16 декабря

Канон иной мученику Ангелию Хиосскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Лик а́нгельский, Ангели́ новому́чениче,/ и со́нмы страстоте́рпец/ восплеска́ша выспрь/ твоему́ ве́ры ра́ди терпе́нию и прекосло́вию/ и дух твой по благо́мудрию возведо́ша на Небеса ́/ со сла́вою ко Христу́ Бо́гу на́шему.

Кано́н второй, гла́с 1.

Пе́снь 1.

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Припев: Святый мучениче Ангели́, моли́ Бо́га о нас.

Тьму, соиме́нный А́нгелом, ра́зума моего́/ моли́твами твои́ми ко Го́споду, му́чениче, потреби́,/ да воспою́ тя в пе́снех,/ прия́вшаго честну́ю и Боже́ственную страсть.

Припев: Святый мучениче Ангели́, моли́ Бо́га о нас.

Пресла́вная страсть и заколе́ние твое́/ све́тлаго нам сотвори́ша пра́здника образ,/ побе́дный Ангели́, в пе́снех восхваля́ем тя.

Сла́ва Отцу́ и Сы́ну и Свято́му Ду́ху:

Го́рняя си́ла Боже́ственный дух твой яви́ша, му́чениче, соиме́нный А́нгелом,/ мо́ря же глубина́ от свере́пия судии́ те́ло твое́ утаи́.

И ны́не и при́сно и во ве́ки веко́в. Ами́нь.

Богоро́дичен: Ми́лости бе́здну ражда́ющая,/ поми́луй, уще́дри мою́ не́мощь, Богобла́гостная,/ и наста́ви к све́ту покая́ния.

Пе́снь 3.

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ и́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

Припев: Святый мучениче Ангели́, моли́ Бо́га о нас.

Попаля́емое огне́м се́рдце твое́/ ко Боже́ственней любви́ неся́й,/ преда́ся в заколе́нии во́льнем, соиме́нный А́нгелом, пречу́дне,/ сего́ ра́ди восхваля́ем тя.

Припев: Святый мучениче Ангели́, моли́ Бо́га о нас.

Вни́де в рвы,/ пренесе́ до́бре, Христо́в му́чениче Ангели́, вся му́ки,/ и, смерть прия́вый,/ же́ртва непоро́чная Христу́ принесе́ся.

Сла́ва Отцу́ и Сы́ну и Свято́му Ду́ху:

Собира́ющихся в па́мять твою́/ и восхваля́ющих ве́рою те́плою твои́ по́двиги и заколе́ние во́льное, Ангелй,/ от губи́тельства лю́таго защити́ и от вся́каго зла.

И ны́не и при́сно и во ве́ки веко́в. Ами́нь.

Богоро́дичен: Яви́ ми путь спасе́ния,/ сего́ же ра́ди Ца́рство Небе́сное насле́дую, Бла́гая, недосто́йный раб Твой,/ и услы́шу Трисвяту́ю песнь, ра́дуяся.

Седа́лен, гла́с 3:

Пото́ки крове́й твои́х зе́млю напои́л еси́,/ но и мо́ре ты освяти́л еси́ телесе́м твои́м,/ в него́же низве́ржен бысть неми́лостивным и злым свире́пием, Ангели́,/ те́мже мо́лим тя:/ су́щих на земли́ и пла́вающих спаси́ от вся́ких бед/ Боже́ственным твои́м, страстоте́рпче, промышле́нием.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возымену́ю Тя?/ Недоумева́ю и ужаса́юся./ Те́мже, я́ко повеле́н бых, вопию́:/ ра́дуйся, Благода́тная.

Пе́снь 4.

Ирмо́с: Ду́хом прови́дя, проро́че Авваку́ме, Словесе́ вопло́щение,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Припев: Святый мучениче Ангели́, моли́ Бо́га о нас.

Духа благода́ть, поста́вивши шате́р в Тебе́,/ вся оста́вити ми́ра красоту́, му́чениче сла́вный Ангели́,/ пону́ди тя и наслажде́ние, и соверше́нный плод Боже́ственный Бо́гу бы́ти.

Припев: Святый мучениче Ангели́, моли́ Бо́га о нас.

Страсть твоя́, му́чениче Богому́дре Ангели́,/ пра́здника о́бразу све́тлому причасти́/ возлюби́вших тя, непобеди́мый новому́чениче, красота́ и сла́ва,/ темже, собра́вшеся, воспева́ем тя.

Сла́ва Отцу́ и Сы́ну и Свято́му Ду́ху:

Мо́ре гроб твой сотвори́ся,/ ты неви́димо предста́ни и свободи́ от злых к тебе́ вопию́щих в ве́ре и благоче́стии/ и ско́рое твое́ предста́тельство прося́щих в треволне́нии и бу́рях.

И ны́не и при́сно и во ве́ки веко́в. Ами́нь.

Богоро́дичен: Поми́луй мя, Еди́ная, ми́лости Исто́чник, Богоро́дице, породи́вши,/ и свободи́ боле́зней души́ моея́ и безчу́вствия се́рдца,/ и даждь покая́ние и лю́тых избавле́ние.

Пе́снь 5

Ирмо́с: Твой мир даждь нам,/ Сы́не Бо́жий,/ ино́го бо, ра́зве Тебе́, Бо́га не зна́ем,/ и́мя Твое́ имену́ем,/ я́ко Бог живы́х и ме́ртвых еси́.

Припев: Святый мучениче Ангели́, моли́ Бо́га о нас.

Твои́ми моли́твами даждь нам, Христо́в страстоте́рпче,/ разреше́ние зол и грех отпуще́ние,/ сла́вящим твою́ страсть и целу́ющим написа́ние о́браза твоего́.

Припев: Святый мучениче Ангели́, моли́ Бо́га о нас.

Я́ко возлю́бленнаго Христа́ тя воспева́ем, му́чениче,/ я́ко страсте́й приобщи́вшагося/ и соверше́нную и неизрече́нную ко Христу́ любо́вь име́ющаго.

Сла́ва Отцу́ и Сы́ну и Свято́му Ду́ху:

Я́ко со́лнце, возсия́ па́мять твоя́ све́тлая,/ все сердца́ Боже́ственно просвеща́ющая/ и любо́вию Бо́га, венча́ющаго тя, согрева́ющая, блаже́нне.

И ны́не и при́сно и во ве́ки веко́в. Ами́нь.

Богоро́дичен: Цари́цу Де́ву Тя пропове́да Дави́д, Пречи́стая,/ сего́ ра́ди молю́ Тя:/ Небе́снаго Ца́рствия мя сотвори́ насле́дника, да Тя ублажа́ю.

Пе́снь 6.

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Припев: Святый мучениче Ангели́, моли́ Бо́га о нас.

Превосхо́дит вои́стинну похва́льныя обы́чаи терпе́ние мно́гое,/ его́же показа́л еси́, всечу́дне, вели́колепие.

Припев: Святый мучениче Ангели́, моли́ Бо́га о нас.

Небе́сный в тебе́ огнь разжига́ся, му́чениче,/ его́же Госпо́дь вложи́,/ прии́де Блаже́нный на зе́млю и опали́ се́рдце твое́ в Боже́ственной любве́.

Сла́ва Отцу́ и Сы́ну и Свято́му Ду́ху:

В ра́дости духо́вней, новому́чениче Ангели́,/ благочеству́ющих мно́жество твою́ па́мять соверша́ет/ и воспева́ет Боже́ственную страсть и боре́ние.

И ны́не и при́сно и во ве́ки веко́в. Ами́нь.

Богоро́дичен: Ма́терь Бо́жию и красне́йшую в жена́х, молю́ Тя приле́жно:/ не оста́ви мя, но поми́луй и от вся́каго вреда сохрани́.

Конда́к, глас 3:

Свята́го тя му́ченик лик, Ангели́, прия́,/ ты же, на Небесе́х ны́не ра́дуяся, пострада́л еси́,/ и зако́нно, бла́гому́дрый, посрами́л еси́ мучи́телей безбо́жную си́лу,/ и вене́ц взял еси́ нетле́ния, ору́жием посече́нный.

Икос:

Вы́шняго жития́ ве́чнаго хотя́й дости́гнути, соиме́нный А́нгелом/ и ангелому́дрый Ангелй, новому́ченик Христо́в достосла́вный,/ ни́жнее тле́ние разу́мно оста́вил еси́,/ сего́ ра́ди во́лею преда́л еси́ себе́ свире́пию и посрамле́нию мучи́телей/ и безбо́жную си́лу и горде́ние размета́л еси́/ безстра́шным предстоя́нием и дерзнове́нием сло́вес твои́х,/ их же ра́ди нече́стие обличи́л еси́,/ Христа́ же пропове́дал еси́,/ Бо́га соверше́ннаго и соверше́ннаго Челове́ка,/ сего́ ра́ди вене́ц нетле́ния взял еси́, ору́жием посече́нный.

Пе́снь 7.

Ирмо́с: Пещь, Спа́се, ороша́шеся,/ о́троцы же, лику́юще, поя́ху:/ отце́в Бо́же, благослове́н еси́.

Припев: Святый мучениче Ангели́, моли́ Бо́га о нас.

Ра́ны мно́гия, их же прия́л еси́,/ темни́цы страсть и смерть, соиме́нный А́нгелом,/ ве́рно воспева́ем и восхваля́ем.

Припев: Святый мучениче Ангели́, моли́ Бо́га о нас.

О, те́плаго твоего́ ко Го́споду рачи́тельства,/ о, твоего́ терпе́ния и любве́!/ То́йже тя от тле́ния жи́зни изведе́ к нетле́нию.

Сла́ва Отцу́ и Сы́ну и Свято́му Ду́ху:

Зако́нно, страстоте́рпче, подвиза́яся, ве́ру к Творцу́ сохрани́л еси́,/ сего́ ра́ди есть тебе́ побе́дный вене́ц, соиме́нный А́нгелом.

И ны́не и при́сно и во ве́ки веко́в. Ами́нь.

Богоро́дичен: О́блак Тя разуме́ю, Богоневе́сто,/ Со́лнце сла́вы поро́ждший,/ све́том озаря́яй нощь мои́х прегреше́ний.

Пе́снь 8.

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Припев: Святый мучениче Ангели́, моли́ Бо́га о нас.

Удиви́л еси́ горе́ А́нгел ли́ки/ и у́жасу прича́ствовал еси́ челове́ком, Ангели́,/ и бе́сы, ви́дяще поспеше́ние к заколе́нию, устраши́лися.

Припев: Святый мучениче Ангели́, моли́ Бо́га о нас.

Ору́жие те́ло разлучи́ и ду́шу твою́,/ но ты взы́де ко Христу́,/ ны́не ца́рствуеши с Ним, Ангели́,/ и живе́ши в сла́ве во вся ве́ки.

Сла́ва Отцу́ и Сы́ну и Свято́му Ду́ху:

Дух твой взы́де к А́нгел лико́м,/ те́ло же пове́ржено бысть в мо́ря глубину́,/ ты яви́ся обличи́ти мучи́телей го́рько на неми́лостивом суди́щи.

И ны́не и при́сно и во ве́ки веко́в. Ами́нь.

Богоро́дичен: Возведи́ лежащего мя в глубине́ злых,/ ны́не боря́щих мя побори́ враг,/ вредя́щих безме́стными сластьми́ ду́шу, Чи́стая,/ не осуди́, но поми́луй и спаси́.

Песнь 9

Ирмо́с: Светоно́сный о́блак, в о́ньже всех Влады́ка,/ я́ко дождь с Небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

Припев: Святый мучениче Ангели́, моли́ Бо́га о нас.

Светоно́сную ду́шу твою́ А́нгел ли́ки и му́ченик, Ангели́,/ и пра́ведник со́нмы с любо́вию поя́ша све́тле,/ ко Христу́ приведо́ша Влады́це,/ и́же прия́ ю ра́достне, я́ко неве́сту избра́нную.

Припев: Святый мучениче Ангели́, моли́ Бо́га о нас.

Вельми́ све́тлый день и ра́достный яви́ся, му́ченик Го́спода Ангели́,/ в не́мже ты пострада́л еси́ с любо́вию и Боже́ственным рачи́тельством Христо́вым,/ просла́вил еси́ его́ Боже́ственными страстя́ми твои́ми,/ и, венце́м увенча́выйся побе́дным, взы́де ко Христу́.

Сла́ва Отцу́ и Сы́ну и Свято́му Ду́ху:

Све́тлый ны́не день наста́,/ в немже мно́жество ве́рных помина́ет па́мять твою́, и дела́ твои́,/ и кончи́ну твою́ блаже́нную, соиме́нный А́нгелом му́чениче,/ темже поми́луй чту́щих тя ве́рно.

И ны́не и при́сно и во ве́ки веко́в. Ами́нь.

Богоро́дичен: Свет породи́вши Боже́ственный,/ омраче́ннаго мя ко́зньми вра́жиими и ле́ностию живу́щаго,/ гне́вающаго Бо́га, Непоро́чная, просвети́,/ наста́ви к до́брым дея́ниям,/ я́ко вина́ су́щи вся́каго добраго.

Свети́лен:

Наде́ющихся на тя ны́не, до́брый страстоте́рпче, прии́мая,/ в День Су́дный не погуби́ наде́жду,/ бу́дет к Бо́гу же любо́вь и ко вся́кому мно́жеству А́нгел и святы́х.

Молитва

О святы́й уго́дниче Бо́жий, му́чениче Ангели́! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.