15 декабря

Канон преподобному Афанасию, затворнику Печерскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Блаже́нство пла́чущих получи́ти жела́я, де́нь и но́щь непреста́нно пла́кал еси́, име́я во уме́ ча́с Су́дный, те́м по кончи́не твое́й обре́л еси́ утеше́ние на небеси́, преподо́бне Афана́сие. Пода́ждь и на́м пла́катися зде́ грехо́в на́ших вы́ну, я́ко да пла́ча безконе́чнаго избы́вше, та́мо прии́мем ве́чное утеше́ние.

Кано́н, гла́с 1.

Пе́снь 1.

Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Преподобне отче Афанасие, моли Бога о нас.

Бре́нными усты́ пе́ти сугу́бое твое́ успе́ние хотя́ща мя ны́не, о́тче, не пре́зри, но уще́дри, молю́тися, зовы́й ны́не в де́нь торжества́ твоего́, в о́ньже па́мять твоя́ просла́вися.

Припев: Преподобне отче Афанасие, моли Бога о нас.

Сме́ртною секи́рою посека́емь, в ми́ре се́м живо́т челове́ческий разуме́в, преподо́бне, да сокруши́ши ту́ собо́ю, к тве́рдому Ка́мени прите́кл еси́, и притупи́в доброде́тельми сме́ртныя прило́ги, пое́ши Бо́гу, я́ко просла́вися.

Сла́ва Отцу́ и Сы́ну и Свято́му Ду́ху:

Умер пе́рвее ми́ру отверже́нием того́ многостра́стных ловле́ний, стопы́ ше́ствий твои́х упра́вил еси́, свя́те, к Животу́ непозы́блемому: те́мже ны́не, сы́н Живота́ су́щи, при́зри на ны́, пою́щия в па́мяти твое́й Бо́гу, я́ко просла́вися.

И ны́не и при́сно и во ве́ки веко́в. Ами́нь.

Богоро́дичен: Умерщвле́нную мою́ ду́шу самохо́тными страстьми́, оживотвори́ти потщи́ся, Чи́стая Де́во: Ты́ бо еси́ Ма́ти Живота́ и подае́ши уме́ршим воста́ние.

Пе́снь 3.

Ирмо́с: Ка́мень, его́же небрего́ша зи́ждущии, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́с, ю́же от язы́к искупи́.

Припев: Преподобне отче Афанасие, моли Бога о нас.

Связа́лся еси́, преблаже́нне, богоуго́днаго жития́ ве́рвию, сме́рть у́бо плени́ся, не иму́щи на тебе́ вла́сти: а́ще бо и похи́ти тя́, но па́ки возврати́ти повеле́л е́сть мно́гим в по́льзу, Иже сме́ртию Свое́ю все́х от сме́рти искупи́.

Припев: Преподобне отче Афанасие, моли Бога о нас.

Ме́ртв свя́зан лежа́л еси́, о́тче, ма́нтии укро́ем на одре́, и Вы́шняго про́мысл чудотвори́ти тща́шеся тобо́ю: по двою́ бо дню́ возврати́ ду́шу твою́, и жи́в обре́лся еси́ во удивле́ние все́м зря́щим, и́же ви́дяху твое́ успе́ние.

Сла́ва Отцу́ и Сы́ну и Свято́му Ду́ху:

Боле́знь твоя́ не бя́ше, преподо́бне, к сме́рти, но к сла́ве Бо́жией: у́мерл бо, сме́рть, а́ки со́н, прия́л еси́ во отра́ду боле́зни твоея́, и по двою́ дню́, а́ки от сна́, воспря́нув, лице́ твое́ умыва́л еси́ струя́ми сле́зными.

И ны́не и при́сно и во ве́ки веко́в. Ами́нь.

Богоро́дичен: Боле́знь сме́ртную пресе́кшая Святы́м Рождество́м Твои́м и Живо́т да́вшая всему́ ми́ру, а́з еди́н оста́х, умерщвле́н скве́рными де́лы, Ма́ти Бо́жия, возложи́ на мя́ ру́ку, и живо́т лу́чший обря́щу.

Седа́лен, гла́с 8:

На безсме́ртие взира́я, да сме́рти ве́чныя избе́гнеши, живо́т те́сный избра́л еси́, Афана́сие преблаже́нне, во умерщвле́нном ти́ телеси́. Сего́ ра́ди, удивля́ющеся ди́вному на тебе́ смотре́нию, сла́вим Еди́наго Человеколю́бца, Иже даде́ все́м живо́т и нетле́ние.

Сла́ва, и ны́не, Богоро́дичен:

Сме́ртной повину́вшихся рабо́те свободи́ла еси́ Рождество́м Твои́м, Богоневе́сто Де́во, те́м Тя́ пе́сньми сла́вят христиа́нстии ро́ди, я́ко дала́ еси́ и́м живо́т и нетле́ние.

Пе́снь 4.

Ирмо́с: Взя́тся со́лнце, и луна́ ста́ в чи́не свое́м, возне́слся еси́, Долготерпели́ве, на дре́во и водрузи́л еси́ на не́м Це́рковь Твою́.

Припев: Преподобне отче Афанасие, моли Бога о нас.

Лежа́ безду́шен, воздви́глся еси́, и дыха́ние прие́мь, па́ки на бытие́ прише́л еси́, о́тче, е́же ви́девше, предстоя́щии со стра́хом славосло́виша Бо́жию си́лу.

Припев: Преподобне отче Афанасие, моли Бога о нас.

Ко́ль стра́шен ча́с сме́рти и Суда́, ви́дев, блаже́нне, го́рце рыда́я, молча́нием и воздыха́нием изъяви́л еси́, и бы́ша сле́зы твоя́ мно́гим написа́ние Суда́ стра́шнаго.

Сла́ва Отцу́ и Сы́ну и Свято́му Ду́ху:

При́сно исхо́д сво́й помина́я, свя́те, пла́кал еси́ в жи́зни се́й боле́зненной, и бо́льшая прибыва́ху ти́ рыда́ния, чу́вственне ви́девшу, како́в отходя́щии и́мут стра́х и тре́пет, его́же да убежи́м и мы́, моли́ся, о́тче преподо́бне.

И ны́не и при́сно и во ве́ки веко́в. Ами́нь.

Богоро́дичен: Суда́ стра́шнаго не бою́ся, ни страшу́ся го́рькия гее́нны, я́ко от мно́гих страсте́й окамене́ мое́ се́рдце. Се́чивом благоутро́бия Твоего́, Чи́стая Де́во Ма́ти, порази́ е́, да очувстви́тся па́мятию му́к стра́шных.

Пе́снь 5

Ирмо́с: Тво́й ми́р да́ждь на́м, Сы́не Бо́жий: ино́го бо, ра́зве Тебе́, Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Припев: Преподобне отче Афанасие, моли Бога о нас.

Тво́й пла́чь и неуте́шное рыда́ние предстоя́щии ви́девше, ужа́сни прося́ху, да ска́жеши и́м сло́во на по́льзу. Ты́ же три́ поле́зная сказа́л еси́ и́м: да храня́т послуша́ние, покая́ние и моли́тву, я́ко бо́льшия доброде́телей ине́х, в ни́хже и мы́ да утверди́мся, моли́ся, о́тче Афана́сие.

Припев: Преподобне отче Афанасие, моли Бога о нас.

Са́м послушли́в сы́й за́поведем Христо́вым, послуша́ние вы́ше все́х доброде́телей бы́ти бра́тии сказа́л еси́, преподо́бне, то́ бо и по сме́рти не умира́ет, но снабдева́ет живо́т с Бо́гом, Иже е́сть стра́шен Судия́ живы́м и ме́ртвым.

Сла́ва Отцу́ и Сы́ну и Свято́му Ду́ху:

Покая́ние и моли́тва — две́ криле́ о́гненне, и си́ми прехо́д неудержи́мь от мыта́рств возду́шных извести́л еси́, блаже́нне, молча́ния яви́л еси́ пути́, и́миже поте́кл еси́ на бо́льшая, наказа́ние оста́вль вопроси́вшим. И на́м да́ждь исправле́ние, де́нь весе́лия твоего́ соверша́ющим.

И ны́не и при́сно и во ве́ки веко́в. Ами́нь.

Богоро́дичен: Моли́твеннице ско́рая о христиа́нстем ро́де, Мари́е Де́во, моли́твы певе́ц Твои́х прие́мши в пречи́стыя дла́ни, принеси́ к Твоему́ Сы́ну и испроси́ на́м грехо́в проще́ние и тишину́ да́ждь су́щим в страсте́х.

Пе́снь 6.

Ирмо́с: Отве́ргл мя́ еси́ во глубины́ се́рдца морска́го, и спа́сл еси́ мя́, Спа́се, от рабо́ты сме́ртныя, и разреши́л еси́ у́зы беззако́ний мои́х.

Припев: Преподобне отче Афанасие, моли Бога о нас.

Отве́ргся коне́чнее живота́ и чу́вственнаго све́та ви́дети, в те́мен затво́р вше́л еси́, пременя́я чу́вственное на мы́сленнаго Све́та зре́ние, его́же и мы́ да улу́чим моли́твами твои́ми, о́тче, отве́ргшеся беззако́ний на́ших.

Припев: Преподобне отче Афанасие, моли Бога о нас.

Умерщвле́нную пло́ть по́стническими труды́ да оживи́ши, свя́те, струя́ми сле́з твои́х напая́л еси́ вы́ну, двана́десять ле́т пребы́в в пеще́ре, жи́в погребе́н, наде́ждою живота́ безсме́ртнаго оживля́емь.

Сла́ва Отцу́ и Сы́ну и Свято́му Ду́ху:

Дре́во жи́зненное пло́ть твоя́, Афана́сие преподо́бне, израсти́ покая́ния все́м плоды́, от ни́хже вкуси́ти да́ждь и мне́ любо́вию твое́ю, да укреплю́ся разреши́ти у́зы беззако́ний мои́х.

И ны́не и при́сно и во ве́ки веко́в. Ами́нь.

Богоро́дичен: Дре́во присноцвету́щее Ты́ еси́, Пречи́стая Де́во, пали́мых зно́ем беззако́ний покрыва́ющее се́нию Твое́ю. Се́ю и на́с покры́й, страстьми́ жего́мых, и воспое́м: ра́дуйся, Дре́во благосенноли́ственное, и́мже покрыва́ются мно́зи.

Конда́к, гла́с 5:

Яко безсме́ртия тезоимени́т, по уме́ртвии свое́м воста́л еси́ жи́в; показу́я же, я́ко зело́ люта́ е́сть сме́рть, пла́кался еси́ го́рько. Ны́не, обре́тши неконча́емую ра́дость, моли́ся о на́с, я́ко да пла́ча ве́чнаго избу́дем.

Пе́снь 7.

Ирмо́с: Су́щим в пещи́ отроко́м Твои́м, Спа́се, не прикосну́ся, ниже́ стужи́, о́гнь. Тогда́ трие́, я́ко еди́неми усты́, поя́ху и благословля́ху, глаго́люще: благослове́н Бо́г оте́ц на́ших.

Припев: Преподобне отче Афанасие, моли Бога о нас.

Жи́знь твою́ в пла́че и воздыха́нии проводи́в и струя́ми сле́з твои́х убели́в Ангельскаго о́браза ри́зу, отше́л еси́ в безплаче́вныя страны́, ра́дующися и пою́щи: благослове́н Бо́г оте́ц на́ших.

Припев: Преподобне отче Афанасие, моли Бога о нас.

Чи́ни Ангельстии в де́нь успе́ния твоего́ приспе́ша, и ду́х тво́й ми́рно прие́мше, проводи́ша в ра́йския оби́тели, иде́же живы́й, помяни́ на́с, о́тче преподо́бне, пою́щих: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Мертве́ц два́жды в жи́зни се́й бы́л еси́, свя́те, и пе́рвее у́бо возвраща́ющася вси́ ви́деша тя́ па́ки в плотски́х соста́вах, от ни́хже втори́цею разре́шся, ны́не живе́ши со Ангельскими чи́нми, иде́же и на́с не забу́ди, пою́щих: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Уме́ршаго мя́ злы́ми дея́нии оживотвори́ти потщи́ся, Влады́чице: на Тя́ бо упова́ние возложи́х несумне́нно, я́ко ро́ждшую Безсме́ртнаго Царя́, и ми́ру всему́ Животда́вца.

Пе́снь 8.

Ирмо́с: Небеса́ небе́с и вода́, я́же превы́ше небе́с, благослови́те, по́йте Го́спода и превозноси́те Его́ во ве́ки.

Припев: Преподобне отче Афанасие, моли Бога о нас.

Небеса́ ра́дуются, прие́мше ду́х тво́й в не́дра своя́, и мы́ весели́мся, кла́няющеся моще́м твои́м, преподо́бне, от ни́хже пода́ждь тре́бующим благода́ть и сподо́би пе́ти Го́спода во ве́ки.

Припев: Преподобне отче Афанасие, моли Бога о нас.

Ангели торжеству́ют, сожи́теля тя́ иму́ще, весели́тся и гора́ Пече́рская, содержа́щи ра́ку моще́й твои́х, а́ки би́сер многосве́тлый, си́м просвети́ на́с, мра́ком страсте́й одержи́мых, и да́ждь пе́ти Го́спода во ве́ки.

Сла́ва Отцу́ и Сы́ну и Свято́му Ду́ху:

Благоугоди́л еси́, о́тче, в жи́зни се́й Влады́це своему́ и прия́л еси́ да́р неду́ги исцеля́ти. На́с, страстьми́ одержи́мых, посети́, я́коже ля́двиями боля́ща Вави́лу, и сподо́би Го́спода пе́ти во ве́ки.

И ны́не и при́сно и во ве́ки веко́в. Ами́нь.

Богоро́дичен: В печа́ли и тузе́ е́смь, скве́рное мое́ житие́ помышля́я, и не и́мам наде́жды. К Тебе́ еди́ной прибега́ю, ра́дости всеми́рной, Чи́стая Де́во, и молю́, да ра́дость возсия́ет души́ мое́й во ве́ки.

Песнь 9

Ирмо́с: Сотвори́ держа́ву мы́шцею Свое́ю, низложи́ бо си́льныя со престо́л и вознесе́ смире́нныя Бо́г Изра́илев, в ни́хже посети́ на́с Восто́к с высоты́ и напра́вил ны́ е́сть на пу́ть ми́рен.

Припев: Преподобне отче Афанасие, моли Бога о нас.

Сотвори́ любо́вь моля́щимся тебе́, о́тче, и моли́твою твое́ю да́ждь цельбу́ стра́ждущим неду́ги душе́вными, па́че же ра́туемых вра́жиими наве́ты напра́ви на пу́ть ми́рен.

Припев: Преподобне отче Афанасие, моли Бога о нас.

Пое́т вели́кая Ла́вра труды́ и по́двиги твоя́, преподо́бне, сла́вит вы́ну пеще́ра, храня́щая чудотво́рныя мо́щи твоя́, и́мже и мы́ покланя́ющеся, мо́лим тя́: напра́ви стопы́ на́ша на пу́ть ми́рен.

Припев: Преподобне отче Афанасие, моли Бога о нас.

Воста́ни ско́ро и прииди́, а́з исцелю́ тя, — рцы́, Афана́сие преблаже́нне; се́ бо от мно́гия боле́зни душе́вныя вопию́ ти, не имы́й отра́ды, па́че же молю́: наста́ви мя́ на спасе́ния пу́ть ми́рен.

Сла́ва Отцу́ и Сы́ну и Свято́му Ду́ху:

Сла́влю Тя́, Тро́ице Пресвята́я, Отче Безнача́льне с Сы́ном Безле́тным, и пою́ Ду́ха Твоего́ Свята́го, Его́же да́ждь се́рдцу моему́ хода́тайством уго́дника Твоего́, да обря́щу пу́ть ми́рен.

И ны́не и при́сно и во ве́ки веко́в. Ами́нь.

Богоро́дичен: Аще кто́ не сла́вит чи́стаго зача́тия и не пое́т несказа́ннаго Рождества́ Твоего́, Мари́е Богоневе́сто, да отпаде́т ве́чныя сла́вы и не бу́дет соо́бщник све́та и сы́н присносу́щнаго ми́ра.

Свети́лен:

В преподо́бных ди́внаго Афана́сия пе́сньми, лю́дие, восхва́лим: то́й бо жи́в у́мре, и по двою́ дню́ воскре́се, и па́ки преста́вися, живе́т, не ктому́ сме́ртию облада́емь, но присносу́щную нача́ жи́знь, я́ко сы́н су́щи живота́, и воскресе́ния пра́ведных насле́дник.

Сла́ва, и ны́не, Богоро́дичен:

Ди́вны Твоя́ та́йны, Чи́стая, кто́ испове́сть? Или́ кто́ возвести́т на Тебе́ сбытие́ неизрече́нных? Родила́ бо еси́ в ле́то Сы́на, пре́жде ве́к от Отца́ рожде́нна, живота́ и воскресе́ния Пе́рвенца, моли́ у́бо Его́, да и а́з воскресе́ния бу́ду и живота́ насле́дник.

Молитва

О свяще́нная главо́, преподо́бне о́тче, преблаже́нне а́вво Афана́сие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.