16 декабря

Канон мученику Ангелию Хиосскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Лик а́нгельский, Ангели́ новому́чениче,/ и со́нмы страстоте́рпец/ восплеска́ша выспрь/ твоему́ ве́ры ра́ди терпе́нию и прекосло́вию/ и дух твой по благо́мудрию возведо́ша на Небеса ́/ со сла́вою ко Христу́ Бо́гу на́шему.

Кано́н, гла́с 4.

Пе́снь 1.

Ирмо́с: Мо́ря чермную пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Припев: Святый мучениче Ангели́, моли́ Бо́га о нас.

Я́ко дру́га бли́жняго Влады́ки тя ве́рно хва́ли́м,/ я́ко дерзнове́ние иму́ща мно́гое к Нему́, соиме́нный А́нгелом,/ я́ко страстоте́рпец непобеди́мый и достохва́льный.

Припев: Святый мучениче Ангели́, моли́ Бо́га о нас.

Претерпе́ любо́вию Христа́ и рачи́тельством, пора́довавыйся ду́хом,/ темни́цу, му́ки и усекнове́ние главы́ твоея́, новому́чениче,/ и, я́ко же́ртва непоро́чная и приноше́ние, ему́ принесе́ся.

Сла́ва Отцу́ и Сы́ну и Свято́му Ду́ху:

Лица́ твоего́ мно́зей све́тлости вся удиви́шася ди́вней, му́чениче Ангели́,/ е́юже, мертв уже́, блиста́я по Боже́ственней благода́ти, пресла́вне.

И ны́не и при́сно и во ве́ки веко́в. Ами́нь.

Богоро́дичен: Пои́стине родила́ еси́ Бо́га и Го́спода, Богоро́дице,/ Еди́ная, и Избра́нная, и Чи́стая,/ сего́ же ра́ди ве́рно Тя хва́лим и вои́стину сла́вим.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Припев: Святый мучениче Ангели́, моли́ Бо́га о нас.

Ра́довашеся в темни́це, ра́ны, А́нгели́, име́л еси́,/ Ты моя́, Христе́, си́ла, – вопия́, –/ и кре́пость моя́ непобеди́мая.

Припев: Святый мучениче Ангели́, моли́ Бо́га о нас.

Разруши́л еси́ му́жески велехвале́ния го́рдость ага́рян, хра́бре,/ словесы́ твои́ми/ и обличи́л еси́ нече́стие.

Сла́ва Отцу́ и Сы́ну и Свято́му Ду́ху:

Воспева́ем ра́ны твои́, Ангели́, и во мра́це затворе́ние,/ и́мже кре́пце ну́жен бысть,/ и усекнове́ние главы́ твоея́.

И ны́не и при́сно и во ве́ки веко́в. Ами́нь.

Богоро́дичен: Покро́ве светоза́рный вои́стинну вся́каго естества́,/ све́те таи́нственный Христа́,/ све́та луча́ дай ми.

Седа́лен, гла́с 3:

Пото́ки крове́й твои́х зе́млю напои́л еси́,/ но и мо́ре ты освяти́л еси́ телесе́м твои́м,/ в него́же низве́ржен бысть неми́лостивным и злым свире́пием, Ангели́,/ те́мже мо́лим тя:/ су́щих на земли́ и пла́вающих спаси́ от вся́ких бед/ Боже́ственным твои́м, страстоте́рпче, промышле́нием.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возымену́ю Тя?/ Недоумева́ю и ужаса́юся./ Те́мже, я́ко повеле́н бых, вопию́:/ ра́дуйся, Благода́тная.

Пе́снь 4.

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Припев: Святый мучениче Ангели́, моли́ Бо́га о нас.

Бие́нием ли́ка и пе́рсей тя умертви́ти хоте́ша,/ сего́ ра́ди уя́звлен ра́нами был еси́,/ и честну́ю главу́ твою́ отсеко́ша, му́чениче страстоте́рпче Ангели́.

Припев: Святый мучениче Ангели́, моли́ Бо́га о нас.

По обы́чаю и любви́, му́чениче,/ прославля́ю по́двиги, и свято́е твое́ заколе́ние,/ и проли́тие кро́ви, и к Христу́ Боже́ственное рачи́тельство.

Сла́ва Отцу́ и Сы́ну и Свято́му Ду́ху:

Моли́твами твои́ми ко Го́споду, новому́чениче,/ чту́щих тя защити́ от напа́стей теле́сных и душе́вных/ на земли́ и на мо́ре во вся́кое вре́мя, соиме́нный А́нгелом.

И ны́не и при́сно и во ве́ки веко́в. Ами́нь.

Богоро́дичен: Законода́вца ро́ждши и Светода́вца,/ лю́тую разруши́ тьму ума́ моего́ Твои́х моли́тв све́том/ и спаси́ мя, Влады́чице, оскверне́ннаго, Чи́стая.

Пе́снь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Припев: Святый мучениче Ангели́, моли́ Бо́га о нас.

Ран губи́тельства, лю́таго и зла́го обстоя́ния/ моли́твами твои́ми, новому́чениче, к Бо́гу предстоя́л, изба́ви, соиме́нный А́нгелом.

Припев: Святый мучениче Ангели́, моли́ Бо́га о нас.

Прише́ствие губи́тельства моли́твами твои́ми удержи́ дале́че/ от восхваля́ющих па́мять твою́ всесвяту́ю, соиме́нный А́нгелом.

Сла́ва Отцу́ и Сы́ну и Свято́му Ду́ху:

Боле́зни злой изба́ви раб твои́х, тя воспева́ющих,/ и губи́тельства стра́шнаго моли́твами твои́ми, соиме́нный А́нгелом.

И ны́не и при́сно и во ве́ки веко́в. Ами́нь.

Богоро́дичен: Рай живота́, Богоро́дице, су́щи,/ сме́рти грехо́вныя и страсте́й многообра́зных свободи́ мя ско́ро.

Пе́снь 6.

Ирмо́с: Пожру Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Припев: Святый мучениче Ангели́, моли́ Бо́га о нас.

Поима́ет тя, Ангели́, храни́телем, стра́жем/ и засту́пником ве́лиим в напа́стех вся́ких о́стров Хио́с,/ в немже и свяще́нную кровь изли́л еси́.

Припев: Святый мучениче Ангели́, моли́ Бо́га о нас.

Чту́ще твое́, Ангели́, заколе́ние во́льное и благи́я дея́ния,/ пра́здник по вся ле́та соверша́ем/ и твоего́ предста́тельства про́сим.

Сла́ва Отцу́ и Сы́ну и Свято́му Ду́ху:

Освяти́лися суть земля́, кровь твою́ прии́мши,/ во́здух же – твой дух/ и мо́ря глубина́ – те́ло,/ сего́ ра́ди спаси́ су́щих на земли́ и на мо́ре моли́твами твои́ми.

И ны́не и при́сно и во ве́ки веко́в. Ами́нь.

Богоро́дичен: Еди́ну Тя честне́йшую ве́даем, Всесвята́я, Херуви́м,/ я́ко ро́ждшую Све́та Пода́теля, Богоро́дице,/ его́же умоли́ к Све́ту мя всели́ти незаходи́мому.

Конда́к, глас 3:

Свята́го тя му́ченик лик, Ангели́, прия́,/ ты же, на Небесе́х ны́не ра́дуяся, пострада́л еси́,/ и зако́нно, бла́гому́дрый, посрами́л еси́ мучи́телей безбо́жную си́лу,/ и вене́ц взял еси́ нетле́ния, ору́жием посече́нный.

Икос:

Вы́шняго жития́ ве́чнаго хотя́й дости́гнути, соиме́нный А́нгелом/ и ангелому́дрый Ангелй, новому́ченик Христо́в достосла́вный,/ ни́жнее тле́ние разу́мно оста́вил еси́,/ сего́ ра́ди во́лею преда́л еси́ себе́ свире́пию и посрамле́нию мучи́телей/ и безбо́жную си́лу и горде́ние размета́л еси́/ безстра́шным предстоя́нием и дерзнове́нием сло́вес твои́х,/ их же ра́ди нече́стие обличи́л еси́,/ Христа́ же пропове́дал еси́,/ Бо́га соверше́ннаго и соверше́ннаго Челове́ка,/ сего́ ра́ди вене́ц нетле́ния взял еси́, ору́жием посече́нный.

Пе́снь 7.

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Припев: Святый мучениче Ангели́, моли́ Бо́га о нас.

Прииди́те, страстолю́бцы, потече́м с любо́вию/ и по вся ле́та све́тло пра́здник почти́м све́тлаго новому́ченика,/ в пе́снех изя́ществию его́ пле́щуще.

Припев: Святый мучениче Ангели́, моли́ Бо́га о нас.

Ка́ко восписа́ся в тебе́, му́чениче, благода́ть Свята́го ду́ха/ и умно́жися чрез покая́ние и мучение!

Сла́ва Отцу́ и Сы́ну и Свято́му Ду́ху:

Со Иа́ковом Ангели́ и с Панха́рием воспое́м/ и с о́троки страстотерпцы и с Петро́м зело́ прославля́ем,/ со учени́к мно́жеством, я́ко побе́ду.

И ны́не и при́сно и во ве́ки веко́в. Ами́нь.

Богоро́дичен: Неизрече́нно во чре́ве сла́вно прия́вшей Бо́га бла́гоутро́бия ра́ди,/ челове́ки сла́вимой, ве́рнии, поклони́мся,/ я́ко Ма́тери Бо́жией Благослове́нной.

Пе́снь 8.

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Припев: Святый мучениче Ангели́, моли́ Бо́га о нас.

Главы́ и пе́рсей ра́ны, и о́чию сле́зы,/ и из глубины́ воздыха́ния се́рдца, всеми́лостивый, пострада́ти изво́ли.

Припев: Святый мучениче Ангели́, моли́ Бо́га о нас.

Главы́ и пе́рсей ра́ны, и о́чию сле́зы,/ и из глубины́ воздыха́ния се́рдца, всеми́лостивый, пострада́ти изво́ли.

Сла́ва Отцу́ и Сы́ну и Свято́му Ду́ху:

Воспева́юще сла́ву страсте́й твои́х,/ к Бо́гу тя хода́тая нарица́ем,/ злых избавле́ние и грех оставле́ние, Богому́дре му́чениче,/ тя про́сим, рабы́ твои́.

И ны́не и при́сно и во ве́ки веко́в. Ами́нь.

Богоро́дичен: Мно́гия нас спа́сают Твои́ щедро́ты, Всесвята́я Ма́терь Бо́жия,/ от грех и напа́стей,/ Ты бо, ро́ждшая Бо́га, ми́луеши весь мир.

Песнь 9

Ирмо́с: Я́ко одушевле́нному Бо́жию Киво́ту,/ да ника́коже ќоснется рука́ скве́рных,/ устне́ же ве́рных Богоро́дице немо́лчно,/ глас А́нгела воспева́юще, с ра́достию да вопию́т:/ ра́дуйся, Благода́тная, Госпо́дь с Тобо́ю.

Припев: Святый мучениче Ангели́, моли́ Бо́га о нас.

Сликовству́еши со А́нгел чи́ны/ и с му́ченик со́нмы ра́дуешися на Небесе́х,/ в це́ркве песньми немо́лчными, му́чениче, сла́вим,/ Богонача́льствие блиста́ния непристу́пнаго, блаже́нне, приима́яй при́сно.

Припев: Святый мучениче Ангели́, моли́ Бо́га о нас.

В Небе́сных селе́ниих живя́й, в ме́сте разу́мнем, му́чениче Госпо́день,/ иде́же ли́ки а́нгельсти́и и святы́х ви́дят красоту́ неизрече́нную,/ о блаже́нне, услы́ши и моли́ся за ве́рных,/ чту́щих тя ны́не.

Сла́ва Отцу́ и Сы́ну и Свято́му Ду́ху:

С любо́вию Боже́ственную па́мять твою́ песньми сла́вящему, му́чениче Богому́дре,/ даждь, Ангели́, твои́ми мольба́ми Богоприя́тными злых свободи́тися/ и печа́лей и зол оставле́ние,/ име́яй дерзнове́ние мно́гое, я́ко му́ченик Христа́ Бо́га.

И ны́не и при́сно и во ве́ки веко́в. Ами́нь.

Богоро́дичен: Я́ко пресве́тлую, Богоро́дице, души́ чи́стую иму́щи красоту́,/ благода́тию же Боже́ственною с Небесе́ насыща́ющи,/ Све́том присносу́щным озаря́еши воспева́ющих Тя, Де́во Чи́стая.

Свети́лен:

Ве́ру Боже́ственную, Ангели́, ю́же отве́ргше пе́рвее,/ восприя́, блаже́нне,/ и пропове́да а́бие пред безбо́жными мучи́тели,/ и, пролия́вый свою́ кровь,/ и́стинно пребыва́еши нам наде́жда и любо́вь.

Молитва

О святы́й уго́дниче Бо́жий, му́чениче Ангели́! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.