дника Твоего́, до́брым по́двигом подвиза́вшагося и венце́м побе́дным ны́не све́тло украше́ннаго.
Припев: Святителю отче Геннадие, моли Бога о нас.
Ополчи́шася вса́дники, и триста́ты, и все́ во́инство фарао́на мы́сленнаго на Неве́сту Христо́ву, гна́в, пости́же и раздели́ достоя́ние Госпо́дне, я́коже коры́сти, оба́че сло́вом твои́м, святи́телю Генна́дие, пучи́ною покры́л еси́ и́х, погрязо́ша во глубине́, я́ко ка́мень.
Сла́ва Отцу́ и Сы́ну и Свято́му Ду́ху:
Тобо́ю, святи́телю, я́ко десни́цею Свое́ю, сте́рл еси́ Госпо́дь сопроти́вных, ты́ же ны́не просла́влен еси́ в кре́пости, и в сла́ве небе́сной лику́еши, и су́щих во обстоя́ниих на земли́ призира́еши.
И ны́не и при́сно и во ве́ки веко́в. Ами́нь.
Богоро́дичен: Иму́щи Тя́, Де́во, ско́рую Засту́пницу и прибе́жище немощны́х, лука́ваго не устраши́мся, злочести́вых шата́ния да избе́гнем, и небе́сных сокро́вищ прия́ти вседу́шно упова́ем.
Пе́снь 3.
Ирмо́с: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.
Припев: Святителю отче Геннадие, моли Бога о нас.
Укрепи́шася отме́тницы нечести́вии зело́ у престо́лов церко́вных и в черто́зех ца́рских, и в горды́ни свое́й высо́кая и ху́льная глаго́лаша, ты́ же, святи́телю, сло́вом твои́м утвержде́ние во Го́споде ве́рным подае́ши.
Припев: Святителю отче Геннадие, моли Бога о нас.
Изнемо́же лу́к злонача́льнаго, и ту́л льсти́ваго истощи́ся в коне́ц, тебе́ же си́лою Госпо́дь препоя́са на врази́ Своя́, даде́ тебе́ моля́щуся моли́тву, а́ки о́гнь сопроти́вныя опаля́ющь, и благослови́ ле́та пра́веднаго уго́дника Своего́.
Сла́ва Отцу́ и Сы́ну и Свято́му Ду́ху:
Снизше́дшаго с небесе́ и возше́дшаго воспропове́дал еси́, о́тче Генна́дие, Иже и́мать суди́ти конце́м земны́м в пра́вде, а́ще и неве́дом ча́с прише́ствия Его́, те́мже и ле́т на осьму́ю ты́сящу Пасха́лию исчисля́еши, святи́телю, я́ко да не преста́нет служе́ние и́стины до прише́ствия Христо́ва.
И ны́не и при́сно и во ве́ки веко́в. Ами́нь.
Богоро́дичен: Непло́дствие духо́вное на́ше разреши́, Де́во, и неве́дения мра́к отжени́ от серде́ц страстьми́ обурева́емых, я́ко да принесе́м благоче́стия пло́д неистле́нный.
Ин конда́к, гла́с 2:
Ве́лия исправле́ния о церко́внем благоле́пии явля́я, Правосла́вную ве́ру [утверди́л еси́, святи́телю о́тче Генна́дие, не преста́й моли́тися о на́с, во Ца́рствии небе́снем Безсме́ртныя трапе́зы наслажда́яся].
Седа́лен, гла́с 4:
В не́мощи челове́честей держа́вствующему поползну́вшуся и ко́зньми льще́ния запя́тому, де́рзость вра́жию до́бльственне отрази́л еси́ и царю́ наста́вник ко спасе́нию яви́лся еси́, Генна́дие му́дре, и та́ко спасе́ся Ру́сь Свята́я, ски́птром и жезло́м архиере́йским укрепля́ема, те́мже и ны́не о на́с моли́ся, святи́телю, оставле́ние на́м грехо́в дарова́ти, и мучи́тельства го́рькаго от беззако́нных властехи́тителей находя́щаго лю́ди твоя́ ны́не изба́вити.
Пе́снь 4.
Ирмо́с: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы, Ты́ бо еси́, Человеколю́бче, кре́пость моя́ и хвале́ние.
Припев: Святителю отче Геннадие, моли Бога о нас.
От ю́га прише́дшаго и от Святы́я Де́вы вопло́щшагося Бо́га испове́дал еси́ пред ве́рными и неве́рными, о́вех у́бо укрепля́юще, о́вех же мече́м сло́ва Бо́жия посека́юще я́ко к сме́рти па́дших и боле́знующих неисце́льне.
Припев: Святителю отче Геннадие, моли Бога о нас.
На Боже́ственней стра́жи о ста́де ове́ц Христо́вых ста́л еси́, до́ндеже нечести́вых посрамле́ние узре́л еси́, святи́телю, па́ству твою́ призира́я, принося́ во бра́ни укре́пльшему тя́ Бо́гу хвале́ние.
Сла́ва Отцу́ и Сы́ну и Свято́му Ду́ху:
Оле лука́вствия нечести́вых! Яве у́бо благоче́ствующе, та́йне же жидо́вствующе, вся́ку святы́ню церко́вную руга́ниями укоря́юще, слуги́ сотво́ришася де́моном, но я́коже во́ск от лица́ огня́, словесы́ твои́ми, о́тче, растаява́хуся.
И ны́не и при́сно и во ве́ки веко́в. Ами́нь.
Богоро́дичен: Ускори́ на по́мощь лю́те на́м и напа́стьми погружа́емым, Чи́стая Ма́ти Госпо́дня, нечести́вых шата́ния низложи́, пою́щия же Тя́ заступи́.
Пе́снь 5
Ирмо́с: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.
Припев: Святителю отче Геннадие, моли Бога о нас.
От но́щи у́тренева ду́х тво́й ко Го́споду о ве́ре поруга́емей богоху́льством лю́тым, те́мже и Писа́ний Боже́ственных по́лный сво́д списа́л еси́, богому́дре, и́мже вся́ Ру́сь просвети́вшеся, благода́рственная тебе́ воспева́ет.
Припев: Святителю отче Геннадие, моли Бога о нас.
Росо́ю слове́с твои́х исцеле́ние неду́гующим е́ресию и у́м ижди́вшим подае́ши, святи́телю, земля́ же нечести́вых паде́ся, неиспове́дующих Трисия́тельнаго Богонача́льнаго Све́та и отме́щущихся воплоще́ния Единоро́днаго.
Сла́ва Отцу́ и Сы́ну и Свято́му Ду́ху:
Вои́стину, па́че ме́ртвых воскресе́ния, ве́лие и пресла́внейшее чу́до е́сть, е́же уме́ршему злове́рием ху́льным, па́ки на благоче́стие преити́ и к благохвале́нию обрати́тися, о тебе́ же, о́тче, сотво́ршем пресла́вная возвесели́шася су́щии на земли́.
И ны́не и при́сно и во ве́ки веко́в. Ами́нь.
Богоро́дичен: Све́та никто́же у́зрит, отмета́яйся ико́ны Твоея́ поклоне́ния, че́сти же о́бразу не возда́вый, ка́ко от первообра́зныя све́тлости осия́ние прия́ти возмо́жет.
Пе́снь 6.
Ирмо́с: Приидо́х во глубины́ морски́я и потопи́ла мя́ е́сть бу́ря мно́гих грехо́в: но́ я́ко Бо́г из глубины́ возведи́ живо́т мо́й, Многоми́лостиве.
Припев: Святителю отче Геннадие, моли Бога о нас.
Глубино́ю зло́бы и пучи́ною хуле́ния поглоще́ну зря́ще Це́рковь Ру́сскую, возопи́л еси́ все́м се́рдцем твои́м ко Го́споду, и па́че наде́жды услы́шан бы́л еси́ о́тче, те́мже и ны́не прибега́ем к моли́тве твое́й.
Припев: Святителю отче Геннадие, моли Бога о нас.
Низше́л еси́ разуме́нием твои́м до са́мыя бе́здны та́йных начина́ний вра́жеских, да из истле́ния возведе́ши ду́ши заблу́дшия. Оле неи́стовства богопроти́вных!
Сла́ва Отцу́ и Сы́ну и Свято́му Ду́ху:
Храня́щии су́етная и ло́жная Ми́лостиваго и Пра́веднаго оста́виша Го́спода, и на чту́щия Того́ все́ю зло́бою язы́ка льсти́ваго вооружи́шася, ты́ же, святи́телю, во гла́се хвале́ния и испове́дания и́стинную же́ртву жря́ще, ко́зни те́х до конца́ низложи́л еси́.
И ны́не и при́сно и во ве́ки веко́в. Ами́нь.
Богоро́дичен: Не отврати́ лица́ Твоего́ от на́с, Влады́чице, но при́зри ми́лостивно на согре́шшия лю́ди Твоя́, а́ще бо и па́даем мно́жицею лю́тыми грехи́, но ми́лости Твоея́ при́сно взыску́ем и Тебе́, я́ко Богоро́дицу и Засту́пницу те́плую сла́вим.
Конда́к, гла́с 4:
Яко незло́бивых наста́вника кро́ткаго и лжи́вых обличи́теля дерзнове́ннаго Це́рковь почита́ет тя́, святи́телю Генна́дие, те́мже и вопие́м к тебе́ с любо́вию: простоты́ на́м да́руй ду́х и умиле́ния и во испове́дании пра́вом соблюди́ неврежде́нны ду́ши на́ша.
Икос:
Прииди́те пра́вды Бо́жия алка́телие, и небе́сных взыска́телие, возвесели́мся в па́мяти предста́теля на́шего кре́пкаго Генна́дия, и наказа́нию его́ вне́млем: я́ко львы́ рыка́ющи еретицы́, и́щущие, кого́ поглоти́ти, пе́рвее к неради́вым и лени́вым приража́ются и сокрове́нныя и сту́дныя дела́ нераска́янных удо́бь отпуща́ют и разреша́ют, к себе́ же саме́м те́м привязу́юще у́зами грехо́вными, те́мже и припаде́м к па́стырю до́брому, я́ко да исхода́таит на́м от Го́спода се́рдце люботру́дное во взыска́ние небе́сных и во испове́дании пра́вом соблюда́ет неврежде́нны ду́ши на́ша.
Пе́снь 7.
Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.
Припев: Святителю отче Геннадие, моли Бога о нас.
Христоуби́йц прельще́ние и неи́стовство во дни́ твоя́ пе́щи о́гненней уподо́бися, ны́не же седмери́цею на Це́рковь твою́ воспламени́ся, ускори́ на́м в по́мощь, святи́телю, да взыва́ем с тобо́ю: оте́ц на́ших Бо́же, благослове́н еси́.
Припев: Святителю отче Геннадие, моли Бога о нас.
Яко Дании́л в ро́ве льви́ном посреде́ отсту́пник та́йных ходя́ще, те́х уста́ лука́выя загради́л еси́, о́тче Генна́дие, те́мже ны́не ко све́ту изше́д невече́рнему воспева́еши: оте́ц на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Пла́мень разже́нный безу́мия и буесло́вия челове́ча преложи́л еси́ на ро́су духо́вную Правосла́вия, и взыва́ти научи́л еси́: оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богоро́дичен: Тя́, Пречи́стую Влады́чицу, я́ко ча́яние проро́к дре́вних испо́лнившую, пе́сньми немо́лчными воспева́ем: вои́стину Бо́га пло́тию оде́явшая и челове́ком Того́ дарова́вшая, благослове́нна еси́.
Пе́снь 8.
Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.
Припев: Святителю отче Геннадие, моли Бога о нас.
Та́тем и разбо́йником приступи́вшим, на нетле́нное бога́тство мы́сленное благоче́стия догма́тов возбеси́вшимся преще́нием запрети́л еси́, святи́телю, ве́рныя же научи́л еси́ пе́ти: вся́ дела́ благослови́те, по́йте Го́спода.
Припев: Святителю отче Геннадие, моли Бога о нас.
Аще не у́ прии́де Месси́я и́стинный, всу́е ожида́ете того, врази́ и престу́пницы, во гресе́х свои́х пребу́дете, до́ндеже прише́д во о́гнь ва́с отсле́т несвети́мый, на́м же не возбрани́те взыва́ти при́сно: вся́ дела́ благослови́те, по́йте Го́спода.
Сла́ва Отцу́ и Сы́ну и Свято́му Ду́ху:
Тро́ичен: Трисия́ет све́тлость еди́на: Безнача́льный и Безвино́вный, со предве́чно Рожде́нным, и инообра́зно Исходя́щим и Животворя́щим вся́ческую тва́рь.
И ны́не и при́сно и во ве́ки веко́в. Ами́нь.
Богоро́дичен: Принеси́ моли́твы на́ша Бо́гу , о Блага́я! смоле́бника приими́ и уго́дника Твоего́ Генна́дия, и́же любо́вию Твое́ю подви́гся, науча́ет и на́с благослови́ти и пе́ти Тя́ во вся́ ве́ки.
Песнь 9
Ирмо́с: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.
Припев: Святителю отче Геннадие, моли Бога о нас.
Во гресе́х свои́х ника́коже да у́мрем, кля́твы Евины насле́дницы, а́ще ве́рою те́плою и усе́рдием вся́ческим, Иже от тебе́, святи́телю, Пропове́даннаго прии́мем, и Тому́ Еди́ному порабо́таим, я́ко Изба́вителю и Просвети́телю и Помо́щнику кре́пку, и Мздовоздая́телю пра́ведному, бе́здну щедро́т иму́щему.
Припев: Святителю отче Геннадие, моли Бога о нас.
Предста́тель те́плый бу́ди о на́с, Генна́дие, ста́до твое́, от волко́в гу́бящих е́, огради́, па́че же сло́вом Боже́ственным напита́й ду́ши гла́дныя, да тя́ вси́ велича́ем.
Сла́ва Отцу́ и Сы́ну и Свято́му Ду́ху:
Тро́ичен: Иже Божество́ Еди́но ве́дети мня́щий, Тро́ическаго же богоче́стия отверга́ющийся, не в небе́сных, но в преиспо́днейших земли́ отца́ себе́ обрето́ша, и́же ни еди́ну тва́рь сотвори́, ни роди́, то́чию вся́кую лжу́ от утро́бы изведе́ своея́ и всыновле́ние свое́ дарова́ благоволи́вшим к непра́вде.
И ны́не и при́сно и во ве́ки веко́в. Ами́нь.
Богоро́дичен: Све́том Сы́на Твоего́ ду́ши на́ша просвети́ и по́мыслы осия́й, Блага́я Влады́чице, да чи́стым се́рдцем и мы́слию высо́кою Тя́ вси́ велича́ем.
Свети́лен:
Дне́сь Вели́кий Но́вегра́де, просвети́ся, восплещи́ пе́сньми духо́вными в па́мяти председа́теля твоего́ Генна́дия в ли́ке возсия́вша святи́телей твои́х, в ни́хже тебе́ похвала́ и утвержде́ние.
Молитва
О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Генна́дие, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со а́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны́ до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![святителя Геннадия, архиепископа Великаго Новaграда святителя Геннадия, архиепископа Великаго Новaграда](img_b/059.jpg)