14 декабря

Канон святому праведному Филарету Милостивому иной

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Авраа́му в ве́ре подража́я, / Иову же в терпе́нии после́дуя, / о́тче Филаре́те, / блага́я земли́ разделя́л еси́ неиму́щим, / и лише́ние си́х терпе́л еси́ му́жественне, / сего́ ра́ди све́тлым тя́ венце́м увенча́ Подвигополо́жник Христо́с Бо́г на́ш, / Его́же моли́ спасти́ся душа́м на́шим.

Кано́н второй, гла́с 2.

Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися.

Припев: Святый праведный Филарете, моли Бога о нас.

Филаре́та прииди́те, дне́сь па́мять да пра́зднуем, веселя́щеся све́тло и ли́к согла́сный составля́юще, того́ бо Христо́с Бо́г ди́вно просла́ви.

Припев: Святый праведный Филарете, моли Бога о нас.

Име́ние твое́, Филаре́те, Бо́гу взаи́м дава́л еси́, вре́менным ве́чная, му́дре, купу́я, те́мже и сугу́бое воздая́ние сподо́бился еси́ прия́ти, на земли́ че́стию и на небеси́ сла́вою венча́вся.

Сла́ва Отцу́ и Сы́ну и Свято́му Ду́ху:

Любве́ Христо́вы свети́льник и́стинный бы́в, ники́ими же ве́тры скорбе́й и искуше́ний угаси́мый, любо́вию Боже́ственною сердца́ ве́рных разже́гл еси́, во е́же зва́ти ти́: Филаре́те боголюбе́зне, ра́дуйся!

И ны́не и при́сно и во ве́ки веко́в. Ами́нь.

Богоро́дичен: Арха́нгельское целова́ние припева́юще, ра́дуйся, немо́лчно вопие́м Ти́, ра́дости бо вся́кия Ты́ еси́ вина́, Влады́чице, ми́ру Спасе́ние ро́ждши.

Пе́снь 3.

Ирмо́с: Лу́к сокруши́ся си́льных держа́вою Твое́ю, Христе́, и си́лою немощству́ющии препоя́сашася.

Припев: Святый праведный Филарете, моли Бога о нас.

Ру́це твои́ ни́щим и убо́гим, устне́ же на похвалу́ Творцу́ и Бо́гу отверза́л еси́, пра́ведниче, те́мже тебе́ Ра́йская врата́ ра́достию отверзо́шася.

Припев: Святый праведный Филарете, моли Бога о нас.

Егда́ обнища́л еси́ привре́менне, Филаре́те, Бо́гу любо́вь твою́ испыту́ющу, ника́коже уныва́я, упова́ние твое́ на Бо́га, Иже смиря́ет и возно́сит и богати́т, возлага́л еси́.

Сла́ва Отцу́ и Сы́ну и Свято́му Ду́ху:

Теку́щему бога́тству се́рдца твоего́ не прилага́л еси́, но в Бо́зе сие́ утвержда́л еси́, Филаре́те му́дре, добролю́бче и́стинный.

И ны́не и при́сно и во ве́ки веко́в. Ами́нь.

Богоро́дичен: Анна пра́ведная, весели́ся со Иоаки́мом све́тло, не по мно́зех бо дне́х вопи́ти и́маши ра́достно: се́ во мне́ насе́яся Дре́ва Живо́тнаго Ко́рень пресла́вный.

Седа́лен, гла́с 2:

Прииди́те, сотвори́м учрежде́ние ве́лие и пи́р че́стен приугото́вим, — к дома́шним твои́м глаго́лал еси́, Филаре́те, прише́ствие самаго́ Царя́ со слуги́ Его́ в до́м тво́й возвеща́я. Егда́ же прии́де вре́мя, изше́л еси́ во сре́тение зва́нным ни́щим и убо́гим Царя́-гра́да, чудя́щимся же все́м зря́щим сия́ вопия́л еси́: сия́ су́ть слуги́ Ца́рския, гряде́т же по си́х и Са́м Ца́рь. — Вои́стину у́бо Ца́рь царе́й Христо́с на ве́черю твою́ прии́де, Ему́же ны́не во све́те невече́рнем любо́вию слу́жиши, за Ве́черию Его́ со святы́ми возлежа́ и воспева́я пе́снь стра́шную, Серафи́мы трегу́бо песносло́вимую.

Пе́снь 4.

Ирмо́с: Услы́шах, Го́споди, сла́вное Твое́ смотре́ние и просла́вих, Человеколю́бче, непостижи́мую Твою́ си́лу.

Припев: Святый праведный Филарете, моли Бога о нас.

Сребро́ и зла́то и гри́вны ме́дяны лю́дем, прося́щим у тебе́, раздая́, коего́ждо потре́бу ду́хом прозира́л еси́, ми́лостиве, Вседержа́внаго Влады́ки Христа́ име́нием му́дре управля́я.

Припев: Святый праведный Филарете, моли Бога о нас.

Оте́ц си́рым и убо́гим показа́ся Филаре́т добролюби́вый и богому́дрый, и положи́ любо́вь держа́вну кре́пости свое́й.

Сла́ва Отцу́ и Сы́ну и Свято́му Ду́ху:

Любо́вию досажде́ния и укоре́ния снося́, бога́тства же по подо́бию Иовлеву лиши́вся: Госпо́дь Бо́г мо́й — си́ла моя́, и То́й учини́т но́зе мои́ на соверше́ние, — вопия́л еси́.

И ны́не и при́сно и во ве́ки веко́в. Ами́нь.

Богоро́дичен: На спасе́ние люде́й Твои́х исше́л еси́, Спа́се, от Де́вы предъизбра́нныя вопло́щся во́лею, Юже непреста́нно блажи́м.

Пе́снь 5

Ирмо́с: Угль Иса́ии проявле́йся, Со́лнце из де́вственныя утро́бы возсия́, во тьме́ заблу́ждшим, Богоразу́мия просвеще́ние да́руя.

Припев: Святый праведный Филарете, моли Бога о нас.

Царе́в ю́жик бы́в, Филаре́те, не превозне́слся еси́, Царя́ царе́й во о́бразе си́рых и убо́гих почита́я, любо́вию же я́ко цари́цею доброде́телей украша́яся.

Припев: Святый праведный Филарете, моли Бога о нас.

Ева́нгельски пожи́в, Филаре́те, стори́чный пло́д Тому́ прине́с, до́брая земля́ и ту́чная показа́лся еси́ Се́ятелю Безнача́льному.

Сла́ва Отцу́ и Сы́ну и Свято́му Ду́ху:

Образ ми́лости богоподо́бныя показа́л еси́ на́м, све́т тво́й пред челове́ки по сло́ву Госпо́дню просиява́я, ко прославле́нию же Отца́ Небе́снаго вся́ подвиза́я.

И ны́не и при́сно и во ве́ки веко́в. Ами́нь.

Богоро́дичен: Богоро́дицу и Ма́терь Емману́илеву, немо́лчными пе́сньми велича́юще, от Нея́ Рожде́ннаго ви́девше, возопие́м: с на́ми Бо́г!

Пе́снь 6.

Ирмо́с: Гла́с глаго́л моле́бных от боле́зненныя, Влады́ко, души́ услы́шав, от лю́тых мя́ изба́ви: Еди́н бо еси́ на́шего спасе́ния вино́вен.

Припев: Святый праведный Филарете, моли Бога о нас.

Ру́це твои́ дая́нии благи́ми освяти́л еси́ и се́рдце ми́лостию разже́гл еси́, ско́рби утоля́я и озло́бленныя утеша́я, ра́дость же печа́ли вме́сто принося́ все́м.

Припев: Святый праведный Филарете, моли Бога о нас.

Авраа́ма странноприи́мнаго подража́я, Тро́ицу Живонача́льную почти́л еси́, Филаре́те, не во о́бразе трие́х стра́нник Явля́емую, но во о́бразе мно́жества убо́гих от тебе́ усе́рдно Служи́му.

Сла́ва Отцу́ и Сы́ну и Свято́му Ду́ху:

Зла́я, я́коже блага́я, от руки́ Госпо́дни прие́мля, Иовлево терпе́ние показа́л еси́, скорбьми́ же и лише́ньми обурева́емь, Бо́га благослови́л еси́, благослове́ние все́х пра́ведных насле́дуя.

И ны́не и при́сно и во ве́ки веко́в. Ами́нь.

Богоро́дичен: Не и́мамы упова́ния, не́сть на́м наде́жды, а́ще не Ты́, Богоро́дице, засту́пиши ны́ и от бе́д изба́виши всеси́льным предста́тельством Твои́м, его́же Сы́н Тво́й держа́вный не пре́зрит.

Конда́к гла́с 3:

Истинно всеизря́дная твоя́ ку́пля зри́тся, / и му́дрою бы́ти су́дится / все́ми благому́дрствующими: / отда́л бо еси́ до́льняя и краковре́менная, / взыску́я го́рних и ве́чных, / те́мже и досто́йно стяжа́л еси́ / ве́чную сла́ву, ми́лостиве Филаре́те.

Икос:

Красна́ и любе́зна вся́ка доброде́тель Христа́ ра́ди стяжава́ема: че́стен по́ст и боголюбе́зно воздержа́ние, зе́млю насле́дует кро́тость и на небеса́ возво́дит смиренному́дрие, вся́кий гре́х побежда́ет покая́ние и богозре́ние да́руется чи́стым сердца́м. Оба́че ми́лость и любы́ над все́ми си́ми превозно́сится и на Стра́шнем Суди́щи Христо́вом от Судии́ Пра́веднаго пе́рвее от все́х истяжава́ется. От Него́ же в то́й де́нь ты услы́шиши, пра́ведниче: прииди́, благослове́нне, Отца́ Небе́снаго насле́дуй Ца́рство, от ве́ка угото́ванное и ве́чную сла́ву, ми́лостиве Филаре́те.

Пе́снь 7.

Ирмо́с: Вети́и яви́шася о́троцы любому́дрейшии дре́вле, от богоприя́тныя бо души́, богосло́вяще устна́ми, поя́ху: Пребоже́ственный отце́в и на́ш Бо́же, благослове́н еси́.

Припев: Святый праведный Филарете, моли Бога о нас.

Учрежде́ние ве́лие приугото́вив, Царя́ прихо́д и слу́г Его́ дома́шним твои́м возвести́л еси́, ни́щим же и убо́гим до́м тво́й испо́лнившим возопи́л еси́: се́ слуги́ Царе́вы, посреде́ же и́х прии́де ко мне́ неви́димо и Пребоже́ственный Ца́рь, благослове́нный Бо́г оте́ц на́ших.

Припев: Святый праведный Филарете, моли Бога о нас.

Юнии и ста́рцы, си́ры и вдови́цы ще́друю десни́цу твою́, Филаре́те, благословля́ху, о тебе́ благодаря́ще Христа́ Бо́га и уми́льно вопия́ху: Пребоже́ственный отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Прииди́те благослове́ннии Отца́ Моего́, насле́дуйте Ца́рство, я́ко алка́х и жа́ждах и боле́зновах и послужи́сте Ми́, — возопие́т Судия́ Христо́с ко ми́лостивым на Стра́шнем суди́щи Свое́м; ты́ же тогда́, о́тче, неизрече́нно возвесели́шися.

И ны́не и при́сно и во ве́ки веко́в. Ами́нь.

Богоро́дичен: Агнца Бо́жия грехи́ ми́ра подъе́мшаго и кро́вию Свое́ю христиа́ны омы́вшаго, моли́ Деви́це Богоро́дице, грехи́ на́ша отъя́ти, се́ бо сокруше́нным се́рдцем и́щем лица́ Его́, Благослове́ннаго от всея́ тва́ри.

Пе́снь 8.

Ирмо́с: О подо́бии зла́те небре́гше треблаже́ннии ю́ноши, неизме́нный и живы́й Бо́жий о́браз ви́девше, среди́ огня́ воспева́ху: осуществова́нная да пое́т Го́спода вся́ тва́рь и превозно́сит во вся́ ве́ки.

Припев: Святый праведный Филарете, моли Бога о нас.

Милосе́рднаго самаряни́на подража́я, не мимои́ди мя́ в разбо́йники впа́дшаго грехи́ мно́гими, Филаре́те, оба́че еле́й моли́тв твои́х на ду́шу мою́ лю́те уя́звленную возле́й, ми́лостиве, я́ко да исцеле́в благода́рне Бо́гу воззову́: да пое́т Го́спода, ди́внаго во святы́х Свои́х, вся́ческая тва́рь.

Припев: Святый праведный Филарете, моли Бога о нас.

Явля́ешися на́м му́дрый сокро́вищ собира́тель и́хже тля́ не тли́т и ржа́ не снеда́ет, и́хже и в небе́сных храни́лищех соблюда́еши, те́мже и се́рдце твое́ та́мо пребыва́ет, уста́ же Го́спода, сы́тости не зна́ющи, воспева́ют во ве́ки.

Сла́ва Отцу́ и Сы́ну и Свято́му Ду́ху:

Тельца́ злата́го дре́вле безу́мнии почита́вшии осужда́ются, и те́лу злато́му от царя́ в Вавило́не поста́вленному, прему́дрии о́троцы не поклони́вшиися ублажа́ются, ты́ же, Филаре́те, вторы́я, а не пе́рвыя подража́л еси́, истука́н бога́тства сокруша́я ра́достне и воспева́я: да пое́т Го́спода вся́кая тва́рь во ве́ки.

И ны́не и при́сно и во ве́ки веко́в. Ами́нь.

Богоро́дичен: Херуви́ми Ти́ кла́няются со стра́хом, Богоро́дице, и Серафи́ми Тя́ воспева́ют непреста́нно, вои́стину бо Небе́сный Ца́рь добро́ты Твоея́ возжела́, Ма́терию Свое́ю Тебе́ наре́к, сего́ ра́ди лю́дие испове́дятся Тебе́ во ве́ки и в ве́к ве́ка.

Песнь 9

Ирмо́с: Ве́сь еси́ жела́ние, ве́сь сла́дость, Сло́ве Бо́жий, Де́вы Сы́не, Бо́же бого́в, Го́споди, святы́х Пресвяты́й, те́м Тя́ вси́ с Ро́ждшею велича́ем.

Припев: Святый праведный Филарете, моли Бога о нас.

Ве́рою бога́тство истощи́в, вся́ от Бо́га па́ки прия́л еси́, ве́рою убо́гия прие́мля и учрежда́я, Самаго́ Бо́га приима́л еси́, ве́рою пожи́л еси́ и ве́рою пресели́лся еси́ во оби́тели ве́чныя, иде́же Бо́га со пра́ведных ли́ки велича́еши.

Припев: Святый праведный Филарете, моли Бога о нас.

Авраа́мов подража́телю и Тро́ицы Безнача́льныя учреди́телю, Влады́чний слуго́ и дру́же преи́скреннейший, ми́ловал еси́ вся́ку тва́рь, ми́лость Бо́жию те́м к себе́ преклоня́я, те́мже ми́лостию твое́ю и на́с посети́, вседу́шно тя́ велича́ющих.

Сла́ва Отцу́ и Сы́ну и Свято́му Ду́ху:

Любо́вию твое́ю возсия́ на́м, Филаре́те, я́ко со́лнце просия́вый в пра́ведней кончи́не твое́й, я́ко да све́тло о тебе́ веселя́щеся, Бо́га во святы́х Свои́х Ди́внаго велича́ем.

И ны́не и при́сно и во ве́ки веко́в. Ами́нь.

Богоро́дичен: Юнии и ста́рцы, бога́тии и убо́зии, мона́си и мирсти́и, пра́ведницы и гре́шницы ка́ющиися, прииди́те припаде́м к Бо́жией Ма́тери, вопию́ще к Не́й: под кро́вом Твои́м соблюда́й на́с при́сно, Влады́чице, Тя́ велича́ющих.

Свети́лен.

Со́лнцу спросия́вый доброде́ланием, добролю́бче и́стинный, Со́лнце Пра́вды ны́не я́вственно зри́ши, Его́же моли́ непреста́нно, ми́лостиве, от бе́д изба́вити на́с.

Молитва святому праведному Филарету Милостивому

О, предивне избранниче Божий, Филарете Милостивый! Амнии прещедрый хлебодателю, Православия светильниче, Господа Бога рабе благий и верный! Ты бо всем сердцем евангельски Христу последовавый и данный тебе талант премудре умноживый: сирых и убогих одеявый и напитавый; странных и нищих в дом свой введый, в скорбех и печалех сущих утешивый, умерших и на стогнах поверженных гробу предавый; всем всячески послуживый, и тако веру свою в делах показал еси. Ей, святый угодниче Божий, не npезри нас, печальми житейскими изнываемых и страстми греховными обуреваемых. Во вся дни уныние и малодушие колеблют нашу веру, жестокосердие и озлобление снедают сердца наша и охлаждают любовь нашу; честолюбие же и нетерпение растлевают души наша, и тако, аки нищии, в делах благих обнщахом. Ты же, Отче праведный, милосердствуя о нас, умоли Христа Бога, да обогатит сердца наша Духом Своим Святым, исцелит душевныя и телесныя недуги наша, и, аки ниву жаждущую, напоит нас щедротами человеколюбия Своего; да вере, долготерпению и милосердию твоему подражающе, во благочестии и чистоте поживем вся дни живота нашего. Еще молим тя, преблаженне, егда приспеет жития нашего отшествие, к покаянию нелицемерному нас подвигни, да Христу Спасителю нашему чрез святыя Его Таинства приобщимся и наследники Царствия Небеснаго будем, идеже в радости святых и Ангелов сподобимся и мы покланятися и воспевати Трисвятое Имя: Отца, и Сына, и Святаго Духа, во веки веков. Аминь!