15 декабря

Канон блаженному мученику, младому царю Урошу Сербскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь свята́го, гла́с 3:

Юношески процве́л еси́ во оте́чествии твое́м добро́тою украше́н, и непра́ведную и безвре́менную сме́рть подъя́л еси́, Уроше всече́стне; ца́рскаго ко́рене пло́д сла́док, а́ще и не во вре́мя созре́в, в Госпо́дню жи́тницу всели́лся еси́, и жа́лость ве́лию сро́дству твоему́ оста́вил еси́. Моли́ся о на́с, творя́щих святу́ю па́мять твою́.

Кано́н свята́го Уроша, гла́с 4.

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Святый мучениче Уроше, моли Бога о нас.

Пе́рвее грехо́вным не приобщи́вся жела́нием, зла́та честне́йший показа́лся еси́, я́ко от ко́рене благоро́дна изра́сл еси́ блаже́нне.

Припев: Святый мучениче Уроше, моли Бога о нас.

Аще и гони́тель тво́й бы́сть Волкаши́н, но ра́вен произше́л еси́ роди́телем твои́м, де́лы и словесы́ подо́бяся, и я́коже звезда́, просия́л еси́, блаже́нне.

Сла́ва Отцу́ и Сы́ну и Свято́му Ду́ху:

Иже зако́нную се́нь премину́в, Уроше, к ше́ствию небе́сному возше́л еси́, ра́дуяся, и Тро́ице предстои́ши, сего́ ра́ди блажи́м па́мять твою́.

И ны́не и при́сно и во ве́ки веко́в. Ами́нь.

Богоро́дичен: Агницу Тя́ посреде́ те́рния обре́т, не вла́емое Приста́нище и к Бо́гу Руководи́тельницу кре́пкую, Ма́ти Де́во Влады́чице.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Святый мучениче Уроше, моли Бога о нас.

Се́мене благоро́днаго цве́т прекра́сен показа́лся еси́ напосле́док явле́нием честны́х моще́й твои́х, в похвалу́ сро́дству твоему́, всеблаже́нне Уроше.

Припев: Святый мучениче Уроше, моли Бога о нас.

Еще от рожде́ния блага́я о́трасль показа́лся еси́, все́ми ви́ды доброде́телию, ревну́я прароди́телем твои́м, це́ркви воздвиза́я, и и́нны потвержда́я.

Сла́ва Отцу́ и Сы́ну и Свято́му Ду́ху:

Из нача́ла о Бо́зе пева́емыя пе́сни, всю́ду прослу́ся и́мя твое́ явле́нием честны́х моще́й твои́х, многострада́льне Уроше всему́дре, назира́й на́с.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, Чи́стая Де́во, и не забу́ди на́с, моля́щихтися, в ту́зе су́щих и ско́рбех, Твою́ ми́лость изле́й на на́с, мо́лимтися, Влады́чице.

Седа́лен, гла́с 8. Подо́бен: Прему́дрости.

Прему́дре, досто́ин бы́л еси́ и́менем и де́лом, роди́телем твои́м подо́бяся, и сро́дству твоему́ обновле́ние твори́ши, Бо́гу просла́вльшу тя́ в животе́, Иже и по сме́рти просла́вил тя́ е́сть в похвалу́ сро́дству твоему́, многострада́льне и преблаже́не Уроше всече́стне, моли́ Христа́ Бо́га, грехо́в оставле́ние пода́ти, чту́щим любо́вию святу́ю па́мять твою́. [Два́жды.]

Сла́ва, и ны́не, Богоро́дичен:

Небе́сную две́рь и киво́т, всесвяту́ю го́ру, светоза́рный о́блак воспои́м, небе́сную ле́ствицу, слове́сный ра́й, Евино избавле́ние, вселе́нныя всея́ вели́кое сокро́вище, я́ко спасе́ние в Не́й соде́лася ми́рови и оставле́ние дре́вних согреше́ний. Сего́ ра́ди вопие́м Ти́: моли́ Сы́на Твоего́ и Бо́га прегреше́ний оставле́ние дарова́ти, благоче́стно покланя́ющеся Пресвято́му Рождеству́ Твоему́.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Святый мучениче Уроше, моли Бога о нас.

Неизглаго́ланная твоя́ чудоде́йствия, я́же напосле́док показа́шася, Уроше всему́дре, не забу́ди сро́дства твоего́ и поми́луй на́с, моля́щихтися.

Припев: Святый мучениче Уроше, моли Бога о нас.

Еже от нача́ла Безнача́льному Сло́ву ве́ровал еси́ и роди́телю единоро́ден бы́л еси́, и ца́рскою диади́мою украша́ют тя́ в сла́ву и похвалу́ сро́дству твоему́.

Сла́ва Отцу́ и Сы́ну и Свято́му Ду́ху:

Доброде́тели твоя́ и красоту́ кто́ изрещи́ мо́жет? Удиви́л бо еси́ все́х, приходя́щих к ра́це моще́й твои́х, ра́зумом превосходя́ мно́гия.

И ны́не и при́сно и во ве́ки веко́в. Ами́нь.

Богоро́дичен: Хвалы́ моле́бныя к Тебе́ воспуща́ю, Пречи́стая Влады́чице, не забу́ди на́с, но моли́ся о на́с к Ро́ждшемуся из Тебе́, да спасе́т Тебе́ ра́ди ду́ши на́ша.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Святый мучениче Уроше, моли Бога о нас.

О, непра́ведныя сме́рти и безвре́менныя, ю́же подъя́л еси́ Уроше всече́стне! Превы́шше бо в ра́дости пребыва́еши с ли́ки избра́нными.

Припев: Святый мучениче Уроше, моли Бога о нас.

Стезе́ю оте́ческою ше́ствовал еси́ всеизря́дною, чудесы́ удиви́л еси́ сро́дство твое́, ра́ка же твоя́ исцеле́ния подава́ет, Уроше блаже́нне.

Сла́ва Отцу́ и Сы́ну и Свято́му Ду́ху:

Твоя́ па́мять дне́сь весе́лия все́х исполня́ет, и́же, удивля́ющеся, глаго́лют: сла́ва благоутро́бию Твоему́, Христе́ Царю́, да́вшему на́м сие́ украше́ние.

И ны́не и при́сно и во ве́ки веко́в. Ами́нь.

Богоро́дичен: Ты́ еси́ все́м Помо́щница, и и́стинная христиа́ном Засту́пница, и Покрови́тельница, и спасе́ние ду́ш на́ших.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Святый мучениче Уроше, моли Бога о нас.

От о́трасли благоро́дныя просия́л еси́, му́дростию и ра́зумом все́х превозше́л еси́, и безвре́менную сме́рть подъе́м, венце́м му́ченическим венча́лся еси́, сла́вне.

Припев: Святый мучениче Уроше, моли Бога о нас.

Твои́м явле́нием Се́рбская о́бласть ра́дуется, и сро́дство твое́ напосле́док твои́м явле́нием просвети́л еси́, не забу́ди и на́с, моля́щихся тебе́.

Сла́ва Отцу́ и Сы́ну и Свято́му Ду́ху:

На спасе́нную стезю́ наста́ви на́с ходи́ти при́сно, и почита́ти тя́, и па́мять твою́ соверша́ти, и богоуго́дно пожи́ти в честне́м хра́ме твое́м.

И ны́не и при́сно и во ве́ки веко́в. Ами́нь.

Богоро́дичен: Пречи́стая Де́во Ма́ти Иису́с Христо́ва, поми́луй и спаси́ и́же ве́рою к Тебе́ прибега́ющия, я́ко на Тя́ с Бо́гом упова́ние и́мамы.

Конда́к, гла́с 6. Подо́бен: Рукопи́саннаго.

Отрасли благоро́дныя цве́т прекра́сный яви́лся еси́, Уроше всече́стне, за́вистию бо убие́н бы́л еси́ от твои́х при́сных, Бо́жиим же Ду́хом просвеще́н, святоро́днаго пле́мене, свя́т бы́л еси́, и му́ченическим венце́м увя́зся, в черто́зе Небе́снем водворя́ешися. Моли́ся о на́с, свя́те, творя́щих любо́вию па́мять твою́.

Икос:

Кто досто́ин устне́ отве́рзсти или́ язы́к дви́гнути и похвали́ти, хвали́маго Бо́гом, оба́че в толи́ко вре́мя в тиме́нии земно́м пребы́в, от Христа́ Спа́са вене́ц прия́л е́сть, и дарова́ньми исцеле́ний обогати́вся, исцеле́ния да́р прия́т, и че́стен страда́лец показа́ся, принося́ моле́ние Благоде́телю, и прие́м сла́ву с небесе́ и вене́ц добро́ты, и мо́лится о творя́щих любо́вию па́мять его́.

Пе́снь 7.

Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Святый мучениче Уроше, моли Бога о нас.

Твою́ оби́тель вску́ю забы́л еси́? Воспряни́ у́бо, си́лою прароди́тель твои́х и испроси́ от Го́спода по́мощь и заступле́ние твое́й оби́тели, я́ко да пое́м: оте́ц на́ших Бо́же, благослове́н еси́.

Припев: Святый мучениче Уроше, моли Бога о нас.

Почита́ю мо́щи твоя́, и покланя́юся: исцеле́ние бо подае́ши ве́рою приходя́щим. Пода́ждь и на́м ми́рное житие́ во оби́тели твое́й, пою́щим: оте́ц на́ших Бо́же благослове́н еси́.

Сла́ва Отцу́ и Сы́ну и Свято́му Ду́ху:

Отрок бы́л еси́, небе́снаго жили́ща хода́тай, вся́кими бо добро́тами украше́н, уби́йственною я́звою измени́л еси́ живо́т тво́й, они́ у́бо студа́ испо́лнишася, ты́ же вопие́ши: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Све́тлыми заря́ми всю́ зе́млю, возсия́вшее Со́лнце от свята́го чре́ва твоего́ озаря́ет, Влады́чице, и́мже и на́с просвети́ Твое́ю ми́лостию, вопию́щих: препе́тый отце́в Госпо́дь и Бо́г, благослове́н еси́.

Пе́снь 8.

Ирмо́с: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Святый мучениче Уроше, моли Бога о нас.

Юношески пожи́в во оте́чествии твое́м, и блажи́т тя́ сро́дство твое́, и весе́лием ра́дуется твоему́ объявле́нию, дивя́ся, глаго́лет: Го́спода по́йте, дела́, и превозноси́те Его́ во вся́ ве́ки.

Припев: Святый мучениче Уроше, моли Бога о нас.

Треплете́нный восприя́л еси́ вене́ц от Вы́шняго Дарода́теля, изря́ден бы́в твое́й оби́тели и це́рковь просвети́в мощми́ твои́ми, вопия́: Го́спода по́йте дела́, и превозноси́те Его́ во вся́ ве́ки.

Сла́ва Отцу́ и Сы́ну и Свято́му Ду́ху:

Естество́ премени́в тле́нное, в ве́чныя оби́тели вше́л еси́, блаже́нне, и житию́ пресвято́му после́довал еси́ прароди́телей твои́х, вопия́: Го́спода по́йте, дела́, и превозноси́те Его́ во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Коне́ц благи́й пода́ти ми́, Де́во, Го́спода умоли́, да избу́ду ожида́ющих мя́ ве́чных му́к, я́ко да Тя́ пою́, Благослове́нная, во вся́ ве́ки.

Песнь 9

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Святый мучениче Уроше, моли Бога о нас.

Боже́ственное селе́ние ты́ бы́л еси́, пресве́тло просвети́вся, Уроше всеблаже́нне, сро́дство твое́ назира́й и от неду́г и бе́д избавля́й, да тя́ непреста́нно велича́ем.

Припев: Святый мучениче Уроше, моли Бога о нас.

Ле́сть искорени́л еси́ злу́ю, Правосла́вию ревну́я, прароди́телем твои́м чудесы́ подо́бяся, удиви́л еси́ зря́щия твоя́ пресла́вная чудеса́, блаже́нне.

Сла́ва Отцу́ и Сы́ну и Свято́му Ду́ху:

Жела́я уподо́битися блаже́нному Симео́ну, и святи́телю Са́вве, и ины́м сро́дством, до́бре пожи́вшим, и не лиши́л тя́ е́сть Вели́кий Дарода́тель, Уроше всече́стне.

И ны́не и при́сно и во ве́ки веко́в. Ами́нь.

Богоро́дичен: Приими́ на́ше ма́лое сие́ приноше́ние, о Всенепоро́чная Госпоже́ Влады́чице! И е́же от недосто́йных усте́н приноси́мое Ти́ моле́ние приими́ и не отри́ни, Всенепоро́чная Влады́чице.

Свети́лен. Подо́бен: Не́бо звезда́ми.

Ны́нешнюю сла́ву презре́л еси́, Вы́шнюю сла́ву получи́л еси́, и земны́ми небе́сная насле́довав, блаже́нне, Влады́це я́ко предстоя́, о на́с всегда́ моли́ся.

Молитва

О, святы́й уго́дниче Бо́жий блаже́нне Уроше, по́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал еси́ Госпо́дь всем лю́бящим Его́; те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.